Motíosi 21
21
Miíŋene má Yésusu naá tɛ́sɔnɔ ya Yolósalɛmɛ
(Mél 11.1-11; Lók 19.28-40; Sáŋ 12.12-19)
1Aŋa Yésusu na behúúní bɛ́hɛ́ bá mbaá ŋá bá ná lɛ́ go báyɛkana go go bola naá Yolósalɛmɛ, bá ná lɛ́ mekúígíi na Bɛ́tɛ́fasɛ, naá Ogɔndɔ yá magónɛ́dá má boolifíe, Yésusu go dóma behúúní bɛ́hɛ́ báandɛ́, 2a amɔ́ gáábɔ́ a amɔ́: «Ɛ́dá nɔnɔ naá gɛdɔŋɔ gɛ́ɛgɔ gɛ́ lɔ́mɔ́ naá busío bɛ́nyɔ́ gɛ́ɛgɔ. No gaá dómbá go gíde ginnyeedíi gá abaŋa bɛbɛa súnígéelú, gɛ́ lɛ́ na moɔnɔ́ ba gɛ́. Gɛ́ súdúnéemú nɔnɔ, no ŋgúlene nabɔ́. 3Mɔtɔ a amɔ́ a nyó úhune boóma, no gundie no amɔ́: Daadáa#21.3 Daadáa: Gokikilidie gúncoó gɔ́ lɔ́mɔ́: Ogɔ́nɔ́ɔ ɛ́na Moatɛ́ɛ babɔ́. a lɛ́ ncaná ya mɔ́. Hɔ́ɔ na hɔ́ɔ, a gaá dómbá go bó dɛ́ɛna no úle nabɔ́.» 4Bó mba bádómbánáa nɔ́ɔnɔ goŋaá dogálɔ dá mbúsí ya Asaŋa dɔ́ɔdɔ dó ɛ́nanɛna. Dogálɔ moánɛ dó lɔ́mɔ́: 5«Oyána nɔnɔ ombóla ba Síyono no amɔ́, “Ɛ́ná, ufuŋe yáhɔ yɔ́yɔ́ɔ yó ná lɔ́mɔ́ go go úlenine; yó do bébúlúgényée, yó lɛ́ bólɛ́gáalú naá ginnyeedíi gá abaŋa bɛbɛa, gɛ́ lɛ́ na moɔnɔ́ ba gɛ́#21.5 O bana naá Sakalɛ́a 9.9., nnyama ya go bádóɛgana bɛnóɛ́.”» 6Behúúní bɔ́ɔbɔ go biene pɛ́, bá báá ŋaáa aŋa Yésusu a mbaá lɛ bó úhúnéelú. 7Gáábɔ́ go úle na ginnyeedíi gá abaŋa bɛbɛa na moɔnɔ́ ba gɛ́. Kɔ́ɔ bá anamɔ́ bɛla bábɔ́ naá nnyama sɛ́ɛsɔ, Yésusu go lukumene kɔ́ɔ naá mmoɛná. 8Kɔ́ɔ gitúu gá batɔ gɛ́ ɛ́damɔ́ go ana bɛla bábɔ́ go pɛ́, bóncodío bá fafa bitimbó, bá ágana naá pɛ́#21.8 O bana, go eninye na 2 Mefuŋe 9.13.. 9Bitúu bá batɔ bɛ́ɛbɛ bɛ́ mbaá lɔmɔ́ bɛ́ mo gɔ́gɔ naá busío na bɛ́ɛbɛ bɛ́ mbaá lɔmɔ́ bɛ́ mo bienene bɛ́ ánca bɛ́ amɔ́: «Osána na Moɔnɔ́ ba Défidi! Gɛfona gɛ́ bɛ́ɛmba na mɔ́ɔnyɔ u úlenemú go ufíno yá Daadáa! Osána naá mmoɛná páábɔ́ gúunú!» 10Aŋa Yésusu a mbií íŋéné naá Yolósalɛmɛ, tɛ́sɔnɔ iŋkimée ɛ báá yuŋúmídé. Bú úhene bá amɔ́: «A lɔ́mɔ́ ánɛ́ɛ o?» 11Bitúu bá batɔ bɛ́ gundenye bɛ́ amɔ́: «A lɔ́mɔ́ mbúsí ya Asaŋa, Yésusu ba go ɛ́da go úle naá Násalɛdɛ ba Gelilée.»
Yésusu a á gúnée bedúí moóma naá Nnyaŋá ya Asaŋa
(Mél 11.15-19; Lók 19.45-48; Sáŋ 2.13-16)
12Gɔ́ɔ Yésusu i íŋenemú naá Nnyaŋá ya Asaŋa, go ɛ́da go gúne batɔ báaba bá mbaá lɔmɔ́ bá ŋanana nyonyí hɔ́ɔ; a dɛ́anana tábɛ́la sá benúgí muinyí na indukí ya bedúí mmɛŋá go cí. 13Gɛ́hɛ́ go bó oyana a amɔ́: «Bó lɛ́ ɔ́ŋɔ́ɔlú goŋaá, bá ŋga dɔ́ŋɔ́nɔ́ɔ “Nnyaŋá yamɛ bá amɔ́ nnyaŋá ya mbósógólí”. Kanɛ́ bɛɛnyɔ́ɔ no báá go yɛ íyie nɛbɔ́ɔsɛgɔ ná biíbi#21.13 O bana, go eninye na Iseyíi 56.7; Selemíi 7.11.!» 14Begélígeli na banɛ́mɔnɛmɔ go mo báyɛkɛna naá Nnyaŋá ya Asaŋa, a báá bó éŋúgényée. 15Aŋa bagɔ́nɔ́ɔ bá bedúmbí bɛbáágá naá Asaŋa na muloodio má gicele bá mbɛɛ́ ɛ́ná bɛsɛɔ bɛ́ɛbɛ Yésusu a mbaá ŋá a gá lɛ́ na go ŋa, bá gɔnɔ go ɔ́bɔnɔ aŋa baábayɔ́ bá mbaá lɔmɔ́ bá ánca naá Nnyaŋá ya Asaŋa bá amɔ́: «Osána na Moɔnɔ́ ba Défidi!» boóma moánɛ go bó óbigio, 16gáábɔ́ go oyana Yésusu bá amɔ́: «Go ɔ́bɔnɔ boóma bɔ́ɔbɔ baábayɔ́ báaba bó oyamɔ́ o?» Gɛ́hɛ́ go bó gundie a amɔ́: «Ɛɛ́ɛŋ, mbó ɔ́bɔnɔ bese bese. No gá báasa no do banáa Ŋgɔ́ŋɛ́ sɛ́ɛsɛ sɛ́ oyamɔ́ sɛ́ amɔ́: “Naá eŋgúdé yá moáyayɔ́ŋgáyayɔ́ na yá muule gɔ́ɔ o mbaá bégedínyée mbúlugie#21.16 O bana Ɛsagɔ 8.3, bó lɔ́mɔ́ na nogɛlɛ́gɛ ná cóá cóá. o”?» 17Kɔ́ɔ a bó síemú hɔ́ɔlɔ́, gɛ́hɛ́ go húme naá tɛ́sɔnɔ, a bɛ́ɛ́ ɛ́dá naá Beteníi, a báá dúmbíe budúgú hɔ́ɔ.
Yésusu a á yɔmɛ́nɔ́ bufiigíe
(Mél 11.12-14,20-25)
18A ná lɛ́ go nco gundene naá tɛ́sɔnɔ na gɛyɛ́nɛ́ túlúbú, gɛ́hɛ́ go ɔ́bɔ ncaná. 19Ɛ ɛ́ ɛ́ná mbɔ́gɔ́ ya bufiigíe naá boayá bá pɛ́, gɛ́hɛ́ go báyɛkɛna hɔ́ɔ, go gíde goana bɛányɛ aá bɛányɛ kanɛ bɛsamɔ́. Gɛ́hɛ́ go gálɛda bufiigíe a amɔ́: «O ŋga dɔ́ɔ, o do gɔnɔ́ go úme gɛsamɔ́!» Hɔ́ɔ na hɔ́ɔ bufiigíe go dómba go kóta. 20Behúúní bɛ́ ɛ́nana nɔ́ɔnɔ, go békúke makɔ́nɔ́, go úhune Yésusu ba amɔ́: «Nɛ́ɛnɛ hɔ́ɔ na hɔ́ɔ, bufiigíe bó dómbamɔ́ go kóta o?» 21Gɛ́hɛ́ go bó gundie a amɔ́: «Mammana ŋgaá nyó oyáná daŋɛ́daŋɛ caá, no amɔ́ no bɛa gioliminyo buisí, gó gunde no do suŋénényée, caá goana bɔ́ɔbɔ ká lɔ́mɔ́ na go ŋa go bufiigíe bɔ́ no ná ŋamɔ́, kanɛ́ akɛ́ no amɔ́ no oyana ogɔndɔ yɔ́ɔyɔ no amɔ́, úlúkíe hɔ́ɔlɔ́ go ɛ́da bɔ́nɔ naá máŋɛ́, boóma moánɛ bó gaá báŋaáa. 22Buimée bɔ́ɔbɔ no ŋgɔɔ́ ɔŋɛ́nɔ́ naá mbósógólí, aáŋa no bɛanana gioliminyo, no ŋga bó bɛáa.»
Bú úhene Yésusu hoóma háaha nɛgaŋa nɛ́hɛ́ nɛ́ mo úleninemú
(Mél 11.27-33; Lók 20.1-8)
23Aŋa Yésusu a mbií íŋéné naá Nnyaŋá ya Asaŋa, gɛcamɛna gɛ́ɛgɛ a mbaá lɛ a húunenye, bagɔ́nɔ́ɔ bá bedúmbí bɛbáágá naá Asaŋa na bafɛanɔ́ɔ bá gɛdɔŋɔ go mo báyɛkɛna bá amɔ́: «O ŋananamɔ́ moóma moánɛ na kasɛ́á nɛgaŋa? Ánɛ́ɛ a lɔ́mɔ́ go íŋénéelú nɛgaŋa moánɛ o?» 24Gɛ́hɛ́ go bó gundie a amɔ́: «Yɔmɔ́ɔ tɔ́nɔ nnyó nɔɔ ŋgúhune táŋɛ́ mmue. No amɔ́ no kundinye, manɛ́ kanɛ́ yɔmɔ́ɔ tɔ́nɔ kaá ná nyó oyáná go nɛgaŋa nɛ́hanɛ́ ŋŋananamɔ́ moóma moánɛ. 25Nnyó úhene caá, giyuminye gɛ́ɛgɛ Sáŋa a mbaá lɛ a yumeninye batɔ gɛ́ mbaá lɛ gɛ́ ɛ́da go úlene áhanɛ́ɛ, naá Asaŋa lí, naá batɔ o?» Gáábɔ́ go ɛ́da go bágálɛnagalɛna bá amɔ́: «Dɛ amɔ́ dɛ oyɛda dɛ amɔ́, gɛ́ mbaá lɛ gɛ́ ɛ́da go úlene naá Asaŋa, a gaá có úhúné a amɔ́, goakɛ́ kanɛ́ no mbií inyé go mo oliminyo o? 26Kanɛ́ dɛ amɔ́ dɛ mo gundie dɛ amɔ́: “Naá batɔ”, dɛ háanana go bɛa bofoá na gitúu gá batɔ, goakɛ́ biimée bá mba lɛ́ bá gɔ́lɔnɔ Sáŋa aŋa mbúsí ya Asaŋa.» 27Kɔ́ɔ bá gundiemú Yésusu bá amɔ́: «Dɛ dɛ íyíménée.» Mɔ́ɔ tɔ́nɔ go bó oyana a amɔ́: «Akɛ́ yɔmɔ́ɔ tɔ́nɔ cɛ gaá nyó oyáná nɛgaŋa nɛ́ɛnɛ ŋŋananamɔ́ moóma mɔ́ɔmɔ na nɛ́.»
Ncaba ya baaná báandɛ́
28«Dɛ́nyɔ́ no amɔ́ nɛɛ́nɛ? Mɔtɔ ummue a mba lɛ́ na baaná bɛ́hɛ́ báandɛ́. Gɔ́ɔ ɛ ɛ́damɔ́ naá ba busío go mo oyana a amɔ́: “Moɔnɔ́ bamɛ, ɛ́dá kanɛ́ yɔgɔnɔ naá ntɛ́mɛ́ ínoni yɛ́ɛyɛ.” 29Moádɔmbɔ́ go mo gundie a amɔ́: “Cɛ lɛ́gálɛ́gáa.” Naá nnyimé hɔ́ɔlɔ́, gɛ́hɛ́ go núgie, a báá dígé. 30Isée go ɛ́da tɔ́nɔ naá ba gáandɛ́ɛ go mo oyana boóma búmmue eé búmmue; mɔ́ɔnyɔ go mo gundie a amɔ́: “Ŋgɛ́dana, baaba.” Kanɛ́ a báá lɔbɛ́nɔ́ a dɛ ɛ́dá. 31Gɔ́ɔ naá baábayɔ́ bá báandɛ́ báaba, ohanɛ́ a mbaá ŋaáa ndɛ́ga ya isée o?» Batɔ go gundie bá amɔ́: «A lɔ́mɔ́ ba busío.» Yésusu a amɔ́ gáábɔ́ a amɔ́: «Mammana, ŋgaá nyó oyáná daŋɛ́daŋɛ caá, bogólí tásɛ na bɛ́daŋadaŋa bá bakɔ́dɔ bɛ́ ŋga nyó dóánɛ́ná naá Bufuŋe bá Asaŋa. 32Mammana, Sáŋa a mbu úlé, a nyó dúfenye pɛ́ ya tɛ́nɛ́ɛ, no bíí inyé go mo oliminyo. Kanɛ́ bogólí tásɛ na bɛ́daŋadaŋa bá bakɔ́dɔ bɔ́ɔ, bá báá mo olímínyóo. Kanɛ́ bɛɛnyɔ́ɔ, akɛ́ aŋa no mbɛɛ́ ɛ́ná nɔ́ɔnɔ, no lɛ́ kanɛ go núgie gɛɔyɔ gɛ́nyɔ́ goŋaá no mo oliminyo.»
Ncaba ya boyogóní bá ŋgónana
(Mél 12.1-12; Lók 20.9-19)
33«Bódólígínyóomú nɔnɔ ncaba incodío. Mɔtɔ ummue a mba bɔ́ŋɔ́ ntɛ́mɛ́ ya magónɛ́dá má bɛsamɔ́ bá mɔgɛ́bɔ; a báá yɛ dúméné omɛndɛ́, a báá gedíe osá, a báá fóágá tɔ́nɔ nnyaŋá ya mmoɛná go ogɛ́ga#21.33 O bana, go eninye na Iseyíi 5.1-2.. Kɔ́ɔ a yɛ íŋenemú go gɛdɛ́nɔ go boyogóní bá go dɛŋa mɔgɛ́bɔ, mɔ́ɔ a bɛ́ɛ́ ɛ́dá go oŋɛndɔ. 34Aŋa gɛcamɛna gá masáŋa gɛ́ mbaá háá, mɔtɔ go dóma boyogóní bɛ́hɛ́ naá boyogóní bá go dɛŋa mɔgɛ́bɔ goŋaá bá mo dómɛna bɛ́hɛ́ bodáŋɔ. 35Gɔ́ɔ bɔ́ɔbɔ bá gumbenemú batɔ bá bosɔ́mɔ; ummue bá báá mo gidée, uncodío, bá báá mo óná, uncodío gɔnɔ́, bá báá mo dóɛ́dánáa adánɛ́. 36Gɔ́ɔ mɔtɔ ba ntɛ́mɛ́ a gɔnɔmɔ́ dóma boyogóní bóncoó gɛca bá báá dómbá báaba bá busío; boyogóní bá go dɛŋa mɔgɛ́bɔ go ŋa caŋa mmue nabɔ́ aŋa bá mbaá ŋaáa na báaba bá busío. 37Naá gosúgudinye, gɛ́hɛ́ go dóma moɔnɔ́ bɛ́hɛ́ ba moatɛ́, a amɔ́ gófɛnaá bá gaá mo hálámáná. 38Kanɛ́ boyogóní bá go dɛŋa mɔgɛ́bɔ, bɛ́ ɛ́nana moɔnɔ́, go bágálɛdɛna bá amɔ́: “A lɔ́mɔ́ moɔnɔ́ ba bigíndé. Úlé nɔnɔ! Ŋgáa dɛ mo óna, dɛ bɔ́gɔ́gɛdɛnɔ bigíndé.” 39Kɔ́ɔ bá mo yɔkɛnɔmɔ́, bá báá húmé nɛhɛ́ naá ntɛ́mɛ́, go mo óna. 40Ɛɛ́ɛŋ, aŋa mɔtɔ ba ntɛ́mɛ́ a nú úlemú, a ná ŋamɔ́ nɛɛ́nɛ na boyogóní bá go dɛŋa mɔgɛ́bɔ bɔ́ɔbɔ o?» 41Batɔ go mo gundie bá amɔ́: «Kanɛ mahana, a ŋga fúúgíe buúníní bɔ́ɔbɔ púmú, i íŋene ntɛ́mɛ́ yɛhɛ́ go gɛdɛ́nɔ go boyogóní bá go dɛŋa mɔgɛ́bɔ bóncoó, báaba bá ná ŋamɔ́ bá mo fáanana bɛ́hɛ́ bodáŋɔ aŋa gɛcamɛna gɛ́ báá ná háá.» 42Yésusu go bó oyana a amɔ́: «No gá báasa no do banáa naá Ŋgɔ́ŋɛ́ goŋaá:
“Ɛdánɛ́ nɛ́ɛnɛ befúégí bá mbuú umbé,
nɛ́ nɛ́ lɔ́mɔ́ ɛ́yáalú Ɛdánɛ́ ná bugído.
Buelí bá Daadáa kanɛ́ bɔ́bɔ́ɔ:
Kasɛ́á boóma bá go békúke naá oŋgíso yɛ́cɔ́#21.42 Ɛsagɔ 118.22-23.!”
43«Tɔ́nɔ ŋgaá nyó oyáná daŋɛ́daŋɛ caá bá ŋgu úlíe Bufuŋe bá Asaŋa naá bɛɛnyɔ́ɔ, bá fáa batɔ bá gɛdɔŋɔ gíntió báaba bá ŋgaá ŋanánáa bɛnɔ́gɔ́ bá moóma na bɔ́. [44Mɔ́ɔnyɔ a ŋgoó obá naá ɛdánɛ́ moánɛ, a ŋga mɛ́ncámɛ́ncáa; gɔnɔ́ mɔ́ɔnyɔ nɛ́ ŋgaá mo obɛ́ná, nɛ́ ŋga mo goláa.»] 45Bagɔ́nɔ́ɔ bá bedúmbí bɛbáágá naá Asaŋa na Befelisiéŋe bɔ́ ɔ́bɔnɔ ncaba sɛ́ɛsɔ, go lɛnca goŋaá Yésusu a mbaá gálágáláa nɔ́ɔnɔ go busío bábɔ́. 46Go ɛ́da go fúmbe pɛ́ ya go mo gumbene, kanɛ́ bá mba dííné gitúu. Mammana, go busío bá gitúu, Yésusu a mba lɛ́ mbúsí ya Asaŋa.
Currently Selected:
Motíosi 21: YAS
Highlight
Share
Copy
Want to have your highlights saved across all your devices? Sign up or sign in
