Lókasɛ 8
8
Bakɔ́dɔ báaba bá bienenemú Yésusu
1Yésusu gɛ́hɛ́ go ɛ́da naá busío, ɛ ɛ́da ɛ ɛnda go tɛ́sɔnɔ na bɛdɔŋɔ, a dúmenye Gɛnɔ́gɔ́ gá Cɔ́mɔ gá Bufuŋe bá Asaŋa. A mba lɛ́ olɔŋɔ na behúúní bɛ́hɛ́ bɔ́ɔ́dɔ́ na báandɛ́, 2na bakɔ́dɔ báaba a mbaá bó úlíe bɛgáda bá biliíli, a báá bó éŋúgíe go ɛgɔnɔ́ yabɔ́. Bakɔ́dɔ moánɛ bá mbaá lɛ náana: Malɛ́a ba Magadaláa mɔ́ɔnyɔ Yésusu a mbaá mo úlíe bɛgáda bá biliíli bɛ́táanɔ na bɛ́andɛ́, 3Sáánɛ, okɔ́dɔ ba Kósa, umbeŋíbéŋí ba masɔ́mɔ má ufuŋe Elóode; Sosána na bakɔ́dɔ gɛca, bɔ́ɔ bá mbaá lɛ bá dúgune Yésusu na behúúní bɛ́hɛ́ na bɔ́ɔbɔ bá mbaá lɛ bá bɛanana.
Ncaba ya mɔtɔ ba go kasana masámá
(Mot 13.1-13; Mél 4.1-12)
4Aŋa bitúu bitúu bá batɔ bɛ́ mbaá lɛ bɛ́ bábánda, batɔ bá fadɛgana naá tɛ́sɔnɔ iŋkimée, bó úlene naá mɔ́ɔ, gɛ́hɛ́ go ɛ́da go oya go ncaba a amɔ́: 5«Uyogóní ummue a mba hémé go go kasana masámá naá ntɛ́mɛ́ yɛhɛ́. A lɛ́ naá go kasana nɔ́ɔnɔ, masámá móncodío go oba go pɛ́ gimbúlúu; bá báá má naadánáa, munoní mó búú úlé, mó báá nyáá púmú. 6Masámá móncodío má bóó obá naá cí ya adánɛ́: gɔgɔ́ aŋa má mbaá dandá má basa, má báá gó ɛ́da go ɔlɔnɔ, má báá gúénénée; goakɛ́ sumbusumbu ɛ dɛ mbá lɛ hɔ́ɔ. 7Masámá móncodío má bóó obá naá musíníni, kanɛ́ aŋa mó mbaá besínyée, mó báá mɔ́mɛ́nɔ́ɔ magónɛ́dá. 8Kɔ́ɔ móncodío mó obamɔ́ naá gɛnɔ́gɔ́ gá cí, má báá basáa, má báá ágánáa bɛondá ntɛdɛ go ntɛdɛ.» Aŋa a mbaá maná go oya ncaba yɛ́ɛyɔ, gɛ́hɛ́ go gálɛda ukelú naá mmoɛná a amɔ́: «Mɔ́ɔnyɔ a lɔ́mɔ́ na edúu go go ɔ́bɔnɔ, ɔ ɔ́bɔ!»
9Behúúní bɛ́hɛ́ go mo úhune goŋaá a bó falonɛna ncaba moánɛ. 10Gɛ́hɛ́ go bó gundie a amɔ́: «Bɛɛnyɔ́ɔ no lɛ́ bɛáalú goíyime gá nnindíi sá Bufuŋe bá Asaŋa; kanɛ́ naá batɔ bóncodío bá bó oyanɛna go ncaba goŋaá bá núune bá dɛ ɛ́ná, bɔ́ ɔ́bɔnɔ bá dɛ ɔ́bɔ́ naá cí.#8.10 Iseyíi 6.9.»
Gofalona gá ncaba ya mɔtɔ ba go kasana masámá
(Mot 13.18-23; Mél 4.13-20)
11«Kanɛ́ ncaba yɛ́ɛyɛ ɛ lɔ́mɔ́ naá cí náana: masámá má lɔ́mɔ́ nogálɔ ná Asaŋa. 12Batɔ bóncodío bá lɛ́ caŋa táŋɛ́ mmue aŋa pɛ́ gimbúlúu yɛ́ɛyɛ masámá mó obamɔ́ hɔ́ɔ: bɔ́ ɔ́bɔnɔ nogálɔ ná Asaŋa, kanɛ́ ohándá a lɛ go úle a nco no sógada naá ɛdɛ́má yabɔ́ goŋaá bá dɛ olímínyóo, Asaŋa a bó sódio. 13Bóncodío bá lɛ́ caŋa táŋɛ́ mmue aŋa cí ya gɛgɔyɔ. Aŋa bɔ́ ɔ́bɔmɔ́ nogálɔ ná Asaŋa, bá nó gɛ́ndɛgɛna na bɛyaŋa. Kanɛ́ bá dɛ nó dɛ́ɛ́ná nó sume ɛŋaŋá, bó oliminyo go moɔnɔ́ ba gɛcamɛna. Aŋa ɛsɔgɛdɔ hɛ́ bó gídemú, bú umbe gioliminyo. 14Masámá máama mó obamɔ́ naá musíníni, má lɔ́mɔ́ batɔ báaba bɔ́ ɔ́bɔnɔmɔ́ nogálɔ ná Asaŋa; kanɛ́ bá lɛ go bádɛ́ɛnɛna mecíkílí, bonɔ́mɛ na gɛɔyɔ gá cí, mó nó mɔ́mɛnɔ, nó lɔbɔ kanɛ goága bɛondá bɛ́ gónɛna. 15Kanɛ́ masámá máama mó obamɔ́ naá gɛnɔ́gɔ́ gá cí má lɔ́mɔ́ batɔ báaba bɔ́ ɔ́bɔnɔmɔ́ nogálɔ ná Asaŋa na odɛ́má usi gɔnɔ́ gedíelú bese, bá nó gumbene, bá ága bɛondá aŋa bá lɔbɔmɔ́ tɛ́ŋɛ́tɛŋɛ.
Ncaba ya lámba
(Mél 4.21-25)
16«Mɔtɔ a dɛ nébígényée lámba go go yɛ cúbigene naá iséní, ɛ́na lí, a yɛ íŋenye naá cí ya ombɛ́dɛ́; kanɛ́ a yɛ áganamɔ́ naá gɛdálɛ́ná gá yɛ́ goŋaá báaba bí íŋenemú naá ncíbo bɛ́ ɛ́na gise#8.16 O bana, go eninye na Mot 5.15; Lók 11.33.. 17Mammana, boóma buimée bɔ́ɔbɔ bó lɔ́mɔ́ ɔsɛ́gɔ́ɔlú bó ŋga dambɛ́mɛ́dá, buimée bɔ́ɔbɔ naá nnindíi bó ŋga dálɛ́mɛ́dá naá gise. 18Gɔ́ɔ, bégedíemú nɔnɔ bese go mbɔ́dɔ yɛ́ɛyɛ no ɔ́bɔnɔmɔ́! Mammana, bá gídenine mɔ́ɔnyɔ a bɛananamɔ́, bú úlie naá mɔ́ɔnyɔ a lɔ́mɔ́ a dɛ bɛanánáa akɛ́ bɔ́ɔbɔ a béeniŋenyemú a amɔ́ a bɛanana.»
Mammana ya ncíbo ya batɔ ya Yésusu
(Mot 12.46-50; Mél 3.31-35)
19Gɔ́ɔ nnyeedíi na bolimóní bá Yésusu bú úlemú go go nco mo ɛ́na. Kanɛ́ pɛ́ ya go mo báyɛkɛna ɛ dɛ mbáa lɛ hɔ́ɔ goŋaá batɔ bá mba lɛ́ gɛca. 20Kɔ́ɔ bó oyanamɔ́ Yésusu bá amɔ́: «Yigúédíi na batɛ́ɔbɛnɔ bá lɛ́ go hanyɔ́, bá lɛ́galɛga go go ɛ́na.» 21Gɛ́hɛ́ go bó gundie a amɔ́: «Mmaáa na bolimóní bámɛ bá lɔ́mɔ́ batɔ báaba bá bódólonyomú nogálɔ ná Asaŋa bá gɔnɔ go ɔyɔ aŋa nó oyamɔ́.»
Yésusu a á kíkíe gɛgaaga gá puŋe
(Mot 8.18,23-27; Mél 4.35-41)
22Budúgú búncodío, gɔ́ɔ Yésusu na behúúní bɛ́hɛ́ bá bólɛgamɔ́ naá gilué. Gɛ́hɛ́ go bó oyana a amɔ́: «Ŋgáa dɛ no yooga gɛsɔmbɔsɔ́mbɔ́ɔ, dɛ ɛ́da naá cɔ́lɔ boayá búunú#8.22 Bó lɔ́mɔ́ gɛsɔmbɔsɔ́mbɔ́ɔ gá Gelilée..» Gáábɔ́ go ɛ́da. 23Kanɛ́ aŋa gilué gɛ́ mbaá ŋá gɛ́ ná lɛ́ go nɛ́naba nabɔ́ naá miimpo, Yésusu go ɛ́da go dɔnɔ́ɔ. Gɛcamɛna gɛ́ dɛ dómbá, gɔ́ɔ gɛantáanta gá puŋe gɛ́ ɛ́damɔ́ go fufe naá gɛsɔmbɔsɔ́mbɔ́ɔ, gilué gá gɛ́ go ɛ́da go hóogono miimpo, batɔ báaba kɔ́ɔ bá báá bɛ́ɛ́ná naá gɛbɛ́. 24Kanɛ́ behúúní go báyɛkɛna bá báá mo foyóná, bá amɔ́ gɛ́hɛ́ aá: «Iloodio, Iloodio, gɛ́cɔ́ go ɛ́da goŋaá dɛ fúe!» Gɛ́hɛ́ go foyoga, go áncɛdɛna puŋe na miimpo máama má mbaá lɔmɔ́ má bɛlɛmɛncana, muimée mɔ́ɔmɔ mó báá yɔyɔ́. Gɛantá gá pɔ́ɔ́ go nco gunde. 25Yésusu go gálɛda behúúní bɛ́hɛ́ a amɔ́: «Gioliminyo gɛ́nyɔ́ gɛ́ lɔ́mɔ́ áhanɛ́ɛ o?» Kanɛ́ bá mba lɛ́ na bofoá, bá békúke makɔ́nɔ́, bá bágálɛnagalɛna bá amɔ́: «Mbɔ́dɔ ya mɔtɔ ɛhanɛ́ɛ yɛ́yɛ́ɛ o? A áncɛdɛna puŋe na miimpo, mó mo ɔ́bɛnɔnɔ#8.25 O bana, go eninye na bɔ́ɔbɔ naá Ɛsagɔ 65.8; 89.10; 107.23-32.!»
Yésusu e éŋúgíe mɔtɔ ba gɛgáda gá giliíli
26Gɔ́ɔ bɛ́ ɛ́damɔ́ bola naá gigísi gá cí gá Béyeleseniéŋe, boayá búunú bá gɛsɔmbɔsɔ́mbɔ́ɔ, cɛŋɛ na Gelilée. 27Aŋa Yésusu a mbaá ágá gɛgɔ́ndɔ́ go cí, mɔtɔ ba tɛ́sɔnɔ go úle giluméní nɛhɛ́. Mɔtɔ mɔ́ɔnyɔ a mba lɛ́ na bɛgáda bá biliíli gó ɛ́da bayɛga fueké, a dɛ mbáá lɛ́ a báágana gɛla, a dɛ bɛ́dɛ́mɛ́ná go nnyaŋá, kɛ́gɛ́ná yɛhɛ́ naá bɛbɛ́lá. 28Kanɛ́ aŋa a mbɛɛ́ ɛ́ná Yésusu, gɛ́hɛ́ go ága kóokóo, go nco go obɛna Yésusu naá bɛgɔ́ndɔ́, go mo gálɛda ukelú naá mmoɛná a amɔ́: «Yésusu, Moɔnɔ́ ba Asaŋa ba Páábɔ́ naá mmoɛná, o fúmbemú ŋkádɛ́ namɛ o? Sɔ́kɔlɛ, o do páá noséésényée.» 29Mammana Yésusu a mbuú úhúné gɛgáda gá giliíli goŋaá gɛ́ húme naá mɔtɔ mɔ́ɔnyɔ. Ɛŋɛndɔ gɛca, gɛgáda gá giliíli gɛ́ɛgɔ gɛ́ mba lɛ́ gɛ́ mo gumbene; bá mo góda iŋgolí na ɛmbɔ́gɔ na bɛgɔ́ndɔ́ na magala go go mo beŋebeŋe. Kanɛ́ a mba lɛ́ a gása iŋgolí yɛhɛ́, gɛgáda gá giliíli gɛ́ɛgɔ gɛ́ mo pemugie, gɛ́ ɛ́da nɛhɛ́ naá bɛcɔ́lɔ́kɔ́ɔ bá hoóma. 30Yésusu a báa lɛ gó mo úhune a amɔ́: «Ufíno yáhɔ yó lɔ́mɔ́ ánɛ́ɛ o?» Gɛ́hɛ́ go mo gundie a amɔ́: «Ufíno yámɛ yó lɔ́mɔ́ Nɛgósa.» Mammana, bɛgáda bá biliíli bɛ́ mba lɛ́ íŋénéelú naá mɔ́ nnyɔ́dɔ gɛca; 31bɛgáda bá biliíli bɛ́ɛbɔ bɛ́ mba lɛ́ bɛ́ bósógolonyo Yésusu goŋaá a dɛ bɛ́ dómá naá ɛbɛ́lá ná noséésényée.
32Hɔ́ɔ hɔ́ɔlɔ́, buufe bá ŋgɔnɔ́bɛ́#8.32 O bana Mél 5.11, tɔ́nɔ na gibélincígínyé gɛ́ɛgɛ hɔ́ɔ. bó mba lɛ́ bó nyáanya naá ogɔndɔ; bɛgáda bá biliíli bɛ́ɛbɔ go ɛ́da go béyéeyenye Yésusu goŋaá o oliminyo, bɛ́ íŋenene naá ŋgɔnɔ́bɛ́ sɛ́ɛsɔ. Gɛ́hɛ́ go oliminyo. 33Bɛgáda bá biliíli bɛ́ báa lɛ gó húmene naá mɔtɔ, go íŋene naá ŋgɔnɔ́bɛ́. Buufe buimée bá ŋgɔnɔ́bɛ́ go ɛ́da kíkide naá ogɔndɔ go nco bésugune naá gɛsɔmbɔsɔ́mbɔ́ɔ cuuu, go fúe púmú naá miimpo.
34Aŋa batɔ báaba bá mbaá lɛ bá beŋebeŋe ŋgɔnɔ́bɛ́ bá mbɛɛ́ ɛ́ná nɔ́ɔnɔ, gáábɔ́ go díine, go cekie boóma bɔ́ɔbɔ bó mbaá bádómbánáa naá tɛ́sɔnɔ na naá nnyimé ya gɛdɔŋɔ. 35Batɔ go émene go go ɛ́na boóma moánɛ, gáábɔ́ go ɛ́da naá Yésusu go gíde mɔtɔ mɔ́ɔnyɔ bɛgáda bá biliíli bɛ́ mbaá hémé naá mɔ́ nnyɔ́dɔ, a mba lɛ́ ndukíi naá bɛgɔ́ndɔ́ bá Yésusu na bɛla go nnyɔ́dɔ, nciŋí yɛhɛ́ ɛ báa go nco gunde. Kɔ́ɔ bá bɛamɔ́ bofoá. 36Batɔ báaba bá mbaá lɔmɔ́ ɛ́náalú boóma bɔ́ɔbɔ buimée go bó oyanɛna aŋa mɔtɔ ba bɛgáda bá biliíli mɔ́ɔnyɔ a mbaá bɛáa go éŋuge.
37Gɔ́ɔ batɔ biimée bá béyéeyenyemú Yésusu goŋaá a dómba naá gigísi gábɔ́ gá cí, goakɛ́ ba mba lɛ́ na bofoá makɔ́nɔ́. Yésusu go bólɛga naá gilué go gunde na nnyimé.
38Mɔtɔ mɔ́ɔnyɔ bɛgáda bá biliíli bɛ́ mbaá húmé naá mɔ́ nnyɔ́dɔ go ɛ́da go bósógolonyo Yésusu goŋaá a lɔbɛnɔ nɛhɛ́. Kanɛ́ Yésusu go mo gundie na nnyimé a báá mo oyáná a amɔ́: 39«Gundé naá mamɔ́ nnyaŋá, go oyanɛna batɔ buimée bɔ́ɔbɔ Asaŋa a báá ná ŋaáa go busío báhɔ.» Kɔ́ɔ mɔtɔ a gundemú na nnyimé, ɛ ɛ́da a gúmenye naá tɛ́sɔnɔ iŋkimée boóma buimée bɔ́ɔbɔ Yésusu a mbaá ŋaáa go busío bɛ́hɛ́.
Yésusu e é éŋúgíe okɔ́dɔ, a báá fúfúné ombóla ba Yeyílusu
(Mot 9.18-26; Mél 5.21-43)
40Aŋa Yésusu a mbɛɛ́ ɛ́dá go úlukie boayá búunú, a báá gɔnɔ́ yooga gɛsɔmbɔsɔ́mbɔ́ɔ, gitúu gá batɔ go mo gólio. Mammana, batɔ biimée bá mba lɛ́ bá mo gɛ́gana. 41Mɔtɔ ummue, ufíno yɛ́hɛ́ Yeyílusu, go úle a báá bolá. A mba lɛ́ ogɔ́nɔ́ɔ ba nnyaŋá ya mbósógólí. Gɔ́ɔ ɔ obɛnamɔ́ Yésusu naá bɛgɔ́ndɔ́ a mo béyéeyenye goŋaá ɛ ɛ́da naá mɔ́ nnyaŋá, 42goakɛ́ a mba lɛ́ a bɛanana gimmuée gɛ́hɛ́ gá ombóla a bégide na nigúe. Gɛ́ mba lɛ́ na boóma bá nnyómá sɛ́ɔ́dɔ́ na ɛ́handɛ́. Gɛcamɛna gɛ́ɛgɛ Yésusu a mbaá lɛ ɛ ɛ́dana hɔ́ɔ, gitúu gá batɔ gɛ́ mba lɛ́ nɛhɛ́ nábɛnábɛ, gɛ́ mo óda maayá miimée.
43Okɔ́dɔ ummue a mba lɛ́ hɔ́ɔ a nóma ogɔnɔ́ yá goémene manɔ́ŋɔ́, bó báá go ŋa nnyómá sɛ́ɔ́dɔ́ na ɛ́handɛ́. A mba ŋá a báá go yímie bonɔ́mɛ bɛ́hɛ́ buimée naá bogóódíníní#8.43 Gigísi gá goŋaá A mba ŋá a báá go yímie bonɔ́mɛ bɛ́hɛ́ buimée naá bogóódíníní gɛ́ dɛ báá naá Ŋgɔ́ŋɛ́ sá cóá cóá iŋkimée., kanɛ ummue ba go mo gɔ́ɔdɛnɔ ɛ ɛ́na bese. 44Kɔ́ɔ a báyɛkɛnamɔ́ Yésusu naá nnyimé a báá báláfɛ́ná udúu yá gɛla gɛ́hɛ́, hɔ́ɔ na hɔ́ɔ, ogɔnɔ́ yɛ́hɛ́ yá go húmene manɔ́ŋɔ́ yó báá sómbɛ́gɛ́ná. 45Gɔ́ɔ Yésusu u úhunemú a amɔ́: «Ánɛ́ɛ a mbáláfɛnamɔ́ o?» Batɔ biimée go sáŋona goŋaá bá lɛ́ kanɛ go mo báláfɛna. Píele go oyɛda a amɔ́: «Iloodio, bó lɔ́mɔ́ batɔ báaba bá go ódamɔ́ maayá miimée.» 46Yésusu go oyɛda a amɔ́: «Mɔtɔ a á mbáláfɛ́ná, goakɛ́ ŋgɔɔ́ ɔ́bɔ́ bogaaga bó báá kémé go nnyɔ́dɔ.» 47Okɔ́dɔ go ɛ́na goŋaá bá á mo lɛncá. Gɛ́hɛ́ go u úle a tatana a báá ncó bɔ́nɔ Yésusu naá bɛgɔ́ndɔ́. Go ɛ́da go mo oyanɛna batɔ biimée bɔ́ ɔ́bɔnɔ, goakɛ́ a báá ná mo báláfɛ́ná, tɔ́nɔ aŋa a báá ná dómbá go éŋuge. 48Yésusu go mo oyana a amɔ́: «Ombóla bámɛ, gioliminyo gáhɔ gɛ́ á go sódío#8.48 gɛ́ á go sódío ɛ́na gɔnɔ́gɛ́ á go éŋúgíe., ɛ́dá naá buumbénú.»
49Yésusu a gá lɛ́ na dogálɔ naá nyuudé, mɔtɔ ba bosɔ́mɔ naá nnyaŋá ya ogɔ́nɔ́ɔ ba nnyaŋá ya mbósógólí go úle a báá bolá go oyɛda a amɔ́: «Ombóla bahɔ a á gúé, dɔmbɔ́ go génegenye Iloodio.» 50Kanɛ́ Yésusu go ɔ́bɔ́ cɔ́mɔ moánɛ, gɛ́hɛ́ go oyana Yeyílusu a amɔ́: «O do gɔ́lɔ́ bofoá, ágá goana odɛ́má yáhɔ naá Asaŋa, ombóla bahɔ a geé éŋúgé.»
51Aŋa Yésusu a mbɛɛ́ ɛ́dá bola naá nnyaŋá, a lɛ́ kanɛ go dɛ́ɛna goŋaá mɔtɔ untió i íŋene nɛhɛ́ naá ncíbo, gó do dómbáa goana Píele, Sáŋa, Sáakɛ, isée na nnyeedíi bá moádɔmbɔ́. 52Bɔ́ɔ biimée bá mba lɛ́ bá baŋa, bá bégide go busío bá moádɔmbɔ́. Yésusu go bó oyana a amɔ́: «No do baŋáa; a lɛ́ kanɛ go gúe, a lɔ́mɔ́ go dɔnɔ́ɔ.» 53Gɔ́ɔ batɔ bɛ́ ɛ́damɔ́ go mo hɔnɔ, goakɛ́ bá mba lɛ́ bí íyimene bá amɔ́ a lɛ́ ugúe. 54Yésusu go mo gumbene go ombɔ́gɔ, go mo dɔ́ŋɛnɔ a amɔ́: «Moɔnɔ́ bamɛ, foyóga.» 55Giliíli gá moádɔmbɔ́ go nco gunde, gɛ́hɛ́ go fadɛgɛna hɔ́ɔ. Yésusu go bó oyana goŋaá bá mo fáa manyáanya. 56Bebíéní moɔnɔ́ go békúke makɔ́nɔ́. Kanɛ́ Yésusu go bó lɔsɛnɔ goŋaá bá dɛ hóámá bá dɛ oyáná mɔtɔ boóma bɔ́ɔbɔ bó báá ná bádómbánáa.
Currently Selected:
Lókasɛ 8: YAS
Highlight
Share
Copy
Want to have your highlights saved across all your devices? Sign up or sign in
