Lókasɛ 6
6
Behúúní bá Yésusu bá fafa bɛondá bá belée buisí bá sábadɛ
(Mot 12.1-8; Mél 2.23-28)
1Kɔ́ɔ buisí bá sábadɛ gɔnɔ́ búmmue bá ofɛ́ yá busío, Yésusu go nco fɛ́lɛda naá ntɛ́mɛ́ sá belée. Behúúní bɛ́hɛ́ go ɛ́da go sóga bɛondá bá sɛ́, bá fombona, bá nyáanana#6.1 buisí bá sábadɛ gɔnɔ́ búmmue gokikilidie gúncoó gó lɔ́mɔ́sábadɛ gɔnɔ́ ya gáandɛ́ ya ofɛ́ yá busío, sábadɛ ya masáŋa má ná lɛ́ mekúígíi (go ɛ́na naá kálata ya Léfi 23.5-14) bá fombona bá nyáanana : go ɛ́na Bicele 23.26.. 2Befelisiéŋe bóncodío go bó úhune bá amɔ́: «Ɛkádɛ no ŋananamɔ́ bɔ́ɔbɔ bó lɔ́mɔ́ gicele go buisí bá sábadɛ#6.2 Go ɛ́na Gihúmie 34.21.o?» 3Yésusu go bo gundie a amɔ́: «No lɛ́ kanɛ akɛ́ go bana boóma bɔ́ɔbɔ Défidi a mbaá ŋaáa buisí búmmue bɔ́ɔbɔ a mbaá lɛ ɔ ɔ́bɔnɔ ncaná na batɔ bɛ́hɛ́ o? 4A mbi íŋéné naá Nnyaŋá yá Asaŋa, a báá gɔ́lɔ́ bɛlɛ́dɛ bá bɛbáágá bɛ́ɛbɛ bedúmbí bɛbáágá naá Asaŋa bákáa bá lɔ́mɔ́ na bogaaga bá go nyáa; a báá nyáá na batɔ bɛ́hɛ́ kɛ́.» 5Yésusu go gɔnɔ bó oyana a amɔ́: «Moɔnɔ́ ba mɔtɔ a lɛ́ ogɔ́nɔ́ɔ ba sábadɛ.»
Yésusu e é éŋúgíe mɔtɔ ba ombɔ́gɔ ugúe
(Mot 12.9-14; Mél 3.1-6)
6Buisí bá sábadɛ búncoó, Yésusu go íŋene naá nnyaŋá ya mbósógólí, go ɛ́da go húunenye. Mɔtɔ ummue a mba lɛ́ hɔ́ɔ na ombɔ́gɔ onɔ́mɛ ugúe. 7Muloodio má gicele na Befelisiéŋe go ágɛna Yésusu oŋgíso go go ɛ́na aáŋa a geé éŋúgíe mɔtɔ buisí bá sábadɛ, bá bɛa hɔ́ɔlɔ́ gɛlabɛ́ná go go mo sɔ́mɛnɔ. 8Kanɛ́ Yésusu a mba lɛ i íyimene go béeniŋenye gábɔ́, gɛ́hɛ́ go oyana mɔtɔ bá ombɔ́gɔ ugúe a amɔ́: «Fadɛ́gɛ́na, o dɛ́lɛmɛna hɔ́ɔlɔ naá oŋgíso yá mɔtɔ uŋkimée.» Mɔtɔ go dɛ́lɛmɛna tɛ́nɛ́ɛ. 9Yésusu go bó gálɛda a amɔ́: «Nnyó úhene caá, gicele gɛ́cɔ́ gɛ́ oyamɔ́ gɛ á amɔ́ dɛ ŋanana besé buisí bá sábadɛ, lí dɛ ŋanana gɛbɛ́ o? Dɛ sódio mɔtɔ, lí dɛ mo dɛ́ɛna a gúe o?» 10A á núúnídé batɔ biimée, gɛ́hɛ́ go oyana mɔtɔ a amɔ́: «Gaanóna ombɔ́gɔ yáhɔ.» Mɔtɔ go yó gaanona, ombɔ́gɔ yɛ́hɛ́ yó báá dómbá go éŋuge. 11Mpímí go hóogo muloodio má gicele na Befelisiéŋe ɛdɛ́má dácɛ, gáábɔ́ go ɛ́da go fúmbe boóma bɔ́ɔbɔ bá lɔ́mɔ́ bá go ŋa na Yésusu.
Yésusu i í iyídé baapótɛlɛ bɛ́hɛ́
(Mot 5.1; 10.1-4; Mél 3.13-19)
12Naá medúgú moánɛ mɔ́ɔmɔ, Yésusu go ɛ́da naá ogɔndɔ go go bósógolonyo, a báá bósógólónyóo Asaŋa budúgú buimée buimée. 13Aŋa gó mbaá semídé, gɛ́hɛ́ go dɔ́ŋɛnɔ behúúní bɛ́hɛ́, go iyide bɔ́ɔ́dɔ́ na báandɛ́ kɔ́ɔ, a báá bó fínídínyée a amɔ́ baapótɛlɛ. 14Ifíno yabɔ́ yɛ́yɛ́ɛ: Símono, mɔ́ɔnyɔ Yésusu a mbaá mo logá a amɔ́ Píele, na Andɛlɛ́ɛ, ondimóní; Sáakɛ na Sáŋa, Fílibi na Betelemíi, 15Motíosi na Tómasɛ, Sáakɛ, ohaŋa bá Alafɛ́ɛ#6.15 ohaŋa bá Alafɛ́ɛ ɛ́na ondimóní ba Alafɛ́ɛ., na Símono ba go noanana goŋaá gɛdɔŋɔ gɛ́hɛ́ gɛ́ bábɛa, 16Yódasɛ, ohaŋa bá Sáakɛ#6.16 ohaŋa bá Sáakɛ ɛ́na ondimóní ba Sáakɛ. , na Yódasɛ Ɛsɛkalɛ́ɔtɛ, mɔ́ɔ a mbaá lɛ ba go dúe Yésusu.
Yésusu a húunenye gitúu gá batɔ
(Mot 4.24-25; Mél 3.7-11)
17Yésusu a á siisé naá ogɔndɔ na Behúúní báaba a mbií íyídé, gɛ́hɛ́ go dɛ́lɛmɛna naá hoóma há lambɔlambɔ, na gɛcɛcá gá behúúní bóntió. Batɔ bóncodío gɛca bá mbaá lɛ tɔ́nɔ hɔ́ɔ, bɛ́ ɛ́da go úlene naá Yudée uŋkimée, naá Yolósalɛmɛ na naá tɛ́sɔnɔ sɛ́ɛsɛ sɛ́ lɔ́mɔ́ naá gɛayáa gá máŋɛ́, Tíile na Sídono. 18Bá mbaá lɔmɔ́ úléné úléné go go ɔ́bɔnɔ dogálɔ dɛ́hɛ́, gɔnɔ́ goŋaá a bó éŋugenye ɛgɔnɔ́ yabɔ́. Báaba bá mbaá lɔmɔ́ na bɛgáda bá biliíli, bé éŋugene tɔ́nɔ. 19Biimée bá mba lɛ́ bá fúmbe go mo báláfɛna go busío bá bogaaga bɔ́ɔbɔ bó mbaá lɛ bó húmene naá mɔ́ nnyɔ́dɔ, bó bó éŋugenye biimée.
Besé na gɛbɛ́
(Mot 5.1-12)
20Gɔ́ɔ Yésusu a núunidemú behúúní bɛ́hɛ́, go ɛ́da go oya a amɔ́:
«Besé makɔ́nɔ́ na bɛɛnyɔ́ɔ báaba nó lɔ́mɔ́ basógasoga, Bufuŋe bá Asaŋa bó lɛ́ go busío bɛnyɔ́.
21Besé makɔ́nɔ́ na bɛɛnyɔ́ɔ báaba nó lɔ́mɔ́ na ncaná godɔ́ɔdɔ, no ŋga nyáányáa no hóogio.
Besé makɔ́nɔ́ na bɛɛnyɔ́ɔ báaba no baŋamɔ́ godɔ́ɔdɔ, no ŋga hɔnɔ́ɔ.
22Besé makɔ́nɔ́ na bɛɛnyɔ́ɔ báaba batɔ bá nyó bɛlabɛlamɔ́, bá nyó pímepimemú, bá nyó sɛgamɔ́, bá gɔnɔ bude ufíno yɛ́nyɔ́ go busío bá Moɔnɔ́ bá mɔtɔ.
23Békelényéemú nɔnɔ naá gɛcamɛna moánɛ, no fulefule na bɛyaŋa, bɛsoɛná bɛ́nyɔ́ bɛ́ lɛ́ makɔ́nɔ́nɔ́ɔ naá mmoɛná. Mammana, nɔ́ɔnɔ gɔ́ɔ biisée bábɔ́ bá mbaá lɛ bá míneminie mbúsí sá Asaŋa#6.23 O bana, go eninye na 2 Bɛcamɛna 36.16; Meŋ 7.52..
24Kanɛ́ mahana makɔ́nɔ́ na bɛɛnyɔ́ɔ báaba nó lɔ́mɔ́ bɛnɔ́mɛ, goakɛ́ no báá go bɛa bɛ́nyɔ́ bodáŋɔ.
25Mahana makɔ́nɔ́ na bɛɛnyɔ́ɔ báaba no nyáanyamɔ́ no hóogonyo godɔ́ɔdɔ, goakɛ́ no ŋga súgúdínyée go ɔ́bɔnɔ ncaná. Mahana makɔ́nɔ́ na bɛɛnyɔ́ɔ báaba no hɔnɔmɔ́ godɔ́ɔdɔ, goakɛ́ egúe na mbií mó nyó gɛ́gana.
26Mahana makɔ́nɔ́ nɛnyɔ́ aáŋa batɔ biimée bá nyó ségisegi, goakɛ́ nɔ́ɔnɔ gɔ́ɔ biisée bábɔ́ bá mbaá ŋanánáa na mbúsí sá mbele.
Maamánáa obɛlɔ́bɛlɔ bahɔ
(Mot 5.39-47)
27«Kanɛ́ bɛɛnyɔ́ɔ báaba no mbódólónyóomú, ŋgaá nyó oyáná caá, maamánáa nɔnɔ babɛlɔ́bɛlɔ bɛ́nyɔ́, no ŋanana báaba bá nyó bɛlabɛlamɔ́ besé. 28Fonáa nɔnɔ báaba bá nyó yɔmɔmɔ́, no bósógolonyo go báaba bá nyó sómbanamɔ́ bɛamɔ́ɔ.
29«Mɔtɔ a amɔ́ a go góba ombɔ́lɛ́ go nɛ́ɛnɛ ɛdáma, mo sɛncɛ́gɛ́náamɔ́ nɛ́ɛnɛ níntió. Mɔtɔ a amɔ́ a bɔgɔ gɛla gáhɔ gá isió, o do mo legé gɛ́ɛgɛ o bááganamɔ́ naá cí. 30Fáá uŋkimée mɔ́ɔnyɔ a go ɔŋɔnɔmɔ́. Mɔtɔ a amɔ́ a gɔ́lɔ boóma báhɔ, o do mo úhúné. 31Moóma muimée mɔ́ɔmɔ no lɛ́galɛgamɔ́ goŋaá batɔ bá nyó ŋɛɛna, bɛɛnyɔ́ɔ tɔ́nɔ bó ŋanánáamɔ́ nɔnɔ caŋa mmue#6.31 O bana, go eninye na Oló 13.8-10..
32«No amɔ́ no maamana báaba bá nyó maamanamɔ́, kasɛ́á bɛsoɛná no gaá ná bɛáa o? Akɛ́ bologílógí tɔ́nɔ bá maamana báaba bá bó maamanamɔ́. 33Gɔnɔ́, no amɔ́ no ŋanana besé goana go báaba bá nyó ŋananamɔ́ besé, kasɛ́á bɛsoɛná no gaá ná bɛáa o? Akɛ́ bologílógí bá ŋanana nɔ́ɔ caŋa mmue. 34Aáŋa no fáananamɔ́ ifínó goana go báaba bá lɔ́mɔ́ bá go nyó gundinye, kasɛ́á mbɔ́dɔ ya bɛsoɛná no gɛ́ganamɔ́ gɔnɔ́ o? Akɛ́ bologílógí bá fáanana tɔ́nɔ ifínó go bologílógí báaba bá lɔ́mɔ́ bá go gundie. 35Kanɛ́ maamánáa nɔnɔ babɛlɔ́bɛlɔ bɛ́nyɔ́, no bó ŋanana besé, no fáanana ifínó kanɛ go gɛ́gana boóma bá go nyó gundinye. Hɔ́ɔlɔ́ gɔ́ɔ no ŋgaá bɛáa bɛantáanta bá bɛsoɛná, no bɛ́ɛmba baaná bá Asaŋa ba Páábɔ́ naá mmoɛná, goakɛ́ mɔ́ɔ, a lɛ́ usi go báaba bá lɔ́mɔ́ bá dɛ íyíménée go fáa bibéhiigí na báaba bá lɔ́mɔ́ bahándá.
Niibo na basɔ́gɔ́ɔ
(Mot 5.48; 7.1-12; 15.14; 10.24-25; 7.3-5)
36«Bɛ́ɛmba nɔnɔ dácɛ na odɛ́má yá niibo aŋa Isée bɛnyɔ́ a lɔ́mɔ́ dácɛ na niibo#6.36 O bana, go eninye na Gihúmie 34.6; Ɛsagɔ 86.15.. 37No do bɛ́ɛ́mbá báaba bá sómbanamɔ́ basɔ́gɔ́ɔ bɛsɛnɛ, gɔ́ɔ Asaŋa a ŋgaá ŋá a dɛ nyó sómbánáa bɛɛnyɔ́ɔ. No do ágánáa basɔ́gɔ́ɔ naá ncíbo ya gɛaŋɔ́, nɔ́ɔ gɔ́ɔ Asaŋa a ŋgaá ŋá a dɛ nyó ágá tɔ́nɔ. Hééhínényée nɔnɔ basɔ́gɔ́ɔ, nɔ́ɔ gɔ́ɔ Asaŋa a ŋgaá nyó hééhínyée tɔ́nɔ. 38Fáánánáa nɔnɔ basɔ́gɔ́ɔ, nɔ́ɔ gɔ́ɔ Asaŋa a ŋgaá nyó fáá tɔ́nɔ. Bá ŋga sugúné naá gɛgada gɛ́nyɔ́ mɛ́da dácɛ, nɔdɔ́nɔ́ nɔdɔ́nɔ́, yihéné yihéné, gɛ ɛ́da gɛ́ udude. Bá ŋga gɔ́lɔ́ go busío bɛ́nyɔ́ mɛ́da máama no lɔ́mɔ́ na máa go bɔsɔ́gɔ́ɔ.»
39Yésusu go gɔnɔ bó ágɛna ncaba yɛ́ɛyɛ a amɔ́: «Ugélígeli a dɛ bósó ba go gɔ́gɔ sɔ́gɔ́ ugélígeli, ábɔ o? Aáŋa nɔ́ɔnɔ, bá goó obɛ́ná bɔ́ɔ biimée báandɛ́ naá gɛbɛ́lábɛ́lá. 40Uhúúní a dɛ dómbánáa uhúúnínyí bɛhɛ́, kanɛ́ uhúúní uŋkimée mɔ́ɔnyɔ a hóonamɔ́ a bɛ́ɛ́ ɛ́dá meninye, a ŋga bɛ́ɛ́mbá aŋa uhúúnínyí bɛhɛ́. 41Goakɛ́ o lɔ́mɔ́ bá go ɛ́na gifumbú gɛ́ɛgɛ gɛ́ lɔ́mɔ́ naá niíso ná tɛ́ɔbɛnɔ, o lɔbɛnɔ o do ɛ́ná boɛ́tɛ bɔ́ɔbɔ naá náhɔ o? 42Nɛ́ɛnɛ o lɔ́mɔ́ bá go oyana tɛ́ɔbɛnɔ go amɔ́: “Ondimóní, ɔ́bɔ́ ko úlie gifumbú gɛ́ɛgɛ naá niíso náhɔ”, maamɔ́ɔ mɔ́ɔnyɔ o lɔ́mɔ́ o do bɛ́ɛ́mbá bá go ɛ́na boɛ́tɛ bɔ́ɔbɔ bó lɔ́mɔ́ naá niíso náhɔ o? Ukuilí mɔ́ɔnyɔ, dóána go búúlie boɛ́tɛ bɔ́ɔbɔ naá niíso náhɔ, hɔ́ɔlɔ́ gɔ́ɔ o gaá nɛ́ ɛ́nánɛ́náa bese, o lɛ go úlie gifumbú gɛ́ɛgɛ gɛ́ lɔ́mɔ́ naá niíso na tɛ́ɔbɛnɔ.
Mammana ya uhúúní
(Mot 12.33-37; 7.16-21)
43«Gɛnɔ́gɔ́ gá boɛ́tɛ gɛ́ dɛ úmée bɛbɛ́ bá bɛsamɔ́, tɔ́nɔ gɛbɛ́ gá boɛ́tɛ gɛ́ dɛ úmée bɛnɔ́gɔ́ bá bɛsamɔ́. 44Bá lɛncanamɔ́ boɛ́tɛ buimée go bɛsamɔ́ bá bɔ́. Bá dɛ gásáa bíkodóo naá gɛ́loŋká, nɔ́ɔnɔ gɔ́ɔ bá lɔ́mɔ́ bá dɛ gásáa mulíómólíómóo naá molɛ́ŋa. 45Usi ba mɔtɔ a gɔ́lɔnɔmɔ́ besé yɛhɛ́ naá bonɔ́mɛ bá busi bá odɛ́má yɛ́hɛ́. Ombɛ́ ba mɔtɔ a gɔ́lɔnɔ bobɛ́ bɛ́hɛ́ naá bonɔ́mɛ bɛ́hɛ́ bá bobɛ́; goakɛ́ bɔ́ɔbɔ nyuudé nɛ́ gálagalamɔ́, bó ɛ́damɔ́ go úlene naá godege gá bɔ́ɔbɔ naá odɛ́má.
46«Ɛkádɛ́ kanɛ́ no tɔ́ŋɔnɔmɔ́ no amɔ́: “Daadáa, Daadáa!” aáŋa no do ŋanánáa bɔ́ɔbɔ ŋgoyamɔ́ o?
(Mot 7.24-27)
47«Mɔtɔ uŋkimée mɔ́ɔnyɔ u úlemú naá yɔmɔ́ɔ, ɔ ɔ́bɔ yɔmɔ́ dogálɔ a gunde a ŋanana aŋa dó oyamɔ́, kaá nyó dúfíe púényí yɛhɛ́.
48«A fóanana mɔtɔ mɔ́ɔnyɔ a mbaá fóágá nnyaŋá, a báá dímée bɛbɛ́lábɛ́lá bɛ́ bíí íŋéné, a báá dábɛ́gá mogoná naá gɛdánɛ́dánɛ́ mmoɛná. Gɛantá gá nobólá gɛ́ ɛ́dá go úle, miimpo go bombɛna nnyaŋá, kanɛ́ má báá lɔbɛ́nɔ́ má dɛ yɛ buhé, goakɛ́ ɛ mba lɛ́ fóágáalú bese bese.
49«Kanɛ́ mɔtɔ mɔ́ɔnyɔ ɔ ɔ́bɔmɔ dogálɔ dámɛ, a báá lɔbɛ́nɔ́ a dɛ ŋaáa aŋa dó oyamɔ́, a fóanana mɔtɔ mɔ́ɔnyɔ a mbaá fóágá nnyaŋá yɛhɛ́ naá cí, a lɔbɛnɔ kanɛ go díme, i íŋenye. Miimpo gá má go bombɛna nnyaŋá, ɛ báá buhúgé busío buimée.»
Currently Selected:
Lókasɛ 6: YAS
Highlight
Share
Copy
Want to have your highlights saved across all your devices? Sign up or sign in
