Suro 7

Pololitana Setepanu

1Mekunemi Tadulako Mpenomba Mahile i Setepanu, nauli, “Tou pae ope-ope au rapololita tauna iti?”

2Nahanai Setepanu, “Uma-uma, halalu-halalu! Nipehadingina hampai! Hangkoia, toiorunta Burahima maida i tampo Mesopotamia. Hangko damani melimba i boea Haran, Pue Ala au mahile kuasaNa hawe i toioruntahe, 3mololitami, Nauli, ‘Nupalehimi tampomu hai halalumu. Laomoko i tampo au ina Kutudungiako.’ 4Ido hai Burahima mopalehi tamponda to Kasdim lao i boea Haran; inditimi umana Burahima mate. Hai roo indo, Pue Ala motudu mbulimi Burahima melimba i tampo ide, au tapaidaimi ide-ide. 5I tempo iti, bara ara tampo au rawei Burahima, nauri hampaga pea. Agaiana Pue Ala modandimi iria, Nauli, ‘Tampo Kanaa ina Kuweiko hawe-hawe i pemuleamu.’ I tempo iti, Burahima bara mani ara anana. 6Agaiana mololitami Pue Ala i Burahima, Nauli: ‘Pemuleamu ina maidahe i tamponda tauna ntanina. Ina rapohawihe hai rapopeahi-ahihe ampu boea i tampo iti i lalu iba atuna parena. 7Agaiana roo indo, ampu boea au mampohawi pemuleamu ina Kuhukuhe, hai pemuleamu ina paduhe hangko i tampo iti mai menomba Iriko inde, i tampo Kanaa.’ 8Hangko indo, Pue Ala mopakanoto dandiNa i Burahima hai hambua tanda, iami ada mpetile. Mewali, Burahima mopaarami Isaki, hai natilemi i alo kaualu hangko i karapoanakana. Kaliliuana Isaki mopaarami Yako. Hai Yako mopaara anana au hampulo hai rodua. Ihira itimi au mewali toiorunta.

9Toiorunta iti mahinahe i Yusupu halalunda, ido hai rapobalumi bona rapohawi i tampo Masiri. Agaiana Pue Ala mamporangai Yusupu, 10hai kahopoana Nakabaha hangko i ope-ope kaparina. Yusupu Nawei Pue Ala kapande au mopamatana laluna Pirao, datu i tampo Masiri, alana naangka Pirao mewali gubernur i tampo Masiri hai topohawa i lalu souna. 11Roo indo, mewalimi rimi mahile i humalele tampo Masiri hai i tampo Kanaa. I tempo iti, bosa tauna mantodiha, hai toiorunta iti bara woripi ara paandenda. 12Hangko indo, nahadimi Yako, ara pare bae au rapobalu i tampo Masiri. Ido hai natudumohe anana, iamohe toiorunta, lao i Masiri meholo paandenda. Itimi polumaonda au nguru-nguruna lao i tampo Masiri. 13Kalaonda karombelana, napopaisaamohe Yusupu kaianami halalunda. I tempo iti hangko naisari Pirao kahalalunanahe Yusupu. 14Roo indo, Yusupu motewai Yako umana hai ope-ope halaluna bona melimbahe i tampo Masiri. Kabosanda tauna au melimba lao i Masiri, pitu pulona hai lima. 15Mewali, melimba mpuumi Yako i tampo Masiri, hai maida inditi duuna mate, nodo worihe toiorunta au hampulo hai rodua iti. 16Agaiana buunda raanti hule i boea Sike i tampo Kanaa hai ratawu i talumba au naholo Burahima hai doi pera hangko i pemuleana Hemor.

17Hungkumi tempona Pue Ala mopabukei dandiNa i Burahima, memule ntepuumohe toiorunta i tampo Masiri duuna bosahe. 18Kahopoana, ara hadua datu au moparenta i tampo Masiri au bara mokaisanga Yusupu. 19Datu iti mopakasusa katuwonda toiorunta hangkoia hai napopeahi-ahihe. Natudumohe motende analeinda au tobalilo bona mate. 20I tempo iti, mesupami Musa. Musa iti, hadua anangkoi au makara ntepuu hai napokatana Pue Ala. Talu pea wulana rakadipura tosaena, hai laomi rakabaha i wiwi owai Nil.#Pes. 2:3 21Anangkoi au rakabaha iti, naalami anantowawinena Pirao hai nakadipura nodo anana haduduana. 22Anti kanakadipurana iti, Musa rapagurumi hinangka kapandenda to Masiri, alana makuasa mpuu i pololitana hai i pobagona.

23Handami iba pulona parena tinuwuna Musa, arami tunggaiana mosondaki hangka to Yahudina. 24I tempo iti, Musa moita hadua to Yahudi napapahai hadua to Masiri. Laomi Musa mamperurui hangka to Yahudina duuna mopapate to Masiri iti. 25Pekirina Musa hai apa au nababehi iti, ina raisa hangka to Yahudina kaiana au Napilei Pue Ala mokabahahe hangko i karapohawinda. Agaiana barari raisa.

26Kahalona, naita mbuli Musa rodua to Yahudi au mombetie. Anti kanapeinaona mopahintuwuhe, ido hai nauliangaahe: ‘Moapari hai mombetiekau? Ikamu topohalalu.’ 27Agaiana hadua au mopapahai rangana mohumbanga Musa, nauliangaa: ‘Hema au moangkako mewali tadulakongki hai topebotusingki? 28Ba nupeinao wori mopapatena, nodo to Masiri au nupapate imaindi?’ 29Kanahadina Musa babehiana iti kewami, melangkami hangko i tampo Masiri lao maida i tampo Midian. Inditi, motambimi hai mopaara rodua anana.

30Iba pulona parena hangko indo, hawemi hadua malaeka mampohidupaa Musa i pada wungi hungku i Bulu Sinai. Malaeka iti mopatongawa watana i lalu rore api au mesupa hangko i tanga-tanga lopo. 31Tingkara mpuu Musa moita api iti, ido hai laomi nahungkuki napeinao bona naisa kaapana. Unga pea, nahadi wotuna Pue Ala au manguli: 32‘Ikomi Pue Ala au rapenombai toiorumu. Ikomi Pue Ala au rapenombai Burahima, Isaki hai Yako.’ Kanahadina Musa wotu iti, moradami anti kalangana, hai barapi bai moparesa api au rore iti. 33Roo indo, mololita mbuli Pue Ala i Musa: ‘Nuwosui kandupamu, lawi tampo au nupeangkai iti, iami tampo au malelaha. 34Kuitami pantodihanda taunaNgku to Yahudi i tampo Masiri. Kuhadimi peraroanda. Ido hai mendauluNa mai mokabahahe. Mewali maiko, ina Kutuduko mesule i tampo Masiri bona nukabahahe.’ ”

35“Musa au raae to Yahudi hangkoia, rauliangaa, ‘Hema au moangkako mewali tadulakongki ba topebotusingki?’ Musa idemi au natudu Pue Ala melempo i hadua Malaeka au mololita iria hangko i lalu lopo, bona mewali tadulakonda au mokabahahe hangko i karapohawinda. 36Musa iti au moanti to Yahudi hangko i tampo Masiri, hai au mobabehi ngkaia tanda kuasa hai tanda au metingkarai i tampo Masiri, i Tahi Malei hai i pada wungi i lalu iba pulona parena. 37Hai Musa wori au mopahawe lolita ide i to Yahudi, nauli, ‘Pue Ala ina moangka hadua hangko i halalumi. Ia ina Napopewali nabi nodo iko.’ 38Musa iti au mokampaihe to Yahudi au bosa i pada wungi. Ia hihimbela hai toiorunta hangkoia, hai ia wori au mohadi lolitana malaeka i Bulu Sinai. Iami au modoko Ngkora Ngkatuwo hangko i Pue Ala bona rapahaweake duuna ide-ide.

39Agaiana, nauri nodo, toiorunta hangkoia barahe mengkoru i Musa. Mosapuakamohe petadulakoina, rauli: ‘Agina mesule peamoke lao i tampo Masiri.’ 40Mewali, ido hai laomohe i Haruni, wutuna Musa, rauliangaa: ‘Nubabehiangkai anitu au kipenombai hangko i lengge ba apa pea, mewali tadulakongki. Lawi barapi kiisa apa au mewali i Musa au moantingkai mai hangko i tampo Masiri hangkoia.’ 41Hangko inditi, mobabehimohe lengge nodo hambaa ana japi hangko i bulawa. Lengge ana japi au rababehi iti, rapenombai hai raposambalea binata. Mosusamohe motoia apa au rababehi sadudua. 42Ido hai napalehimohe Pue Ala hai Napogiangaamohe menomba i betue. Nodo au teuki i lalu sura nabi-nabi au manguli node:

‘Ikamu to Yahudi! Mohuhukau pae popenomba

au rasambale hai popenomba ntanina Iriko hungkami i pada wungi i lalu iba pulona parena?

43Bara hambela! Agaiana moanti-antirikau mai

sou paidaana anitu Molok hai mpinowali au molengge betue Repan.

Itimi au nibabehi bona nipenombai.

Ido hai ina Kupogiangaa mpuukau ratawani, duuna raantikau hawe ntanda i orupena wanua Babeli.’ ”#Amo. 5:25-27

44“Tanganda toiorunta i pada wungi, Pue Ala motudumi Musa mobabehi Bambaru Penombaa#7:44 Bambaru Penombaa iti rababehi hangko i koli. Basa Indonesia: Kemah Kesaksian. au peisa rapombegeroa hai raanti-anti iumba pea kalaoanda. Bambaru Penombaa iti mewali tanda kaarana Pue Ala i olonda to Yahudi, hai rababehi moula hawana Pue Ala i Musa. 45Hai Bambaru Penombaa iti raanti liliu toiorunta mesua i tampo Kanaa ide, i tempona Yosua moantihe toiorunta mampemala tampo au tapaidai ide-ide hangko i taienda tauna au nawurahe Pue Ala. Hai Bambaru Penombaa iti ara mani i olonda duuna hawe i tempona Datu Daudi. 46Daudi mopamatana laluna Pue Ala, hai merapi bona Nawei tempo moaro sou penombaa i Pue Ala au napenombai Yako hangkoia. 47Barari Daudi au moaro souna Pue Ala, agaiana Salomori.

48Halalu-halalu, Pue Alami au melumbu kuasaNa hangko i ope-ope au rapenombai. Ia bara maida i sou au nababehi manusia. Lawi i lalu surana nabi hangkoia, au teuki node:

49‘Langi iami pohudaaNgku,

hai tampo pepangkaaKu.

Sou apa au nipeinao niaroaNa?

Iumba sou au hintoto Kupaidai? Bara ara.

50Lawi Iko au mampopewali hinangkana!’ ”#Yes. 66:1-2

51“Halalu-halalu! Rumihi mpuu pengkabatumi hai pembongomi! Mengkantulikau mampehadingi lolitana Pue Ala! Himbelakau hai toiorunta hangkoia, lawi mosapuaka liliukau Inao Malelaha. 52Toiorumi mampopeahi-ahimohe nabi-nabi hangkoia; ihira mopapatehe tuduana Pue Ala au mobambari kaina hawena hadua Tuduana Pue Ala au Manoto. TuduaNa au Manoto iti ide-ide nisapuaka hai nipapatemi. 53Nidokomi hawana Pue Ala au rapahawe malaeka i toiorunta, agaiana bara nipeulai.”

Setepanu rapapate

54Karahadina tadulako iti lolitana Setepanu, rumpu mpuuhe hai koi inaonda. 55Agaiana Setepanu nakuasaimi Inao Malelaha, hai mengoami i langi. Naitami peawana Pue Ala, hai naita wori Yesu meangka ntanda i koanana Pue Ala. 56Nauli Setepanu, “Peita! Kuita langi tebungkahi hai Ana Manusia meangka ntanda i koanana Pue Ala!”

57Roo indo, tadulako agama iti monganga-ngangamohe hai motabungimohe talinganda. Unga peahe lao mohaka Setepanu. 58Rabisoso lao i raoa wanua bona rawatui. Tauna au mosalai Setepanu iti, mowosuimohe badunda hai moalahe watu hai meweduhe. Badunda rawoli i lindona hadua tobalilo au rahanga Saulus. 59Tangana Setepanu rawatui, mekakaemi, nauli, “Pue Yesu, Nudokomi inaongku!” 60Roo indo, molingkudumi, hai mololita masisimbuku, nauli, “Pue, ineehe Nuhuku anti dosanda ide.” Karoona mololita nodo, matemi.

Currently Selected:

Suro 7: NPY

Highlight

Copy