Suro 15

Pogombo mahile i Yerusale

1Hambela tempo, bahangkia to Yahudi hangko i tampo Yudea au mepoinalai i Pue Yesu laohe i wanua Antiokia. To Yahudi iti mopaturohe to Sarani i Antiokia, rauliangaahe, “Ane barakau ratile moula atura au napahawe Musa, batena barakau ina tehorema hangko i huku dosami!” 2Agaiana Paulu hai Baranaba, rumihi poewanda paturo iti. Kahopoana, rabotusi bona Paulu, Baranaba, hai bahangkia tauna ntanina au mepoinalai i Yesu lao mopahawe kara-kara iti i surona Pue Yesu hai penatua-penatua i Yerusale.

3Mewali, Paulu hai Baranaba rapopeangkamohe to Sarani i Antiokia hai raporangaihe hawe i raoa wanua. Hangko inditi, molumaomohe lao i Yerusale. I polumaonda iti, moliuhe i tampo Fenisia hai Samaria, hai i polumaoanda, motuntuhe noumba tauna au barahe to Yahudi mepoinalai worihe i Yesu. Bambari iti mopamatana lalunda ope-ope halalu hampepepoinalainda. 4Kahawenda i Yerusale, radoko maroahe to Sarani hai surona Pue Yesu hai penatua-penatua au ara inditi. Paulu hai Baranaba motuntuahe ope-ope au nababehi Pue Ala i polumaoanda hangkoia mobambari Ngkora Marasa i tamponda tauna au barahe to Yahudi.

5Agaiana ara worihe bahangkia toParisi au mepoinalaimohe i Yesu meangkahe mololita, rauli, “Tauna au barahe to Yahudi au mepoinalai i Yesu, hangangaa ratile hai ratuduhe mampeulai Aturana Musa!”

6Ido hai teruhumohe surona Pue Yesu hai penatua-penatua mampohuda-hudaa kara-kara iti. 7Mahaemohe mombehahanai, meangkami Peturu mololita nauli, “Halalu-halalu, niisa mpuu apa au mewali iriko. Bahangkia parena liu, napileina Pue Ala hangko i olomi, hai Natuduna mobambari Ngkora Marasa i tauna au barahe to Yahudi bona bambari iti rahadi hai rapoinalai wori. 8Hai Pue Ala, au moisa lalu tauna, modoko tauna au barahe to Yahudi, hai Ia mopakanoto tunggaiaNa iti i kaNaweinda Inao Malelaha nodo au mewali irikita hangkoia. 9Ikita to Yahudi hai au barahe to Yahudi, bara Napopontani Pue Ala. Napamalelaha lalunda lawi mepoinalaihe i Yesu. 10Mewali, halalu-halalu, moapari hai nipeinao mopaara karumpuna Pue Ala? Moapa hai nipeinao mopakasusahe hai ngkaia parenta au mapari hai palia au mantimi ntepuu? Mepongka i toiorunta hangkoia hawe irikita ide-ide, bara tabuku mampeulai ope-ope parenta hai palia iti! 11Tapoinalai molambike katuwo maroa bara anti pampeulainta parenta hai palia au nodo, agaiana anti kabulana laluna Pue Yesu. Nodo wori ihira.”

12Mewali ope-ope tauna au teruhu iti mandii-ndii pearaihe mampehadingi lolitanda Baranaba hai Paulu kana i tanda kuasa au rababehi hai kuasana Pue Ala tanganda i boeanda tauna au barahe to Yahudi. 13Karoonda Baranaba hai Paulu mololita, Yakobu mopahawe wori lolitana, nauli, “Halalu-halalu, nipehadingi lolitangku. 14Napahaweamoke Simo Peturu noumba Pue Ala nguru-nguruna motudungiahe ahiNa i tauna au barahe to Yahudi. Napilei worihe bona mewali taunaNa. 15Hintoto hai apa au rauki amimi nabi-nabi hangkoia, lawi ara teuki node:

16Nauli Pue:

‘Roo nodo, ina mesule mbuliNa.

Ina Kuaro hule poparentana Datu Daudi,

au nodomi haogu sou au madungkami;

ina Kupakaroa,

hai ina Kupatogo hule,

17bona ope-ope tauna ntanina

au barahe to Yahudi

peisa worihe menomba Iriko,

lawi Kukakiomohe mewali taunaNgku.’

18Nodomi pangulina Pue au mopakanoto tunggaiaNa hangkoia.”#Amo. 9:11-12

19Napaliliumi Yakobu lolitana, nauli, “Mewali, idemi pelambiaku halalu. Ineeke mopakapari tuwonda tauna au barahe to Yahudi au mengkoruhe i Pue Ala. 20Agina taukiahe hambua sura mopaturohe bona ineehe moande paande au rapopenomba i anitu, ineehe maande wahe hai ineehe maande bau hangko i binata au matempudu. Hai tauliangaa worihe bona ineehe motambi-tambi dele hai ineehe mebualosi. 21Hangko i ope-ope Aturana Musa, hawa au bahangkia iti pea au tapahaweahe, datike mopakoi inaonda to Yahudi. Lawi hangkongkoiami, to Yahudi au maida i boea-boeana mobasa Sura Aturana Musa i Alo Pengkarooangaa i sou penombaa. Hai Atura iti rabambari i ope-ope boeanda.”

Sura au rapakatu i to Sarani au barahe to Yahudi

22Roo indo, suronahe Pue Yesu, penatua-penatua hai ope-ope to Sarani au teruhu inditi mopileihe bahangkia ranganda bona ratuduhe lao i Antiokia hihimbela hai Paulu hai Baranaba. Au rapilei iti, rodua tobalilo au rabila halalu hampepepoinalainda, iami Silas, hai Yudasi, au rahanga wori Barsabas. 23I lalu sura iti, teuki node:

“Ikami, surona Pue Yesu hai penatua-penatua hahalalumi hampepepoinalai au arangkai inde, mopakatungkai sura ide irikamu halalu hampepepoinalaingki au barakau to Yahudi i wanua Antiokia hai humalele Siria, hai i propinsi Kilikia. Tabea!

24Ara kihadi bahangkia tauna hangko irikami inde au lao irikamu mopawulikau i lalu pepoinalaimi hai paturonda. Mewali bona niisa: barahe kitudu. 25Ido hai mogombomongkai inde, hai hampepekirimongkai mopilei bahangkia rangangki au kitudu lao irikamu hihimbela hai Baranaba hai Paulu au kipokaahi. 26Baranaba hai Paulu iti mohuhuhe katuwonda i Pue Yesu Kerisitu anti pampopolumaonda bago au naweihe Pue Ala. 27Mewali, ide-ide kitudumohe Yudasi hai Silas lao irikamu bona mopahaweakau apa au hintoto hai ihi surangki ide.

28Halalu, idemi pobotusi au napokana Inao Malelaha, hai au kipokana wori. Kiuliangaakau bona ineekau rapakasusa hai mampopengaa parenta. Batena ide pea au paraluu kipahaweakau:

29Ineekau moande paande au rapopenomba i anitu.

Ineekau maande wahe, hai ineekau maande onto binata au matempudu.

Ineekau motambi-tambi dele

hai ineekau mebualosi.

Ane nipakarao ope-ope babehia ide hangko i katuwomi, handami. Hampa indemi lolitangki.”

30Karoonda mombetabe, tauna au iba iti rapopeangkamohe lao i wanua Antiokia. Kahawenda i Antiokia, mokakiohe ope-ope topepoinalai i Pue Yesu bona raweihe sura au raanti. 31Karoonda mobasa sura iti, matanamohe lawi tepalindomi lalunda. 32Hangko inditi, Yudasi hai Silas mahaehe mololita mopaturo halalu hampepepoinalainda hai mohuweki pepoinalainda, lawi ihira iti nabi worihe. 33Ihira maida bahangkia alona hihimbela hai tauna i Antiokia, hai roo indo Silas hai Yudasi ina rapopelingkamohe mesule lao i Yerusale i tauna au motuduhe mai. Rauli to Antiokia iti, “Maroa-roakau i rara.” 34[Agaiana Silas bara mewali melingka, lawi napakanotomi maida i Antiokia.]

35Paulu hai Baranaba, mahaehe haodi maida i Antiokia. Ihira hai bosa tauna ntanina mopaturo hai mopahawe Ngkorana Pue i tauna inditi.

Paulu hai Baranaba mogaa

36Hangko indo, nauli Paulu i Baranaba, “Mesulemoke lao mosondaki halalu hampepepoinalainta i ope-ope boea au tapoliungi hangkoia i tempota mobambari Ngkorana Pue bona taita noumba katuwonda.”

37Baranaba mampeinao moanti Yohane au rauli Markus i polumaonda iti, 38agaiana nauli Paulu, “Bara maroa taporanga, lawi napalehimoke hangkoia i propinsi Pampilia hai bara mantaha mamporangaike duuna roo bagonta.” 39Mewali, mombehanaimohe Paulu hai Baranaba, alanda mogaa. Baranaba mangala Markus naporanga, hai mesawimohe i kapala tahi lao i lewuto Siprus. 40Paulu mopilei Silas naporanga. Hai rapopelingkahe halalu hampepepoinalainda i wanua Antiokia, rapekakaengaahe bona Pue Ala mokadipurahe hai ahiNa i lalu polumaonda. 41Paulu hai Silas mampolumaongi tampo Siria hai propinsi Kilikia, mopakaroho lalunda to Sarani au ara inditi.

Currently Selected:

Suro 15: NPY

Highlight

Copy