Suro 17

Paulu i Tesalonika

1Paulu hai Silas mopaliliuhe polumaonda moliu i wanua Ampipolis hai Apolonia hawe i wanua Tesalonika. I Tesalonika iti, ara haogu sou penombaanda to Yahudi. 2Nodo au biasa nababehi, laomi Paulu i sou penombaa iti mampololita kana i Ngkorana Pue Ala hihimbela hai tauna au teruhu inditi. Talu mingguna mombeusu, i alo Penombaanda to Yahudi, 3Paulu mopakanotoahe apa lempona ihi Sura Malelaha, nauli, “Datu Topehompo au nadandi Pue Ala hangkoia, hangangaa mohalea kapari duuna mate, agaiana ia tuwo hule. Yesu au kupololita irikamu ide iami Datu Topehompo.” 4Arahe to Yahudi au modoko lolita iti hai au meulahe i Paulu hai Silas. Ara worihe tauna ntanina au mepoinalai, tepesua bosa to Yunani au mengkoru i Pue Ala hai bosa wori towawine au teadai.

5Agaiana to Yahudi au bara mepoinalai, mahinahe i Paulu hai Silas. Ido hai mokakiomohe tauna au lohehe mobago hai au mohuda-huda peahe i pobalu-balua. Bosamohe teruhu, hai mobabehimohe silaka i lalu wanua. Kahawenda i sou au rapaidai Paulu hai Silas, pesuanda peami. Tunggaianda mohakahe Paulu hai Silas hai raanti lao i lindonda tauna bosa, 6agaiana barahe ralambi. Ido hai mohakamohe ampu sou, hangana Yason. Yason iti hai bahangkia to Sarani rabisosohe lao i lindonda tadulako boea, hai monganga-ngangahe, rauli, “Paulu hai rangana ide mopawuli tauna i humalele dunia. Maihe inde mampeinaohe mogero-gero boeanta. 7Hai Yason idemi au modokohe i lalu souna! Tauna iti moewahe hawana datunta i Roma, rauli kaarana datu ntanina au rahanga Yesu.” 8Karahadina tauna bosa hai tadulakonda lolitanda, rumpu ntepuumohe. 9Kahopoana, Yason hai halalu hampepepoinalaina mohuhuhe ngkaia doi i tauna bosa hai tadulakonda, hai modandihe ane Paulu hai Silas mobabehi silaka i wanua, ihirami au rahaka. Roo indo hangko rakabaharihe.

Paulu i Berea

10I wengi iti, halalu hampepepoinalainda au i Tesalonika mouliangaahe Paulu hai Silas, “Agina manteulimokau hampai lao i Berea.” Mewali, lao mpuumohe. Kahawenda i Berea, Paulu hai Silas lao i sou penombaanda to Yahudi. 11Tauna i Berea iti maroa lalunda, bara nodo au i Tesalonika, lawi mampehadingihe lolitanda Paulu hai Silas hangko i katanana lalunda. Alo-alona moparesahe Sura Malelaha bona raisa ba manoto lolitana Paulu ba bara. 12Bosahe to Yahudi au mepoinalai i Yesu. Hai bosa worihe to Yunani au mepoinalai. To Yunani itihe iami tobalilo hai towawine au teadai.

13Bara mahae hangko inditi, rahadimi to Yahudi au i wanua Tesalonika popahawenami Ngkorana Pue Ala i wanua Berea. Ido hai laomohe i Berea mohuweki lalunda tauna bosa. 14Mewali, to Sarani inditi hoholigahe mamporangai Paulu lao i wiwi ntahi. Agaiana Silas hai Timotiu, maida manihe i Berea. 15To sarani iti, mamporangaihe Paulu hawe i wanua Atena. Roo indo, mesulemohe i Berea moanti tewaina Paulu i Silas hai Timotiu bona hoholigahe mekulele.

Paulu i Atena

16Tangana Paulu mampegia Silas hai Timotiu i Atena, masusa laluna moita kangkaiana watu molindo au rapenombai to Atena. 17Ido hai i sou penombaa, Paulu mombepakana i lolita hai to Yahudi hai tauna ntanina au mesua agama Yahudi. Alo-alona Paulu mopaturo worihe hema-hema pea au nalambi i pobalu-balua. 18I wanua Atena iti, ara worihe tauna mapande au mampeulai paturona Epikuros hai paturona Stoa#17:18 paturona Epikuros hai paturona Stoa: Moula Epikuros, tungaiana katuwona tauna bona tuwo peahe i lalu katana-tana. Moula Stoa, rara molambi katana iami modokoke apa pea au mewali. Agaiana nauli Paulu, tunggaiana katuwonta i dunia ide, bona mampeulaike peundeana Pue Ala.. Tauna au mapande iti mombehanai hai Paulu. Arahe au manguli, “Mengkamapande mpuu tauna ide ba apa dolou nauli.” Ara worihe au manguli, “Ba ina napahaweake kana i anitu hangko i tampo ntanina.” Nodo lolitanda, lawi i pepaturona, Paulu mepaturo kana i Yesu hai kana i katuwonda hule tauna hangko i kapate.

19Ido hai tauna iti moantimohe Paulu i poteruhua mahile au rahanga Bulu Aeropagus, rauliangaa, “Kipeinao mohadi paturo wou iti. 20Bara mani ara kihadi paturo ntanina au mepawuli nodo iti. Ido hai kipeinao moisa lempona.” 21(Lawi biasana to Atena hai tauna ntanina au maida inditi, raunde pea mampehadingi hai mampololita liliu apa au wou.)

22Ido hai meangkami Paulu i lindonda majelisi Aeropagus, nauli, “Ampu boea Atena! Kuita topoagama mpuukau. 23Kuisa iti, lawi i polumaongku i lalu wanuami inona, kuita penombaami hai kuita wori hambua watu penombaa au ara ukina node: ‘Penombaa i Pue au Bara Taisa.’ Mewali, pue au nipenombai au bara niisa, itimi au ina kupahaweakau. 24Pue Ala itimi au mampopewali dunia hai hinangka ihina, ia Ampu langi hai tampo. Ia bara maida i sou penombaa au nababehi tauna. 25Bara wori paraluu nadurei manusia, lawi Ia bara ara kamakurana. Ia au moweike katuwo hai inao hai hinangka au taparaluu. 26Hangko i hadua tauna, Pue Ala mampopemule hantina-hantina tauna, bona mampaidaihe dunia ide. Ia mopakanoto amimi hangko i nguru-nguruna tampana tampo au rapaidai ope-ope kadatua hai tempo poparentanda. 27Pue Ala mobabehi ope-ope iti bona Ia tahaoki, hai ane tahaoki, peisa tahumba. Katouana, Ia bara karao hangko irikita ope-ope. 28Lawi idemi lolitanda toiorunta: ‘Hangko Iria pea katuwonta. Ido hai peisake maida hai mokale i dunia ide.’ Himbela wori au nauki hadua toiorumi hangkoia, nauli: ‘Ikita ope-ope napoanamoke Pue Ala.’

29Mewali, halalu-halalu, bara maroa ane ikita au napoanamoke Pue Ala mopahimbelake Pue Ala hai watu molindo au rababehi hangko i bulawa ba hangko i salaka ba hangko i watu moula kapande manusia. 30Hangkoia, menombake i anitu. Nauri nodo, barake nahuku Pue Ala. Ia motuko pea mataNa i kantulita iti. Agaiana ide-ide, Natuduhe ope-ope tauna i humalele dunia bona menosohe hangko i dosanda. 31Lawi i hambela tempo au Napakanotomi, Pue Ala ina mobotusi kara-karanda tauna i humalele dunia i kanoto-notoaNa. PobotusiNa iti ina napobago hadua tauna au napilei Pue Ala. Hai tauna iti Napatuwo hule hangko i kapate bona tongawa i ope-ope tauna kaIana au Napilei.”

32I karahadina lolitana Paulu, arahe au moele-ele, lawi barahe mampoinalai kaarana tauna au peisa tuwo hule. Agaiana, ara worihe au manguli, “Kiunde mampehadingi mbuli lolitamu iti.” 33Roo indo, padumi Paulu hangko i poteruhuanda. 34Agaiana arahe au meula i Paulu hai mepoinalaimohe i Yesu. Hadua au mepoinalai i Yesu, iami Dionisius, hadua anggota majelisi Aeropagus. Ara wori hadua towawine au rahanga Damaris, hai ara worihe au ntanina.

Currently Selected:

Suro 17: NPY

Highlight

Copy