Mélékusu 15
15
Bɛ́ ɛ́ ɛ́dá na Yésusu naá Pɛlátɛ
1Na gɛyɛ́nɛ́ túlúbú, bagɔ́nɔ́ɔ bá bedúmbí bɛbáágá naá Asaŋa go bábándɛgɛna go nɛganda olɔŋɔ na bafɛanɔ́ɔ bá gɛdɔŋɔ, muloodio má gicele, na batɔ biimée báaba naá Nɛgála nɛgɔ́nɔ́ ná gɛdɔŋɔ. Gáábɔ́ go góda Yésusu iŋgolí, go ɛ́da nɛhɛ́ bá báá mo íŋéné gá ŋgɔ́mɔnɔ Pɛlátɛ. 2Pɛlátɛ go mo úhune a amɔ́: «O lɛ́ ufuŋe yá Beyúdene lí?» Yésusu go mo gundie a amɔ́: «Go ó oyɛ́dá#15.2 Go ó oyɛ́dá: go ɛ́na naá Mot 27.11 na gibélincígínyé gɛ́ɛgɛ gɛ́ lɔ́mɔ́ hɔ́ɔ..» 3Bagɔ́nɔ́ɔ bá bedúmbí bɛbáágá naá Asaŋa bá báa lɛ gó ɛ́da go mo sɔ́mɔnɔ go gɛcɛcá gá bɛsɛnɛ. 4Gɔ́ɔ Pɛlátɛ a gɔnɔmɔ́ mo úhune a amɔ́: «O do gundényée boóma go go bósódio lí? Go ɔ́bɔnɔ gɛcɛcá gá bɛsɛnɛ gɛ́ɛgɛ bá go obeninyemú go nnyɔ́dɔ yahɔ o?» 5Kanɛ́ Yésusu go mo obɛna gɛmámɔ́, gɛmámɔ́ gɛ́ɛgɛ gɛ́ mbaá ŋaáa goŋaá Pɛlátɛ a békúke.
Pɛlátɛ a á sómbá goŋaá bó óna Yésusu
6Nnyómá iŋkimée naá gɛcamɛna gá gibíné gá Pásɛ́ka ya Beyúdene, Pɛlátɛ a mba lɛ́ a húmenye mɔtɔ ummue naá ncíbo ya gɛaŋɔ́ mɔ́ɔnyɔ gɛdɔŋɔ gɛ́ úhunemú. 7Kanɛ́ mɔtɔ ummue, ufíno yɛ́hɛ́ Balábasɛ, a mba lɛ́ naá ncíbo ya gɛaŋɔ́ na batɔ bóntió, goakɛ́ bá mbo óná mɔtɔ naá osaŋɔ́ yɔ́ɔyɔ yó mboó obá go go nuugenye bogɔ́nɔ́ɔ bá gɛdɔŋɔ gábɔ́. 8Gitúu gá batɔ go ɛ́da kanɛ́ naá Pɛlátɛ, gɛ́ mo úhene goŋaá a hóogio ŋgɔŋɛnɔ yabɔ́ aŋa naá bofɛ́lánɔ́ bábɔ́. 9Pɛlátɛ go bó úhune a amɔ́: «No lɛ́galɛgamɔ́ goŋaá nnyó dɛ́ɛnɛna ufuŋe yá Beyúdene lí?» 10Mammana, Pɛlátɛ a mba lɛ́ i íyimene goŋaá bagɔ́nɔ́ɔ bá bedúmbí bɛbáágá naá Asaŋa bá mba lɛ́ dúelú Yésusu go hɛagá. 11Bagɔ́nɔ́ɔ bá bedúmbí bɛbáágá naá Asaŋa bɔ́ɔbɔ go ɛ́da go gínigenye gitúu gá batɔ go goŋaá bú úhune Pɛlátɛ a bó dɛ́ɛnɛna Balábasɛ, caá akɛ́ Yésusu. 12Pɛlátɛ go gɔnɔ go úhune gitúu gá batɔ a amɔ́: «Ŋnamɔ́ kanɛ́ ɛkádɛ na mɔ́ɔnyɔ no dɔ́ŋɔnɔmɔ́ no amɔ́ ufuŋe yá Beyúdene o?» 13Gáábɔ́ go mo gundie bá ánca ukelú naá mmoɛná bá amɔ́: «Mo gilénéemú naá kolósi.» 14Pɛlátɛ go bó úhune a amɔ́: «Gɛbɛ́ kanɛ́ gɛ́hanɛ́ a á ná ŋaáa o?» Bɔ́ɔ bɛ́ ɛ́dana naá busío bá ánca na bogaaga bá amɔ́: «Mo gilénéemú naá kolósi.» 15Aŋa Pɛlátɛ a mbaá lɛ a lɛ́galɛga go óbio gitúu gá batɔ bese, gɛ́hɛ́ go bó dɛ́ɛnɛna Balábasɛ. Go Yésusu, a báá manɛ́ fáa bogaaga bá go mo sóala bɛságɔ. Naá nnyimé, gɛ́hɛ́ go mo íŋene goŋaá bá mo gilene naá kolósi.
Bisimbi bɛ́ hɔnɔ Yésusu
(Mot 27.27-31; Sáŋ 19.2-3)
16Bisimbi go gɔ́lɔ Yésusu, go íŋene nɛhɛ́ naá ndáŋɛ. Gáábɔ́ go bándɛgɛna bisimbi bíntió, bɛ́ báá mo géŋgélídíe. 17Bá báá lɛ gó ága Yésusu gɛmbɛ́lɛŋɛnyɛ gá kaba, bá báá nogá ɛdada há bufuŋe na cɛ́ndɛ́ bá báá mo sɔnɛ́gɔ́ go odóɛ. 18Gɔ́ɔ bɛ́ ɛ́damɔ́ go mo gidenine ɛmbɔ́gɔ bá amɔ́: «Mbédíígí, ufuŋe yá Beyúdene.» 19Bá mo óndana ombalɔ go odóɛ, bá mo cábana bɛdɛ́, bá gɔnɔ mo gulenine enúu go go lɔŋɔmɛdɔnɔ mosío naá busío bɛ́hɛ́. 20Aŋa bá mbaá dɔmbɔ́ go mo hɔnɔ, gáábɔ́ go mo úlie gɛmbɛ́lɛŋɛnyɛ gá kaba, bá báá gundíe go mo ága bɛla bɛ́hɛ́. Gáábɔ́ go húme nɛhɛ́ go go ɛ́da mo gilene naá kolósi.
Bisimbi bɛ́ á giléné Yésusu naá kolósi
(Mot 27.33-44; Lók 23.36-43; Sáŋ 19.16-24)
21Símono untió, ba tɛ́sɔnɔ ya Siléene, isée ba Alɛgɛsándɛlɛ na Lúfusu#15.21 O bana, go eninye na bɔ́ɔbɔ naá Oló 16.13., a mba lɛ́ a dómbana naá pɛ́ moánɛ, a nco gundene naá ntɛ́mɛ́. Bisimbi go mo gaŋa goŋaá a bádóɛgɛna kolósi ya Yésusu. 22Gáábɔ́ go ɛ́da na Yésusu naá hoóma háaha bá dɔ́ŋɔnɔmɔ́ bá amɔ́ Gologóta, nɔ́ɔnɔ gó lɛ́ aá «hoóma háaha há fóananamɔ́ giŋóŋkólóŋó gá odóɛ.» 23Aŋa bá mbaá bolá hɔ́ɔ, bá mba lɛ́ bá lɛ́galɛga go mo dóŋio mɔgɛ́bɔ nebígínyéelú na ondɔ yá gifuugie makánya, míile. Kanɛ́ Yésusu a mbi inyé go bónyo. 24Gɔ́ɔ bá gilenemú Yésusu naá kolósi. Go go aba bɛla bɛ́hɛ́, bá báá bɛ́ nɔɔ́ɔ go adɔ go go íyime gɛ́ɛgɛ sɔ́gɔ́ɔ a gaá ná bɛáa#15.24 Ɛsagɔ 22.19.. 25Bó mba lɛ́ go bigúlí bɛ́nnámanyɛ́ na gímmue bá gɛyɛ́nɛ́ gɔ́ɔ bá mbaá mo giléné naá kolósi. 26Ŋgɔ́ŋɛ́ yɛ́ɛyɛ ɛ mbaá lɛ ɛ dúfenye mbɔ́gɔ́ yá gɛsɛnɛ gá Yésusu go gúe go gɛ́ ɛ mba lɛ́ ɔ́ŋɔ́ɔlú náana: «Ufuŋe yá Beyúdene yɔ́yɔ́ɔ.» 27Bá báá gilénée tɔ́nɔ bahándá báandɛ́ gɛcamɛna gímmue eé gímmue na Yésusu, onyɔ moánɛ naá yɛhɛ́ kolósi, mɔ́ɔnyɔ naá boayá bá ombɔ́gɔ onɔ́mɛ, mɔ́ɔnyɔ naá boayá bá ombɔ́gɔ odádɛ́. [28Gó mba báŋaáa nɔ́ɔnɔ goŋaá nogálɔ ná Asaŋa nɔ́ɔnɔ nó ɛ́nanɛna. Nó lɔ́mɔ́: Bá mba mo baná naá olɔŋɔ yá bepelípélí#15.28 Go ɛ́na Lók 22.37; Iseyíi 53.12..] 29Batɔ báaba bá mbaá lɛ bá dómbana hɔ́ɔ, bá mba lɛ́ bá gide ɛdóɛ bɛ́ ɛ́da bá mo sɛga, bá amɔ́ gɛ́hɛ́ bá amɔ́: «Ɛɛ́ɛŋ! Maamɔ́ɔ mɔ́ɔnyɔ o mbaá lɛ o lɛ́galɛga go gada Nnyaŋá ya Asaŋa go go fóaga intió go medúgú táŋɛ́ mádadɔ́#15.29 Ɛsagɔ 22.8; Sáŋ 2.19., 30bósódíomú maamɔ́ɔ moatɛ́, siisé naá kolósi aá!» 31Caŋa mmue, bagɔ́nɔ́ɔ bá bedúmbí bɛbáágá naá Asaŋa na muloodio má gicele bá hɔnɔ Yésusu bɔ́ɔ na bɔ́ɔ bá amɔ́: «A á sódónyóo batɔ bóntió, a dɛ bósó ba go bósódio mɔ́ɔ moatɛ́! 32Kanɛ́ ŋgáa Mesíi, ufuŋe yá batɔ bá Ɛ́sɛlahɛ́ɛlɛ a siise godɔ́ɔdɔ naá kolósi aá!» Dɛ amɔ́ dɛ ɛ́na boóma moánɛ, dɛ gaá ágá odɛ́má yɛ́cɔ́ naá mɔ́ɔ. Batɔ báaba bá mbaá lɛ naá kolósi naá boayá bá Yésusu bá mo sɛga tɔ́nɔ.
Yésusu a á gúé naá kolósi
(Mot 27.45-56; Lók 23.44-49; Sáŋ 19.28-30)
33Go tólóbóo, mbíno go dómba go oba naá gɛdɔŋɔ giimée, gó bɛ́ɛ́ ɛ́dá húme bigúlí bɛ́dadɔ́. 34Go bigúlí bɛ́dadɔ́ bɛ́ɛbɔ, Yésusu go áncɛda ukelú naá mmoɛná, a amɔ́: «Eloyí, Eloyí, lámá sabakatanɛ́ɛ o?» Nɔ́ɔnɔ gó lɛ́ aá: «Asaŋa bamɛ, Asaŋa bamɛ, o túfiemú nnyimé náana goakɛ́#15.34 Ɛsagɔ 22.2, gálɛ́dáalú na noalamɛ́ɛ. o?» 35Batɔ báaba bá mbaá lɔmɔ́ hɔ́ɔ bá mo ɔ́bɔnɔ a gálagala nɔ́ɔnɔ, go oyɛda bá amɔ́: «Bódólígínyóomú nɔnɔ, a ná lɛ́ go dɔ́ŋɔnɔ Elíi.» 36Mɔtɔ ummue mɔ́ɔnyɔ naá olɔŋɔ yábɔ́ go ɛ́da a díine, a báá dúmé giyugú naá gɛtóánɔ́ɔ gá mɔgɛ́bɔ, a báá gɛ́ cékígínyée naá ombalɔ, gɛ́hɛ́ go mo dóŋio goŋaá a libige ukelú yɛ́hɛ́ kɔ́ɔ#15.36 Ɛsagɔ 69.22., o oya a amɔ́: «Gɛ́gɛ́dɛ́na nɔnɔ, dɛ ɛ́na aáŋa Elíi a gaá ncó mo siisie naá kolósi.»
37Gɔ́ɔ kanɛ́ Yésusu a áncɛdamɔ́ ukelú ogɔ́nɔ́, gɛ́hɛ́ go obɛnɛna. 38Sanda ya goodo yɛ́ɛyɛ ɛ mbaá lɔmɔ́ ɛ sala Nnyaŋá ya Asaŋa go biseli bɛ́andɛ́#15.38 Gihúmie 26.31-33. go salɛga go biseli bɛ́andɛ́, gó bayɛga gɛmmoɛnáa gó nco héme gɛmbádáa. 39Ogɔ́nɔ́ɔ ba bisimbi mɔ́ɔnyɔ a mbaá lɛ tɛ́nɛ́ɛ cɛŋɛ na Yésusu ɛ ɛ́nana mbɔ́dɔ yɛhɛ́ ya nigúe, go gálɛda a amɔ́: «Mammana, mɔtɔ mɔ́ɔnyɔ a mba lɛ́ Moɔnɔ́ ba Asaŋa.» 40Bakɔ́dɔ bóntió tɔ́nɔ bá mba lɛ́ hɔ́ɔ bá núune naá gɛyábá. Naá olɔŋɔ yábɔ́, Malɛ́a ba tɛ́sɔnɔ ya Magadaláa, Malɛ́a mɔ́ɔnyɔ nnyeedíi ba Sáakɛ ba gifío na Yósɛsɛ, na Salóma tɔ́nɔ. 41Bakɔ́dɔ bɔ́ɔbɔ bá mba lɛ́ bá mo bienene, bá mo óhigonyo go masɔ́mɔ gɛcamɛna gɛ́ɛgɛ a mbaá lɛ naá Gelilée. Bá mba lɛ́ gɔnɔ́ na gɛcɛcá gá bakɔ́dɔ gíntió gɛ́ɛgɛ gɛ́ mbɛɛ́ ɛ́dá olɔŋɔ na Yésusu naá Yolósalɛmɛ.
Bá á miée Yésusu
(Mot 27.57-61; Lók 23.50-56; Sáŋ 19.38-42)
42-43Aŋa hɛɔbɔ́bɔ́ɔ hɛ́ mboó oba, gɔ́ɔ, Yósɛbɛ, ba tɛ́sɔnɔ ya Alɛmatɛ́ɛ u úlemú a báá bolá. A mba lɛ́ giidí gá mɔtɔ gímmue naá Nɛgála nɛgɔ́nɔ́, mɔ́ɔ tɔ́nɔ a mba lɛ́ a bɛanana toodo odɛ́máa ya goŋaá Bufuŋe bá Asaŋa bó úlene. Bó mba lɛ́ buisí bá go bégedegedie go sábadɛ, naá gobélie. Gó moánɛ, Yósɛbɛ a mbɛɛ́ ɛ́dá na nigégé niimée naá Pɛlátɛ go go mo úhune gigúe gá Yésusu, a gɛ́ mie otóotoɛ yá sábadɛ. 44Kanɛ́ Pɛlátɛ a mba békúkée aŋa a mbɔɔ́ ɔ́bɔ́ goŋaá Yésusu a báa go gúe, gɛ́hɛ́ go oyɛda goŋaá bá dɔ́ŋɛnɔ ogɔ́nɔ́ɔ ba bisimbi go go mo úhune ɛ́na a báa gúe fueké. 45Aŋa ogɔ́nɔ́ɔ ba bisimbi a mbaá mo oyáná goŋaá Yésusu a báá go gúe, Pɛlátɛ go fáa Yósɛbɛ bogaaga bá go gɔ́lɔ gigúe gá Yésusu. 46Yósɛbɛ go ɔ́ndɔ nnɔ́mbɔ́ ya gɛla, gɛ́hɛ́ go úlie gigúe gá Yésusu naá kolósi, a báá gɛ́ máŋánáa naá nnɔ́mbɔ́ yɛ́ɛyɔ, go ɛ́da gɛ́ bídiginye naá gɛbɛ́lá gɛ́ɛgɛ bá mbaá dímé naá gɛdánɛ́dánɛ́. Gɔ́ɔ a tíŋgilidiemú gɛantá gá ɛdánɛ́ go go buige miíŋene má gɛbɛ́lá. 47Malɛ́a ba Magadaláa na Malɛ́a mɔ́ɔnyɔ nnyeedíi ba Yósɛsɛ bá mba lɛ́ bá núune hoóma háaha bá mbaá mo ágá hɔ́ɔ.
Currently Selected:
Mélékusu 15: YAS
Highlight
Share
Copy
Want to have your highlights saved across all your devices? Sign up or sign in
