Matiu 1

Pemuleanda toioruna Yesu

(Luk. 3:23-38)

1Yesu Kerisitu iami pemuleana Datu Daudi, pemuleana Burahima. Mepongka hangko i Burahima hawe i Daudi, hanganda au mampemuleaka Yesu, idemohe:

2Burahima mopaara Isaki;

Isaki mopaara Yako;

Yako mopaara Yehuda hai halaluna;

3Yehuda mopaara Peres hai Sera hangko i Tamar;

Peres mopaara Hesron;

Hesron mopaara Ram;

4Ram mopaara Aminadab;

Aminadab mopaara Nahason;

Nahason mopaara Salmon;

5Salmon mopaara Boas hangko i Rahab;

Boas mopaara Obed hangko i Ruti;

Obed mopaara Isai;

6hai Isai mopaara Datu Daudi.

Mepongka hangko i Datu Daudi hawe i karatawaninda to Yahudi i wanua Babeli, idemi hanganda ulu bubuna Yesu:

Daudi mopaara Salomo hangko i bembana Uria;

7Salomo mopaara Rehabeam;

Rehabeam mopaara Abia;

Abia mopaara Asa;

8Asa mopaara Yosapat;

Yosapat mopaara Yoram;

Yoram mopaara Usia;

9Usia mopaara Yotam;

Yotam mopaara Ahas;

Ahas mopaara Hiskia;

10Hiskia mopaara Manase;

Manase mopaara Amon;

Amon mopaara Yosia;

11Yosia mopaara Yekonya hai halalunahe.

I tempo iti to Yahudi ratawanihe i Babeli.

12Mepongka hangko i karatawaninda to Yahudi i Babeli hawe i karapoanakana Yesu, idemohe hanganda ulu bubuna Yesu:

Yekonya mopaara Sealtiel;

Sealtiel mopaara Serubabel;

13Serubabel mopaara Abihud;

Abihud mopaara Elyakim;

Elyakim mopaara Asor;

14Asor mopaara Sadok;

Sadok mopaara Akim;

Akim mopaara Eliud;

15Eliud mopaara Eleasar;

Eleasar mopaara Matan;

Matan mopaara Yako;

16Yako mopaara Yusupu tobalilona Maria.

Maria itimi au mampoanaka Yesu au rahanga Kerisitu.

17Mewali, mepongka hangko i Burahima hawe i Daudi, ara hampulo hai iba lapina toioruna Yesu. Mepongka hangko i Daudi hawe i karatawaninda to Yahudi i Babeli, hampulo wori hai iba lapina. Hai mepongka hangko i karatawaninda to Yahudi lao i Babeli hawe i karapoanakana Kerisitu, hampulo wori hai iba lapina.

Tuntukana karapoanakana Yesu

(Luk. 2:1-7)

18Idemi tuntukana karapoanakana Yesu Kerisitu. Maria, inana, momanu hai Yusupu, agaiana hangko damanihe mohamboko, mantimimi. Kamantimina iti, hangko i kuasana Inao Malelaha. 19Yusupu, hampomanuna, tauna au manoto poantina. Ido hai nauli laluna, “Kubotuki ngkandii pomanungku hai ia,” lawi bara naunde mopakaea Maria. 20Tangana Yusupu mampepekiri iti, mangipimi. I lalu pangipina, moita hadua malaekana Pue, au mololita, nauli, “Yusupu, pemuleana Datu Daudi! Ineeko langa mampotambia Maria, lawi Anangkoi au nakantimia iti mewali anti kuasana Inao Malelaha. 21Maria ina moana hadua tobalilo. Anangkoi iti, hangangaa nuhanga ‘Yesu’,#1:21 Yesu: Lempona: ‘Pue mehorema’. lawi Ia au ina mohorema taunaNa hangko i dosanda.”

22Ope-ope iti mewali bona tepabukei Ngkorana Pue au naukimi nabiNa hangkoia:

23“Hadua anantowawine ina mantimi,

hai moana hadua tobalilo.

Anangkoi iti ina rahanga Imanuel.”#Yes. 7:14

Lempona, “Pue Ala mamporangaike.”

24Mearomi Yusupu, napeulai mpuumi apa au nauliangaa malaekana Pue Ala iti. Naposambokomi Maria, 25agaiana bara manihe hampapaturua duuna Maria moana. I pesupaana Anangkoi iti, Yusupu mohanga anangkoi iti Yesu.

Currently Selected:

Matiu 1: NPY

Highlight

Copy