Mélékusu 3
3
Yésusu e é éŋúgíe mɔtɔ ba ombɔ́gɔ ugúe buisí bá sábadɛ
(Mot 12.9-14; Lók 6.6-11)
1Gɛ́hɛ́ go gɔnɔ go íŋene naá nnyaŋá ya mbósógólí mmue. Mɔtɔ ummue a mba lɛ́ hɔ́ɔ na ombɔ́gɔ ugúe. 2Batɔ go ágɛna Yésusu oŋgíso go go ɛ́na aáŋa a gaá mo éŋúgíe go buisí bá sábadɛ. Bá mba lɛ́ bá fúmbe go mo sɔ́mɛnɔ. 3Yésusu go oyana mɔtɔ mɔ́ɔnyɔ a mbaá lɛ na ombɔ́gɔ ugúe a amɔ́: «Fadɛ́gɛ́na hɔ́ɔlɔ́ naá oŋgíso yá mɔtɔ uŋkimée.» 4Yésusu go úhune kanɛ́ batɔ báaba bá mbaá lɛ hɔ́ɔ a amɔ́: «Gicele gɛ́cɔ́ gɛ́ oyamɔ́ nɛɛ́nɛ o?» Dɛ sɛmɛgananamɔ́ go ŋanana besé buisí bá sábadɛ lí, dɛ ŋanana gɛbɛ́ o? Ɛ́na lí, dɛ sɛmɛgananamɔ́ go sódio mɔtɔ lí, dɛ mo dɛ́ɛna a gúe o? Batɔ go gúdumidene pɔ́ɔ́. 5Yésusu a á bédíbíédíbíe na mpímí mɔtɔ uŋkimée, tɔ́nɔ na mahana naá odɛ́má, go oyana mɔtɔ mɔ́ɔnyɔ a amɔ́: «Gaanóna ombɔ́gɔ yáhɔ.» Gɛ́hɛ́ go yó gaanona, yó báá dúmbíe go éŋuge. 6Befelisiéŋe bá húmene naá nnyaŋá ya mbósógólí, gáábɔ́ go dómba go ɛ́da go cumbé na batɔ bá giimbó gá Elóode go go fúmbe pɛ́ sá go óna Yésusu.
Gɛcɛcá gá batɔ gɛ́ úlene naá Yésusu
(Mot 4.25; 12.15-16; Lók 6.17-19)
7Gɔ́ɔ Yésusu a mbaá bɔ́gɔ́gɛ́dɔ́ olɔŋɔ na behúúní bɛ́hɛ́ naá cɔ́lɔ ya máŋɛ́ má Gelilée. Gitúu gá batɔ gɛ́ báá lɛ gó mo biene, báaba bɛ́ ɛ́da fadɛgana naá gɛdɔŋɔ gá Gelilée na gá Yudée. 8Báaba bóncodío bɛ́ ɛ́da go úlene naá tɛ́sɔnɔ ya Yolósalɛmɛ, gɛayá gá Idumée, báaba gɔnɔ́ naá boayá búunú bá osaá yá Yɔlɔdɛ́ŋɛ, bóncodío gɔnɔ́ bɛ́ ɛ́da go úlene gɛayá gɛ́ɛgɛ mekúígíi na tɛ́sɔnɔ ya Tíile na ya Sídono. Gɛcɛcá gá batɔ moánɛ gɛ́ mba lɛ́ gɛ́ úlenine Yésusu goŋaá gɛ́ mba lɛ́ gɛ́ ɔ́bɔnɔ meŋiigíe mɛ́hɛ́. 9Aŋa Yésusu a mbɛɛ́ ɛ́ná goŋaá batɔ bá ná lɛ́ go dídigenine bá mo óda, go oyana behúúní bɛ́hɛ́ goŋaá bá mo fúmbene gilué u úlukie naá cɔ́lɔ, i íŋene naá miimpo na gɛ́ go go bó gálagala kanɛ gɛdɔmbɔ. 10Mammana, aŋa a mbeé éŋúgényée gɛcɛcá gá batɔ, bɔgɔnɔ́gɔnɔ mbɔ́dɔ mbɔ́dɔ bá báá lɛ gó ɛ́da go bégínigenye go go mo báláfɛna bé éŋugene. 11Aŋa gɔ́ɔgɔ tɔ́nɔ bɛgáda bá biliíli bɛ́ mbaá lɛ bɛ́ mo núune, bɛ́ mba lɛ bɛ́ mo obanɛna naá bɛgɔ́ndɔ́, bɛ́ oya ukelú naá mmoɛná bɛ́ amɔ́: «O lɛ́ Moɔnɔ́ ba Asaŋa.» 12Kanɛ́ Yésusu go bɛ́ bébégidine a amɔ́ bɛ́ dɛ hóámá bɛ́ dɛ oyáná mɔtɔ ánɛ́ɛ a lɔ́mɔ́.
Yésusu i í iyídé batɔ bɔ́ɔ́dɔ́ na báandɛ́ a báa bó dɔ́ŋɛ́nɔ́ a amɔ́ baapótɛlɛ
(10.1-4; Lók 6.12-16)
13Gɔ́ɔ Yésusu a bólɛgamɔ́ naá ogɔndɔ mmoɛná go dɔ́ŋɛnɔ batɔ báaba a mbaá lɛ a maamana, bá búú úlénée. 14Naá tɛ́mádɛ́má yabɔ́, gɛ́hɛ́ go iyide batɔ bɔ́ɔ́dɔ́ na báandɛ́ [báaba a mbaá bó fínídínyée a amɔ́ baapótɛlɛ], bá gɛ́ga nɛhɛ́, a bó dómana go go dúmenye nogálɔ ná Asaŋa, 15gɔnɔ́ a bó fáanana nɛgaŋa ná go gúne bɛgáda bá biliíli. 16Batɔ bɔ́ɔ́dɔ́ na báandɛ́ báaba Yésusu a mbi iyídé bábáa: Símono, mɔ́ɔnyɔ Yésusu a mbaá mo fáá ufíno yúntió a amɔ́ Píele#3.16 ufíno yúntió a amɔ́ Píele: o bana, go eninye na Mot 16.16-18; Sáŋ 1.42., 17Sáakɛ na ondimóní bɛhɛ́ Sáŋa, biimée báandɛ́ bahaŋa bá Sebedée, báaba Yésusu a mbaá bó logá a amɔ́ «Boanɛlɛyɛ́sɛ», nɔ́ɔnɔ gó lɛ́ aá «batɔ báaba bá fóananamɔ́ mbalámandáa#3.17 O bana, go eninye na bɔ́ɔbɔ naá Lók 9.54.», 18Andɛlɛ́ɛ, Fílibi, Betelemíi, Motíosi, Tómasɛ, Sáakɛ ohaŋa ba Alɛfɛ́ɛ, Tadɛ́ɛ, Símono, ba go noanana goŋaá gɛdɔŋɔ gɛ́hɛ́ gɛ́ bábɛa, 19na Yódasɛ Ɛsɛkalɛ́ɔtɛ, mɔ́ɔnyɔ ba go dúe Yésusu.
Yésusu na Belesebúlu, ombɛ́ ba mɔtɔ
(Mot 12.24-32; Lók 11.15-23; 12.10)
20Gɔ́ɔ Yésusu a mbaá gundé naá nnyaŋá olɔŋɔ na behúúní bɛ́hɛ́. Gitúu gá batɔ go gɔnɔ bábándɛgɛna naá boayá bɛ́hɛ́ mbɔ́dɔ ya goŋaá mɔ́ɔ moatɛ́ na behúúní bɛ́hɛ́ bá dɛ bɛáa gɛcamɛna gá go nyáa boóma. 21Aŋa ncíbo yɛhɛ́ ya batɔ ɛ mbɔɔ́ ɔ́bɔ́ bosɔ́mɔ moánɛ, go fadɛgɛna go go ɛ́da mo gɔ́lɔ, goakɛ́ ɛ mba lɛ́ ɛ gálagala yɛ amɔ́#3.21 ɛ mba lɛ́ ɛ gálagala: gokikilidie gúncoó gó lɔ́mɔ́ bá mba lɛ́ bá gálagala.: «Nɛɛ́nɛ! Mɔtɔ mɔ́ɔnyɔ a ná lɛ́ na buegu lí?»
22Muloodio má gicele mɔ́ɔmɔ mó mbɛɛ́ ɛ́dá go úle naá Yolósalɛmɛ, mó mba lɛ́ mó oya mó amɔ́: «A bɛanana bogaaga bá Belesebúlu, ombɛ́ ba mɔtɔ.» Mó mba lɛ́ mó gɔnɔ go oya mó amɔ́: «Bó lɔ́mɔ́ na bogaaga bá ufuŋe yá bɛgáda bá biliíli gɔ́ɔ a bɛ́ gúnemú.» 23Kanɛ́ Yésusu go mó dɔ́ŋɛnɔ go mó ágɛna ncaba yɛ́ɛyɛ a amɔ́: «Sátana a lɛ́ ba go gɔnɔ bégúne mɔ́ɔ moatɛ́ moatɛ lí? 24Aáŋa batɔ bá bufuŋe búmmue bá básalasala bɔ́ɔ na bɔ́ɔ, bufuŋe bɔ́ɔbɔ bó gaá fúé. 25Caŋa táŋɛ́ mmue aáŋa batɔ bá ncíbo mmue bá básalasala bɔ́ɔ na bɔ́ɔ, ncíbo ya ndiemi ɛ gaá fúé. 26Nɔ́ɔ gɔ́ɔ tɔ́nɔ, aáŋa Sátana a bénuugenye mɔ́ɔ ba moatɛ́ moatɛ, a amɔ́ a básalasala, bogaaga bɛ́hɛ́ bó do gɛɛ́ ɛ́dáná naá busío, bó gaá maná. 27Mɔtɔ a dɛ báá ba go íŋene naá nnyaŋá ya sɔ́gɔ́ mɔtɔ mɔ́ɔnyɔ a lɔ́mɔ́ gɛgaaga, a gɔ́lɔ bonɔ́mɛ bɛ́hɛ́ kanɛ go dóana go mo góda iŋgolí; aŋa a ŋamɔ́ a báá go mo góda iŋgolí, a ná lɛ́ ba goŋaá a gɔ́lɔ bonɔ́mɛ buimée bɔ́ɔbɔ naá nnyaŋá yɛ́ɛyɔ.
28«Mammana, ŋgaá nyó oyáná caá, Asaŋa a ŋga hééhínyée batɔ go bɛlɔgɔ bábɔ́ biimée na cigí sábɔ́ iŋkimée. 29Kanɛ́ mɔtɔ mɔ́ɔnyɔ a ŋgaá sɛgɛ́dá Gimmúmpúu gá Giliíli, ba ndiemi Asaŋa a dɛ ŋgá mo héehinye, goŋaá a á ŋaáa gɛlɔgɔ gɛ́ɛgɛ Asaŋa a ŋga ŋá a dɛ bófoolío.» 30Yésusu a mba lɛ́ a bó gálagala nɔ́ɔnɔ goŋaá bá mba lɛ́ bó oya bá amɔ́, «a lɛ́ na gɛgáda gá giliíli.»
Nnyeedíi na bolimóní bá Yésusu
(Mot 12.46-50; Lók 8.19-21)
31Gɔ́ɔ nnyeedíi na bolimóní bá Yésusu bú úlemú bá báá bolá; gáábɔ́ go lɔbɛnɔ go hanyɔ́, go dóma mɔtɔ goŋaá ɛ ɛ́da mo dɔ́ŋɛnɔ. 32Gitúu gá batɔ gɛ́ mba lɛ́ ndukíi gɛ́ báá go mo géŋgelidie. Bá báá lɛ gó mo oyana bá amɔ́: «Yigúédíi na batɛ́ɔbɛnɔ bá lɛ́ go hanyɔ́, bá go fúmbe.» 33Yésusu go bó gundie a amɔ́: «Ánɛ́ɛ a lɔ́mɔ́ mmaáa o? Baánɛ́ɛ bá lɔ́mɔ́ gɔnɔ́ bolimóní bámɛ o?» 34Yésusu go bédíbedibie batɔ báaba bá mbaá lɔmɔ́ ndukíi bá báá go mo géŋgelidie, gɛ́hɛ́ go bó oyana a amɔ́: «Núúnée nɔnɔ, mmaáa na bolimóní bámɛ bɔ́ɔ bábáa. 35Mammana, mɔtɔ uŋkimée mɔ́ɔnyɔ ɔ ɔyɔmɔ́ aŋa Asaŋa a maamanamɔ́, mɔ́ɔ a lɔ́mɔ́ ondimóní bamɛ, na nnyeedíi bamɛ.»
Currently Selected:
Mélékusu 3: YAS
Highlight
Share
Copy
Want to have your highlights saved across all your devices? Sign up or sign in
