MATEO 26

Jesusta wañuchinapaq pakamanta rimakipanakunku

(Mc 14.1-2; Lc 22.1-2; Jn 11.45-53)

1Jayk'aqchus Jesusqa tukuy yachachiyninkunata tukuchapurqan chhikaqa yachaqaq qatiqninkunaman ajinata nirqan:

2–Qankunapaq yachasqaykichismanjina iskay p'unchaymantam Pascua raymiqa ruwakunqa, Nuqa runapaq Churintaq chakatasqa kanaypaq puskatasqam kasaq.

3Chay p'unchaykunapitaq, sacerdotekunapaq kurajkaqninkuna jinataq judiokunapaq machulankuna ima Caifás Athunkaq sacerdotepaq wasimpi tantaykukurqanku, 4jinaspataq Jesusta imaymana llullakunawan jap'iykunapaq jinaspa wañuchinapaq rimakipanakurqanku. 5Chaywampas ajinatam nirqanku:

–Runakunapaq ama piturakunankupaq, raymi p'unchaykunapiqa ama jap'iykusunchu –nispa.

Uj warmi sumaq q'apaq jampiwan Jesusta ch'aqch'un

(Mc 14.3-9; Jn 12.1-8)

6Jesusqa Betania llaqtapi, lliqi unquyniyuq nisqa Simonpaq wasimpi kachkarqan; 7chaypi kachkaqtintaq, uj warmi achkha chaniyuq q'apachkaq jampita uj yuraq rumimanta ruwasqa chatu junt'a aparisqa payman qayllachakurqan. Jesuspaq mikhuna chhikapi kachkaqtintaq, chay warmiqa sumaq q'apaq jampiwan uman patamanta Jesusman ch'aqch'uykurqan. 8Chayta rikuspaqa, yachaqaq qatiqninkunaqa phiñarikupurqanku, jinaspataq ajina niyta qallarirqanku:

–¿Imapaqtaq qasiman kayta jich'awachachkanri? 9Chay jampiqa achkha qulqipim ranqakunman karqan, ajinamanta mana imayuq wajchakunaman yanaparinapaq –nispa.

10Jesustaq chayta uyarirqan, jinaspataq paykunaman ajinata nirqan:

–¿Imamantataq kay warmita turiyachkankichisri? Payqa uj sumaq ruwaytam nuqawan ruwachkan. 11Wajchakunataqa qankuna chawpipi kachillankichispunim, chaywampas nuqakaqmanqa manañam wiñaypaq qankuna chawpipi kachiwankichisñachu. 12Kay warmipaq sumaq q'apaq jampiwan nuqajawapi ch'aqch'usqanwanqa, ayay pakanankupaqmi wakichachkawan. 13Sut'intapuni niykichis: May chhikaniqpipas kay sumaq willaykuna rimakunqa chaypiqa, kay warmipaq ruwasqanqa rimakullanqataqmi, ajinamantam payqa yuwarisqapuni kanqa –nispa.

Judasqa Jesusta ranqaykun

(Mc 14.10-11; Lc 22.3-6)

14Chunka iskayniyuq yachaqaq qatiqninkunamanta, ujkaq Judas Iscariote sutiyuqmi, kurajkaq sacerdotekunaman rikuq purirqan, 15jinaspataq paykunaman ajinata nirqan:

–¿Nuqachus Jesusta puskataykichisman chhikaqa, jayk'atataq quwankichismanri? –Nispa.

Paykunataq kimsa chunka qulqikunata qunapaq rimayninta qurqanku. 16Chhikamantapachataq Judasqa jayk'aqtaq Jesusta puskatanman karqan chayta maskaspa puriykachachkarqan.

Pascua raymipi Tata Jesuspaq mikhusqan

(Mc 14.12-25; Lc 22.7-23; Jn 13.21-30; 1 Co 11.23-26)

17Mana t'amachiqniyuq t'ant'a mikhuna raymi qallariy p'unchay chayamuqtintaq, yachaqaq qatiqninkuna Jesusman qayllachakuspa ajinata tapurirqanku:

–¿Maypitaq Pascua raymi ch'isi mikhuyta wakichamunaykuta munankiri? –Nispa.

18Paytaq paykunaman ajinata jaynirqan:

–Llaqtaman puriychis uj runapaq wasinman, jinaspa ajinata niychis: ‘Yachachiq ajinata nin: Pachay chayampunñam, yachaqaq qatiqniykunawan wasiykiman Pascua raymi ruwanapaq jamuchkani’ –nispa.

19Yachaqaq qatiqninkunataq, imaynatachus Jesusqa kamachichkarqan ajinamanjina ruwamurqanku, jinaspataq Pascua ch'isi mikhuyta wakichamurqanku.

20Tutayaykupuqtintaq, Jesusqa chunka iskayniyuq yachaqaq qatiqninkunawan kuska mikhuna chhikapi kachkarqan; 21Mikhuchkaqtinkutaq paykunaman ajinata nirqan:

–Sut'inta niykichis, qankunamanta ujkaqmi ranqaykuwanqa –nispa.

22Paykunataq anchata llakirikupurqanku, jinaspataq ujmanta uj ajinata nispa tapuriyta qallarirqanku:

–Tata Jesús, ¿nuqachu kasaqri? –Nispa.

23Jesustaq paykunaman ajinata jaynirqan:

–Ujkaq nuqawan kuska t'ant'ata chuwapi challpuchkan chaymi ranqaykuwanqa. 24Nuqa runapaq Churinqa, Qilqasqakunapi nichkan ajinamanjina chayniq ñanta purispam wañunay kanqa; chaywampas ¡Imalla kachkanqa pichus ranqaykuchkawan chaypaqqa! Allinraq kanman karqan mamampaq wijsanmanta mana paqarinanqa –nispa.

25Chhikataq Judas mayqinchus ranqaykuchkarqanña, chay ajinata payman tapurirqan:

–Yachachiq, ¿nuqachu kasaqri? –Nispa.

–Qanmi nichkanki –nispa Jesusqa jaynirqan.

26Mikhuchkaqtinkutaq, Jesusqa makimpi t'ant'ata jap'irqan, Diosman yuspärayta quspataq, phatmiraspa yachaqaq qatiqninkunaman ajinata nispa ch'iqirachirqan:

–Jap'iychis, jinaspa mikhuychis kayqa nuqapaq aychaymi –nispa.

27Chhikamantataq makinwan pusilluta jap'irqan, Diosman yuspärayta quspataq, paykunaman ujyanankupaq ajinata nispa jaywarqan:

–Kay pusillumanta tukuy qankuna ujyaykuychis, 28imaraykuchus kayqa yawarniymi, chaywantaq Diosqa qankunawan uj musuq rimthapiyta ruwan, kay yawartaq achkha runakunarayku juchankuna pampachasqa kanampaq jich'asqam. 29Chaywampas niykichis, manañam jayk'aqpas kay vinotaqa Tataypaq qhapaq suyumpi qankunawan kuska waj musuq vinota ujyananchiskama ujyasaqñachu –nispa.

Jesusqa Pedropaq mana payman riqsiq tukunanmanta willan

(Mc 14.26-31; Lc 22.31-34; Jn 13.36-38)

30Jesusqa yachaqaq qatiqninkunawan kuska salmokunata takirisqaku chhikamantataq, Olivos urquniqman puripurqanku. 31Jesustaq paykunaman ajinata nirqan:

–Kunan tutam, tukuy qankuna nuqapi iyawniyuq kasqaykichista chinkachikupunkichis. Qilqasqakunapiqa ajinatam nin: ‘Michiqta wañurquchisaq, chhikamantataq uwijakunaqa chinkawachapunqakum’ –nispa. 32Chaywampas jayk'aqchus wañusqamanta nuqa kawsarimpusaq chhikaqa, qankunapaq ñawpaqiykichistam Galilea suyuniqman nuqa purichkasaq –nispa.

33Pedrotaq payman ajinata jaynirqan:

–Tukuyninkupas qampi iyawninkuta chinkachikuchunku, nuqakaqqa manapunim chinkachikuchkasaqchu –nispa.

34Jesustaq payman ajinata nirqan:

–Sut'inta niyki, imaynatachus kunan tutapacha, manaraq k'ank'apaq waqach'akumuchkaqtin, kimsa kuti nuqa mana riqsiq tukuwanki –nispa.

35Pedroqa astawanraq atipakurqan:

–Imapas kachun, jayk'apas kachun, qanwan kuska wañunaypas kachun, manapunim qanman mana riqsiq tukuchkasaqchu –nispa.

Kikillantataq tukuy yachaqaq qatiqninkunaqa nirqanku.

Jesusqa Getsemaní chhikapi mañakun

(Mc 14.32-42; Lc 22.39-46)

36Jesusqa yachaqaq qatiqninkunawan kuska Getsemaní sutiyuq chhikaman purispa paykunaman ajinata nirqan:

–Kay chhikapi tiyachkaychis, nuqataq chhaqayniqman Diosmanta mañakuq purisaq –nispa.

37Chhikataq Pedrota, Zebedeopaq iskaynin churinkunatawan pusqarukurqan, jinaspa anchata llakikuyta qallarirqan. 38Paykunamantaq ajinata nirqan:

–Sunquypi ñaqapas wañupuchkaymanjina anchata llakirikuni. Qankunaqa kay chhikapi ama puñjaspa nuqawan kuska kachkaychis –nispa.

39Chhikapacha ñawpaniqman purispa, mat'in pampaman chayanankama k'uñuykukuspa Diosmanta mañakurqan, ajinata nispa: “Tatay, munanki chhikaqa kay ñak'ariyta nuqamanta jithiqarichiway; chaywampas ama nuqapaq munasqaymanjina kachunchu, manachayqa qampaq munayniyki ruwakuchun –nispa.”

40Chhikamantataq may chhikapichus yachaqaq qatiqninkuna kachkarqanku chayman kutirispa puñurachkaqta jap'iqarqan. Jesustaq Pedroman ajinata nirqan:

–¿Manachu uj chhikatapas qankuna nuqawan kuska rijch'arisqa kayta atichkankichisri? 41Rijch'arisqa kachkaychis, jinataq Diosmanta mañakuychis yanariykunaman ama chayanaykichispaq. Qankunaqa allin ruwayta munankichismi, chaywampas kallpaykichiswanqa manam atichkankichischu –nispa.

42Iskay kutiña purispataq ajinata mañakurqan: “Tatay, kay yanariy ruwakunampuni chhikaqa, munayniykimanjina ruwakuchun,” nispa.

43Jayk'aqchus kutirimurqan chhikataq, yachaqaq qatiqninkunata puñuchkaqta taripapullarqantaq, imaraykuchus paykunaqa ancha puñuy q'aylluq'ayllu kachkarqanku. 44Paykunata ajinapi saqispa, wajmanta kimsa kutiña kikillantataq mañakuq purirqan. 45Chhikamantataq may chhikapichus yachaqaq qatiqninkuna kachkarqan chayman kutirispa, ajinata paykunaman nirqan:

–¿Qankunaqa samaraspa puñurakuchkallankichischuri? Nuqa runapaq Churin juchararakunapaq makimpi jap'ichisqa kanay pachaqa chayampunñam. 46Sayariychis, puripusunchis; nuqa ranqaykuqqa qayllachakumuchkanñam –nispa.

Jesusta jap'iykunku

(Mc 14.43-50; Lc 22.47-53; Jn 18.2-11)

47Jesusqa manaraqmi rimayta tukuchachkarqanchu ajinamanmi, Judas ujninkaq yachaqaq qatiqninkunamanta, achkha k'aspikuna, jinataq athun kuchillukuna ayarisqa runakunawan kuska chayaykumuchkarqan. Paykunataq kurajkaq sacerdotekunapaq jinataq llaqta machulakunapaq kachamusqankum karqanku. 48Ranqaykuq Judasqa yachanachikuspaqa ajinata nisqam paykunaman uj rikuchiyta quspa: “Mayqintachus much'aykuchkasaq chaymi jap'iykuychis” –nispa. 49Ajinaqa Jesusman qayllachakuspa ajinata nirqan:

–¡Napaykuykim yachachiq! –Nispa.

Ajinata nispataq much'aykurqan. 50Jesustaq payman ajinata jaynirqan:

–Wawqimasiy, imachus ruwanaykita usqhayllata ruway –nispa.

51Chay pachataq, Jesuswan kuska kachkaqkunamanta ujninkaq, athun kuchillunta jurqurqukuspa Athunkaq sacerdotepaq uywasqanman ujniq ninrinta waqtaspa phawaqachirqan. 52Jesustaq payman ajinata nirqan:

–Kuchilluykita may chhikapichus kanan kachkan chaypi churay. Imaraykuchus tukuy kuchilluwan maqanakuqkunaqa, kuchilluwan wañuchisqallataqmi kanqaku. 53¿Manachu yachanki, anchakunan Tatayman mañarikuyman chhika payqa kunan pacha chunka iskayniyuq chakurijina angelkuna kurajtaraq apachimuwanman chaytari? 54Chaywampas, ajina kanman chhikaqa ¿Imaynatataq Qilqasqakunapi nichkan chay junt'akunan kanmanri? –Nispa.

55Chhikapachataq Jesusqa runakunaman ajinata tapurirqan:

–¿Imamantataq qankunaqa chhikan kuchillukunawan jinataq k'aspikunawan nuqa suwa runapas kayman ajinata jap'iykunapaq jamunkichisri? Sapa p'unchaytaq Diospaq wasimpi yachachispa kakuchkaniqä, chaypiqa manataq jayk'aqpas jap'iykuchkawankichischuqä –nispa. 56Chaywampas tukuy kaykunaqa, Diospaq sutimpi willaqkunapaq jinataq Qilqasqakunapi nisqanmanjina junt'akunampaqmi ajinata ruwakun –nispa.

Jesusqa Athunkaq Tantakuypaq ñawpaqimpi

(Mc 14.53-65; Lc 22.66-71)

57Pikunachus Jesusta jap'iykuchkarqanku chay runakunaqa, Caifás nisqa Athunkaq sacerdotepaq wasinman apapurqanku, maypichus Diospaq kamachiynin yachachiq runakuna jinataq machulakuna ima chayman tantasqa kachkarqanku. 58Pedrotaq karuniqllamanta Athunkaq sacerdotepaq wasikanchankama Jesusta qatiykurqan. Chayman waykuspataq, imaynapichus tukuy chay ruwaykuna tukjakunqa chay rikunapaq Diospaq wasin rikuqkunawan kuska chunuykuchkarqan.

59Kurajkaq sacerdotekunawan jinataq tukuy Athunkaq Tantakuywan ima, Jesusman imaymanamanta llullaykuspa wañunampaq juchanchayta maskachkarqanku, 60chaywampas, achkha runakuna payman llulla rimaykunawan irkatarqanku chhikaqa, manam ima juchatapas paypi tariparqankuchu. Chhikamantataq iskayniyuq irkataq runakunapiwan chayamurqanku, 61paykunataq ajinata irkataspa atipakurqanku:

–Kay runaqa ajinatam nirqan: ‘Nuqa Diospaq wasinta t'unarquyman, jinaspataq kimsa p'unchaypim wajmanta sayarichillaymantaq –nispa.’

62Chhikataq Athunkaq sacerdote sayarispa Jesusman ajinata tapurirqan:

–¿Manachu imatapas ninkiri? ¿Imataq kay qanjawapi rimachkanku chayri? –Nispa.

63Chaywampas Jesusqa, mana ima nispam jup'alla kachkarqan. Athunkaq sacerdotetaq payman ajinata nirqan:

–Kawsachkaq Diospaq sutimpi, chiqan kaqta rimarqunaykipaq kamachiyki. Niwaychis, qampunichu Diospaq Churin Mesías kanki –nispa.

64Jesustaq payman ajinata jaynirqan:

–Arï, qan nichkanki. Nuqa nillaykichistaq, qankunaqa Nuqa runapaq Churinta tukuy atiyniyuq Diospaq pañaniqnimpi tiyachkaqta jinataq phuyupatapi janaqpachamanta jamuchkaqtam rikuwankichis –nispa.

65Chayta uyarispataq, Athunkaq sacerdoteqa phiñakusqanta riqsichinapaq p'achanta wikharpayakurqan, jinaspataq ajinata nirqan:

–¡Kay runapaq rimayninkunaqa Diospaq sutinta mana allimpim churan! ¿Imapaqñataq astawan irkataqkunata munapunchisri? Qankuna kikinmi mana allin rimasqanta uyarichkankichis; 66¿Kayjawamanta imaninkichistaqri?

Paykunataq ajinata jaynirqanku:

–Juchayuqmi, jinaspataq wañunanmi –nispa.

67Chhikataq uyanmanta thuqkataspa takarqanku. Wakinkunataq maqjarqanku, 68ajinata nispa:

–Qan Mesiaschari kankiqa, ¡pitaq maqasunki chayta sut'inchaychis! –Nispa.

Pedroqa Jesusta mana riqsiq tukun

(Mc 14.66-72; Lc 22.56-62; Jn 18.15-18,25-27)

69Pedroqa jawaniq wasikanchapi chunuykuchkarqan. Chaypitaq uj jaywaq sipas payman qayllachakuspa ajinata nirqan:

–Galileapi kaq Jesuswan kuska qan puriykachallarqankitaqmi –nispa.

70Chaywampas Pedroqa tukuypaq ñawpaqimpi ajinata nispa mana riqsiq tukurqan:

–Manam imakaqmanta rimasqaykitapas yachachkanichu –nispa.

71Chhikamantataq punkuniqman puripurqan, maypichus ujkaq payta rikuspa wakinkunaman ajinata nirqan:

–Chhaqay runaqa Nazaret llaqtapi kaq Jesuswan puriykachaqmi –nispa.

72Pedroqa wajmanta ajinata nispa mana riqsiq tukupullarqantaqmi:

–¡Chay runataqa manapunim riqsichkanichu! –Nispa.

73Uj chhikamantataq, chaypi kaqkunaqa Pedroman qayllachakuspa, ajinata nirqanku:

–Paykunamanta ujkaqninmi qan kanki, rimasqaykipipas chay kasqaykiqa sut'iraqmi yachakuchkan –nispa.

74Chhikataq payqa, ujmanta ujtawan juramintuwan rimayninta quspa ajinata nirqan:

–¡Manam chay runata riqsichkanichu! –Nispa.

Chay kikin pachapitaq uj k'ank'a waqach'arikumurqan, 75Jinaspa Pedroqa Jesuspaq nisqanta yuwatatarikurqan: “Manaraq k'ank'a waqach'akumuchkaqtin kimsa kutim qanqa nuqaman mana riqsiq tukuwanki” –nispa. Chaymanta lluqsipuspataq Pedroqa, ancha sunqu nanasqam waqarikurqan.

Currently Selected:

MATEO 26: QNBNT

Highlight

Copy