Lókasɛ 18
18
Ncaba ya gɛbɛ́ gá usúmbí bɛsɛnɛ
1Go go dúfie goŋaá bó lɛ́ na ndénégé go go bósógolonyo bɛcamɛna biimée kanɛ go yoda bɛnamá, Yésusu go ágɛna behúúní bɛ́hɛ́ ncaba yɛ́ɛyɛ a amɔ́: 2«Naá tɛ́sɔnɔ mmue, usúmbí bɛsɛnɛ a mba lɛ́ hɔ́ɔ, a dɛ dííné Asaŋa, a dɛ hálámánáa mɔtɔ. 3Tɔ́nɔ naá tɛ́sɔnɔ mmue eé mmue, gisí gá okɔ́dɔ gímmue gɛ́ mba lɛ́ hɔ́ɔ, gɛ́ úlene naá usúmbí bɛsɛnɛ mɔ́ɔnyɔ, gɛ́ mo oyanɛna gɛ́ amɔ́: “Sómbá gɛsɛnɛ gámɛ gɛ́ɛgɛ na obɛlɔ́bɛlɔ bamɛ.” 4Gɛantá gá gɛcamɛna, usúmbí bɛsɛnɛ mɔ́ɔnyɔ i inyene; kanɛ́ naá go ɛ́da súgudinye, gɔ́ɔ a bágálɛdɛnamɔ́ a amɔ́: “Bó lɛ́ mammana, cɛ díínée Asaŋa, cɛ gɔ́lɔ́nɔ́ɔ gɛcamɛna na mɔtɔ. 5Kanɛ́ aŋa gisí gá okɔ́dɔ gɛ́ɛgɛ gɛ́ ncomɔ́ céesenye, kaá sómbá gɛsɛnɛ gɛ́ɛgɛ go besé yɛhɛ́, goŋaá a dɛ dɔ́bɔ́ɔ ɛ ɛ́dana naá busío, a nco ŋgáda edúu bɛcamɛna biimée.”» 6Daadáa go gídene a amɔ́: «Ɔ́bɔ́ nɔnɔ bese bese mbɔ́dɔ yɛ́ɛyɛ gɛbɛ́ gá usúmbí bɛsɛnɛ mɔ́ɔnyɔ a gálagalamɔ́! 7Kɔ́ɔ bɛɛnyɔ́, no béeniŋenye no amɔ́ Asaŋa a dɛ ŋgá gaŋɛmɛda go báaba mɔ́ɔ moatɛ́ a mbií iyídé, bá mo baŋanamɔ́ aŋa siisíi aŋa budúgú o? A ŋga gígényée go úle go go nco bó oyo o? 8Ŋgaá nyó oyáná caá, Asaŋa a ŋga sagɛ́mɛ́dá go gaŋɛmɛda go báaba mɔ́ɔ moatɛ́ a mbií iyídé. Kanɛ́ aŋa gɔ́ɔgɔ Moɔnɔ́ ba mɔtɔ a ŋguú úlé, a ŋga gídé gɔnɔ́ naá cí batɔ báaba bá lɔ́mɔ́ na gioliminyo o?»
Ncaba ya moɔnɔ́ ba Béfelisiéŋe na ugólí tásɛ
9Yésusu go gɔnɔ go ága ncaba go báaba bá mbaá lɔ́mɔ́ bá bédúfenye bá amɔ́ bɔ́ɔ bá lɛ́ bɛtɛ́nɛ́ɛ naá busío bá Asaŋa, bá fánɛnafanɛna basɔ́gɔ́ɔ, a amɔ́: 10«Batɔ báandɛ́ bá mbɛ ɛ́dá naá Nnyaŋá ya Asaŋa go mbósógólí: ummue a mba lɛ́ moɔnɔ́ ba Befelisiéŋe, mɔ́ɔnyɔ ummue ugólí tásɛ. 11Moɔnɔ́ ba Befelisiéŋe, a lɛ́ tɛ́nɛ́ɛ, a ŋanana mbósógólí yɛ́ɛyɛ naá mɔ́ gadɛ́ɛ#18.11 a lɛ́ tɛ́nɛ́ɛ, a ŋanana mbósógólí yɛ́ɛyɛ naá mɔ́ gadɛ́ɛ : gokikilidie gúncoó gó lɔ́mɔ́ a lɛ́ tɛ́nɛ́ɛ go boayá, a bósógolonyo. a amɔ́: “Asaŋa bamɛ, ko béhiigi goakɛ́ cɛ báá uŋgíbi, uŋií mobɛ́ ɛ́na akɛ́ odáŋadaŋa aŋa batɔ bóncodío, ɛ́na gɔnɔ́ aŋa ugólí tásɛ múunyú. 12Mbécelene manyáanya medúgú máandɛ́ naá gɛanyɛ. Páanana gɛɔdɔ́ɔ gá bonɔ́mɛ bámɛ buimée.” 13Ugólí tásɛ mɔ́ɔ, tɛ́nɛ́ɛ naá nibúne héení néení, a dɛ lɛ́gá akɛ́ go fediginye busío bɛ́hɛ́ go mmoɛná, a bégide ombɔ́gɔ go gɛsasɔ a bósógolonyo a amɔ́: “Asaŋa bamɛ, ŋgɛ́náamɔ́ mahana, goakɛ́ ndɛ́ ulogílógí!” 14Ŋgaá nyó oyáná caá: ba mesúgudinye mɔ́ɔnyɔ mɔ́ɔ a mbaá gundé naá mɔ́ nnyaŋá Asaŋa a báa go mo héehinye go bɛlɔgɔ bɛ́hɛ́, caá akɛ́ mɔ́ɔnyɔ uncodío, goakɛ́ mɔ́ɔnyɔ a bébúlugiemú, bá ŋga mo siisíe, mɔ́ɔnyɔ a bésiisiemú bá ŋga mo búlúgíe.»
Yésusu a fona baábayɔ́ bá lɛɛ́lɛɛ́
(Mot 19.13-15; Mél 10.13-16)
15Kɔ́ɔ batɔ bá mbɛɛ́ ɛ́dá go úlenine Yésusu na baábayɔ́ na bá lɛɛ́lɛɛ́ kɛ́, goŋaá á ba bó dálá ɛmbɔ́gɔ. Behúúní go ɛ́na boóma moánɛ gɛbɛ́, bá bɛ́ɛ́ ɛ́dá go bó gundenye na nnyimé. 16Kanɛ́ Yésusu go bɔ́gɔ́gɛdɛnɔ baábayɔ́, go oyɛda a amɔ́: «Dɛ́ɛ́na nɔnɔ baábayɔ́ bú úlene naá yɔmɔ́ɔ! No do bó legénée, goakɛ́ Bufuŋe bá Asaŋa bó ɔ́bɔnɛnɔmɔ́ na báaba bá lɔ́mɔ́ aŋa bɔ́ɔ. 17Mammana, ŋgaá nyó oyáná caá; mɔtɔ mɔ́ɔnyɔ a ná ŋamɔ́ a dɛ olímínyóo Bufuŋe bá Asaŋa aŋa moádɔmbɔ́ o olimonyomú, a dɛ ní íŋene hɔ́ɔ.»
Onɔ́mɛnɔmɛ ba mɔtɔ
(Mot 19.16-30; Mél 10.17-31)
18Ufuŋe yá Beyúdene yúmmue gá yɔ́ɔ go úhune Yésusu yó amɔ́: «Gɛnɔ́gɔ́ gá Ogɔ́nɔ́ɔ, ndɔ́mɔ́ bá go ŋa ɛkádɛ goŋaá mbɛa bámɛ bodáŋɔ naá gɛɔyɔ gá kanɛ mesúge o?» 19Yésusu go mo gundie a amɔ́: «Ɛkádɛ́ o tɔ́ŋɔnɔmɔ́ gɛnɔ́gɔ́ gá ogɔ́nɔ́ɔ o? Mɔtɔ ba gɛnɔ́gɔ́ a dɛ báá, goana Asaŋa mokáa. 20Go íyimene bɛlɔsɛnɔ bɛ́ɛbɛ: O do ŋaáa gɛdáŋa, o do óná mɔtɔ, o do íbé boóma, o do básómbɛ́ná mɔtɔ, o hálamana tɛ́ɔ na yigúédíi#18.20 Go ɛ́na naá Gihúmie 20.12-16; naá Bicele 5.16-20..» 21Ufuŋe yɔ́ɔyɔ go gundie yó amɔ́: «Ndɛ́ bɛ́dɛ́gɛ́náalú bɛlɔsɛnɔ bɛ́ɛbɛ biimée gó bayɛga naá bohaŋa bámɛ.» 22Aŋa Yésusu a mbɔɔ́ mo ɔ́bɔ́ nɔ́ɔnɔ, gɛ́hɛ́ go mo oyana a amɔ́: «Boóma búmmue bó gá gɔnɔ go taŋanɛna: dúé buimée bɔ́ɔbɔ o lɔ́mɔ́ na bɔ́, go abana basógasoga, gɔ́ɔ o ná bɛamɔ́ bonɔ́mɛ naá mmoɛná; naá nnyimé úlé, mbienéemú.» 23Aŋa ufuŋe yɔ́ɔyɔ yó mbɔɔ́ ɔ́bɔ́ nɔ́ɔnɔ, go dómba go súŋide busío, mammana yó mba lɛ́ na bonɔ́mɛ degédegé.
24Yésusu ɛ ɛ́ná gobɛ́ɛmba gɛ́hɛ́, go oyɛda a amɔ́: «Bó lɛ́ ndɔlɛ makɔ́nɔ́ go batɔ báaba bá lɔ́mɔ́ na bonɔ́mɛ go go ɛ́da bola naá Bufuŋe bá Asaŋa. 25Ɛɛ́ɛŋ, bó lɛ́ fɛaŋɔ goŋaá gɛantá gá nnyama aŋa samóo gɛ́ dómba naá gɛasɛ́ gá nnɔndɔ, kanɛ́ ndɔlɛ goŋaá onɔ́mɛnɔmɛ ba mɔtɔ i íŋene naá Bufuŋe bá Asaŋa!» 26Báaba bá mbaá lɔmɔ́ bá mo bódólonyo go oyɛda bá amɔ́: «Ánɛ́ɛ kanɛ́ bá lɔ́mɔ́ ba go mo sódio o?» 27Yésusu go oyɛda amɔ́: «Bɔ́ɔbɔ bó lɔ́mɔ́ ndɔlɛ naá busío bá batɔ, bó do báá ndɔlɛ naá Asaŋa.»
28Píele go oyɛda a amɔ́: «Ɛ́ná, bɛɛcɔ́ɔ dɛ mba síé dɛ báá dɛ́ɛ́ná moóma mɛ́cɔ́ muimée go go go fíde!» 29Yésusu go bó gundie a amɔ́: «Mammana, mammana, ŋgaá nyó oyáná caá, mɔtɔ a amɔ́ a síe a báá dɛ́ɛ́ná nnyaŋá, ogɛ́, bolimóní, bebíéní bɛ́hɛ́, ɛ́na baaná, go busío bá Bufuŋe bá Asaŋa, 30a ŋga bɛáa moóma mɔ́ɔmɔ degédegé bó dómba naá gɛcamɛna gɛ́ɛgɛ dɛ lɔ́mɔ́ hɔ́ɔ gɛ́ɛgɛ, tɔ́nɔ a bɛa naá cí yɛ́ɛyɛ yɛ úlenemú gɛɔyɔ gá kanɛ mesúge.»
Yésusu a á dóógío nigúe nɛ́hɛ́ go ɔŋɛndɔ yá gádadɔ́ɔ
(Mot 20.17-19; Mél 10.32-34)
31Gɔ́ɔ Yésusu a gɔ́lɔmɔ́ Bɛɔdɔ́ɔ na bɛ́andɛ́, go bó oyana a amɔ́: «Ɔ́bɔ́ nɔnɔ, gɛ́cɔ́ go bólɛga naá Yolósalɛmɛ, anáa moóma muimée mɔ́ɔmɔ mbúsí sá Asaŋa sɛ́ mbɔɔ́ ɔ́ŋɔ́ɔ go busío bá Moɔnɔ́ ba mɔtɔ mó ná bóhóogiomú. 32Bá ná mo dúe naá bindiíyímé Asaŋa, bɛ́ɛbɛ bɛ́ ná mo hɔnɔ, bɛ́ mo sɛga, bɛ́ mo cábana bɛdɛ́. 33Bɛ́ ná mo gide na bɛságɔ bɛ́ gunde bɛ́ mo óna. Kanɛ́ naá buisí bá gádadɔ́ɔ, a fúfuge.» 34Kanɛ́ behúúní bá mba lɛ́ kanɛ go ɔ́bɔ boóma bɔ́ɔbɔ akɛ́ sɔŋɛ; cí ya dogálɔ dɔ́ɔdɔ ɛ mba lɛ́ bó ɔsɛ́gɛ́nɔ́ɔlú, bá báá lɔbɛ́nɔ́ kanɛ go íyime bɔ́ɔbɔ Yésusu a mbaá lɔmɔ́ o oya.
Yésusu e é éŋúgíe ugélígeli ummue naá Yelíko
(Mot 20.29-34; Mél 10.46-52)
35Aŋa Yésusu a mbaá lɔmɔ́ ɛ ɛ́dana go go bola naá tɛ́sɔnɔ ya Yelíko, ugélígeli ummue a mba lɛ́ ndukíi naá boayá bá pɛ́, ɔ ɔŋɔnɔ hɔ́ɔ. 36Ɔ ɔ́ ɔ́bɔ́ gitúu gá batɔ gɛ́ dómbana, gɛ́hɛ́ go úhune ɛkádɛ́ moánɛ. 37Gɔ́ɔ bá mo oyanamɔ́ bá amɔ́, Yésusu ba Násalɛdɛ mɔ́ɔ a mbaá lɔmɔ́ a nco dómbana. 38Kanɛ́ gɛ́hɛ́ go áncɛda ukelú naá mmoɛná a amɔ́: «Yésusu, Ohaŋa ba Défidi, ŋgɛ́náamɔ́ mahana!» 39Batɔ báaba bá mbaá lɔmɔ́ bá dóanana naá busío go ɛ́da go mo kóndiokondio goŋaá a buige nyuudé, kanɛ́ mɔ́ɔ go áncɛda gɔnɔ́ ukelú naá mmoɛná a amɔ́: «Ohaŋa ba Défidi, ŋgɛ́náamɔ́ mahana!» 40Yésusu go dɛ́lɛmɛna, a búú úhúné goŋaá ŋgáa bú úle nɛhɛ́ anáa mɔ́ɔ a mbaá lɔmɔ́. Ugélígeli a á mo báyɛkɛ́ná, Yésusu go mo úhune a amɔ́: 41«Ɛkádɛ o lɛ́galɛgamɔ́ goŋaá ŋŋa go busío báhɔ o?» Ugélígeli go mo gundie a amɔ́: «Daadáa, ŋaáa goŋaá ŋgɛ́nanɛna!» 42Yésusu go mo oyana a amɔ́: «Ɛ́nánɛ́náa, Ɛ́dá, gioliminyo gáhɔ gɛ́ á go éŋúgíe#18.42 gɛ́ á go éŋúgíe ɛ́na gɛ́ á go sódío..» 43Hɔ́ɔ na hɔ́ɔ, gɛ́hɛ́ go ɛ́da go ɛ́nanɛna, a bienene Yésusu, a búlugenye Asaŋa. Gitúu gá batɔ giimée gɛ́ ɛ́ ɛ́ná boóma moánɛ, gá gɛ́ go ɛ́da go búlugenye tɔ́nɔ Asaŋa.
Currently Selected:
Lókasɛ 18: YAS
Highlight
Share
Copy
Want to have your highlights saved across all your devices? Sign up or sign in
