UGONDU WA ATUMWA 4

E Shepi Pita na Jon Pa Atwa-ụshɛrɛya

1Aka na tu ga Pita na Jon ta duma n-ndumwa na atwa ata, ibɛ onongbo,#4:1 onongbo: Tɛjɛshɛrɛga tu ko ti hiɛŋ ehiu onongbo. ne ehiu angbaracɛ Umwono wa Agwatana, keeni Asadusi zhajɛ. 2Yaa gwumanɛ aŋ, iwɛnɛ ta atumwa ata o mbisogono atwa ata iyi, aa anangana aŋ du iwɛ tihiɛ ta atwa na 'wi ni izeci Jisus. 3Ibɛ po aa 'imɛ aŋ ee zweni nu umwono-tishi uuwa iyi heri, iwɛnɛ tụ ụjita shiwo cebe na aka ata. 4Ama atwa ofwugwo a na hwụjɛ iwɛ ɛtɛ, tɛtanɛ-rishe, ibɛ po ufwugwo we etwenyi ata keeni ugombo, aa shɛ ya gana atwa igbɛɛ-iyebi-na-akpakwụ-a-ta.

5Aka na ti iyi heri, ehiu aba, nu n-nyarɛ ma aba keeni embisegeni Undwa ụlwatagwụ nu Jɛrusalɛm. 6Ga Anas na shɛ Bunongbo bụ 'wụtụ namba, na Kayafas, na Jon, na Alɛkizanda, keeni atwa elele na shɛ atwa umwamwa Bunongbo ata bụ 'wụtụ. 7Aka na te e shikicinji Pita na Jon na agba aba, ee kwuni aŋ iheŋtene, ɛɛ hiɛŋ, Nu ukpahiŋ imbe kwuuŋ, kwo kaa ni izeci aba ahiɛ njɛ ijɛɛ?

8Nazhɛ ga Pita na Mpiala mi Tijilo mi shini amɛ ubwa, jishijɛ aŋ, bɛɛ hiɛŋ, Ahiɛba ehiu atwa ga, keeni n-nyarɛ, 9yaa shɛ ehi mo tu hoŋtono hwayɛ ga iwɛ ugondu ubiye na aa ndanɛ bụtụ ga shɛ la ugwurukwu, gana na ta a nɛnjɛ bụ, 10asha mapa ma inɛ gɛ keeni atwa Isrɛl kpaaŋ, maa ni izeci Jisus Krast, bụtụ ata bu Nazarɛt, na ehi to la nu ubatanɛ, na Agwatana hicinjɛ no tu'wo. Tedure ni izeci ibwɛ, ibɛ bụtụ ga shikeni epe ne eshe hiŋ lapiya. 11Ge Jisus ata ubwa Iwɛ ya Agwatana dumwa la iwɛ ubwa, yɛɛ hiɛŋ,

Utayɛ na omo-tuma jineci, ubwa shɛ ya utayɛ ụ tandụ

na ngezeni a na vwɛ hwɛɛ.#Shɛzu 118:22

12I zasa binya bụtụ be elele na eri bo bicingo bụtụ o, i zasa kaa izeci inyɛ elele nɛ namba nu unyizo ga ee peni atwa maa e ti bicinji tedure ni ibɛ o.

13Aka na ta a kwụbɛ eshe-hwoo Pita na Jon, ee eshiciji maa e ge mepi shi iyi o, atwa tukwakwa aa ga shɛ, ibɛ po yaa dama aŋ. Nazhɛ ee teyinje ya maa a namɛ la ne Jisus. 14Ama gana na ta atwa ata kwụbɛ ta bụtụ ata aa nɛnjɛ shikeni na Pita keeni Jon, e eri shi a dumana ya iwɛ ye elele nɛ zhɛ ya tala ya ashamanjɛ ibɛ o. 15Aka na te e peni Pita na Jon unu maa ge beni tugwo na agba atwa-ụshɛrɛya, nazhɛ aa njɛ ushaura abaaba, ɛɛ hiɛŋ, 16Imbe ɛti zhɛ ta nda atwa gaa? Iwɛnɛ po atwa elele na namɛ nu Jɛrusalɛm mepi maa atwa ga njɛ iyi tudama i'wɛtwɛ, ti eri shi kaa ta tala ashamanjɛ ibɛ o. 17Ama mizha tɛ tɛtaganɛ aŋ ma unu, iwɛ maa kede i keeni ya tumburusono na ashashɛ atwa tu o. Ti hiɛŋ aŋ ma maa, Te kwuni na aka ga, ta duma ma ya iwɛ na bụtụ be elele ni izeci ɛtɛ Jisus kwukwuŋ o.

18Nazhɛ aa suyananɛ aŋ, aa tɛtaganɛ aŋ unu tebiye, maa kede a jɛmɛ ya iwɛ, kwo kaa e mbisegeni ya bụtụ be elele iyi ni izeci Jisus kwukwuŋ o.

19Ama ga Pita na Jon jishijɛ aŋ, ɛɛ hiɛŋ, I teni suu cɛŋ ne eshe Agwatana maa ta hwuga-unu iyi nɛ ahiɛ jɛmɛ uhwuri una wa Agwatana? Haŋsa iŋ ma ni ikɛnyi hiŋ. 20Iwɛnɛ po ti eri shi ta ganga iyi nɛ atụ kwụbɛ keeni iyi nɛ atụ hwụjɛ tụdụma o. 21Ama aka na te e zweni aŋ inyɛsɛ, ee genji aŋ, iwɛnɛ ta a kwụbɛ shɛ gana na i shɛ maa e peni aŋ ụbaụta. Iwɛnɛ ta atwa elele a shɛtana Agwatana iwɛ iyi nɛ aa njɛ. 22Iwɛnɛ po bụtụ ata aa nɛnjɛ hwuri shiywa buhanda te e meci bu.

Atɛtanɛ-rishe a Nda Adua maa Agwatana Peni aŋ Eshe-hwoo

23Aka na te e genji Pita na Jon, ee hwuri no ofwo atwa vwɛ aba gunu ata, ee swegeni aŋ iyi elele nɛ ehiu onongbo, nu n-nyarɛ mbishe aŋ. 24Aka na ta a hwụjɛ iŋ, ee suji rụhwụŋ ra aba na azuba hwɛɛ aba na aka oko zhiaaŋ, ɛɛ hiɛŋ, Oo Agwangwama mokondo, gabụ na bɛ njɛ azuba, tu unyizo hwɛɛ, ti itekwu keeni iyi elele nɛ zweni nu bwa.#Ụban 20:11; Nehi 9:6; Shɛzu 146:6 25Gabụ bu dumwa na Mpiala mi Tijilo tedure nu unu bishi tu ge Devid, na shɛ yɛu-ugondu bu,#4:25 yɛu-ugondu bu: Kwo kaa Yɛu bu. ɛbi hiɛŋ,

Iwembe po atwa na shɛ shɛ Eju a nda abwagara gana idɛkwɛ,

atwa a haŋsa iyi yo ohondoo? #Shɛzu 2:1,2

26Shɛgwuma shi unyizo shi mama imanjɛ,

ehiu atwa momo togotogwu urubwo uko,

maa a sukakanɛ Agwangwama keeni Krast bwa.#4:26 Krast bwa: Tɛjɛshɛrɛga tu ko ti hiɛŋ, Bụtụ na ee dudugeni manɛbɛ. Kwo kaa Mɛsaya. #Shɛzu 2:1,2

27Iwɛnɛ po gɛ Hɛrod, na Pontius Pɛilat, keeni atwa na shɛ shɛ Eju keeni atwa Isrɛl, ụlwatagwụ nụ ụshɛpwụ ga, maa a sukakanɛ Yɛu-ugondu bu tijilo#4:27 yɛu-ugondu bu tijilo: Kwo kaa bujama bu, kwo kaa Yɛu bu. #Mat 27:1,2; Mak 15:1; Luk 23:1,7-11; Jon 18:28,29 ge Jisus, na ebi teri. 28A ụlwatagwụ maa a njɛ iyi elele nɛ abu imwangwa la nu ukpahiŋ bu keeni ukwulana bu maa i zhɛ ya nda tilɛɛ. 29Agwangwama, kwụba de gana na oo mo tu holono, iti peni ukpahiŋ atuba miaụŋ-mu-ugondu bu, maa ta duma iwɛ bụ ne eshe-hwoo hwɛɛ. 30Mbisono ukpahiŋ bụ maa nɛnjɛ agwumashɛ, maa njɛ iyi tudama keeni iyi ya arụhwajɛ ni izeci Yɛu-ugondu bu tijilo ge Jisus.

31Aka na te e hwuwi adua aba tɛnda, nazhɛ ofwo ata aa ga ụlwatagwụ zhingotu, Mpiala mi Tijilo mi shini shɛmɛ sha aba hwɛɛ, aa jɛmɛ iwɛ ya Agwatana ne eshe-hwoo.

Iyi Elele nɛ Aa 'Yajɛ I Shɛ Iyi ya Aba Udundo

32Atwa elele na tɛtanɛ-rishe togotogwu na ahaŋsa oko, keeni amɛ oko. I zasa bụtụ be elele na ashashɛ aba na hiɛŋ maa iyi nɛ baa 'yajɛ i shɛ inɛ ibwɛ bwooko, ama iyi elele i shɛ iyi ya aba udundo.#Ugo 2:44,45 33Atumwa le tiseyida tɛ tihiɛ ta Agwangwama Jisus nu ukpahiŋ ụ'wụtụ. Agwatana dudugeni aŋ tulubo tu bwa ti biye tụ 'wụtụ hwɛɛ aba.#4:33 Agwatana dudugeni aŋ tulubo tu bwa ti biye tụ 'wụtụ hwɛɛ aba: Kwo kaa bụtụ be elele mụnɛ aŋ ụjɛrụma ụ'wụtụ. 34I zasa bụtụ be elele na ashashɛ aba na vwụnjɛ iyi o. Bụtụ be elele na 'yajɛ cɛnjɛ, okwo shimwono, ba sanga, be suje ukwuribi ijɛ ɛtɛ bee senji, 35bo utogono atumwa, nazhɛ a pana bụtụ bụtụ gana na tu ukekeshi na wa nda bụ namɛ.

36Go Josɛf ata atumwa keeni izeci ti ga Banabas, nɛ (egini ibɛ i shɛ, bikeeni-bi-ikɛnyi), bɛ shɛ Bulivai, nu Saipros ee meci bu. 37Bi senji itimɛ nɛ baa ga 'yajɛ, bee suje ukwuribi ibɛ bee utegeni atumwa.

Currently Selected:

UGONDU WA ATUMWA 4: RBT

Highlight

Copy