Matiu 16

ToParisi hai toSaduki merapi bona Yesu mobabehi tanda kuasa

(Mrk. 8:11-13)

1Hangko inditi, bahangkia toParisi hai toSaduki hawe i Yesu mohaoki kanawoaNa. Merapihe i Yesu, rauliangaa, “Nubabehiangkai tanda kuasa bona tongawa irikami kahangko i Pue AlaMu.”

2Nahanaihe Yesu, “Ane ina tampumi alo hai malei langi, niuli, ‘Malelaha deade raoa.’ 3Ane madondo-dondo niuli, ‘Deade ina keuda, lawi makaindi raoa hai ngembe pea.’ Niisa mpuu mampekatandai raoa. Agaiana bara niisa mampekatandai apa au nababehi Pue Ala i tempo ide. 4Kadake mpuukau! Mosapuaka liliukau Pue Ala! Niperapi bona Kupopaitaakau tanda kuasa. Agaiana bara ara tanda kuasa au ina rapopaitaakau. Au ina rapopaitaakau, batena pea tanda nodo au mewali i nabi Yunu hangkoia.”#Mat. 12:39-40 Roo indo, Napalehimohe.

Paturonda toParisi hai toSaduki rapandiri nodo ragi

(Mrk. 8:14-21)

5Laomohe Yesu hai topeguruNa moweta rano, agaiana topeguruNa bara mokatuinao moanti bakunda. I tempo iti, Yesu mopahaweahe lolita ide, 6“Maroa-roakau, hai mainga-ingakau i raginda toParisi hai toSaduki!”

7Agaiana lolita iti bara raisa lempona. Mewali mololitamohe hadua hai hadua, rauli, “Ido hai Nauli nodo, lawi barake moanti roti.”

8Agaiana naisari Yesu apa au rapololita topeguruNa, ido hai Nauliangaahe, “Moapa hai mampololitakau kadami moanti roti? Makura mpuu pepoinalaimi! 9Bara mani liliu niisa! Bara pae nikatuinao roti au lima oguna au Kupaandeahe tauna au lima sabuna? Hai hangkia bingkana pentarana au nigulu? 10Noumba wori hai roti au pitu oguna Kupaandeahe tauna au iba sabuna? Hai hangkia wori bingkana pentarana au nigulu? 11Moapari hai bara liliu niisa kadana roti au Kutunggai? Mainga-ingakau i raginda toParisi hai toSaduki.”

12Roo indo, hangko raisari topeguruNa kadana ragi au rapoporoti au natunggai Yesu. Tunggaiana lolitaNa bona mainga-ingahe i paturonda toParisi hai toSaduki.

Peturu mopangaku kaYesuna Datu Topehompo

(Mrk. 8:27-30; Luk. 9:18-21)

13Laomi Yesu hai topeguruNahe i tampo au hungku i wanua Kaisarea Pilipi. Inditi, Yesu mekune i topeguruNa, Nauli, “Moula pangulinda tauna, hema Ana Manusia ide?”

14Rahanai topeguruNa, rauli, “Arahe au manguli kaOiona Yohane Toperiu au tuwo hule. Ara worihe au manguli Oio hadua nabi au tuwo hule, nodo nabi Elia, nabi Yeremia, ba nabi au ntanina.”

15Napekune mbulihe, Nauli, “Ane moula pelambiami, ide Iko, hemaNa?”

16Nahanai Simo Peturu, nauli, “Oiomi Datu Topehompo, Anana Pue Ala au tuwo.”

17Nauli Yesu, “Simo anana Yunu, morasi mpuuko, lawi bara manusia au mampopaisaako iti, agaiana UmaNgkuri au ara i suruga. 18Mewali, ido hai rahangako Peturu, lempona ‘watu’. Hai i wongko watu ide, Kuaro souNgku lempona, Kugulu ope-ope tauna au mampoinalaiNa. Ope-ope kuasa tokadake bara peisa monangihe. 19Ina Kuweiko kuasa motosaengi taunana Pue Ala.#16:19 Basa Yunani: ‘pegili poparentaa i suruga’. Mewali, apa au nubotusi i dunia, iti nabotusimi Pue Ala i lalu suruga. Ane nuuli hadua tauna hangangaa rahuku, Pue Ala mohukuhe. Ane nuuli hadua tauna raampungi dosana, Pue Ala moampungi.” 20Roo indo, Nauliangaahe, “Inee hampai niuli i hema pea kaIkona Datu Topehompo.”

Yesu mampololita kana i kapateNa hai kana i rara meula Iria

(Mrk. 8:31–9:1; Luk. 9:22-27)

21Mepongka hangko inditi, Yesu mopakanoto i topeguruNa apa au hangangaa mewali i wataNa, nauliangaahe, “Hangangaa laoNa i Yerusale. Inditi ina rapopeahi-ahiNa totosae boea, kapala-kapala tadulako mpenomba hai guru-guru agama. Ina rapapateNa, agaiana i kataluna alona, ina tuwo huleNa.”

22Agaiana Peturu modii Yesu hangko inditi hai nakambaroa, nauli, “Pue, ineeKo mololita nodo! Kuperapi i Pue Ala bona iti Napakarao hangko Irio.”

23Yesu mampembalilingi Peturu, hai Nauliangaa, “Peloho Datu Tokadake! Ba nupeinao mohombokiNa bona datiNa mampeulai peundeana UmaNgku? Pekirimu iti pekiri manusia, bara pekirina Pue Ala.”

24Roo indo, Yesu mouliangaahe topeguruNa, “Hema au mampeinao meula Iriko, hangangaa mokabaha peundeana haduduana hai mohalea kau popakuana. Ane nodo, hangko peisari meula Iriko. 25Hema au mokabaha peundeana haduduana anti peulana Iriko, kehapiri rapapate, ia au molambi katuwo maroa. Agaiana hema au mampeulai peundeana haduduana, bara molambi katuwo maroa. 26Apa bunduna morampu ope-ope peawa i dunia, ane barake molambi katuwo maroa i alo pebotusi. Lawi bara ara au peisa taintolohia katuwo maroa iti. 27Hambela tempo Iko Ana Manusia ina maiNa hangko i suruga mampetudungia peawana tuwoNgku au himbela hai peawana tuwona UmaNgku. I tempo iti, bosa wori malaeka ina moulaNa, hai batena Kuhurungi babehianda ope-ope tauna. 28Nipehadingi maroa apa au Kuuliangaakau ide: arakau inde au bara ina mate hangko damani moita, Iko Ana Manusia, hawe nodo Datu.”

Currently Selected:

Matiu 16: NPY

Highlight

Copy