Motíosi 3
3
Ŋgoyáamɔ́ ya Sáŋa Begiyuminye
(Mél 1.2-6; Lók 3.1-6; Sáŋ 1.19-23)
1Naá gɛcamɛna moánɛ gíiní, gɔ́ɔ Sáŋa Begiyuminye a buyugugemú naá giolóo gá bodɛ́agadɛ́ gá Yudée, go ɛ́da go dóogonyo a amɔ́: 2«Núgíe nɔnɔ gɛɔyɔ gɛ́nyɔ́#3.2 Gokikilidie gúncodío gó lɔ́mɔ́ núgíe nɔnɔ ndoŋá ɛ́na gɔnɔ́ bógoodóomú nɔnɔ bɛoba. , Bufuŋe bá mmoɛná bó ná lɛ́ mekúígíi!»
3Gá Sáŋa mɔ́ɔnyɔ gɔ́ɔ mbúsí ya Asaŋa Iseyíi ɛ mboó oyɛ́dá yɛ amɔ́: «Ukelú yá mɔtɔ yó dónogogana naá giolóo gá bodɛ́agadɛ́ yó amɔ́: “Gedégédíe nɔnɔ pɛ́ ya Daadáa, bónónáa nɔnɔ ŋŋɛndɛ́ná sɛ́hɛ́#3.3 Iseyíi 40.3, bó lɔ́mɔ́ naá gokikilidie gá ŋgɔ́ŋɛ́ sá cóá cóá na nogɛlɛ́gɛ.”.» 4Gɛla gɛ́ɛgɛ Sáŋa a mbaá lɛ a bɛga gɛ́ mba lɛ́ gedíelú na binúmpe bá nnyama yɛ́ɛyɛ bá dɔ́ŋɔnɔmɔ́ bá amɔ́ samóo, kandáa ya gɛɔbɔ básómbɛ́náalú go nosɛ́ŋɛ́. A mba lɛ́ a bédúge na bɛatatalá na megúdé má póɔ́ŋɛ́. 5Kɔ́ɔ batɔ bá Yolósalɛmɛ, na biimée báaba naá Yudée, gigísi gá cí giimée gá Yɔlɔdɛ́ŋɛ, bɛ́ ɛ́damɔ́ go úlene naá Sáŋa; 6bó oya bɛoba bábɔ́ daŋɛ́daŋɛ, a bó yumeninye naá osaá yá Yɔlɔdɛ́ŋɛ.
Sáŋa o oyanɛna batɔ goŋaá bá núgie gɛɔyɔ gábɔ́
(Lók 3.7-9)
7Aŋa Sáŋa a mbɛɛ́ ɛ́ná gitúu gá Befelisiéŋe na Beseduseyéŋe bá mo úlenine goŋaá a bó yuminye, gɛ́hɛ́ gó bó oyana a amɔ́: «Bɛɛnyɔ́ɔ pɛ́nɛ sɛ́ɛsɛ, ánɛ́ɛ a ná nyó fáá nciŋí ya go pamba mpímí ya Asaŋa yɛ́ɛyɛ yɛ úlenemú o? 8Dúfényée kanɛ́ nɔnɔ na meŋiigíe má bese no bóloodio goŋaá no á núgíe gɛɔyɔ gɛ́nyɔ́. 9Kanɛ́, no do ɛ́dá go bágálɛnagalɛna naá odɛ́má no amɔ́: “Ábalaháma a lɛ́ isée kɔ́nɔ́ɔ bɛcɔ́#3.9 O bana gigísi gá ŋgɔ́ŋɛ́ gɛ́ɛgɛ go eninye na gá Sáŋa 8.33,37,39..” Ɛɛ́ɛŋ, ŋgaá nyó oyáná caá, Asaŋa a lɛ́ ba go gɔ́lɔ adánɛ́ yáaya, yá ɛ́ya baaná bá Ábalaháma. 10Moánɛ, iléŋú hɛ́ ná lɛ́ mekúígíi go go sómba ɛŋaŋá ya mɛɛ́tɛ: boɛ́tɛ buimée bɔ́ɔbɔ bó lɔ́mɔ́ bó do úmée bɛnɔ́gɔ́ bá bɛsamɔ́, bá bó sómba bá bó nɔɔ naá íyuke.
Giyuminye gá miimpo na gɛ́ɛgɛ gá íyuke
(Mél 1.7-8; Lók 3.15-18; Sáŋ 1.24-28)
11«Yɔmɔ́ɔ nnyó yumeninye naá miimpo go go loodio goŋaá no á núgíe gɛɔyɔ gɛ́nyɔ́; kanɛ́ mɔ́ɔnyɔ u úlenemú naá nnyimé yamɛ a lɛ́ gɛgaaga a tómbana, cɛ háánánáa naá odɛ́nɛ́ yá go mo úlie nnaadɛna sɛ́hɛ́. Mɔ́ɔ, a ná nyó yumeninyemú na Gimmúmpúu gá Giliíli na íyuke. 12A lɛ́ na gifúne#3.12 Gɛ́ lɛ́ loŋáalú aŋa gɛsɔ́bɛlɔ, gɛ́ dúgune go go gide ŋkeŋé, bá dádona camɔ́ na bifúnú. ŋkeŋé go ombɔ́gɔ go go úlenye bifúnú. A bɛ́dɛgana camɔ́ naá gɛɔ́lɔ, a lókononyo bifúnú naá íyuke há kanɛ go fúenene.»
Sáŋa a á yumínyé Yésusu
(Mél 1.9-11; Lók 3.21-22; Sáŋ 1.29-34)
13Gɔ́ɔ Yésusu a buyugugemú ɛ ɛ́da go úlene naá Gelilée, go úle naá osaá yá Yɔlɔdɛ́ŋɛ, goŋaá Sáŋa a mo yuminye. 14Sáŋa a mba lɛ́ a maamana go inye go mo yuminye, go gálɛda amɔ́: «Yɔmɔ́ɔ caá yɔmɔ́ɔ mɔ́ɔ ndɔ́mɔ́ ba go úle naá maamɔ́ɔ goŋaá o nyuminye, maamɔ́ɔ o lɔ go úle naá yɔmɔ́ɔ!» 15Kanɛ́ Yésusu go mo gundie a amɔ́: «Olímínyóo goŋaá bó manɛ báŋa nɔ́ɔ godɔ́ɔdɔ. Náana gɔ́ɔ gó háananamɔ́ goŋaá dɛ loodio botɛ́nɛ́ɛ buimée.» Kɔ́ɔ Sáŋa o oliminyomú, gɛ́hɛ́ go yumiye Yésusu. 16Gɔgɔ́ aŋa Yésusu a mbaá béyumínyée, gɛ́hɛ́ go húme naá miimpo. Mmoɛná go dómba go bébuune, gɛ́hɛ́ go ɛ́na Giliíli ba Asaŋa a mo siisenine aŋa mmɛŋá. 17Ukelú go ɛ́da go úle naá mmoɛná yó oya yó amɔ́: «Moɔnɔ́ bamɛ ba odɛ́má mɔ́nyɔ́ɔ, bɛyaŋa bámɛ biimée bɛ́ lɔ́mɔ́ naá mɔ́ɔ#3.17 Go eninye dogálɔ dɔ́ɔdɔ na ŋgɔ́ŋɛ́ naá kálata ya Ɛsagɔ 2.7; tɔ́nɔ na Iseyíi 42.1..»
Currently Selected:
Motíosi 3: YAS
Highlight
Share
Copy
Want to have your highlights saved across all your devices? Sign up or sign in