Matiu 11
11
1Karoona Yesu mopaturo topeguruNa au hampulo hai rodua, Ia laomi mepaturo hai mobambari Ngkora Marasa i boea-boea au hungku.
Yesu motoia Yohane Toperiu
(Luk. 7:18-35)
2I tempo iti, Yohane Toperiu tangana ratarunggu. Kanahadina Yohane apa au napobago Kerisitu, ia motudu bahangkia topeguruna lao i Yesu mekune Iria, node, 3“Ba Oio mpuumi Datu Topehompo au nadandi Pue Ala? Ba ara mani au ntanina kipegia?” Lao mpuumohe topeguruna Yohane mopahawe pampekunena iti i Yesu.
4Kanahadina Yesu pekunenda, Nauliangaahe node, “Mesulemokau, hai nipetumbuia Yohane apa au nihadi hai au niita: 5au bilo meitami, au palu molumaomi, au ketangga maohami, au bongo mehadimi, tauna au mate Kupatuwo hule, hai Ngkora Marasa Kupahawemi i tauna au meahi-ahi tuwonda.#11:5 Idemi au nauki nabi Yesaya hangkoia kana i Datu Topehompo. Peita: Yes. 35:5-6, 61:1. 6Morasihe tauna au bara bata-bata lalunda Iriko.”
7I pesulenda tuduana Yohane Toperiu, mololitami Yesu i tauna bosa kana i Yohane, Nauli, “Apa tunggaiami lao i Yohane i pada wungi hangkoia? Ba mampeinao peakau moita tala au nawui himburu node hou node mai? Bara!#11:7 Lempona, Yohane bara malede pepoinalaina nodo tala au nawui himburu node hou node mai. Maroho pepoinalaina hai rumihi pampeulaina peundeana Pue Ala. 8Mewali, apari au nipeinao lao nipeita? Ba mampeinaokau mampeita tauna au makara hampina? Bara wori, lawi tauna au makara hampinda maida peahe i souna datu. 9Mewali, apari au nipeinao lao nipeita? Ba mampeinaokau mampeita nabi? Ane nodo, tou. Agaiana Kuuliangaakau meliu kamahilena tuwona Yohane hangko i nabi au ntanina. 10Lawi Yohane iti au natunggai i lalu Sura Malelaha hangkoia. Nauli Pue Ala i AnaNa:
‘Idemi suroNgku,
au ina Kutudu moioru hangko Irio,
bona mopasilolonga raraMu.’ ”#Mal. 3:1
11Nauli mbuli Yesu, “Bona niisa, hangko i ope-ope tauna au rapoanaka i dunia ide, bara ara hadua au meliu kamahilena tuwona hangko i Yohane Toperiu. Agaiana mepongka ide-ide, morasi mpuuhe tauna au mengkoru i Pue Ala. Mogalori hadua tauna au tepakoi tuwona i lalu poparentana Pue Ala, mahile tuwona pane Yohane. 12Hangko i pobagona peami Yohane Toperiu hawe i tempo ide, tauna au kadake mopari-parihe moewa taunana Pue Ala, rapeinaohe rakuasai. 13Mepongka hangkoia hawe i kamaina Yohane, ope-ope paturonda nabi hai aturana Musa mampololita hahahe apa au hangangaa ina mewali i tempo ide. 14Mewali, ane maukau mampoinalai, Yohanemi au natunggai hadua nabi hangkoia au mopahawe kaina hawena hule nabi Elia.#Mal. 4:5-6 15Hema au motalinga, nipehadingi maroa!
16Ikamu au tuwo ide-ide peisa rapandiri nodo anangkoi au mohuda-huda i pobalu-balua au mombekakiohe, 17rauli,
‘Kipotulaliakau, agaiana barakau motaro-taro.
Kipandawiakau, agaiana barakau moteria.’
18Lempona: Yohane Toperiu bara niunde. Iko wori, baraNa niunde. Kamaina Yohane, ia mopuasa hai bara moenu anggoro. Nisapuaka liliu, niuli node, ‘Ia napesuangi seta!’ 19KamaiNgku Ana Manusia, maenuNa anggoro hai maandeNa. Agaiana nisapuaka woriNa, niuli, ‘Peita! Topehioro, tomalangu, ranganda toperuru asele hai tomadosa!’ Agaiana nauri nodo, kamanotona rarana Pue Ala tongawa i lalu katuwonda tauna au mampeulai peundeaNa.”
Yesu mokambaroa to Yahudi i Galilea au barahe mepoinalai
(Luk. 10:13-15)
20Hangko inditi, Yesu mokambaroa to Yahudi au maidahe i bahangkia wanua i tampo Galilea, lawi nauri paka Nababehiahe tanda kuasa i boeanda, bara mpuuhe menoso hangko i babehianda au kadake. 21Nauli Yesu, “Hurewukau to Korasim hai to Betsaida! Ngkaiami tanda kuasa au Kubabehi i boeami, agaiana bara mpuukau menoso hangko i dosami. Ane rapana tanda kuasa iti Kubabehi i lalu wanua Tirus hai Sidon, kemahaemohe menoso hangko i dosanda, nauri barahe to Yahudi. Kemangalamohe waru ngkasusa rapohampi, hai watanda raawui, tanda katebalikinami lalunda. 22Mewali bona niisa, i alo pebotusi i kahopoa dunia, ina rumihi mpuu pehukuna Pue Ala irikamu pane pehukuNa i to Tirus hai to Sidon.
23Hai ikamu wori to Kapernaum! Ba nipehangu ina naangkakau Pue Ala hawe i suruga? Bara! Ina Natendekau i lalu naraka! Ane rapana tanda kuasa au Kubabehimi i boeami, Kubabehi wori i wanua Sodomo hangkoia, wanua iti kebara napakarugi Pue Ala, ara mani duuna ide-ide. 24Mewali bona niisa, i alo pebotusi i kahopoa dunia, rumihi mpuu pehukuna Pue Ala irikamu pane pehukuNa i to Sodomo au kadake babehianda hangkoia.”
Yesu mekakae hai mokakio tauna mai Iria
(Luk. 10:21-22)
25I tempo iti, mekakaemi Yesu, nauli, “O Uma, Ampu langi hai tampo! KutoiaKo, lawi ope-ope au tewuniangi hangkoia, Nupopaisaamohe tauna au i woi tuwonda, agaiana Nuwuniangiahe tauna au mapangka posikolanda hai tauna au mapande, 26lawi nodomi peundeaMu, Uma.”
27Roo indo, nauli mbuli Yesu, “Hinangkana NaweimoNa UmaNgku. Bara ara hadua au moisaNa, Iko Anana Pue Ala, batena pea UmaNgku au moisaNa. Nodo wori, bara ara au moisa UmaNgku, batena pea Iko AnaNa hai hema pea au Kupopaisaa.
28Maimokau ope-ope au mawowe hai au mantimi haleami. Ina Kuweihaakau haleami. 29Nihaleami haleaNgku, hai megurukau Iriko bona molambikau katinda lalu. Lawi maalusuNa hai mengkaiwoiNa. 30HawaNgku bara mapari, hai mangaa haleaNgku au Kuweikau nihalea.”
Currently Selected:
Matiu 11: NPY
Highlight
Share
Copy
Want to have your highlights saved across all your devices? Sign up or sign in
@LAI 2016
