Sáŋa 19
19
1Kɔ́ɔ Pɛlátɛ a fáamɔ́ bogaaga bá go gɔ́lɔ Yésusu bɛ́ ɛ́da mo sóala bɛságɔ. 2Bisimbi go noga ɛdada há bufuŋe na cɛ́ndɛ́, bá báá mo sɔnɛ́gɔ́ go odóɛ, bá báá mo ágá gɛmbɛ́lɛŋɛnyɛ gá kaba. 3Gáábɔ́ go mo báyɛkɛna, bá amɔ́ gɛ́hɛ́ aá: «Mbédíígí, ufuŋe yá Beyúdene!» Bɛ́ ɛ́da bá mo dóɛdana ɛmbɔ́lɛ́. 4Pɛlátɛ go gɔnɔ húme go oyana Beyúdene a amɔ́: «Ɛ́ná nɔnɔ, nnyó úlene nɛhɛ́ naá hanyɔ́, go goŋaá no íyime no amɔ́ cɛ ɛ́nánáa boóma bá go mo ubie na gɛsɛnɛ.» 5Gɔ́ɔ Yésusu a húmemú na ɛdada há cɛ́ndɛ́ go odóɛ, na gɛmbɛ́lɛŋɛnyɛ gá kaba go nnyɔ́dɔ. Pɛlátɛ go bó oyana a amɔ́: «Mɔtɔ moatɛ́ mɔ́nyɔ́ɔ!» 6Aŋa bagɔ́nɔ́ɔ bá bedúmbí bɛbáágá naá Asaŋa na bebeŋíbéŋí bábɔ́ bá mbaá mo ɛ́ná, go ɛ́da go ánca bá amɔ́: «Mo gilénéemú naá kolósi! Mo gilénéemú naá kolósi!» Pɛlátɛ a amɔ́ gáábɔ́ a amɔ́: «Mo gɔ́lɔ́ɔmɔ́ nɔnɔ, no ɛ́da mo gilene bɛnyɔ́ moatɛ́ naá kolósi; naá bámɛ boayá, cɛ ɛ́nánáa boóma bá go mo ubie na gɛsɛnɛ.» 7Beyúdene go mo gundie bá amɔ́: «Dɛ bɛanana gicele gímmue, go gicele moánɛ, a háanana na nigúe, goakɛ́ a lɛ́ bóoyɛ́dáalú a amɔ́ a lɛ́ Moɔnɔ́ ba Asaŋa#19.7 O bana, go eninye na Léfi 24.16..»
8Aŋa Pɛlátɛ a mbɔɔ́ ɔ́bɔ́ dogálɔ dɔ́ɔdɔ, gɛ́hɛ́ go gɔnɔ bɛa bofoá makɔ́nɔ́. 9Gɛ́hɛ́ go gɔnɔ go íŋene naá ncíbo, go úhune Yésusu a amɔ́: «Maamɔ́ɔ o lɔ́mɔ́ ba baánɛ́ɛ o?» Yésusu a dɛ mbá mo gundie boóma. 10Kɔ́ɔ Pɛlátɛ a mo oyanamɔ́ a amɔ́: «Yɔmɔ́ɔ mɔ́ɔ o mmámɛnamɔ́ o? O do íyíménée go amɔ́ mbɛanana bogaaga ba go go dɛ́ɛna, tɔ́nɔ na bá go go gilene naá kolósi o?» 11Kanɛ́ Yésusu go mo gundie a amɔ́: «O do báá ba go bɛa nɛgaŋa go busío bámɛ aáŋa nɛ́ dɛ ɛ́dá go úlene naá mmoɛná. Kɔ́ɔ gó lɔ́mɔ́, mɔ́ɔnyɔ a lɔ́mɔ́ túelú naá maamɔ́, a á bádóɛ́gɛ́ná gɛantáanta gá gɛlɔgɔ.» 12Gó bayɛga hɔ́ɔlɔ́, Pɛlátɛ go ɛ́da go fúmbe pɛ́ ya go mo dɛ́ɛna. Kanɛ́ Beyúdene go ɛ́da go ánca bá amɔ́: «Go amɔ́ o mo dɛ́ɛna, o do báá ugúle ba Sɛsáalɛ. Mammana, uŋkimée mɔ́ɔnyɔ a bébúlugiemú ufuŋe a lɛ́ obɛlɔ́bɛlɔ ba Sɛsáalɛ.»
13Aŋa Pɛlátɛ a mbɔɔ́ ɔ́bɔ́ dogálɔ dɔ́ɔdɔ, gɛ́hɛ́ go húmie Yésusu, mɔ́ɔ moatɛ́ go lukumene naá undukí ya umbidí (bá yó dɔ́ŋɔnɔ na nohébelée ba amɔ́ «Gabata»). 14Bó mba lɛ́ buisí bá go bégedegedie go gibíné gá Pásɛ́ka ya Beyúdene, boóma bá tólóbóo. Pɛlátɛ go oyana Beyúdene a amɔ́: «Ufuŋe yɛ́nyɔ́ yɔ́yɔ́ɔ!» 15Gɔ́ɔ bɛ́ ɛ́damɔ́ go ánca bá amɔ́: «Ŋgáa a gúe! Ŋgáa a gúe! Mo gilénéemú naá kolósi!» Pɛlátɛ go gɔnɔ gɔ́lɔ dogálɔ, a amɔ́ gáábɔ́ a amɔ́: «Kilene ufuŋe yɛ́nyɔ́ naá kolósi o?» Bagɔ́nɔ́ɔ bá bedúmbí bɛbáágá naá Asaŋa go baga bá amɔ́: «Dɛ dɛ bɛanánáa ufuŋe yúncodío goana Sɛsáalɛ.» 16Hɔ́ɔlɔ́ gɔ́ɔ, a bó íŋenemú Yésusu go go ɛ́da mo gilene naá kolósi.
Bá á gilénée Yésusu naá kolósi
(Mot 27.32-44; Mél 15.21-32; Lók 23.26-43)
Bá báá lɛ gó yɔkɛnɔ Yésusu. 17Yésusu go bádóɛgɛna kolósi yɛhɛ́, go húme, bá báá lɛ gó ɛ́da nɛhɛ́ anáa bá dɔ́ŋɔnɔmɔ́ bá amɔ́ «hoóma há Giŋóŋkólóŋó gá odóɛ», na nohébelée ba amɔ́ «Gologóta.» 18Hɔ́ɔ gɔ́ɔ, bá mbaá mo gilénée naá kolósi gɛcamɛna gímmue eé gímmue na bahándá báandɛ́ onyɔ moánɛ naá yɛhɛ́ kolósi, mɔ́ɔnyɔ boayá, mɔ́ɔnyɔ boayá, Yésusu go bɛ́ɛmba naá tɛ́mádɛ́má. 19Pɛlátɛ a mba dómá goŋaá bá ága gɛgɔ́gɔ́ naá odóɛ yá kolósi ya Yésusu, bá mbɔɔ́ ɔ́ŋɔ́ kɔ́ɔ bá amɔ́: «Yésusu ba Násalɛdɛ, ufuŋe yá Beyúdene.» 20Aŋa bá mbaá giléné Yésusu naá hoóma háaha há mbaá lɔmɔ́ mekúígíi na tɛ́sɔnɔ, gɛcɛcá gá Beyúdene gɛ mba banáa ŋgɔ́ŋɛ́ sɛ́ɛsɔ, goakɛ́ sɛ́ mba lɛ́ ɔ́ŋɔ́ɔlú na nohébelée, na nolatɛ́ŋɛ, na nogɛlɛ́gɛ. 21Gɔ́ɔ bagɔ́nɔ́ɔ bá bedúmbí bɛbáágá naá Asaŋa bá Beyúdene bó oyanamɔ́ Pɛlátɛ bá amɔ́: «O do á gá háánánáa go ɔ́ŋɔ go amɔ́: “Ufuŋe yá Beyúdene”, kanɛ́ go á ná lɔ́mɔ́ ba go ɔ́ŋɔ go amɔ́ “Mɔtɔ mɔ́ɔnyɔ a mba bóoyɛ́dá a amɔ́ a lɛ́ ufuŋe yá Beyúdene”.» 22Pɛlátɛ go gundie a amɔ́: «Bɔ́ɔbɔ mbáá nɔ́ ɔ́ŋɔ́, mbɔ́ɔ ɔ́ŋɔ.»
23Aŋa bisimbi bɛ́ mbaá ŋá bɛ́ báá go gilene Yésusu naá kolósi, bɛ́ báá gó gɔ́lɔ bɛla bɛ́hɛ́, go aba go madáŋɔ ménni, onyɔ moánɛ na bɛ́hɛ́. Kaba ɛ báá lɛ gó síene, ɛ mba lɛ́ kanɛ meledíe, nogáalú na mbáaga táŋɛ́ mmue. 24Bisimbi go bágálɛdɛna bɛ́ amɔ́: «Dɛ dɛ yɛ lafá, ŋgáa dɛ yɛ nɔɔ go adɔ go go ɛ́na mɔ́ɔnyɔ a gaá ná yɛ bɛáa.» Gɔ́ɔ nogálɔ ná Ŋgɔ́ŋɛ́ nɔ́ɔnɔ nó mbɛɛ́ ɛ́nánɛ́náa, nó lɔ́mɔ́: «Bá mba abɛ́dáná bɛla bámɛ, bá báá nɔɔ́ɔ kaba yamɛ go adɔ.» Boóma bɔ́ɔbɔ bisimbi bɛ́ mbaá ŋaáa bɔ́ɔbɔ. 25Bá mba lɛ́ hɔ́ɔ tɛ́nɛ́ɛ mekúígíi na kolósi ya Yésusu: nnyeedíi bɛhɛ́, ondimóní ba nnyeedíi, na Malɛ́a, okɔ́dɔ ba Kɛlɛyópasɛ, na Malɛ́a ba tɛ́sɔnɔ ya Magadaláa. 26Aŋa Yésusu a mbɛɛ́ ɛ́ná uhúúní mɔ́ɔnyɔ a mbaá lɛ a maamana mekúígíi na nnyeedíi, go oyana nnyeedíi a amɔ́: «Okɔ́dɔ, moɔnɔ́ bahɔ mɔ́nyɔ́ɔ.» 27Go oyana tɔ́nɔ uhúúní a amɔ́: «Yigúédíi mɔ́nyɔ́ɔ.» Gó bayɛga hɔ́ɔlɔ́, gɔ́ɔ uhúúní a mbaá dómbá go gunde na Malɛ́a naá mɔ́ nnyaŋá.
Gogúe gá Yésusu
(Mot 27.45-56; Mél 15.33-41; Lók 23.44-49)
28Naá nnyimé hɔ́ɔlɔ́, aŋa Yésusu a mbií íyímé a amɔ́ moóma muimée mó báá go ɛ́nanɛna, gɛ́hɛ́ go gálɛda a amɔ́: «Ndɛ́ na inyúidi», go goŋaá Ŋgɔ́ŋɛ́ sɛ́ bóhóogio bó ɛ́da bola naá mesúge#19.28 Ɛsagɔ 69.22; go eninye na Ɛsagɔ 22.16.. 29Iséní dácɛ há gɛtóánɔ́ɔ gá mɔgɛ́bɔ hɛ́ mba lɛ́ mekúígíi hɔ́ɔ, bisimbi bɛ́ báá gó cékiginye giyugú naá otáfɛ yá isópe, go gɛ́ dúme naá gɛtóánɔ́ɔ gá mɔgɛ́bɔ#19.29 O bana, go eninye na Ɛsagɔ 69.22., go mo yɛkɛna naá nyuudé. 30Aŋa Yésusu a mbɔɔ́ ɔ́bɛ́dɛ́nɔ́, gɛ́hɛ́ go gálɛda a amɔ́: «Buimée bó á bóhóógío!» Gɔ́ɔ a dábamɔ́ odóɛ go obɛnɛna.
Manɔ́ŋɔ́ na miimpo mó á húménée naá nnyɔ́dɔ ya Yésusu
31Bó mbaá lɛ buisí bá go bégedegedie go sábadɛ ya Beyúdene. Bá dɛ mbáa lɛ bá lɛ́galɛga goŋaá bá dɛ́ɛna bɛlɔ́ŋɔ́ naá kolósi buisí bá sábadɛ yabɔ́, goakɛ́ sábadɛ moánɛ ɛ mba lɛ́ gɛantá gá buisí. Go busío moánɛ gɔ́ɔ, bagɔ́nɔ́ɔ bá Beyúdene bú úhunemú Pɛlátɛ goŋaá a fáa bogaaga bá go mánca batɔ báaba naá kolósi bɛgɔ́ndɔ́#19.31 Go ɛ́na naá Bicele 21.22-23., bá lɛ go bó siisie. 32Bisimbi go ɛ́da gɔ́gɔ́ɔ go go mánca bɛgɔ́ndɔ́ bá batɔ báaba bá mbaá bó gilénée naá kolósi olɔŋɔ na Yésusu. Bá báá máncá bá mɔtɔ bá busío, bá bɛ́ɛ́ ɛndɛ́gá go ba gáandɛ́ɛ. 33Aŋa bá mbɛɛ́ ɛ́dá bola naá Yésusu, go ɛ́na goŋaá a báá go gúe, go lɔbɔ kanɛ go mo mánca bɛgɔ́ndɔ́. 34Kanɛ́ gisimbi gímmue go mo polo noɛndá na ɛyɔŋɔ́, kɔ́ɔ manɔ́ŋɔ́ na miimpo mó dómbamɔ́ go ɛ́da go húmene. 35Mɔtɔ mɔ́ɔnyɔ a mbɛɛ́ ɛ́ná, mɔ́ɔ o oyamɔ́ goŋaá tɔ́nɔ bɛɛnyɔ́ɔ no oliminyo; gooya gɛ́hɛ́ gó lɛ́ mammana; i íyimene a amɔ́ bɔ́ɔbɔ o oyamɔ́ bó lɛ́ mammana. 36Buimée bɔ́ɔbɔ bó lɛ́ báŋaáalú goŋaá nogálɔ ná Ŋgɔ́ŋɛ́ nɔ́ɔnɔ nó ɛ́nanɛna. Nó lɔ́mɔ́: «Bá dɛ ŋgá bóso go mánca akɛ́ gigúégúé gɛ́hɛ́ gímmue#19.36 Go ɛ́na naá Gihúmie 12.46; Ɛmbanɔ 9.12; Ɛsagɔ 34.21..» 37Gɔnɔ́ hoóma hóntió naá Ŋgɔ́ŋɛ́ hó oya há amɔ́: «Bá ŋga fedígényée oŋgíso go go lɛ́ɛma mɔ́ɔnyɔ bá mbaá mo poló noɛndá.»
Bá á miée Yésusu
(Mot 27.57-61; Mél 15.42-47; Lók 23.50-56)
38Naá nnyimé hɔ́ɔlɔ́, Yósɛbɛ ba tɛ́sɔnɔ ya Alɛmatɛ́ɛ go ɛ́da go úhune Pɛlátɛ bogaaga bá go gɔ́lɔ gigúe gá Yésusu. Yósɛbɛ moatɛ́ a mba lɛ́ uhúúní ummue ba Yésusu, kanɛ́ naá nɛɔsɛgɔ go go díine mefuŋe má Beyúdene. Gɔ́ɔ Pɛlátɛ o oliminyomú, Yósɛbɛ go ɛ́da go odona gigúe gá Yésusu naá kolósi. 39Nɛkɔdɛ́mɛ mɔ́ɔnyɔ a mbuú úlé gémmue go go nco go ɛ́na Yésusu na nutútúgu, a mbu úlé tɔ́nɔ na megúdé má go fofa nebígínyéelú na míile na aloɛ́sɛ boóma bá go éme bokílo nitíno na bɔ́ɔ́dɔ́. 40Gáábɔ́ go gɔ́lɔ gigúe gá Yésusu, go gɛ́ máŋana naá nnɔ́mbɔ́ ya gɛla, bɛ́ ɛ́da bá gɛ́ sugunene megúdé má go fofa aŋa gɔ́ɔgɔ Beyúdene bá mbaá lɛ bá mienene bigúe bábɔ́. 41Ntɛ́mɛ́ mmue ɛ mba lɛ́ mekúígíi na hoóma háaha bá mbaá gilénée Yésusu naá kolósi; gɛbɛ́lá gɛfáa gɛ́ mba lɛ́ hɔ́ɔ, gɛ́ɛgɛ bá mbaá ŋá bá gá lɛ́ bá dɛ miée mɔtɔ kɔ́ɔ. 42Aŋa bó mbaá lɛ buisí bá go bégedegedie go sábadɛ ya Beyúdene, gɛbɛ́lá gɛ́ɛgɔ gɔnɔ́ mekúígíi, gɔ́ɔ bá mbaá miée Yésusu kɔ́ɔ.
Currently Selected:
Sáŋa 19: YAS
Highlight
Share
Copy
Want to have your highlights saved across all your devices? Sign up or sign in
