Matiu 7
7
Ineekau mosalai hangka rangami
(Luk. 6:37-38,41-42)
1“Ineekau mosalai hangka rangami dati worikau nasalai Pue Ala. 2Lawi hoka au nipake i hangka rangami, iti wori au ina rahokaakau. Lempona, ane mobotusikau rangami, nodo wori Pue Ala ina mobotusi kara-karami.
3Moapa hai niparesa pupu i matana rangami, moleri rangka kau au ara i matami bara niita? 4Noumba pane peisakau mouliangaa rangami, ‘Mai kuingihi pupu i matamu,’ moleri ara mani rangka kau i matami. 5Ineekau mengkamaroa! Hangangaa niingihi hampai rangka au ara i matami, hangko manotori petotokimi moingihi pupu i matana rangami.”
6Roo indo, Yesu mopahawe ngkora pandiri ide, Nauli, “Ineekau mowei paande au maroa i dike, kahopoana napenggoliikau nakeki. Ineekau mowei apa au masuli i boe bona dati napangka-pangka mbero pea.”#7:6 I lalu ngkora pandiri ide, Yesu mepaturo bona ineehe mopahawe liliu Ngkorana Pue Ala i tauna au mesapuaka au rapandirihe nodo dike hai boe. Dike hai boe iami pinatuwo au bara raunde to Yahudi.
Merapi i Pue Ala
(Luk. 11:9-13)
7“Perapimide i Pue Ala, batena Naweikau. Haokimide apa au niparaluu i Pue Ala, batena nilambi. Tidongkomide baba, batena Nabungkahiakau. 8Lawi hema au merapi ina rawei. Hema au masaoki ina molambi. Hema au motidongko baba, ina rabungkahia.
9-10Ba arakau au mowei watu i anami ane merapi roti? Ba niweihe ile ane merapihe bau? Bara! 11Kehapirikau kadake, niisa mani mowei apa au maroa i anami. Apa mani Umami au ara i suruga! Batena ina mowei apa au maroa i tauna au merapi Iria.”
Babaka au maigu
12“I paka-pakana, apa au niunde rababehi rangami irikamu, iti wori au hangangaa nibabehi i rangami. Itimi paturona Aturana Musa hai paturonda nabi.
13Mesuakau moliu i babaka au maigu, lawi baba au maemba hai rara mahile monontohi naraka, hai bosa wori tauna au moula rara iti. 14Agaiana maigu baba hai kokoi rara au monontohi katuwo maroa, hai haodi pea tauna au molambi.”
Nabi au mepakanawo tongawa i babehianda
15“Mainga-ingakau i nabi au mepakanawohe. Ihira hawe i olomi nodohe dimba agaiana katouana nodohe serigala au maseke. 16Niisa podongkonda ane niita wuana pobagonda au kadake. Anggoro bara rapupu hangko i dui sumbali. Kau rodo bara mowua gambu. 17Kau au marudu, maroa wuana. Kau au maduhu, bara maroa wuana. 18Bara ara kau au maroa au kadake wuana, hai bara ara kau au kadake au maroa wuana. 19Kau au bara mowua maroa, ina ratiwi hai raintuki. 20Niisa pepakanawonda nabi iti ane niita wuana pobagonda.
21Bara ope-ope tauna au mokabelaiNa ‘Pue,’ ina mesua i lalu poparentana UmaNgku au ara i suruga. Batena pea tauna au mobabehi peundeana Pue Ala au ina mesua i lalu poparentaNa. 22I alo pebotusi i kahopoa dunia, bosa tauna ina mouliangaaNa, ‘Pue! Pue! Bara pae Nuisa kaikamina au mopahawe Ngkorana Pue Ala i lalu hangaMu! Hai i lalu hangaMu mampopelohongkai seta. Hai ngkaia wori tanda kuasa kibabehi i lalu hangaMu.’
23Ina Kuhanaihe: ‘Barakau Kuisa! Pelohokau hangko inde, ikamu au kadake babehiami.’ ”
Ngkora pandiri kana i rodua tauna au moaro sou
(Luk. 6:47-49)
24“Hema au mampehadingi lolitaNgku hai napeulai, peisa rapandiri nodo hadua tauna au mapande; ia moaro souna i wongko watu au maroho. 25Toa uda, meumbalami owai, hai angi morumpa sou iti, agaiana bara mapoka, lawi raaro i wongko watu au maroho.
26Agaiana tauna au mohadi lolitaNgku ide hai bara napeulai, peisa rapandiri nodo hadua tauna au ntuli au moaro souna i wongko wungi. 27Toa uda, meumbalami owai, hai angi morumpa sou iti, pane liliu mapoka, magero ope-ope.”
28Karoona Yesu mololita, tingkaramohe ope-ope tauna au mohadi pepaguruNa, 29lawi pepaguruNa bara nodo guru-guru agama, agaiana nodo tauna au makuasa ntepuu.
Currently Selected:
Matiu 7: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
