Lókasɛ 16
16
Ncaba ya uliomí ba uyogóní
1Gɔ́ɔ Yésusu a gɔnɔmɔ́ go oyana behúúní bɛ́hɛ́ a amɔ́: «Onɔ́mɛnɔmɛ ba mɔtɔ ummue a mba lɛ́ a bɛanana umbídígíní bonɔ́mɛ bɛ́hɛ́. Gɔ́ɔ kanɛ́ bá ncomɔ́ mo dóoginyo goŋaá mɔtɔ mɔ́ɔnyɔ a budebudie bonɔ́mɛ bɛ́hɛ́. 2A báá lɛ go dɔ́ŋɛnɔ uyogóní mɔ́ɔnyɔ go mo úhune a amɔ́: “Gɛsɛnɛ gɛ́ɛgɛ ŋgɔ́bɔnɔmɔ́ batɔ bá gálagala gɛ́ ladana nahɔ gɛ́ lɔ́mɔ́ nɛ́ɛnɛ o? Ŋgoyánáamɔ́ aŋa o ŋananamɔ́ na bonɔ́mɛ bámɛ, goakɛ́ caá maamɔ́ɔ o ná gɔnɔmɔ́ bó beŋebeŋe.” 3Gɔ́ɔ umbídígíní bonɔ́mɛ a bágálɛdɛnamɔ́ naá odɛ́má gadɛ́ɛ a amɔ́: “Nnɔ́ ɔyɔmɔ́ nɛ́ɛnɛ gɔ́ɔgɔ aŋa ogɔ́nɔ́ɔ bamɛ o oyɛdamɔ́ a amɔ́ cɛ gɔnɔ́ beŋe bonɔ́mɛ bɛ́hɛ́ o? Yɔmɔ́ɔ mɔ́nyɔ́ɔ kanɛ bogaaga bá go yɔgɔnɔ ntɛ́mɛ́. Kɔnɔ nóanana odóɛ go go ɛ́da ŋgɔŋɔnɔ batɔ moóma. 4Ɛɛ́ɛŋ, ŋgií íyímé aŋa ndɔ́mɔ́ ba go ŋa go goŋaá aŋa nná sógamɔ́ undukí yámɛ, batɔ bá kɔ́lɔnɔ bese naá nnyaŋá sábɔ́.” 5Kɔ́ɔ ɛ ɛ́damɔ́ go dɔ́ŋɔnɔ go ummue go ummue, biiménénée báaba ba mbaá lɔmɔ́ bá bɛanɛnana ogɔ́nɔ́ɔ bɛhɛ́ ufínó yá boóma. Ba busío, a báá mo úhúné a amɔ́: “O bɛanɛnana ogɔ́nɔ́ɔ bamɛ ufínó yá ɛkádɛ o?” 6Mɔ́ɔnyɔ go mo gundie a amɔ́: “Mmo bɛanɛnana kásɛ́ sá megúdé ntɛdɛ.” Gɔ́ɔ a mo oyanamɔ́ a amɔ́: “Gɔ́lɔ́ kálata yahɔ ya ufínó, o lukumene go cí fɛaŋɔ go ɔ́ŋɔ kɔ́ɔ go a amɔ́: Kásɛ́ sá megúdé otíno áhandɛ́ na sɛ́ɔ́dɔ́.” 7Naá nnyimé hɔ́ɔlɔ́, gɔ́ɔ a dɔ́ŋɛnɔmɔ́ ba gáandɛ́ɛ. Gɛ́hɛ́ go mo úhune a amɔ́: “Maamɔ́ɔ, bá go úhenemú ŋkádɛ o?” Mɔ́ɔnyɔ a amɔ́: “Ŋkudu sá mbasa ntɛdɛ.” Gɛ́hɛ́ go mo oyanamɔ́ a amɔ́: “Gɔ́lɔ́ kálata yahɔ ya ufínó yɛ́ɛyɛ, go ɔ́ŋɔ kɔ́ɔ go amɔ́: Ŋkudu sá mbasa otíno énni.” 8Ogɔ́nɔ́ɔ ba gɛbɛ́ gá umbídígíní bonɔ́mɛ mɔ́ɔnyɔ go mo ségi goŋaá a mba ŋaáa boóma bɔ́ɔbɔ na moloolio degédegé. Batɔ bá cí yɛ́ɛyɛ bá lɛ́ na moloolio degédegé naá masɔ́mɔ máama má bó ladanamɔ́ na basɔ́gɔ́ɔ, bá dómbana báaba naá gise.
9«Kanɛ́ ŋgaá nyó oyáná caá: bɔ́ŋɔ́nɔ́ɔ nɔnɔ megúle na bonɔ́mɛ bá mbele bá cí yɛ́ɛyɛ, go goŋaá naá gɛcamɛna gɛ́ɛgɛ no nɛ́ ɛ́damɔ́ go sógasoga, bá nyó gɔ́lɔ bese naá kɛ́gɛ́ná sá medúgú miimée.
10«Mɔtɔ mɔ́ɔnyɔ a beŋemú moóma má sɔŋɛ bese bese, a lɛ́ tɔ́nɔ mɔ́ɔnyɔ a ná beŋemú moóma má bɛantáa bese bese. Mɔtɔ mɔ́ɔnyɔ a lɔ́mɔ́ a dɛ bɛ́ɛ́mbá bá go beŋe moóma má sɔŋɛ bese bese, a dɛ báá tɔ́nɔ bá go beŋe bɛantá bá moóma bese bese. 11Aáŋa no do á gí íyímé go beŋe bonɔ́mɛ bá mbele bɔ́ɔbɔ naá cí yɛ́ɛyɛ bese, ánɛ́ɛ a lɔ́mɔ́ ba go nyó ága naá bonɔ́mɛ bá mammana o? 12Gɔnɔ́ aáŋa no do beŋé moóma má sɔ́gɔ́ɔ bese, ánɛ́ɛ a ná nyó fáamɔ́ mɔ́ɔmɔ mó lɔ́mɔ́ mɛ́nyɔ́ o?
(Mot 6.24)
13«Uyogóní a dɛ báá ba go yɔgɔnɛnɔ bagɔ́nɔ́ɔ báandɛ́: a gaá bɛlábɛ́láa ummue, a maamana ummue, ɛ́na lí, a gaá báladá na ummue, a fánɛna ummue. No do báá ba go yɔgɔnɛnɔ na Asaŋa na Muinyí#16.13 O bana, go eninye na Mot 6.24..»
Bɔ́ɔbɔ batɔ bɛ́ ɛ́nanamɔ́ gɛantáa makɔ́nɔ́ bó lɛ́ gɛbɛ́ makɔ́nɔ́ naá Asaŋa
14Aŋa Befelisiéŋe bá mbɔɔ́ ɔ́bɔ́ dogálɔ dá Yésusu dɔ́ɔdɔ, bá báá lɛ gó ɛ́da go mo hɔɔnɔ, goŋaá bá mba lɛ́ bá lɛ́galɛga bonɔ́mɛ. 15Gɔ́ɔ Yésusu a bó oyanamɔ́ a amɔ́: «No lɛ́ batɔ báaba bá lɛ́galɛgamɔ́ go dúfie naá oŋgíso yá batɔ bóncodío goŋaá no lɛ́ bɛtɛ́nɛ́ɛ, kanɛ́ Asaŋa i íyimene ɛdɛ́má yɛnyɔ́. Boóma buimée bɔ́ɔbɔ bó lɔ́mɔ́ gɛantáa makɔ́nɔ́ naá oŋgíso yá batɔ, bó lɛ́ gɛbɛ́ makɔ́nɔ́ naá oŋgíso yá Asaŋa.
(Mot 11.12-13)
16«Gicele gá Mɔ́sɛsɛ na bakálata bá mbúsí sá Asaŋa mó mba gɛ́gáa gó ɛ́da go éme naá gɛcamɛna gɛ́ɛgɛ Sáŋa Begiyuminye a mbuú úlé. Kɔ́ɔ gó bayɛga naá gɛcamɛna moánɛ gó nco go éme ínoni yɛ́ɛyɛ, bó oyamɔ́ Gɛnɔ́gɔ́ gá Cɔ́mɔ gá Bufuŋe bá Asaŋa naá batɔ biimée. Go busío bá ndiemi gɔ́ɔ mɔtɔ uŋkimée a fúmbemú go íŋene hɔ́ɔ go bogaaga.
(Mot 5.18)
17«Gó lɛ́ gá go bɛ́ɛmba fɛaŋɔ goŋaá mmoɛná na cí mó dómba, caá akɛ́ goŋaá ipuúpumbú há gɛlada hɛ́ úlukie naá kálata ya gicele.
(Mot 5.32; 19.9; Mél 10.11-12)
18«Mɔtɔ a amɔ́ i inye okɔ́dɔ bɛhɛ́, a báá giŋé uncodío, a á ŋaáa gɛdáŋa. Tɔ́nɔ, mɔtɔ mɔ́ɔnyɔ a giŋemú okɔ́dɔ mɔ́ɔnyɔ onɔ́mɛ a mo inyemú, a á ŋaáa gɛdáŋa.»
Ncaba ya onɔ́mɛnɔmɛ ba mɔtɔ na Lasáalɛ
19«Onɔ́mɛnɔmɛ ba mɔtɔ ummue a mba lɛ́ hɔ́ɔ, a bálɛŋa na ndɛŋɔ sá nigúmi gɔnɔ́ sɛ́ɛsɛ sɛ́ lɔ́mɔ́ ntɔ́nɔ makɔ́nɔ́. Ɔ ɔyɔ miisí miimée naá fundufundu na bɛnɔ́gɔ́ bá manyáanya. 20Osógasoga ba mɔtɔ ummue, ufíno yɛ́hɛ́ Lasáalɛ, a lɛ go bɛ́ɛmba a súgulesugule hɔ́ɔlɔ́ naá gɛasɛ́ gá onɔ́mɛnɔmɛ, bɛdɔ́lɛgɔ nnyɔ́dɔ iŋkimée. 21A mba lɛ́ odɛ́má a amɔ́ a bédúge na pumbú sɛ́ɛsɛ sɛ́ mbaá lɛ sɛ́ balagadana naá tábɛ́la ya onɔ́mɛnɔmɛ. Kanɛ́ bó do báŋaáa nɔ́ɔ, mbóa sɛ́ lɛ go gɔnɔ go ɛ́da go nco náka bɛdɔ́lɛgɔ bɛ́hɛ́.
22«Kɔ́ɔ osógasoga a gúemú, bɛɛ́ŋgɛlɛsɛ go mo gɔ́lɔ bá bɛ́ɛ́ ɛ́dá nɛhɛ́ naá boayá bá Ábalaháma. Onɔ́mɛnɔmɛ a báá gúé tɔ́nɔ, bá báá mo miée. 23A mba lɛ́ ɔ ɔ́bɛgɔnɔ makɔ́nɔ́ naá kɛ́gɛ́ná ya begúe; gɛ́hɛ́ go fediginye busío, go ɛ́na halaháláa Ábalaháma, Lasáalɛ naá boayá bɛ́hɛ́. 24Gɛ́hɛ́ go áncɛda a amɔ́: “Baaba Ábalaháma, ŋgɛ́náamɔ́ mahana, o dóma Lasáalɛ a dúme busío bɛ́hɛ́ bá ɛnɔɔ́nnɔɔ́ naá miimpo, a nco ndibige gɛlɛ́mbɛ, mammana ŋgɔ́bɛgɔnɔ makɔ́nɔ́ naá íyuke hɛ́ɛhɛ.” 25Ábalaháma go mo oyana a amɔ́: “Moɔnɔ́ bamɛ, bééníŋínyéemú goŋaá naá gɛɔyɔ gáhɔ o lɛ́ bɛáalú besé akɛ́báamɔ́, Lasáalɛ mɔ́ɔ a báá bɛáa gɛɔ́bɛgɔ akɛ́báamɔ́. Kɔ́ɔ godɔ́ɔdɔ háalá, a bɛananamɔ́ gifuugidie gɛ́hɛ́, maamɔ́ɔ go ɔ́bɛgɔnɔ. 26Gɔnɔ́ tɔ́nɔ, findímí ya ɛbɛ́lá ɛ có ádona nɛcɔ́ nɛnyɔ́, goŋaá báaba bá lɛ́galɛgamɔ́ go báca háalá go go úle hɔ́ɔlɔ́ naá bɛɛnyɔ́ɔ bá dɛ bósó. Tɔ́nɔ naá bɛɛnyɔ́ɔ hɔ́ɔlɔ́, mɔtɔ a dɛ bósó ba go báca go go úle háalá naá bɛɛcɔ́ɔ.”
27«Onɔ́mɛnɔmɛ a amɔ́: “Baaba, ŋgaá go bósógólídío kanɛ́ goŋaá o dóma Lasáalɛ naá nnyaŋá ya isée bamɛ, 28mbɛanana hɔ́ɔ bolimóní bá banɔ́mɔtɔ́ bátáanɔ. Ŋgɛ́ɛ ɛ ɛ́da bó bébégidine goŋaá bɔ́ɔ tɔ́nɔ bá dɛ ncó go úle naá hoóma há goɔ́bɛgɔnɔ háaha.” 29Ábalaháma go gundie a amɔ́: “Ŋgáa bɔ́ ɔ́bɔ bɔ́ɔbɔ bó lɔ́mɔ́ ɔ́ŋɔ́ɔlú naá kálata ya bicele ya Mɔ́sɛsɛ na ya mbúsí sá Asaŋa.” 30Mɔ́ɔ a amɔ́: “Akɛ́ɛ, baaba Ábalaháma, mɔtɔ a amɔ́ a nco go úlukie naá begúe háalá a bɛ́ɛ́ ɛ́da bó huenye, bá nɔ́ ɔ́bɔ.” 31Kɔ́ɔ Ábalaháma a mo oyanamɔ́ a amɔ́: “Aáŋa bá dɛ ɔ́bɛ́nɔ́ Mɔ́sɛsɛ na mbúsí sá Asaŋa, akɛ́ mɔtɔ a fúfuge naá begúe, bá dɛ ná bósó go mo ɔ́bɔ”.»
Currently Selected:
Lókasɛ 16: YAS
Highlight
Share
Copy
Want to have your highlights saved across all your devices? Sign up or sign in
