UGONDU WA ATUMWA 6

Tutala ta Atwa Ecenje

1Aka na tu ufwugwo we eseshi-iyi wa kaana ugombo, ibɛ po Eju na a duma Rigrik o ngwulongongono Ehibru, iwɛnɛ te e jineci olulo aba ni iyi nɛ ga shɛ maa a na ndana aŋ iyi-heri iyi-heri. 2Ibɛ po atumwa ata umpwa-na-ba-eyebi suyanɛ atɛtanɛ-rishe kpaaŋ, ɛɛ hiɛŋ aŋ, I zhɛshɛ maa ta ganga n-ndumwa ma Agwatana tu'ananga maa tu no hwoŋso iyimɛyɛ o.#6:2 maa tu no hwoŋso iyimɛyɛ o: Kwo kaa maa ta untangana ukwuribi o. 3Iwɛbɛ po ahiɛba miaụŋ-mo-bino tu na amɛ Krast, yalaga ma atwa ecenje na ashashɛ hŋ, anaa na shihaŋsa sha aba shɛ zhɛmɛ, a na kaa Mpiala mi Tijilo mi shini na shɛmɛ sha aba keeni ti'inta, maa to utogono aŋ ugondu ata. 4Ama ti zhɛ tuba tu mama pana na adua tɛnda, tu na ta tuhwulo nu n-ndumwa ma Agwatana tu'ananga tutu.

5Ahaŋsa ata kaa atumwa shileni ufwugwo wa atwa ata kwụlanɛ aŋ hwɛɛ aba, ibɛ po ee teri Stivin, na rishe-tɛtɛtana ri shini amɛ ubwa keeni Mpiala mi Tijilo, ne Filip, no Prokoros, na Naikano, na Taimon, na Pamɛnas, ne Nikolaos, na shɛ Biju na banɛ na Antiok. 6Ee suje atwa ata, ee shikicinji aŋ na agba atumwa, nazhɛ atumwa njɛ adua, ee petengeni aŋ i'ɛlɛ ya aba.

7Nazhɛ n-ndumwa ma Agwatana ma kaana tumburusonu, ibɛ po ufwugwo we eseshi-iyi wa kaana ugombo nu Jɛrusalɛm. Onongbo ofwugwo ụ'wụtụ leni iwɛ rishe-tɛtɛtana.

A 'Imɛ Stivin

8Gana na to tulubo-ti-biye keeni ukpahiŋ shini amɛ Stivin, baa njɛ iyi ya arụhwajɛ keeni iyi tudama na ashashɛ atwa ata. 9Ama atwa oko umwono tu'ụlwatagwụ (na ɛɛ hiɛŋ umwono tu'ụlwatagwụ wa atwa na ɛɛ jwɛ na tijama)#6:9 atwa na ɛɛ jwɛ na tijama: Aba shɛ Eju a na shɛ la ajama aka oko, a na ɛɛ lɛshijɛ maa a mama 'yaga sasana. keeni atwa Sareni, na atwa Alɛkizandiria, na atwa na banɛ ni Silikia keeni atwa Esia, kepengeni Stivin na ashamanjɛ. 10Ama a twa sụ kaa iwɛ ti'inta keeni Mpiala mu na ge Stivin ba duma iwɛ o.

11Ibɛ po aa njɛ atwa oko ụgwụ, ee mbisegeni aŋ maa ga a jɛmɛ maa, Tụ hwụjɛ ta bụtụ ga ba dumangana Moses keeni Agwatana n-ndumwa mụ wɛ.#1 Shɛgwu 21:10

12Ibɛ po ee vwunji shihaŋsa sha atwa ata keeni n-nyarɛ, keeni embisegeni Undwa, nazhɛ aa zhajɛ aa 'imɛ Stivin, ee shepi bu no ofwo atwa-ụshɛrɛya. 13Ee shikicinji eseyida tukata a na hiɛŋ, Bụtụ ga genji shi n-ndumwa mụ wɛ tudumangana ofwo ga tijilo keeni Undwa Moses o. 14Tụ hwụjɛ tu baa jɛmɛ maa, ge Jisus bụtụ ata bu Nazarɛt zhɛ bo hwuŋzo Umwono ga wa Agwatana, maa sheyingo ihɛli nɛ go Moses iti peni la.

15Aka na ta atwa elele na jɛjɛ na atwa ata ụshɛrɛya, ngbaracɛ eshe Stivin, aa shɛ gana eshe butumwa-ba-azuba.

Currently Selected:

UGONDU WA ATUMWA 6: RBT

Highlight

Copy