Lókasɛ 15
15
Ncaba ya gɛdómbáa gá go gɔnɔ go ɛ́nɛga
1Gɔ́ɔ bogólí tásɛ biimée na beŋií mobɛ́ bɛ́ ɛ́damɔ́ go báyɛkana Yésusu go go ɔ́bɔnɔ dogálɔ dɛ́hɛ́. 2Befelisiéŋe na muloodio má gicele go bayɛga go uŋguluŋgule, bó oya bá amɔ́: «Mɔtɔ mɔ́ɔnyɔ a gɔ́lɔnɔ beŋií mobɛ́ bese, a nyáanya olɔŋɔ nabɔ́.»
3Kɔ́ɔ Yésusu a bó ágɛnamɔ́ ncaba yɛ́ɛyɛ a amɔ́: 4«Ánɛ́ɛ naá bɛɛnyɔ́ɔ a lɔ́mɔ́ ba ŋaá, aáŋa a bɛanana bɛdómbáa ntɛdɛ, gímmue gɛ́ báá yímé, a dɛ síé bɛ́ɛbɛ otíno énni na buinyo na bínni naá bodɛ́agadɛ́, go go ɛ́da fúmbe gɛ́ɛgɛ gɛ́ báá ná yímé gó húme aŋa a gɛ́ ɛ́namɔ́ o? 5Aŋa a gɛ́ ɛ́namɔ́, a gɛ́ bááfɛga naá bibéndu na gɛca gá bɛyaŋa. 6Aŋa a bolamɔ́ naá mɔ́ nnyaŋá, a lɛ go bándɛgɛna begúle bɛ́hɛ́ na mebégu mɛ́hɛ́, a bó oyana a amɔ́: “Ŋgáa dɛ no békelenye, goŋaá ŋgɛɛ́ ɛ́ná gɛdómbáa gámɛ gɛ́ɛgɛ gɛ́ lɔ́mɔ́ yíméelú!” 7Ŋgaá nyó oyáná caá: nɔ́ɔ gɔ́ɔ tɔ́nɔ bɛyaŋa bɛ́ ná bɛ́ɛmbamɔ́ naá mmoɛná go uŋií mobɛ́ ummue táŋɛ́ mɔ́ɔnyɔ a núgiemú gɛɔyɔ, gó dómba bɛtɛ́nɛ́ɛ bá batɔ otíno énni na buinyo na bínni bɛ́ɛbɛ bɛ́ lɔ́mɔ́ bɛ́ dɛ gɔnɔ́ baŋa go núgie gɛɔyɔ.»
Ncaba ya dóla go yíme
8«Ɛ́na lí, okɔ́dɔ ohanɛ́ a lɔ́mɔ́, aáŋa a bɛanana bafaláŋa bɛ́hɛ́ bá muinyí bɔ́ɔ́dɔ́, gɔ́ɔ a yímiemú mmue, a dɛ ágá lámba íyuke, a fóla ncíbo yɛhɛ́ na embúne kɛ́, gó ɛ́da héme aŋa a yɛ bádamɔ́ o? 9Kanɛ́, aŋa a ŋamɔ́ a báa go yɛ báda, a lɛ go bándɛgɛna begúle bɛ́hɛ́ na mebégu mɛ́hɛ́, a bó oyana a amɔ́: “Ŋgáa dɛ no békelenye, goakɛ́ ŋgaá bádá yɔmɔ́ faláŋa ya muinyí yɛ́ɛyɛ ɛ lɔ́mɔ́ yíméelú!” 10Nɔ́ɔ gɔ́ɔ nnyó oyanamɔ́ caá, bɛyaŋa bɛ́ lɛ́ naá bɛɛ́ŋgɛlɛsɛ bá Asaŋa gɔ́ɔgɔ uŋií mobɛ́ ummue táŋɛ́ a núgiemú gɛɔyɔ.»
Ncaba ya moɔnɔ́ ba go nco gunde naá gɛɛŋɔ́ gá isée
11Gɔ́ɔ Yésusu a gɔnɔmɔ́ bó oyana a amɔ́: «Mɔtɔ ummue a mba lɛ́ na bahaŋa bɛ́hɛ́ báandɛ́. 12Ba gifío go oyana isée a amɔ́: “Baaba, páamɔ́ gámɛ gigísi gá bonɔ́mɛ bá bigíndé gɛ́ɛgɛ gɛ́ lɔ́mɔ́ gámɛ.” Gɔ́ɔ isée a bó abɛdanamɔ́ bonɔ́mɛ bɛ́hɛ́. 13Medúgú sɔŋɛ má á dómbá, ohaŋa ba gifío go dúe moóma mɛ́hɛ́ muimée, a bɛ́ɛ́ ɛ́dá naá gɛdɔŋɔ gá halaháláa, a bóó obɛ́ná go díeŋedieŋie bonɔ́mɛ bɛ́hɛ́ go gɛbɛ́ gá gɛɔyɔ. 14Kanɛ́ aŋa a mbaá ŋá a báa go bude bonɔ́mɛ bɛ́hɛ́ buimée púmú, gɛantá gá ncaná gá gɛ́ go íŋene naá gɛdɔŋɔ. Gosóga gó báá bayɛ́gá go mo gumbenene. 15Kɔ́ɔ ɛ ɛ́damɔ́ gɔ́lɔ buelí naá mɔtɔ ummue ba gɛdɔŋɔ gɛ́ɛgɔ, mɔ́ɔnyɔ go mo dóma go go ɛ́da beŋebeŋe ŋgɔnɔ́bɛ́#15.15 O bana, go eninye na Mél 5.11. sɛ́hɛ́ naá gɛsɔgɔ. 16A mba lɛ́ na ncaná ya goŋaá gásɛ́ a á nyáá moóma mɔ́ɔmɔ ŋgɔnɔ́bɛ́ sɛ́ mbaá lɛ sɛ́ nyáanana, kanɛ́ mɔtɔ a dɛ ŋgá nco mo díside. 17Gɔ́ɔ ɛ ɛ́damɔ́ go bógoodo odɛ́nɛ́ yɛ́hɛ́, go bágálɛdɛna a amɔ́: “Kanɛ́ boyogóní bá baaba bénnikí bá nyáanyamɔ́ mó bɛ́gabɛga o! Yɔmɔ́ɔ nco gúenene háalá na ncaná. 18Kaá fadɛ́gɛ́ná, kunde naá baaba, mmo oyana caá: Baaba, ŋgaá budée Asaŋa, mbáá go budée maamɔ́ɔ. 19Cɛ háánánáa goŋaá bá gɔnɔ pínenye bá amɔ́ ohaŋa bahɔ, kɔ́lɔ́ɔmɔ́ gɔ́ɔgɔ aŋa uyogóní bahɔ ummue.” 20Gɔ́ɔ a fadɛgɛnamɔ́ go gunde naá isée. Aŋa a mbaá ŋá a gá lɛ́ halaháláa nɔ́ɔnɔ, isée go ɛ́da mo ɛ́na. Gɛ́hɛ́ go ɔ́bɔ gosóga degédegé naá odɛ́má. Go gúduge na odɛ́dá, a báá mo bágódá, a báá mo gɔ́lɔ́ kude. 21Gɔ́ɔ ohaŋa bɛhɛ́ a mo oyanamɔ́ a amɔ́: “Baaba, ndɛ́ budébudé Asaŋa, mbáa go budée tɔ́nɔ, cɛ háánánáa goŋaá bá pínenye bá amɔ́ ohaŋa bahɔ.” 22Isée go oyana boyogóní bɛ́hɛ́ a amɔ́: “Úlé nɔnɔ fɛaŋɔ na gɛla gɛ́ɛgɛ gɛ́ dómbamɔ́ bonɔ́gɔ́, no mo ága. Mo ágáamɔ́ nɔnɔ mmándɔ naá ɛnɔɔ́nnɔɔ́, no mo ága gɔnɔ́ nnaadɛna naá bɛgɔ́ndɔ́. 23Ɛ́dá no gɔ́lɔ gɛncɛlɛ gá gúlúge gá megúdé, no óna. Ŋgáa dɛ no nyáanya, dɛ békelenye, 24goŋaá ohaŋa bamɛ mɔ́ɔnyɔ, a mba gúé, kanɛ́ a á ncó gunde naá gɛɔyɔ; a mba yímé, kanɛ́ ŋgaá gɔnɔ́ mo ɛ́ná.”
«Gáábɔ́ go bayɛga go yaŋa. 25Hɔ́ɔlɔ́, ohaŋa ba busío ba mɔtɔ mɔ́ɔnyɔ a mbaá ŋá a gá lɛ́ naá ntɛ́mɛ́. A ná lɛ́ go nco gundene, a ná lɛ́ mekúígíi na nnyaŋá, gɛ́hɛ́ go ɔ́bɔ gigudugudu gá mesígí na mebíné. 26Gɔ́ɔ a dɔ́ŋɛnɔmɔ́ ummue mɔ́ɔnyɔ naá boyogóní goŋaá a mo oyana ɛkádɛ gɛ́ báá ná síéné gɛ́ bola naá nnyaŋá. 27Uyogóní mɔ́ɔnyɔ go mo oyana a amɔ́: “Tɛ́ɔbɛnɔ a báa nco gunde, gɔ́ɔ tɛ́ɔ a báá nó óná gɛncɛlɛ gá gúlúge go busío bɛ́hɛ́, goakɛ́ ohaŋa bɛhɛ́ a báa nco mo gundine bese naá ɛmbɔ́gɔ.” 28Kɔ́ɔ ohaŋa bɛhɛ́ mɔ́ɔnyɔ ɔ ɔ́bɔmɔ́ mpímí, a bíí inyé go íŋene naá ncíbo. Isée go héme, a bɛ́ɛ́ ɛ́dá go mo bósógolonyo goŋaá i íŋene. 29Kanɛ́ moɔnɔ́ mɔ́ɔnyɔ go gundie isée a amɔ́: “Nnyómá sɛ́sɛ́ɛ kanɛ ombanɔ, ko yɔgɔnɛnɔ, ká báasa cɛ inyé go ŋa boóma bɔ́ɔbɔ o ŋgoyanamɔ́. Maamɔ́ɔ o gá báasa o do páá akɛ́ moɔnɔ́ ba mbúnyi goŋaá dɛ nyáa na begúle bámɛ, dɛ békelenye. 30Kanɛ́ aŋa moɔnɔ́ bahɔ mɔ́ɔnyɔ, mɔ́ɔ mɔ́ɔnyɔ a mbaá díéŋédíéŋíe bonɔ́mɛ bahɔ go go bienebiene bakɔ́dɔ a ncomɔ́ gunde, go óna gɛncɛlɛ gá gúlúge gá megúdé go busío bɛ́hɛ́.” 31Kɔ́ɔ isée a mo oyanamɔ́ a amɔ́: “Moɔnɔ́ bamɛ, o lɛ́ bɛcamɛna biimée naá yɔmɔ́ boayá. Gɔnɔ́ boóma buimée bɔ́ɔbɔ mbɛananamɔ́ bó lɔ́mɔ́ báhɔ. 32Kanɛ́ gó bá sɛmɛganana goŋaá dɛ ɔ́bɔnɔ bese, dɛ békelenye, goakɛ́ tɛ́ɔbɛnɔ mɔ́ɔnyɔ a lɔ́mɔ́ mɔ́ɔnyɔ, a mba gúé, kanɛ́ a á ncó gunde naá gɛɔyɔ. A mba yímé, kanɛ́ ŋgaá gɔnɔ́ mo ɛ́ná.”»
Currently Selected:
Lókasɛ 15: YAS
Highlight
Share
Copy
Want to have your highlights saved across all your devices? Sign up or sign in
