Motíosi 19
19
Yésusu a húunenye naá gɛsɛnɛ gá go inye okɔ́dɔ
(Mél 10.1-12; Lók 16.18)
1Kanɛ́ naá nnyimé ya dogálɔ dá témbugenye dɔ́ɔdɔ, gɔ́ɔ Yésusu u úlukiemú naá Gelilée, go ɛ́da naá gisísi gá cí gá Yudée, naá boayá búunú bá osaá yá Yɔlɔdɛ́ŋɛ#19.1 Boayá búunú… Yɔlɔdɛ́ŋɛ: nɔ́ɔnɔ gó lɛ́ aá naá boayá bá ombɔ́gɔ odádɛ́ bá osaá yá Yɔlɔdɛ́ŋɛ.. 2Bitúu bitúu bá batɔ go ɛ́da go mo bienene, a bó éŋugenye hɔ́ɔ hɔ́ɔlɔ́. 3Befelisiéŋe bóncodío go mo báyɛkɛna, go mo dámbɛna na ŋgúhune yɛ́ɛyɛ bá amɔ́: «Mɔtɔ a bɛanana bogaaga bá go inye ogɛ́ akɛ́ go gɛsɛnɛ gɛ́hanɛ́ɛ o?» 4Yésusu go gundie a amɔ́: «Ábɔ, nó lɛ́ kanɛ go bana goŋaá, naá gobayɛga gá cí, Ugedí a mba bó gedíe onɔ́mɔtɔ́ na okɔ́dɔ#19.4 O bana kálata ya Mabayɛga 1.27; 5.2. o? 5Gɔ́ɔ a mbaá gálɛ́dá a amɔ́: “Go busío moánɛ gɔ́ɔ onɔ́mɔtɔ́ a ná húmemú naá nnyaŋá ya biisée, a bágódɛna okɔ́dɔ bɛhɛ́, biimée báandɛ́ bá bɛ́ɛmba nnyɔ́dɔ táŋɛ́ mmue.” 6Hɔ́ɔlɔ́ bá dɛ báá gɔnɔ́ báandɛ́, goana nnyɔ́dɔ táŋɛ́ mmue. Mɔtɔ a dɛ ádóná kanɛ́ bɔ́ɔbɔ Asaŋa a mbaá nebígínyée.» 7Gáábɔ́ go mo úhune bá amɔ́: «Go busío bá akɛ́ kanɛ́, Mɔ́sɛsɛ a mbaá fáá bogaaga bá go íŋene kálata yɛ́ɛyɛ ɛ́ dúfenyemú goŋaá nɛbáná nɛ́ á maná#19.7 Go ɛ́na naá Bicele 24.1; tɔ́nɔ naá Mot 5.31. gɔ́ɔgɔ mɔtɔ inyemú ogɛ́ o?» 8Yésusu go bó gundie a amɔ́: «Bó lɔ́mɔ́ go gɛlalaga gɛ́nyɔ́ gá odɛ́má, gɔ́ɔ Mɔ́sɛsɛ a mbaá nyó fáá bogaaga bá go inyene bakɔ́dɔ bɛ́nyɔ́; kanɛ́ naá mabayɛga bó do mbáa lɛ nɔ́ɔnɔ. 9Ŋgaá nyó oyáná caá, mɔtɔ a amɔ́ i inye ogɛ́ aáŋa caá goŋaá a á hémé hanyɔ́, a báá giŋé okɔ́dɔ untió, a á ŋaáa gɛdáŋa.»
10Gɔ́ɔ behúúní bá mo gundiemú bá amɔ́: «Aáŋa bó lɔ́mɔ́ nɔ́ɔnɔ go onɔ́mɔtɔ́ naá boayá bá ogɛ́, bó do háánánáa goŋaá mɔtɔ a giŋene.» 11Gɛ́hɛ́ go bó gundie a amɔ́: «Mɔtɔ uŋkimée a dɛ ɔ́bɔ́nɔ́ɔ nogálɔ nɔ́ɔnɔ, kanɛ́ goana báaba Asaŋa a mbaá bó fáá bogaaga bá go ɔ́bɔ nogálɔ moánɛ. 12Mammana, batɔ bá lɛ́ hɔ́ɔ báaba bá mbaá bébíéné bɛancanca, bá dɛ báá ba go giŋe okɔ́dɔ; bóncodío, goŋaá basɔ́gɔ́ɔ batɔ bá mbaá bó gundíe bɛancanca, báaba bóncodío, bɔ́ɔ bá moatɛ́ moatɛ go Bufuŋe bá mmoɛná, bá bíí ínyé go giŋene. Mɔ́ɔnyɔ a lɔ́mɔ́ bá go ɔ́bɔ, ɔ ɔ́bɔ!»
Yésusu a fona baábayɔ́
(Mél 10.13-16; Lók 18.15-17)
13Gɔ́ɔ batɔ bú úlinemú Yésusu na baábayɔ́ goŋaá a bó dálana ɛmbɔ́gɔ, go go bó fona. Kanɛ́ behúúní bɛ́hɛ́ go lege batɔ bɔ́ɔbɔ. 14Aŋa Yésusu a mbɛɛ́ ɛ́ná boóma moánɛ, gɛ́hɛ́ go bó gálɛda a amɔ́: «Dɛ́ɛ́na nɔnɔ baábayɔ́ ŋgá bú úle mekúígíi namɛ, no do bó legé, goakɛ́ Bufuŋe bá mmoɛná bó lɔ́mɔ́ go batɔ báaba bá lɔ́mɔ́ aŋa bɔ́ɔ.» 15Naá nnyimé ya go bó dálana ɛmbɔ́gɔ, gɛ́hɛ́ go fíde pɛ́.
Gɛnɔ́mɛ gá ohaŋa ba mɔtɔ
(Mél 10.17-31; Lók 18.18-30; 13.30)
16Gɔ́ɔ mɔtɔ ummue a báyɛkɛnamɔ́ Yésusu go mo úhune a amɔ́: «Iloodio, ndɔ́mɔ́ bá go ŋa ɛkádɛ gá besé goŋaá mbɛa gɛɔyɔ gá kanɛ mesúge o?» 17Yésusu go mo oyana a amɔ́: «Ɛkádɛ́ o ŋgúhenemú bɔ́ɔbɔ bó lɔ́mɔ́ bá besé o? Ummue táŋɛ́ mɔ́ɔ a lɔ́mɔ́ mammana. Aáŋa o lɛ́galɛga go íŋene naá gɛɔyɔ, bɛ́dɛ́gɛ́na bɛlɔsɛnɔ.» 18Mɔtɔ mɔ́ɔnyɔ go mo úhune a amɔ́: «Bɛlɔsɛnɔ bɛ́hanɛ́ɛ?» Yésusu go gundie a amɔ́: «O do óná mɔtɔ. O do ŋaáa gɛdáŋa. O do íbé boóma. O do básómbɛ́ná mɔtɔ. 19O hálamana tɛ́ɔ na yigúédíi. Naá go súgidinye, o maamana sɔ́gɔ́ɔ aŋa maamɔ́ɔ moatɛ́#19.19 Go ɛ́na naá Gihúmie 20.12-16; kálata ya Bicele 5.16-20, tɔ́nɔ na Léfi 19.18..» 20Ohaŋa bá mɔtɔ mɔ́ɔnyɔ go mo oyana a amɔ́: «Ndɛ́ bɛ́dɛ́gɛ́náalú bɛlɔsɛnɔ bɛ́ɛbɛ biimée. Ŋkádɛ́ gɛ́ gá gɔnɔmɔ́ taŋanɛna o?» 21Yésusu go mo oyana a amɔ́: «Aáŋa o lɛ́galɛga go bɛ́ɛmba mammana, ɛ́dá, dúé buimée bɔ́ɔbɔ o lɔ́mɔ́ na bɔ́, go abana basógasoga, gɔ́ɔ o ná bɛamɔ́ bonɔ́mɛ naá mmoɛná. Naá nnyimé, úlé, mbienéemú.» 22Aŋa ohaŋa ba mɔtɔ a mbɔɔ́ ɔ́bɔ́ dogálɔ dɔ́ɔdɔ, gɛ́hɛ́ go biene pɛ́ ɛ ɛ́da a súŋe busío, mammana a mba lɛ́ na bonɔ́mɛ degédegé.
23Kɔ́ɔ Yésusu o oyanamɔ́ behúúní bɛ́hɛ́ a amɔ́: «Mammana mammana, ŋgaá nyó oyáná caá, bó lɛ́ ndɔlɛ makɔ́nɔ́ goŋaá onɔ́mɛnɔmɛ ba mɔtɔ i íŋene naá Bufuŋe bá mmoɛná. 24Ŋgaá nyó fitínyé caá, bó lɛ́ fɛaŋɔ goŋaá gɛantá gá nnyama aŋa samóo gɛ́ dómba naá gɛasɛ́ gá nnɔndɔ, kanɛ́ bó lɛ́ ndɔlɛ goŋaá onɔ́mɛnɔmɛ ba mɔtɔ i íŋene naá Bufuŋe bá Asaŋa.» 25Aŋa behúúní bá mbɔɔ́ ɔ́bɔ́ dogálɔ dɔ́ɔdɔ, gáábɔ́ go ɛ́da go békúke, bó oya bá amɔ́: «Ánɛ́ɛ kanɛ́ bá lɔ́mɔ́ ba go mo sódio o?» 26Yésusu go bó ágɛna oŋgíso go bó oyana a amɔ́: «Naá busío bá batɔ, bó lɛ́ ndɔlɛ, kanɛ́ naá Asaŋa, boóma bá ndɔlɛ bó do báá.»
27Gɔ́ɔ Píele a gɔ́lɔmɔ́ dogálɔ a amɔ́ gɛ́hɛ́ a amɔ́: «Bese! Bó ná bɛ́ɛmbamɔ́ kanɛ́ nɛɛ́nɛ go bɛɛcɔ́ɔ báaba dɛ mbaá síé dɛ báá dɛ́ɛ́ná buimée dɛ báá go fídé o?» 28Yésusu go bó gundie a amɔ́: «Mammana mammana ŋgaá nyó oyáná caá: naá gobénúgie gá moóma muimée, aŋa Moɔnɔ́ ba mɔtɔ a ŋgaá lukúméné naá oŋgɛ́yɔ́ yɛ́hɛ́ yá bugúmigumi#19.28 O bana, go eninye na Déniele 7.14., bɛɛnyɔ́ɔ báaba no mbaá mbiené, no ŋga lukúménénée tɔ́nɔ naá ɛŋgɛ́yɔ́ yɔ́ɔ́dɔ́ na ɛhandɛ́ go go sómba bɛsɛnɛ bá egúli yɔ́ɔ́dɔ́ na áhandɛ́ yá Ɛ́sɛlahɛ́ɛlɛ. 29Kɔ́ɔ, uŋkimée mɔ́ɔnyɔ a mbaá síé a báá dɛ́ɛ́ná nnyaŋá, na bolimóní bá banɔ́mɔtɔ́ na bá bakɔ́dɔ, isée, nnyeedíi, baábayɔ́ ɛ́na lí ntɛ́mɛ́, go busío bá ufíno yámɛ, a ŋga gɔnɔ́ bɛa moóma mɔ́ɔmɔ makɔ́nɔ́ mó dómba, tɔ́nɔ a gunde a bóda gɛɔyɔ gá kanɛ mesúge. 30Kanɛ́ gɛca gá báaba bá lɔ́mɔ́ bá busío godɔ́ɔdɔ bá ŋga bɛ́ɛ́mbá bá nnyimé; tɔ́nɔ gɛca gá báaba bá lɔ́mɔ́ bá nnyimé godɔ́ɔdɔ, bá ŋga bɛ́ɛ́mbá bá busío.»
Currently Selected:
Motíosi 19: YAS
Highlight
Share
Copy
Want to have your highlights saved across all your devices? Sign up or sign in
