Mélékusu 10
10
Gɛsɛnɛ gá go áda nɛbáná
(Mot 19.1-9; Lók 16.18)
1Yésusu u ú úlúkíe hɔ́ɔlɔ́, go ɛ́da naá gigísi gá cí gá Yudée, a báá bácaá osaá yá Yɔlɔdɛ́ŋɛ. Gɔ́ɔ gɔnɔ́ bitúu bitúu bá batɔ bɛ́ mbaá bábándɛ́gɛ́ná naá boayá bɛ́hɛ́, gɛ́hɛ́ go ɛ́da go bó húunenye, aŋa gɔ́ɔgɔ a mbaá lɔmɔ́ u úle a ŋanana bɛcamɛna biimée. 2Befelisiéŋe bóncodío go mo báyɛkɛna, go mo dámbɛna na ŋgúhune yɛ́ɛyɛ bá amɔ́: «Mɔtɔ a bɛanana bogaaga bá go inye ogɛ́ lí?» 3Yésusu go bó gundie na ŋgúhune yɛ́ɛyɛ a amɔ́: «Gicele gɛ́hanɛ́ Mɔ́sɛsɛ a mbaá nyó ágɛ́ná o?» 4Kɔ́ɔ bá mo oyana bá amɔ́: «Mɔ́sɛsɛ a mba fáá bogaaga bá go ɔ́ŋɔ kálata yɛ́ɛyɛ ɛ dúfenyemú goŋaá nɛbáná nɛ́ á maná, o lo go gúne okɔ́dɔ bahɔ#10.4 Go ɛ́na naá Bicele 24.1..» 5Gɔ́ɔ Yésusu a bó oyanamɔ́ a amɔ́: «Aáŋa Mɔ́sɛsɛ a mba nyó ágɛ́ná gicele gɛ́ɛgɔ, bó lɔ́mɔ́ go gɛlalaga gɛ́nyɔ́ gá odɛ́má. 6Naá gobayɛga gá cí, Asaŋa a mba bó gedíe onɔ́mɔtɔ́ na okɔ́dɔ#10.6 O bana 1.27; 5.2.. 7Go busío moánɛ gɔ́ɔ onɔ́mɔtɔ́ a ná húmemú naá nnyaŋá ya biisée, [a bágódɛna okɔ́dɔ bɛhɛ́,] 8biimée báandɛ́ bá bɛ́ɛmba nnyɔ́dɔ táŋɛ́ mmue. Hɔ́ɔlɔ́ bá dɛ báá gɔnɔ́ báandɛ́, goana nnyɔ́dɔ táŋɛ́ mmue. 9Mɔtɔ kanɛ́ a dɛ ádóná bɔ́ɔbɔ Asaŋa a mbaá nebígínyée.» 10Aŋa Yésusu a mbaá gundé naá nnyaŋá, behúúní bɛ́hɛ́ bá báá lɛ gó gɔnɔ mo úhune ŋgúhune símmue eé símmue naá gɛsɛnɛ gá goádona nɛbáná. 11Gɛ́hɛ́ go bó oyana a amɔ́: «Mɔtɔ a amɔ́ i inye ogɛ́ a báá giŋé okɔ́dɔ uncodío, a á ŋaáa gɛdáŋa naá busío bá okɔ́dɔ bɛhɛ́ ba otóotoɛ. 12Caŋa táŋɛ́ mmue, okɔ́dɔ mɔ́ɔnyɔ i inyemú onɔ́mɛ a báá giŋé onɔ́mɔtɔ́ uncodío, a á ŋaáa gɛdáŋa.»
Yésusu a á fonáa baábayɔ́
13Gɔ́ɔ batɔ bú úlinemú Yésusu na baábayɔ́ goŋaá a bó dálana ɛmbɔ́gɔ go go bó fona. Behúúní bɛ́hɛ́ go lege batɔ bɔ́ɔbɔ. 14Aŋa Yésusu a mbɛɛ́ ɛ́ná boóma moánɛ, gɛ́hɛ́ go ɔ́bɔ gokánya naá odɛ́má, go gálɛda behúúní bɛ́hɛ́ a amɔ́: «Dɛ́ɛ́na nɔnɔ baábayɔ́ bú úlene mekúígíi namɛ, no do bó legé. Bufuŋe bá Asaŋa bó lɔ́mɔ́ go busío bá batɔ báaba bá lɔ́mɔ́ aŋa bɔ́ɔ. 15Mammana, ŋgaá nyó oyáná caá; mɔtɔ mɔ́ɔnyɔ a ná ŋamɔ́ a dɛ olímínyóo Bufuŋe bá Asaŋa aŋa moádɔmbɔ́ o olimonyomú, a dɛ ŋgí íŋene hɔ́ɔ.» 16Yésusu a báa lɛ gó ɛ́da go gɔ́lɔnɔ baábayɔ́ ummue go ummue, a bó dálana ɛmbɔ́gɔ go go bó fona.
Bó lɛ́ ndɔlɛ goŋaá mɔtɔ ba bonɔ́mɛ i íŋene naá Bufuŋe bá Asaŋa
(Mot 19.16-30; Lók 18.18-30)
17Aŋa Yésusu a mbaá húmé go go biene pɛ́, mɔtɔ ummue go úle a díine, go nco gule enúu naá mɔ́ busío, go mo úhune a amɔ́: «Gɛnɔ́gɔ́ gá Ogɔ́nɔ́ɔ, ndɔ́mɔ́ bá go ŋa ɛkádɛ goŋaá mbɛa bámɛ bodáŋɔ naá gɛɔyɔ gá kanɛ mesúge o?» 18Yésusu go mo oyana a amɔ́: «Ɛkádɛ́ o tɔ́ŋɔnɔmɔ́ gɛnɔ́gɔ́ gá ogɔ́nɔ́ɔ o? Mɔtɔ ba gɛnɔ́gɔ́ a dɛ báá, goana Asaŋa mokáa a lɔ́mɔ́ gɛnɔ́gɔ́. 19Go íyimene bɛlɔsɛnɔ bɛ́ɛbɛ bɛ́ lɔ́mɔ́: O do óná mɔtɔ, o do ŋaáa gɛdáŋa, o do íbé boóma, o do básómbɛ́ná mɔtɔ, [o do gɔ́lɔ́ boóma bá sɔ́gɔ́ɔ go moliolio]. O hálamana tɛ́ɔ na yigúédíi#10.19 Go ɛ́na naá Gihúmie 20.12-16; Bicele 5.16-20..» 20Mɔtɔ go mo oyana a amɔ́: «Ogɔ́nɔ́ɔ, ndɛ́ bɛ́dɛ́gɛ́náalú bɛlɔsɛnɔ bɛ́ɛbɔ biimée gó bayɛga na bohaŋa bámɛ.» 21Yésusu go mo núunide na gɛnɔ́ɔ́nɛ́nɔ́, go mo oyana a amɔ́: «Boóma búmmue táŋɛ́ bó gá go taŋanɛna; ɛ́dá, dúé buimée bɔ́ɔbɔ o lɔ́mɔ́ na bɔ́, go abana basógasoga, nɔ́ɔnɔ gɔ́ɔ o ná bɛamɔ́ bonɔ́mɛ naá mmoɛná; naá nnyimé úlé, mbienéemú.» 22Aŋa mɔtɔ a mbɔɔ́ ɔ́bɔ́ dogálɔ dɔ́ɔdɔ, nnyɔ́dɔ yɛhɛ́ go bádɛ́ɛnɛna, go biene pɛ́ ɛ ɛ́da a súŋe busío, mammana a mba lɛ́ na bonɔ́mɛ degédegé.
23Yésusu a á núúnídé naá boayá bɛ́hɛ́, go oyana behúúní bɛ́hɛ́ a amɔ́: «Bó ná bɛ́ɛmba ndɔlɛ makɔ́nɔ́ goŋaá batɔ báaba bá lɔ́mɔ́ na bonɔ́mɛ bí íŋene naá Bufuŋe bá Asaŋa!» 24Dogálɔ dɛ́hɛ́ dɔ́ɔdɔ dó mba yuŋgúlídíe behúúní bɛ́hɛ́. Yésusu go bó fitinye a amɔ́: «Baaná bámɛ, bó lɛ́ ndɔlɛ makɔ́nɔ́#10.24 ndɔlɛ makɔ́nɔ́ : Ŋgɔ́ŋɛ́ síncodío sá cóá cóá sɛ́ gídenine háalá náana: go báaba bá áganamɔ́ odɛ́má yábɔ́ naá bonɔ́mɛ. go go íŋene naá Bufuŋe bá Asaŋa! 25Bó lɛ́ fɛaŋɔ goŋaá gɛantá gá nnyama aŋa samóo gɛ́ dómba naá gɛasɛ́ gá nnɔndɔ, kanɛ́ ndɔlɛ goŋaá onɔ́mɛnɔmɛ ba mɔtɔ i íŋene naá Bufuŋe bá Asaŋa.» 26Behúúní bá mba gɔnɔ́ békúke akɛ́báamɔ́; bá bágálɛnagalɛna bá amɔ́: «Bá lɔ́mɔ́ bá go sódio kanɛ́ ánɛ́ɛ o?» 27Yésusu go bó ágɛna oŋgíso go bó oyana a amɔ́: «Naá busío bá batɔ, bó lɛ́ ndɔlɛ, kanɛ́ caá akɛ́ naá Asaŋa, mammana, boóma bá ndɔlɛ bó do báá naá Asaŋa.»
28Gɔ́ɔ Píele o oyanamɔ́ Yésusu a amɔ́: «Bese! Bɛɛcɔ́ɔ dɛ mba síé dɛ báá dɛ́ɛ́ná buimée dɛ báá go fídé.» 29Yésusu go oyɛda a amɔ́: «Mammana mammana, mɔtɔ a amɔ́ a síe a báá dɛ́ɛ́ná nnyaŋá, bolimóní bá banɔ́mɔtɔ́ na bá bakɔ́dɔ, nnyeedíi, isée, baaná ɛ́na ntɛ́mɛ́ sɛ́hɛ́ go busío bámɛ na go busío bá Gɛnɔ́gɔ́ gá Cɔ́mɔ, 30moóma mɛ́hɛ́ mɔ́ɔmɔ a dɛ́ɛnamɔ́ mɔ́ɔmɔ, mó ŋgɛ ɛ́dá bíene na bɔ́ɔbɔ bó bíenye moóma ntɛdɛ naá gɛɔyɔ gɛ́hɛ́ gɛ́ɛgɛ naá cí háalá, nnyaŋá, bolimóní bá banɔ́mɔtɔ́ na bá bakɔ́dɔ, bennyeedíi, baaná, ntɛ́mɛ́ síncodío, tɔ́nɔ na duséésényée, gó gunde a bɛa gɛɔyɔ gá kanɛ mesúge naá cí yɛ́ɛyɛ yɛ úlenemú. 31Kanɛ́ gɛca gá báaba bá lɔ́mɔ́ bá busío godɔ́ɔdɔ bá ŋga bɛ́ɛ́mbá bá nnyimé; tɔ́nɔ gɛca gá báaba bá lɔ́mɔ́ bá nnyimé godɔ́ɔdɔ, bá ŋga bɛ́ɛ́mbá bá busío.»
Yésusu a á dóógío nigúe nɛ́hɛ́ na púfuge yɛhɛ́ go oŋɛndɔ yá gádadɔ́ɔ
32Bá mba lɛ́ go pɛ́ bá bólɛgana naá Yolósalɛmɛ, Yésusu ɛ ɛnda naá busío bábɔ́. Behúúní bɛ́hɛ́ bá báa lɛ gó bɛ́ɛmba na mayayɔ́, báaba bá mbaá lɛ bá bó bienene bá mba lɛ́ tɔ́nɔ na bofoá go nnyɔ́dɔ. Gɔ́ɔ Yésusu a gɔnɔmɔ́ gɔ́lɔ Bɛɔdɔ́ɔ na bɛ́andɛ́ a báá bɔ́gɔ́gɛ́dɔ́ nabɔ́, go ɛ́da go bó oyanɛna bɔ́ɔbɔ bó mbaá lɛ ba go mo bolɛna a amɔ́: 33«Ɛ́ná nɔnɔ, goɛ́da gɛ́cɔ́ gɔ́gɔ́ɔ naá Yolósalɛmɛ. Hɔ́ɔ gɔ́ɔ bá gaá ná túé go bagɔ́nɔ́ɔ bá bedúmbí bɛbáágá naá Asaŋa na muloodio má gicele, yɔmɔ́ɔ, Moɔnɔ́ ba mɔtɔ. Bɔ́ɔbɔ bá gaá sómbá goŋaá a háanana na nigúe, bá lɛ go mo íŋene go batɔ bá kanɛ go olimonyo Asaŋa. 34Batɔ bá ndiemi bá ná mo fánɛnafanɛna, bá mo cábana bɛdɛ́, bá mo sóala bɛságɔ, bá mo óna. Kanɛ́ naá nnyimé ya medúgú mádadɔ́ a lɛ go fúfuge.»
Ŋgɔŋɛnɔ ya Sáakɛ na Sáŋa
35Kɔ́ɔ bahaŋa bá Sebedée báandɛ́, Sáakɛ nɛhɛ́ na Sáŋa bá báyɛkɛnamɔ́ Yésusu bá báá lɛ gó mo oyana bá amɔ́: «Iloodio, dɛ lɛ́galɛga goŋaá o ŋa boóma bɔ́ɔbɔ dɛ gaá ná go úhúné go busío bɛ́cɔ́.» 36Yésusu go bó úhune a amɔ́: «No lɛ́galɛgamɔ́ goŋaá ŋŋa ɛkádɛ go busío bɛ́nyɔ́ o?» 37Bá amɔ́ gɛ́hɛ́ bá amɔ́: «Dɛ lɛ́galɛgamɔ́ dɛ amɔ́; aŋa o ná ŋamɔ́ o ná lɛ́ naá undukí yáhɔ yá bufuŋe, o có lukumenye ummue naá boayá báhɔ bá ombɔ́gɔ onɔ́mɛ, mɔ́ɔnyɔ untió naá yɔ́ɔyɔ yá odádɛ́.» 38Yésusu go bó gundie a amɔ́: «No do bósó go íyimene boóma bɔ́ɔbɔ no ɔŋɔnɔmɔ́. No lɛ́ ba go nyóɛna ɛnnyóɛ́ná hɛ́ɛhɛ yɔmɔ́ɔ kaá ná nyóɛ́ná, no gunde no bɛa giyuminye gɛ́ɛgɛ kaá ná bɛáa lí?» 39Bá amɔ́ gɛ́hɛ́ aá: «Dɛ lɛ́ ba go hɛ́ nyóɛna.» Yésusu go bó oyana a amɔ́: «Ɛɛ́ɛŋ! No gaá nyóɛ́ná ɛnnyóɛ́ná hɛ́ɛhɛ yɔmɔ́ɔ kaá ná nyóɛ́ná no gunde no bɛa giyuminye gɛ́ɛgɛ yɔmɔ́ɔ kaá ná bɛáa#10.39 O bana, go eninye na Meŋ 12.2.. 40Kanɛ́, naá gɛ́ɛgɛ gá go lukumene mɔ́ɔnyɔ naá boayá bá ombɔ́gɔ onɔ́mɛ yámɛ, mɔ́ɔnyɔ naá bɔ́ɔbɔ bá odádɛ́, a dɛ bósó yɔmɔ́ɔ mɔ́ɔ ndɔ́mɔ́ ba go sómba nɔ́ɔnɔ; goakɛ́ indukí moánɛ ɛ lɔ́mɔ́ go báaba Asaŋa a mbaá gedíe go busío bábɔ́.»
41Aŋa behúúní bɔ́ɔ́dɔ́ báaba bóncodío bá mbɔɔ́ ɔ́bɔ́ boóma bɔ́ɔbɔ, gáábɔ́ go ɔ́bɛnɔ Sáakɛ na Sáŋa mpímí. 42Gɔ́ɔ Yésusu a bó dɔ́ŋɛnɔmɔ́ bɔ́ɔ biimée go bó oyana a amɔ́: «No íyimene bɛɛnyɔ́ɔ moatɛ́ goŋaá báaba bá lɔ́mɔ́ aŋa mefuŋe má gɛdɔŋɔ bí íligene batɔ bábɔ́ na masɔ́mɔ, bɛgaaga bɛ́ bó míneminie. 43Bó do báá nɔ́ɔnɔ naá kadɛ́gadɛ́ɛ yɛnyɔ́. Kanɛ́ aáŋa mɔtɔ a lɛ́galɛga go bɛ́ɛmba ogɔ́nɔ́ɔ naá kadɛ́gadɛ́ɛ yɛnyɔ́, a háanana go bɛ́ɛmba mɔ́ɔnyɔ a yɔgɔnɔmɔ́ go busío bɛ́nyɔ́. 44Gó gɔnɔ gunde, aáŋa mɔtɔ a lɛ́galɛga go bɛ́ɛmba ba busío naá kadɛ́gadɛ́ɛ yɛnyɔ́, ŋgáa a bííyie gɛɔlɛ́ gá biimée. 45Mammana, Moɔnɔ́ ba mɔtɔ a mbuú úlé, caá akɛ́ goŋaá batɔ bá mo bɔ́yɔgɔnɛnɔ, kanɛ́ goŋaá, mɔ́ɔ a bɔ́yɔgɔnɛnɔ batɔ, a gunde i íŋene gɛɔyɔ gɛ́hɛ́ go go fáŋa gɛcɛcá gá batɔ#10.45 O bana go eninye na 14.24; 1 Tim 2.6..»
Yésusu e é éŋúgíe Beletimée bigélí
(Mot 20.29-34; Lók 18.35-43)
46Gɔ́ɔ Yésusu olɔŋɔ na behúúní bɛ́hɛ́ bá ncomɔ́ bola naá tɛ́sɔnɔ ya Yelíko. Naá gɛcamɛna gɛ́ɛgɛ bá mbaá ŋá bá ná lɛ́ go húmene naá tɛ́sɔnɔ yɛ́ɛyɔ olɔŋɔ na gitúu gá batɔ, ugélígeli ummue ufíno yɛ́hɛ́ Beletimée, ohaŋa ba Timée, a mba lɛ́ ndukíi naá boayá bá pɛ́, ɔ ɔŋɔnɔ hɔ́ɔ. 47Aŋa a mbɔɔ́ ɔ́bɔ́ a amɔ́ Yésusu ba Násalɛdɛ mɔ́ɔ a dómbanamɔ́, gɛ́hɛ́ go bayɛga go ánca ukelú naá mmoɛná a amɔ́: «Yésusu, ohaŋa ba Défidi, ŋgɛ́náamɔ́ mahana.» 48Gɛca gá batɔ go ɛ́da go mo kóndokondio goŋaá a buige nyuudé. Kanɛ́ mɔ́ɔ ɛ ɛ́dana naá busío a ánca makɔ́nɔ́ a amɔ́: «Ohaŋa ba Défidi, ŋgɛ́náamɔ́ mahana!» 49Yésusu go dɛ́lɛmɛna go gálɛda a amɔ́: «Mo dɔ́ŋɛ́nɔ́ɔmɔ́ nɔnɔ!» Gɔ́ɔ bá mo dɔ́ŋɛnɔmɔ́ bá báá mo oyáná bá amɔ́: «Bágɛ́ndɛ́náamɔ́, fadɛ́gɛ́na, a go dɔ́ŋɔnɔ.» 50Gɔ́ɔ mɔtɔ a dúmbiemú go búumbene ménnyimée gɛla gɛ́hɛ́, go lúduge a bɛ́ɛ́ ɛ́dá naá Yésusu. 51Yésusu go mo úhune a amɔ́: «O lɛ́galɛgamɔ́ goŋaá ŋŋa ɛkádɛ go busío báhɔ o?» Ugélígeli go mo gundie a amɔ́: «Iloodio, ŋaáa goŋaá ŋgɛ́nanɛna.» 52Yésusu a amɔ́ gɛ́hɛ́ aá: «Ɛ́dá, gioliminyo gáhɔ gɛ́ á go éŋúgíe#10.52 gɛ́ á go éŋúgíe ɛ́na gɛ́ á go sódío..» Hɔ́ɔ na hɔ́ɔ, mɔtɔ go dómba go bayɛga go ɛ́nanɛna, a bɛ́ɛ́ ɛ́dá go bienene Yésusu.
Currently Selected:
Mélékusu 10: YAS
Highlight
Share
Copy
Want to have your highlights saved across all your devices? Sign up or sign in
