Motíosi 14
14
Nigúe ná Sáŋa Begiyuminye
(Mél 6.14-29; Lók 9.7-9,19-20)
1Naá gɛcamɛna moánɛ gíiní, ufuŋe Elóode go ɔ́bɔ ufíno yá Yésusu yó gúme. 2Gɛ́hɛ́ go oyana batɔ bɛ́hɛ́ a amɔ́: «Mɔtɔ mɔ́ɔnyɔ a lɔ́mɔ́ Sáŋa Begiyuminye mɔ́ɔ a á ná fúfúgé, boóma moánɛ bɔ́ a bɛananamɔ́ bogaaga bá go ŋanana bɛsɛɔ.» 3Mammana, Elóode mɔ́ɔ a mbaá fáá bogaaga bá go gumbene Sáŋa, bá mo nɔɔ naá ncíbo ya gɛaŋɔ́, go busío bá Ɛlɔdɛ́adɛ, ogánɛ́ ondimóní Fílibi#14.3 Go ɛ́na naá Mél 6.17 na gibélincígínyé gɛ́ɛgɛ gɛ́ lɔ́mɔ́ hɔ́ɔ.. 4Ɛɛ́ɛŋ, Sáŋa a mba lɛ́ o oyanɛna Elóode a amɔ́: «O do bɛanánáa bogaaga bá go mo gɔ́lɔ ɛ ɛ́ya okɔ́dɔ bahɔ#14.4 O bana naá Léfi 18.16; 20.21..»
5Akɛ́ aŋa Elóode a mbaá lɔmɔ́ a lɛ́galɛga go óna Sáŋa, a mba lɛ́ a díine boɛ́nɔ, goakɛ́ batɔ biimée bá mba lɛ́ bá gɔ́lɔnɔ Sáŋa bá amɔ́ a lɛ́ mbúsí ya Asaŋa. 6Buisí bá go leebie nnyómá ya nobébíényée ná Elóode, gɔ́ɔ ombóla ba Ɛlɔdɛ́adɛ a bínidemú naá oŋgíso yá batɔ báaba bá mbaá dɔ́ŋɛ́nɔ́ naá gibíné, a báá nɔ́ɔ́ Elóode. 7Ufuŋe go bálɛa a amɔ́ a gaá mo fáá buimée bɔ́ɔbɔ a gaá ná mo ɔŋɛ́nɔ́. 8Na bigíniginye bá nnyeedíi, ombóla go oyana ufuŋe a amɔ́: «Páamɔ́ háalá, odóɛ yá Sáŋa Begiyuminye naá gɛmbalɛ́ŋa gá usóyóo.» 9Boóma bɔ́ɔbɔ go séesenye ufuŋe akɛ́báamɔ́; kanɛ́ aŋa a mbaá lɔmɔ́ a báá go bálɛa naá oŋgíso yá batɔ báaba bá mbaá lɛ dɔ́ŋɛ́nɔ́ɔlú naá gibíné, gɛ́hɛ́ go íŋene bogaaga bá go yó mo fáa. 10Gɔ́ɔ a dómamɔ́ mɔtɔ a bɛ́ɛ́ ɛ́dá sómba Sáŋa Begiyuminye odóɛ naá ncíbo ya gɛaŋɔ́. 11Gɛ́hɛ́ go yó ága naá gɛmbalɛ́ŋa gá usóyóo, go nco go íŋene ombóla, mɔ́ɔnyɔ a bɛ́ɛ́ ɛ́dá na yɔ́ naá nnyeedíi. 12Behúúní bá Sáŋa go nco gɔ́lɔ gikekulu gɛ́hɛ́, bá báá miée; gáábɔ́ go ɛ́da go oyana Yésusu buimée bɔ́ɔbɔ bó mbaá bádómbánáa.
Yésusu a á nyéényényée batɔ tɔ́sɛnɔ ɛ́táanɔ
(Mél 6.30-44; Lók 9.10-17; Sáŋ 6.1-15)
13Aŋa Yésusu a mbɔɔ́ ɔ́bɔ́ ŋgoyáamɔ́ yɛ́ɛyɔ, gɛ́hɛ́ go bólɛga naá gilué mɔ́ɔ mokáa, go go ɛ́da naá hoóma háaha há lɔ́mɔ́ gɛyáŋɛ́. Bitúu bitúu bá batɔ go ɛ́da fadɛgana naá tɛ́sɔnɔ sábɔ́, go bienene Yésusu go cí. 14A á siisé gilué, gɛ́hɛ́ go ɛ́na bitúu bitúu bá batɔ; mahana go mo gɔ́lɔ naá odɛ́má go busío bábɔ́, a bɛ́ɛ́ ɛ́dá go éŋugenye bɔgɔnɔ́gɔnɔ bábɔ́. 15Nyɔbɔ́ nɛ́ ó obá, behúúní bɛ́hɛ́ go mo báyɛkɛna bá amɔ́: «Hoóma háaha há lɛ́ gɛyáŋɛ́, gɔnɔ́ gɛcamɛna gɛ́ ná lɛ́ páábɔ́; gúlúgíe kanɛ́ bitúu bitúu bá batɔ bɛ́ɛbɛ naá bɛdɔŋɔ, bɛ́ ɛ́da go ɔ́ndɔ manyáanya.» 16Yésusu go bó gundie a amɔ́: «Bó do úhénée goŋaá bɛ́ ɛ́da; bɛɛnyɔ́ɔ moatɛ́ bó fáamɔ́ nɔnɔ manyáanya.» 17Behúúní go mo gundie bá amɔ́: «Dɛ bɛanana háalá goana bɛlɛ́dɛ bɛ́táanɔ na moɔbɔ́ móandɛ́.» 18Yésusu a amɔ́ gáábɔ́ a amɔ́: «Ŋgúlénéemú nɔnɔ na mɔ́ɔ háalá.» 19Gɛ́hɛ́ go íŋene bogaaga bá goŋaá batɔ bá lukumenene naá mbínyí; mɔ́ɔ go gɔ́lɔ bɛlɛ́dɛ bá bɛ́táanɔ na moɔbɔ́ móandɛ́, a báá búlúgíe oŋgíso go mmoɛná, a báá béhiigí Asaŋa. Gɛ́hɛ́ go gɛ́sa bɛlɛ́dɛ, i íŋene behúúní, bɔ́ɔ bá abana bitúu bitúu bá batɔ. 20Biimée bá báá nyáányáa, bá báá hóógío; bá báá gɔ́lɔ́ bigísi bá bɛlɛ́dɛ bɛ́ɛbɛ bɛ́ mbaá síéné, bɛ́ mba lɛ́ bɛ́ hóogono ncada sɛ́ɔ́dɔ́ na ɛ́handɛ́ dácɛ dácɛ#14.20 O bana go eninye na 2 Mefuŋe 4.42-44.. 21Biimée báaba bá mbaá nyáányáa bá mba lɛ́ ombanɔ yá batɔ banɔ́mɔtɔ́ bá go húme tɔ́sɛnɔ ɛ́táanɔ, kanɛ go bana bakɔ́dɔ na baábayɔ́.
Yésusu ɛ ɛnda naá miimpo mmoɛná
(Mél 6.45-52; Sáŋ 6.16-21)
22Hɔ́ɔ na hɔ́ɔ naá nnyimé, Yésusu go oyana behúúní bɛ́hɛ́ a amɔ́ ŋgá bá bólɛga naá gilué, bá dóanana naá cɔ́lɔ ya máŋɛ́ boayá búunú; mɔ́ɔ moatɛ́ a manɛ síene a gúlugenye bitúu bá batɔ. 23Naá nnyimé ya go bó gúlugenye, gɛ́hɛ́ go ɛ́da gɛyáŋɛ́ naá ogɔndɔ mmoɛná go go bósógolonyo. Hɛɔbɔ́bɔ́ɔ hɛ́ bóo obá, Yésusu hɔ́ɔlɔ́ tɛ́nɛ́ɛ mokáa. 24Gilué gɛ́ mbaá ŋá gɛ́ ná lɛ́ halaháláa na cí, miimpo má gɛ́ búugiebugie, goakɛ́ ufufu yó mba lɛ́ yó gɛ́ úlenine cɛŋɛ. 25Na ŋgɔɔ́ ya otóotoɛ háalá, Yésusu go úle anáa behúúní bɛ́hɛ́ ɛ ɛnda naá miimpo mmoɛná. 26Behúúní bá mo ɛ́nana ɛ ɛnda naá miimpo mmoɛná, gáábɔ́ go gɔ́lɔ bofoá bá amɔ́: «Bó lɔ́mɔ́ nnyɔlɛ!» Mayayɔ́ aŋa má mbaá bó gumbéné, gáábɔ́ go ɛ́da go ánca. 27Hɔ́ɔ na hɔ́ɔ, Yésusu go bó oyana a amɔ́: «Nigégé, a lɔ́mɔ́ yɔmɔ́ɔ, no do bɛáa bofoá.» 28Píele go gɔ́lɔ dogálɔ a amɔ́ gɛ́hɛ́ aá: «Daadáa, aáŋa a lɔ́mɔ́ maamɔ́ɔ, páamɔ́ bogaaga bá go úle anáa o lɔ́mɔ́, ŋgɛnda naá miimpo mmoɛná.» 29Yésusu a amɔ́ gɛ́hɛ́ aá: «Úle!» Kɔ́ɔ Píele a siisemú naá gilué, go bayɛga go ɛnda naá miimpo mmoɛná, go go ɛ́da anáa Yésusu a mbaá lɔmɔ́. 30Kanɛ́ Píele ɛ ɛ́nana ufufu, gɛ́hɛ́ go gɔ́lɔ bofoá. A á bayɛ́gá go yímene naá miimpo, gɛ́hɛ́ go áncɛda a amɔ́: «Daadáa códíomú!» 31Hɔ́ɔ na hɔ́ɔ, Yésusu go dóŋio ombɔ́gɔ, a báa mo gumbéné; gɛ́hɛ́ go mo oyana a amɔ́: «Gioliminyo gáhɔ gɛ́ lɛ́ fágɔfágɔ, o báá ná suŋénényée goakɛ́ o?» 32Kanɛ́ aŋa bá mbaá bólɛ́gá naá gilué, ufufu go yɔyɔ. 33Kɔ́ɔ behúúní báaba bá mbaá lɔmɔ́ naá gilué, bá gulemú enúu naá busío bɛ́hɛ́, bá amɔ́: «O lɛ́ mammana moɔnɔ́ ba Asaŋa!»
Yésusu e é éŋúgíe bɔgɔnɔ́gɔnɔ naá Gɛnɛsalɛ́dɛ
(Mél 6.53-56)
34Bá á yoogá miimpo, gáábɔ́ go bola naá gigísi gá cí gá Gɛnɛsalɛ́dɛ#14.34 O bana, go eninye na bɔ́ɔbɔ naá Mél 6.53 na gibélincígínyé gɛ́ɛgɛ gɛ́ lɔ́mɔ́ kɔ́ɔ.. 35Batɔ bá hoóma hɔ́ɔhɔ go lɛnca Yésusu, bá báá lɛ gó cekie cɔ́mɔ naá gigísi gá cí giimée, batɔ go ɛ́da go mo úlenine na bɔgɔnɔ́gɔnɔ biimée. 36Bá mba lɛ́ bá mo béyéeyenye goŋaá o oliminyo bɔgɔnɔ́gɔnɔ bá bálafa udúu yá gɛla gɛ́hɛ́. Gɔ́ɔ biimée báaba bá mbaá lɛ bá báláfɛna udúu yá gɛla gɛ́hɛ́; bá mba lɛ́ bé éŋugene.
Currently Selected:
Motíosi 14: YAS
Highlight
Share
Copy
Want to have your highlights saved across all your devices? Sign up or sign in
