Sáŋa 8
8
Odáŋadaŋa ba okɔ́dɔ
1Yésusu gɛ́hɛ́ go ɛ́da naá Ogɔndɔ yá magónɛ́dá má boolifíe. 2Gó bélenye na gɛyɛ́nɛ́ túlúbú, gɛ́hɛ́ go nco gunde naá Nnyaŋá ya Asaŋa. Aŋa batɔ biimée bá mbaá lɔmɔ́ bá mo úlenine, gɛ́hɛ́ go lukumene, go ɛ́da gáábɔ́ go húunenye. 3Gɔ́ɔ muloodio má gicele na Befelisiéŋe bó úlemú na okɔ́dɔ mɔ́ɔnyɔ bá mbaá mo gídígínyée a ŋanana gɛdáŋa; gáábɔ́ go mo sɛncɛga naá tɛ́mádɛ́má ya gitúu gá batɔ. 4Bá amɔ́ gá Yésusu bá amɔ́: «Iloodio, bá báá gídiginye okɔ́dɔ mɔ́ɔnyɔ a ŋanana gɛdáŋa. 5Naá gicele gɛ́cɔ́, Mɔ́sɛsɛ a có fáanana bogaaga bá go óna bakɔ́dɔ aŋa mɔ́ɔnyɔ náana na adánɛ́#8.5 Go ɛ́na naá Léfi 20.10; Bicele 22.22-24.. Dáhɔ go amɔ́ nɛɛ́nɛ o?» 6Bá mba lɛ́ bá gálagala nɔ́ɔnɔ na mbééníŋínyí ya go mo dámbɛna, go go bɛa gɛlabɛ́ná gá go mo sɔ́mɛnɔ go gɛ́. Kanɛ́ Yésusu go gudimene, go ɛ́da go dánda cí na ɛnɔɔ́nnɔɔ́. 7Aŋa bá mbaá lɔmɔ́ bɛ́ ɛ́dana naá busío bá mo nɔɔnɔnɔ ŋgúhune, Yésusu go bónogoga go bó oyana a amɔ́: «Ŋgáa ummue naá bɛɛnyɔ́ɔ, mɔ́ɔnyɔ a gá báasamɔ́ a dɛ ŋaáa gɛlɔgɔ, a dóana go mo dóɛda ɛdánɛ́.» 8Gɛ́hɛ́ go gɔnɔ gudimene, a báá dúmbényée na go dánda cí. 9Aŋa batɔ bá mbɔɔ́ ɔ́bɔ́ dogálɔ dɔ́ɔdɔ, gáábɔ́ go ɛ́da go úndugugene ummue go ummue, bilunú naá busío. Yésusu go síene hɔ́ɔlɔ́ mokáa, okɔ́dɔ tɛ́nɛ́ɛ naá busío bɛ́hɛ́. 10Gɔ́ɔ Yésusu a bónogogamɔ́, go mo gálɛda a amɔ́: «Okɔ́dɔ, bɔ́ɔ báhaába o? Mɔtɔ a dɛ á gá go fáá gɛoba o?» 11Okɔ́dɔ go gundie a amɔ́: «Akɛ́ mɔtɔ, Daadáa.» Yésusu a amɔ́ gɛ́hɛ́ aá: «Akɛ́ yɔmɔ́ɔ cɛ go fáánánáa gɛoba, kanɛ́ ɛ́dá, o do gɔnɔ́ lɔgɔ akɛ́ go buisí.»]
Yésusu a lɛ́ gise gá cí
12Yésusu go gɔnɔ bó oyana a amɔ́: «Yɔmɔ́ɔ ndɔ́mɔ́ gise gá cí#8.12 O bana, go eninye na Iseyíi 49.6; Mot 5.14; Sáŋa 9.5.. Mɔ́ɔnyɔ a mbienemú a dɛ ŋgá gɔnɔ go ɛnda naá mbíno, a ŋga bɛáa gise gɛ́ɛgɛ gɛ́ fáananamɔ́ gɛɔyɔ.» 13Gɔ́ɔ Befelisiéŋe bá mo oyanamɔ́ bá amɔ́: «O gálagala maamɔ́ɔ moatɛ́ go masɔ́mɔ máama má go núunemú! Ŋgoyáamɔ́ yahɔ ɛ lɛ́ go dugúnú!» 14Yésusu go bó gundie a amɔ́: «Akɛ́ aŋa ŋgoyáamɔ́ yamɛ ɛ lɔ́mɔ́ go yɔmɔ́ɔ ba moatɛ́, ɛ dɛ báá go dugúnú, goakɛ́ ŋgíyimene anáa ŋgɛ́damɔ́ go úlene gɔnɔ́ anáa ŋgɛ́danamɔ́. Kanɛ́ bɛɛnyɔ́ɔ no do íyíménée anáa ŋgɛ́damɔ́ go úlene gɔnɔ́ anáa ŋgɛ́danamɔ́. 15No sómba bɛsɛnɛ naá mbɔ́dɔ ya batɔ. Yɔmɔ́ɔ, cɛ sómbánɛ́náa mɔtɔ gɛsɛnɛ. 16Kanɛ́ bó amɔ́ bó bɛ́ɛmbamɔ́ goŋaá cómba gɛsɛnɛ, gosómba gámɛ gó lɛ́ tɛ́nɛ́ɛ, goakɛ́ cɛ báá mokáa; dɛ lɛ́ na Mɔ́ɔnyɔ a mbaá tómá. 17Bó lɛ́ ɔ́ŋɔ́ɔlú naá gicele gɛ́nyɔ́ goŋaá: Batɔ báandɛ́ bá amɔ́ bó oya boóma búmmue eé búmmue, ŋgoyáamɔ́ yabɔ́ ɛ dɛ báá go dugúnú#8.17 O bana, go eninye na Bicele 17.6; Ɛmbanɔ 35.30.. 18Kálagala go masɔ́mɔ máama má nnúunemú yɔmɔ́ɔ moatɛ́, Baaba mɔ́ɔnyɔ a mbaá tómá mɔ́ɔ tɔ́nɔ a gálagala go busío bámɛ.» 19Gáábɔ́ go mo úhune bá amɔ́: «Tɛ́ɔ moánɛ a lɔ́mɔ́ áhanɛ́ɛ o?» Yésusu go bó gundie a amɔ́: «No do ŋgíyíménée, gó gunde no do íyíménée Baaba; aáŋa gɔ́ɔ no ŋgíyimenemú, gásɛ́ tɔ́nɔ no íyimene Baaba.» 20Yésusu a mba gálágáláa dogálɔ dɔ́ɔdɔ naá hoóma háaha bá áganamɔ́ bɛbáágá, gɛcamɛna gɛ́ɛgɛ a mbaá lɔmɔ́ a húunenye naá Nnyaŋá ya Asaŋa. Mɔtɔ a dɛ mbá mo dála ombɔ́gɔ, goakɛ́ gɛcamɛna gɛ́hɛ́ gɛ́ mbaá ŋá gɛ́ gá lɛ́ gɛ́ dɛ háá.
Yésusu a á dóógío goɛ́da gɛ́hɛ́ naá Isée
21Yésusu go gɔnɔ bó oyana a amɔ́: «Ŋgɛ́dana; no ná púmbe, kanɛ́ no ná gúe naá gɛlɔgɔ gɛ́nyɔ́. No do bósó ba go ɛ́da anáa ŋgɛ́danamɔ́.»
22Beyúdene go ɛ́da go gálagala bɔ́ɔ nabɔ́ bá amɔ́: «Aŋa a lɔ́mɔ́ a amɔ́: “No do bósó ba go ɛ́da anáa ŋgɛ́danamɔ́”, a bɛanana mbééníŋínyí ya go bóóna lí?» 23Yésusu go bó gundie a amɔ́: «Bɛɛnyɔ́ɔ no lɛ́ bá cí háalá; yɔmɔ́ɔ ndɛ́ ba mmoɛná gúunú. Bɛɛnyɔ́ɔ no ɔ́bɛnɔnɔ na cí yɛ́ɛyɛ, kanɛ́ yɔmɔ́ɔ cɛ ɔ́bɔ́nɛ́nɔ́ɔ na yɛ́. 24Go busío moánɛ gɔ́ɔ ndɔ́mɔ́ nyó oyánáalú caá no ná gúe naá gɛlɔgɔ gɛ́nyɔ́. Ɛɛ́ɛŋ, no ná gúe naá gɛlɔgɔ gɛ́nyɔ́ aáŋa no do olimónyóo goŋaá ndɛ́ Mɔ́ɔnyɔ ndɔ́mɔ́#8.24 O bana, go eninye na Gihúmie 3.14-15..» 25Beyúdene go mo úhune kanɛ́ bá amɔ́: «Maamɔ́ɔ o lɔ́mɔ́ ánɛ́ɛ o?» Yésusu go bó gundie a amɔ́: «Bɔ́ɔbɔ ndɔ́mɔ́ ŋgúle nyó oyanɛna gó dúme naá mabayɛga. 26Mbɛanana gɛca gá moóma gá go oya na má go bide mɔ́ɔmɔ mó nyó núunemú; kanɛ́ Mɔ́ɔnyɔ a mbaá tómá o oya mammana, kɔ́ɔ yɔmɔ́ɔ tóogoninyomú batɔ goana bɔ́ɔbɔ mbɔɔ́ ɔ́bɔ́ naá mɔ́ɔ.» 27Bá dɛ mbáa lɛ bɔ́ ɔ́bɔnɔ goŋaá a mbaá lɔmɔ́ a bó oyanɛna moóma mɔ́ɔmɔ mó núunemú Isée. 28Yésusu go bó oyana kanɛ́ a amɔ́: «Aŋa no ŋgaá ŋá no báá go búlugie Moɔnɔ́ ba mɔtɔ, no lɔ go nco lɛnca tɔ́nɔ goŋaá ndɛ́ Mɔ́ɔnyɔ ndɔ́mɔ́. No gunde no lɛnca goŋaá cɛ ŋanánáa boóma go yɔmɔ́ɔ moatɛ́, ŋgoyamɔ́ goana bɔ́ɔbɔ Baaba a mbaá kúúnényée. 29Mɔ́ɔnyɔ a mbaá tómá a lɛ́ namɛ, a lɛ́ kanɛ go tɛ́ɛna mokáa, goakɛ́ ŋŋanana bɔ́ɔbɔ bó mo fɛɛnanɛnamɔ́ gɛcamɛna giimée.» 30Aŋa Yésusu a mbaá lɔmɔ́ a gálagala nɔ́ɔnɔ, gɛca gá batɔ go ágá odɛ́má yábɔ́ naá mɔ́ɔ.
Mammana ya ɛnana ya Ábalaháma
31Gɔ́ɔ Yésusu o oyanamɔ́ Beyúdene báaba bá mbaá ágá odɛ́má yábɔ́ naá mɔ́ɔ a amɔ́: «No amɔ́ no bágódɛna nogálɔ námɛ, no lɛ́ mammana behúúní bámɛ. 32No ní íyime mammana, mammana ɛ nyó úlie naá boɔlɛ́.» 33Beyúdene go mo gundie bá amɔ́: «Bɛɛcɔ́ɔ dɛ lɛ́ ɛnana ya Ábalaháma#8.33 O bana, go eninye na Mot 3.9; Lók 3.8., dɛ gá báasa dɛ dɛ bɛ́ɛ́mbá bɛɔlɛ́ bá mɔtɔ. Nɛɛ́nɛ o lɔ́mɔ́ ba go oyɛda go amɔ́ dɛ gaá húmé naá boɔlɛ́ o?» 34Yésusu go bó gundie a amɔ́: «Mammana, mammana, ŋgaá nyó oyáná caá, mɔtɔ mɔ́ɔnyɔ a ŋananamɔ́ gɛlɔgɔ a lɛ́ gɛɔlɛ́ gá gɛlɔgɔ. 35Gɛɔlɛ́ gɛ́ dɛ ɔ́bɔ́nɛ́nɔ́ɔ na ncíbo ya batɔ go busío buimée, kanɛ́ moɔnɔ́ mɔ́ɔ ɔ ɔ́bɔnɛnɔ na ncíbo ya batɔ go busío buimée. 36Moɔnɔ́ a amɔ́ a nyó fáŋa, no do ŋgá gɔnɔ bɛ́ɛmba gɔnɔ́ mammana bɛɔlɛ́. 37Ŋgíyimene goŋaá no lɛ́ ɛnana ya Ábalaháma, kanɛ́ gɔ́ɔ no fúmbemú go ŋgóna goakɛ́ nogálɔ námɛ no gá lɛ́ nó do nyó íŋénínée. 38Yɔmɔ́ɔ kálagala go bɔ́ɔbɔ mbɛɛ́ ɛ́ná naá Baaba; kanɛ́ bɛɛnyɔ́ɔ, no ŋanana bɔ́ɔbɔ no mbɔɔ́ ɔ́bɔ́ naá isée bɛnyɔ́.» 39Beyúdene go mo baga bá amɔ́: «Isée bɛcɔ́ a lɔ́mɔ́ Ábalaháma.» Yésusu go bó oyana a amɔ́: «Aáŋa no lɛ́ mammana baaná bá Ábalaháma, yɔgɔ́nɔ́ɔ nɔnɔ buelí bɔ́ɔbɔ mɔ́ɔ a mbaá yɔgɔ́nɔ́ɔ#8.39 O bana, go eninye na Héb 11.8-19.. 40Kanɛ́ godɔ́ɔdɔ, akɛ́ aŋa nnyó oyanɛnamɔ́ mammana yɛ́ɛyɛ mbɔɔ́ ɔ́bɔ́ naá Asaŋa, no fúmbe go ŋgóna. Ábalaháma a lɛ́ kanɛ go ŋa boóma aŋa bɔ́ɔbɔ nɔ́ɔnɔ. 41Bɛɛnyɔ́ɔ no ŋanana meŋiigíe má isée bɛnyɔ́.» Beyúdene go mo baga bá amɔ́: «Dɛ dɛ báá bɛbɔlɔ. Dɛ bɛanana Isée táŋɛ́ ummue, a lɔ́mɔ́ Asaŋa.» 42Yésusu go bó gundie a amɔ́: «Aáŋa Asaŋa a lɛ́ Isée bɛnyɔ́, gásɛ́ no mmaamana, goakɛ́ naá Asaŋa gɔ́ɔ ŋgɛ́damɔ́ go úlene, ndɔ́mɔ́ háalá go busío bɛ́hɛ́; ndɛ́ kanɛ go búúline yɔmɔ́ɔ moatɛ́, kanɛ́ Mɔ́ɔ a mbaá tómá. 43No lɔ́mɔ́ no do ɔ́bɔ́nɔ́ɔ boóma bɔ́ɔbɔ nyó oyanɛnamɔ́ goakɛ́ o? Bó lɔ́mɔ́ goŋaá no do hódánáa go bódólonyo nogálɔ námɛ. 44Isée bɛnyɔ́, a lɔ́mɔ́ Ohándá; gɔ́ɔ no lɛ́galɛgamɔ́ go ŋanana mbééníŋínyí sɛ́hɛ́. Gó dúme naá mabayɛga a lɛ́ uŋgúníní batɔ; a dɛ báasa o oya mammana, goakɛ́ mammana ɛ dɛ báá naá mɔ́ɔ. Gɛcamɛna gɛ́ɛgɛ a belebelemú, a gálagala go dɛ́hɛ́, goakɛ́ a lɛ́ umbelíbélí, mɔ́ɔ moatɛ́ isée ba mbele. 45Kanɛ́ aŋa yɔmɔ́ɔ ŋgoyamɔ́ mammana, go moánɛ no lɔ́mɔ́ no do olímónyóo dogálɔ dámɛ. 46Ánɛ́ɛ naá bɛɛnyɔ́ɔ a lɔ́mɔ́ ba go dúfie goŋaá ŋgaá ŋaáa gɛlɔgɔ o? Kanɛ́ aáŋa ŋgoya mammana, goakɛ́ no lɔ́mɔ́ no do olímónyóo dogálɔ dámɛ o? 47Mɔ́ɔnyɔ ɔ ɔ́bɔnɛnɔmɔ́ na Asaŋa, a bódólonyo dogálɔ dá Asaŋa. No do bódólónyóo dogálɔ dámɛ goŋaá no do báá bá Asaŋa.»
48Beyúdene go mo gundie bá amɔ́: «Dɛ oya mammana goŋaá o lɛ́ ba Básamalɛtɛ́ŋɛ, o lɛ́ gɔnɔ́ na gɛgáda gá giliíli.» 49Yésusu go bó oyana a amɔ́: «Akɛ́ɛ, cɛ báá na gɛgáda gá giliíli; kanɛ́ mbúlugenyemú Baaba, kɔ́ɔ bɛɛnyɔ́ɔ no ciisenyemú. 50Yɔmɔ́ɔ, cɛ fúmbée nigúmi námɛ ná moatɛ́. A lɛ́ hɔ́ɔ mɔ́ɔnyɔ a yɔgɔnɔmɔ́ go busío moánɛ, a sómba bɛsɛnɛ. 51Mammana, naá mammana, ŋgaá nyó oyáná caá, mɔ́ɔnyɔ a beŋemú nogálɔ námɛ, a dɛ ŋgá bóso go gúe.»
52Kɔ́ɔ Beyúdene bá mo oyanamɔ́ bá amɔ́: «Dɛ í íyímé godɔ́ɔdɔ goŋaá o lɛ́ na gɛgáda gá giliíli! Ábalaháma a mba gúé, mbúsí sá Asaŋa sɛ́ báá gúénénée tɔ́nɔ, kanɛ́ maamɔ́ɔ o lo go nco go oyɛda go amɔ́: “Mɔtɔ a amɔ́ a beŋe nogálɔ námɛ, a dɛ ŋgá bóso go gúe.” 53O lɛ́galɛga go oyɛda go amɔ́ o lɛ́ ogɔ́nɔ́ gá isée bɛcɔ́ Ábalaháma mɔ́ɔnyɔ a mbaá gúé o? Mbúsí sá Asaŋa tɔ́nɔ sɛ́ báá gúénénée. O lɛ́galɛgamɔ́ go bó oyɛda go amɔ́ o lɛ́ ŋkádɛ o?» 54Yésusu go bó gundie a amɔ́: «Aáŋa mbáfáanana yɔmɔ́ moatɛ́ moatɛ nigúmi, gásɛ́ nigúmi námɛ moánɛ nɛ́ lɛ́ go dugúnú. Baaba, mɔ́ɔ a páananamɔ́ nigúmi; mɔ́ɔ mɔ́ɔnyɔ bɛɛnyɔ́ɔ no oyamɔ́ no amɔ́ a lɛ́ Asaŋa bɛnyɔ́, 55gɔ́ɔ bɛɛnyɔ́ɔ no do mo íyíménée. Kanɛ́ yɔmɔ́ɔ mmo íyimene; caá ŋgoyɛda caá cɛ mo íyíménée, gásɛ́ ndɛ́ umbelíbélí aŋa bɛɛnyɔ́ɔ. Kanɛ́ mmo íyimene, mbeŋebeŋe nogálɔ nɛ́hɛ́. 56Isée bɛnyɔ́ Ábalaháma a mbɔ ɔ́bɔ́ bɛyaŋa makɔ́nɔ́ go mbééníŋínyí yɛ́ɛyɛ a mbaá bɛáa go goŋaá a gɛɛ́ ɛ́ná Buisí bámɛ; a lɛ́ bó ɛ́náalú, a báá békelényée akɛ́báamɔ́.» 57Hɔ́ɔlɔ́ gɔ́ɔ Beyúdene bá mo oyanamɔ́ ba amɔ́: «O gá lɛ́ o do húmé akɛ́ nnyómá otíno áhandɛ́ na sɛ́ɔ́dɔ́, go amɔ́ o mbɛ ɛ́ná Ábalaháma!» 58Yésusu go bó gundie a amɔ́: «Mammana, mammana, ŋgaá nyó oyáná caá, otóotoɛ yá goŋaá Ábalaháma a bɛ́ɛmba, yɔmɔ́ɔ Mmba ŋá nná lɛ́.» 59Gɔ́ɔ Beyúdene bá bádamɔ́ adánɛ́ go go mo dóɛdana. Yésusu go bó bɔ́ɔsɛgɛnɛnɔ, a báá húmé naá Nnyaŋá ya Asaŋa.
Currently Selected:
Sáŋa 8: YAS
Highlight
Share
Copy
Want to have your highlights saved across all your devices? Sign up or sign in
