UMOZHIGO 24

Adalụ Biyikwo Azik Tizha

1Ga Abraham shɛ iyɛri, bɛ injɛ duwa na aka ga, AGWANGWAMA kaa peni bu uwebiye na amɛ iyi elele kpaaŋ. 2Ga Abraham hiɛŋ yɛu ibwɛ ugondu i'wɛtwɛ, na kaa 'yajɛ ụhwada iyi ibwɛ ye elele ni ihwɛ ibwɛ, Ma bụ lụpa maa shiyeni u'ala bụ tuta ti i'unte#24:2 maa shiyeni u'ala bụ tuta ti i'unte: Ecilo u'ala tishiyono tuta ti i'unte i shɛ uhwaŋna uko na atwa oko a ta-tuwa aa zha shɛ kaa e sheyingo ya kwukwuŋ. mi. 3Iwɛ maa n teji AGWANGWAMA na shɛ Agwatana azuba keeni cɛnjɛ tu unyizo, maa bi zha shɛ ba zananga yɛu mi biyikwo na ashashɛ miaụŋ-mo-o me Ekenan ga Ngaa jɛjɛ na ashashɛ aba o. 4Ama zhaga na cɛnjɛ ti mi, no ofwo udenji mu, iwɛ maa zɛnɛnjɛ yɛu mi ga Azik biyikwo.

5Ibɛ yɛu ɛtɛ ibwɛ ugondu hiɛŋ bụ, Yaa shɛ biyikwo ata tuba leni shi maa ma n 'wa na cɛnjɛ tu ga, asha i shɛ suu i tilɛɛ maa mo gwuricingo yɛu bụ na cɛnjɛ ta ata abu banɛ la?

6Ga Abraham hiɛŋ bụ, Ta kara maa gwuricinji yɛu mi apata o. 7AGWANGWAMA na shɛ Agwatana azuba, na m bɛcinjɛ ni ihwɛ bishi mi keeni na cɛnjɛ tu na ee m meci, ubwa kaa m mbishi iwɛ, bee n shileni-unu ụ'wụtụ, bɛɛ hiɛŋ, N zhɛ ma pana ajalalo bu cɛnjɛ tu ga. Ubwa kaa zhɛ ba tumwanɛ butumwa bwa ba azuba maa mo bu hwulono umbe, iwɛ maa zɛnɛnjɛ yɛu mi biyikwo apata. 8Yaa shɛ biyikwo ata leni shi maa ma bụ 'wa, aka ata asha bu benengeni tijama ta-tuwa tu ga obu to, ama tuba to gwuricingo yɛu mi apata o. 9Nazhɛ yɛu ɛtɛ ugondu shiyeni ga u'ala ubwa tuta ti i'unte Abraham, agwuma-ihwɛ ibwɛ, boo to-tuwa ti iwɛ ɛtɛ.

10Nazhɛ yɛu ɛtɛ ugondu suji nruhondo ma agwuma-ihwɛ ibwɛ umpwa, bee hwuri. I'wɛŋnɛ ibiye ya agwuma-ihwɛ ibwɛ kaa zweni ni i'ɛlɛ ibwɛ, bɛɛ ishijɛ, baa sanɛ Mɛsopotemia, na shɛ ụshɛpwụ Naho. 11Aka na bee ci apata, baa njɛ maa nruhondo mu wotogo to dongonu u'ibwa meni na namɛ no tupohondo tụ ụshɛpwụ ata. Geri bu uwaŋna ụrụmɛ kaa yaa shɛ, ibɛ shɛ aka na eyikwo a zha aa ciga meni nu u'ibwa ata.

12Baa njɛ adua, bɛɛ hiɛŋ, Oo AGWANGWAMA na shɛ Agwatana agwuma-ihwɛ mi ga Abraham, ma bu tabwa maa n tɛjɛ uhwaŋna nu uwebiye bu hwayɛ ga, maa mepeni agwuma-ihwɛ mi ga Abraham iwɛ. 13Hioko, Gamba na n shikeni nu umɛzhinjɛ ga, miaụŋ-mo-o mụ ụshɛpwụ ga na kaa mu banɛ maa mɛ cɛjɛ meni. 14Lono maa yɛu towo nɛ Ngɛɛ zhɛ mɛ hiɛŋ hwayɛ, Sukwu, shishijɛ ka ihiulwe bu maa m peni meni ma swa. Gɛ mɛ hiɛŋ, Swa, maa ma pana du nruhondo mụ bụ maa mu swe. Asha ga shɛ ubwa ebi teleji yɛu-ugondu bu, ga Azik. Tedure ni inɛ gɛ Ngɛɛ zhɛ ma mapa maa bi mepeni agwuma-ihwɛ mi iwɛ.

Ge Rebeka Zhe Uwapa

15Bu ta kwunanjɛ shɛ okwo adua ubwa tɛnda o, ti ge Rebeka yɛu Bɛtuɛl, nɛ ge Milka metenji Naho yɛu buhongwu Abraham pushe, baa patanɛ ihiulwe ibwɛ nu ututu. 16Yɛu ɛtɛ towo kaa pilanụ tebiye, bu ta shɛ kaa usapa, i ta zasa butubwenyi be elele mwopwo bu o. Bee zhe nu umɛzhinjɛ ata, bɛɛ cijɛ meni ni ihiulwe ibwɛ bee munje.

17Ibɛ yɛu ɛtɛ ugondu gezhiji bee teji bu uhwaŋna, bɛɛ hiɛŋ bụ, Okwu, m peni ka meni mi ihiulwe gɛ bu dice maa ma swa.

18Yɛu ɛtɛ towo hiɛŋ bụ, Iyɛri mi, N zhɛ ma bụ pana maa swe. Bɛɛ shishijɛ ga ihiulwe ibwɛ kakayɛ baa 'waŋnɛ iŋ ni i'ɛlɛ ibwɛ, bee peni bu meni bee swe.

19Aka na ti bee peni bu meni bee swe hwɛɛ, bɛɛ hiɛŋ, N zhɛ du mɛ piɛ nruhondo mụ bụ meni maa mu swe te gembi aŋ. 20Baa njɛ ga izɛlɛgwu bee zweni meni mi ihiulwe ibwɛ ni ijɛ ɛtɛ oo zwonono iyimabiga meni, bee gwuri nu umɛzhinjɛ maa cigananɛ meni, bɛɛ cijɛ iwɛ nruhondo ma ata kpaaŋ. 21Ibɛ bụtụ ata ngbaracɛ bụ zhiiŋ, bee shikeni saiiŋ maa eshicigo okwo AGWANGWAMA zhɛ o lono maa tahaŋnụ tu bwa ti zhɛmanɛ bụ kwo kaa bi zha shɛ bo lono.

22Aka na tu nruhondo ma ata mu hwuwi meni tuswa hwɛɛ, nazhɛ bụtụ ata shapɛ bukanɛ ba azhɛnarɛya bee hwuŋteni Rebeka ni inyɛnu keeni shi'umwo shi i'ɛlɛ sha azhɛnarɛya, baa shanɛ Rebeka ni i'ɛlɛ ibwɛ. 23Bɛɛ hiɛŋ Rebeka, Sukwu, m mbishi yɛu bụtụ na abɛ shɛ. Ohwolu namba ni ihwɛ bishi bu maa to woto hŋ nụ ụrụmɛ go?

24Ge Rebeka jishijɛ bụ, bɛɛ hiɛŋ, N shɛ yɛu Bɛtuɛl ata ge Milka metenji Naho. 25Baa hiaaŋnanɛ bụ, Ti 'yajɛ ta ambɛ tiya a na gembi aŋ, to ohwolu tuzokwu namba ni ihwɛ tu du.

26Nazhɛ bụtụ ata kwuzhi baa zhɛbɛ AGWANGWAMA. 27Bɛɛ hiɛŋ, Ga ashɛtwa shɛ a na AGWANGWAMA na shɛ Agwatana agwuma-ihwɛ mi ga Abraham, na peshinji shi agwuma-ihwɛ mi tulubo tu bwa ti biye keeni tɛcara tu bwa. AGWANGWAMA n zɛrijɛ ni ihwɛ miaụŋ-mo-bino ma agwuma-ihwɛ mi.

28Nazhɛ yɛu ɛtɛ yo o gezhiji maa mbishe atwa ihwɛ bino bwa ijɛ kpaaŋ. 29Ge Rebeka kaa 'yajɛ ikwenyi ike nɛ ɛɛ hiɛŋ izeci ibwɛ ga Laban. Ga Laban gezhiji bee teji bụtụ ata uhwaŋna no ofwo umɛzhinjɛ ata. 30Aka na tu baa kwụbɛ bukanɛ bi inyɛnu keeni shi'umwo shɛ na bụngwụfuụ bwa shanɛ ni i'ɛlɛ, baa hwụjɛ kaa iwɛ nɛ bụngwụfwụ bwa ge Rebeka jɛmɛ, maa bwonu bụtụ ata mbishi bu, bee zhe pa bụtụ ata. Ti bee te shikeni no ofwo nruhondo nu unu umɛzhinjɛ ata. 31Ga Laban hiɛŋ bụ, Teni gabụ na AGWANGWAMA peni-uwebiye, iwembe po ebi shikeni no tupohondoo? Iwɛnɛ po N imwangwa umwono bu buweci keeni ohwolu iwɛ nruhondo mụ bụ.

32Nazhɛ bụtụ ata teni nu umwono, ga Laban tufwurinji i'wɛŋnɛ nruhondo, bee peni bụtụ ata ambɛ tiya iwɛ nruhondo keeni meni maa fwata ɛvwɛvwɛjɛ ubwa. 33Ee sheni bu iyimɛyɛ maa ya, ama bi hiɛŋ, N ta zha shɛ ma ya iyimɛyɛ o, semi aka na Ngee hi mbishi ulapiya tahaŋnụ ti mi.

Ga Laban hiɛŋ bụ, Asha duma.

Yɛu-ugondu Abraham Jɛmɛ Ulapiya Tahaŋnụ tu Bwa

34Nazhɛ bụtụ ata jɛmɛ, bɛɛ hiɛŋ, Yɛu-ugondu Abraham Ngaa shɛ. 35AGWANGWAMA kaa peni agwuma-ihwɛ mi uwebiye duwa, baa shɛ bɛzhɛgba, na ajama eyi keeni ajama o o, nu nruhondo keeni nzhinyacɛ. 36Ga Sara biyikwo ba agwuma-ihwɛ mi metenji bu yɛu-ye-eyi na tudawuŋ tu bwa. Ibɛ po bee peni yɛu ɛtɛ iyi elele nɛ baa 'yajɛ kpaaŋ. 37Nazhɛ agwuma-ihwɛ mi leni maa mo shilo-unu maa, Bu zha shɛ bɛ zɛnɛnjɛ yɛu mi biyikwo na ashashɛ miaụŋ-mo-o me Ekenan ga Ngaa jɛjɛ na cɛnjɛ ta aba o. 38Ama zhaga ni ihwɛ bishi mi no ofwo udenji mu, maa zɛnɛnjɛ yɛu mi biyikwo apata.

39Ngɛɛ hiɛŋ agwuma-ihwɛ mi, Nekeshi biyikwo ata zha shɛ bo lono maa ma n 'wa epe o.

40Bɛɛ n hiɛŋ, AGWANGWAMA na Ama hwuga-unu ubwa aka elele, zhɛ a tumwanɛ butumwa bwa ba azuba nu umbe bu. Ubwa kaa zhɛ ba nda maa tahaŋnụ tụ bụ tụ bụ zhɛmanɛ, iwɛ maa zɛnɛnjɛ yɛu mi biyikwo nu udenji ihwɛ bishi mi. 41Iyi nɛ zhɛ ya nda maa benengeni tijama tu unu na ebi shiri i shɛ aka na te ebi zhe no ofwo udenji mu, ee bi peni shi, nazhɛ ɛbi zhɛ ba banangana tuwa tu ga ebi n teji.

42Ngaa zhajɛ hwayɛ ga no ofwo umɛzhinjɛ meni ata, Ngaa njɛ adua Ngɛɛ hiɛŋ, Oo AGWANGWAMA na shɛ Agwatana agwuma-ihwɛ mi ga Abraham, yaa shɛ ɛbi zhɛ bo lono maa tahaŋnụ ti mi ti n zhɛmanɛ. 43Asha Gamba na n shikeni nu unu umɛzhinjɛ ga, lono maa yɛu towo ye elele nɛ mɛmɛ imɛ i banɛ maa ciga meni, nɛ Ngɛɛ zhɛ mɛ hiɛŋ bụ, Sukwu m piɛ meni ni ihiulwe bu maa ma swa dice. 44Gɛ mɛ n hiɛŋ, M ma swa, iwɛ maa du mɛ piɛ nruhondo mụ bụ. Ga shɛ ubwa shɛ biyikwo na AGWANGWAMA teri iwɛ yɛu ya agwuma-ihwɛ mi.

45N te hwuwi shi kaa okwo adua ata tɛnda na amɛ mi kpaaŋ o, ti ge Rebeka pushe, ni ihiulwe ibwɛ nu ututu. Bee zwi nu umɛzhinjɛ ata bɛɛ cijɛ meni. Ngɛɛ hiɛŋ bụ, Ma bu tabwa maa m peni meni mụ bụ ma swa.

46Bɛɛ pɛshinjɛ ihiulwe ibwɛ nu ututu kakayɛ, bɛɛ hiɛŋ, M ma swa, maa ma pana du nruhondo mụ bụ maa mu swe. Ngee swe ga, bee peni du nruhondo, mee swe.

47Ngee heŋteni bu, Ngɛɛ hiɛŋ, Yɛu aba kwuuŋ abɛ shɛɛ?

Bɛɛ n jishijɛ, bɛɛ hiɛŋ, Yɛu Bɛtuɛl ata shɛ yɛu Naho nɛ ge Milka metenji bu. Nazhɛ Ngee hwuŋteni bu bukanɛ ata ni inyɛnu, Ngee zweni bu du shi'umwo ni i'ɛlɛ ibwɛ. 48Ngoo to bizhiri, Ngaa zhɛbɛ AGWANGWAMA, Ngoo zhemonjino du AGWANGWAMA na shɛ Agwatana agwuma-ihwɛ mi ga Abraham, na kaa n zɛrijɛ mbwụụ nu umwamwa wa agwuma-ihwɛ mi maa mɛ zɛnɛnjɛ yɛu ibwɛ biyikwo epe. 49Hwuwayɛ go, yaa shɛ ɛhi zhɛ hia ndana agwuma-ihwɛ mi uwebiye keeni iyi tɛkana, asha m mbishi ma, yaa shɛ shɛ kaa gana ata, m mbishi ma, maa ma mapa iyi nɛ shɛ maa ma nda.

Ge Rebeka Zhagajɛ ni Yɛu-ugondu Abraham

50Nazhɛ ga Laban keeni Bɛtuɛl jishijɛ bụ, ɛɛ hiɛŋ, Ecilo ijɛ banɛ no olugwo AGWANGWAMA, ti eri shi to bu mbiso inɛ iwɛ kwo kaa inɛ ibiye o. 51Hioko, ge Rebeka ta ibi shileni shapa bụ maa hwuri, maa sha biyikwo bi yɛu ya agwuma-ihwɛ bu, nu gana na ta AGWANGWAMA dumwa.

52Aka na ti yɛu-ugondu Abraham hwụjɛ n-ndumwa ma aba, bee ubi ụpɛshɛka ubwa na cɛnjɛ baa zhɛbɛ AGWANGWAMA. 53Nazhɛ yɛu ɛtɛ ugondu bwɛ i'wɛŋnɛ tisemberi, ya azụrụfa, na azhɛnarɛya keeni tugwuno bee peni Rebeka, bee penenji du ikwenyi ibwɛ keeni bino bwa iyi nɛ zhanganjɛ. 54Nazhɛ aa yɛ iyimɛyɛ ee swe meni, tu bwa, ta atwa na namɛ nu bwa, oo zokwu apata uuwa iyi heri. Nazhɛ ɛɛ ishijɛ nu uvwungwa, bɛɛ hiɛŋ aŋ, Lono ma maa mo hwulo ya pa agwuma-ihwɛ mi.

55Ikwenyi Rebeka, no bino bwa hiɛŋ bụ, Lono maa yɛu gɛ towo gɛga tugwo no tu dice, i ci okwo ijitɛ umpwa, nazhɛ u hwulo.

56Ama yɛu ɛtɛ ugondu mbishi aŋ bɛɛ hiɛŋ, Ta ma nda ma ya ukwurishi o, gana na ta AGWANGWAMA lwonuo maa tahaŋnụ ti mi tu n zhɛmanɛ, lono ma maa mo jiyo ya pa agwuma-ihwɛ mi.

57Ɛɛ hiɛŋ, Tu suyanɛ ma tugwo yɛu ɛtɛ towo maa tu hwụjɛ ma unu ubwa. 58Aa suyanɛ ga Rebeka, ee heŋteni bu, ɛɛ hiɛŋ, Bi zhɛ suu ba zhagaga na bụtụ ga?

Bɛɛ jishijɛ aŋ, bɛɛ hiɛŋ, Iiŋ, N zhɛ.

59Ee genji Rebeka bụngwụfwụ aba, ti yɛu biyikwo nɛ zhɛ no mbiyono bu, ti yɛu-ugondu Abraham keeni atwa ubwa, ee hwuri. 60Ee peni Rebeka uwebiye, ɛɛ hiɛŋ bụ, A-bụngwụfwụ tu, ga ajalalo bu shɛ igbɛɛ igbɛɛ, ga ajalalo bu lasatagwụ atwa i'ime ya aba.

61Ge Rebeka ishijɛ, to showo shɛ bwa, aa patanganɛ nruhondo, aa 'wa bụtụ ata. Gabata yɛu ɛtɛ ugondu shepi Rebeka ee hwuri hwɛɛ aba.

Ga Azik Zeni Rebeka

62Gunu na ti ga Azik jiye, tu baa banɛ nu u'ibwa meni Lahai-roi.#24:62 Lahai-roi: Kwụba ti'eshicigono tu 16:14. Iwɛnɛ po bɛ jɛjɛ na cɛnjɛ tụ ụzalụ tuta ti Kenan. 63Ga Azik mbo mehieŋ, bee zhe ne ehilo nụ ụrụmɛ maa nda ahaŋsa, bee shepi eshe baa kwụbɛ tu nruhondo me ci. 64Ge Rebeka shepi eshe baa kwụbɛ Azik, baa pashɛngwa na aba irihende. 65Iwɛnɛ po bu go hoŋtwonuo yɛu ɛtɛ ugondu, bɛɛ hiɛŋ bụ, Gaaba ta kwuuŋ bo rungo ne ehilo ga iti tɛjɛ uhwaŋnaa?

Yɛu ɛtɛ ugondu hiɛŋ bụ, agwuma ga ihwɛ mi ta. Ibɛ po ge Rebeka urigeni ụpɛshɛka ubwa owowo.

66Nazhɛ yɛu ɛtɛ swegeni Azik iyi elele nɛ bɛɛ njɛ. 67Ga Azik zeriji Rebeka nu udulo tugwuno bino bwa ga Sara, bee shepi Rebeka baa njɛ bụ biyikwo bwa. Ga Azik kaa bo lubo Rebeka. Gabata amɛ Azik lemi na aba tu'wo te bino bwa.

Currently Selected:

UMOZHIGO 24: RBT

Highlight

Copy