Sáŋa 17
17
Yésusu a bósógolonyo go behúúní bɛ́hɛ́
1Aŋa Yésusu a mbaá dɔmbɔ́ go gálagala nɔ́ɔnɔ, gɛ́hɛ́ go fediginye oŋgíso go mmoɛná, a amɔ́: «Baaba, gigúlí gɛ́ á háá, gúmídíe Moɔnɔ́ bahɔ goŋaá Moɔnɔ́ bahɔ a go gúmidie. 2O mba mo fáá nɛgaŋa go batɔ biimée, go goŋaá a fáa biimée báaba o mbaá mo íŋéné gɛɔyɔ gá kanɛ mesúge. 3Gɛɔyɔ gá kanɛ mesúge moánɛ gɛ́ lɔ́mɔ́ goŋaá bá go lɛnca, maamɔ́ɔ mɔ́ɔnyɔ o lɔ́mɔ́ mokáa Asaŋa ba mammana; bá lɛnca tɔ́nɔ Yésu Kilítu mɔ́ɔnyɔ o mbaá dómá. 4Mmba dúfie nigúmi náhɔ naá cí, mbáa yibé buelí bɔ́ɔbɔ o mbaá páá go go ŋa. 5Kanɛ́ godɔ́ɔdɔ, Baaba, gɔnɔ́ páá nigúmi nɛ́ɛnɛ mmbaá lɛ na nɛ́ cóá naá boayá báhɔ otóotoɛ yá go gedie cí.
6«Mmba go lincíe naá batɔ báaba o mbaá gɔ́lɔ́ naá cí go go bó páa; bá mba lɛ́ bɔ́ ɔ́bɛnɔnɔ nahɔ, o báá bó páá, bá báá gumbéné nogálɔ náhɔ. 7Bí íyimene godɔ́ɔdɔ goŋaá buimée bɔ́ɔbɔ o mbaá páá, bó ncomɔ́ go úlene naá maamɔ́ɔ, 8go goŋaá mmba bó dúmbínyée dogálɔ dɔ́ɔdɔ o mbaá páá. Bá mba lɛncá mammana goŋaá ncomɔ́ go úlene naá maamɔ́ɔ, bá bóó olímínyóo goŋaá mammana maamɔ́ɔ mɔ́ɔ o mbaá tómá. 9Mbósógolonyomú go busío bábɔ́; cɛ bósógólónyóo go batɔ bá cí, kanɛ́ mbósógolonyomú go báaba o mbaá páá, goakɛ́ bɔ́ ɔ́bɛnɔnɔmɔ́ nahɔ.
10«Buimée bɔ́ɔbɔ bó lɔ́mɔ́ bámɛ, bó lɛ́ báhɔ; caŋa mmue, buimée bɔ́ɔbɔ bó lɔ́mɔ́ báhɔ, bó lɛ́ bámɛ. Nigúmi námɛ nɛ́ bédúfenye naá báaba o mbaá páá. 11Gó bayɛga godɔ́ɔdɔ cɛ báá gɔnɔ́ naá cí, kanɛ́ bɔ́ɔ, bá á síéné naá cí; yɔmɔ́ɔ, ŋgúle naá maamɔ́ɔ. Baaba, maamɔ́ɔ mɔ́ɔnyɔ o lɔ́mɔ́ Gimmúmpúu, bó beŋemú go bogaaga bá ufíno yahɔ, ufíno yɔ́ɔyɔ o mbaá páá, go goŋaá bá bɛ́ɛmba boóma búmmue aŋa namɛ nahɔ dɛ lɔ́mɔ́ boóma búmmue. 12Gɛcamɛna gɛ́ɛgɛ mmbaá lɛ nabɔ́, mmba bó beŋébéŋée go bogaaga bá ufíno yáhɔ, ufíno yɔ́ɔyɔ o mbaá páá. Mmba bó beŋébéŋée, akɛ́ ummue naá olɔŋɔ yábɔ́ a lɛ́ kanɛ go yíme, aáŋa caá goana mɔ́ɔnyɔ a mbaá lɛ ba go yíme go goŋaá Ŋgɔ́ŋɛ́ sɛ́ bóhóogio#17.12 Go ɛ́na naá Ɛsagɔ 41.10; Sáŋ 13.18..
13«Kanɛ́ godɔ́ɔdɔ, ŋgúle naá maamɔ́ɔ, kálagalamɔ́ dogálɔ dɔ́ɔdɔ, ká lɛ́ naá cí goŋaá bá bɛa bɛyaŋa aŋa bɛ́ɛbɛ ndɔ́mɔ́ na bɛ́, bá bɛ́ bɛa fundufundu. 14Mmba bó oyánɛ́náa nogálɔ nahɔ, kɔ́ɔ batɔ bá cí bá mbaá bó bɛlábɛ́láa, goakɛ́ bá dɛ ɔ́bɛ́nɔ́nɔ́ɔ na cí, aŋa yɔmɔ́ɔ ndɔ́mɔ́ cɛ ɔ́bɛ́nɔ́nɔ́ɔ na cí. 15Cɛ go úhénée naá mbósógólí yamɛ goŋaá o bó úlie naá cí, kanɛ́ bó lɔ́mɔ́ goŋaá o bó beŋe go Ombɛ́. 16Bá dɛ ɔ́bɛ́nɔ́nɔ́ɔ na cí, aŋa yɔmɔ́ɔ moatɛ́ ndɔ́mɔ́ cɛ ɔ́bɛ́nɔ́nɔ́ɔ na cí. 17Ŋaáa goŋaá bá bɛ́ɛmba uŋkimée uŋkimée babɔ́ naá maamɔ́ɔ go busío bá mammana, nogálɔ náhɔ nó lɛ́ mammana. 18Aŋa o mbaá tómá naá cí, yɔmɔ́ɔ tɔ́nɔ ŋgaá bó dómá naá cí. 19Ŋgaá bííŋéné uŋkimée uŋkimée bamɛ naá maamɔ́ɔ go busío bábɔ́ goŋaá bɔ́ɔ tɔ́nɔ bá bɛ́ɛmba uŋkimée uŋkimée babɔ́ mammana naá maamɔ́ɔ.
20«Cɛ bósógólónyóo goana go busío bábɔ́, kanɛ́ mbósógolonyomú tɔ́nɔ go busío bá báaba bá ŋgaá ágá odɛ́má yábɔ́ naá yɔmɔ́ɔ go busío bá nogálɔ nábɔ́. 21Mbósógolonyo goŋaá bɔ́ɔ biimée bá bɛ́ɛmba boóma búmmue, Baaba, aŋa maamɔ́ɔ o lɔ́mɔ́ naá yɔmɔ́ɔ, yɔmɔ́ɔ naá maamɔ́ɔ. Ŋgáa bɔ́ɔ tɔ́nɔ bá bɛ́ɛmba naá bɛɛcɔ́ɔ, go goŋaá batɔ bá cí bó oliminyo bá amɔ́ maamɔ́ɔ o mbaá tómá. 22Yɔmɔ́ɔ mmba bó fáá nigúmi nɛ́ɛnɛ o mbaá páá, go goŋaá bá bɛ́ɛmba boóma búmmue aŋa bɛɛcɔ́ɔ dɛ lɔ́mɔ́ boóma búmmue: 23yɔmɔ́ɔ naá bɔ́ɔ, maamɔ́ɔ naá yɔmɔ́ɔ, go goŋaá bá bɛ́ɛmba boóma bummue go busío buimée; nɔ́ɔ gɔ́ɔ batɔ bá cí bá ŋgaá lɛncá goŋaá maamɔ́ɔ mɔ́ɔ o mbaá tómá, gɔnɔ́ o bó maamana aŋa o mmaamanamɔ́. 24Baaba, maamɔ́ɔ o mbaá bó páá, gɔ́ɔ ndɛ́galɛgamɔ́ caá, bá bɛ́ɛmba olɔŋɔ namɛ naá hoóma háaha ka ŋgaá bɛ́ɛ́mbá. Nɔ́ɔ gɔ́ɔ bá ŋgaá núúnée nigúmi námɛ, nigúmi nɛ́ɛnɛ o mbaá páá, goakɛ́ o mba mmaamánáa otóotoɛ yá goŋaá o gedie cí. 25Baaba, maamɔ́ɔ mɔ́ɔnyɔ o lɔ́mɔ́ gɛtɛ́nɛ́ɛ, batɔ bá cí bá dɛ go íyímé, kanɛ́ yɔmɔ́ɔ ko íyimene, batɔ béndiemi bí íyimene goŋaá maamɔ́ɔ mɔ́ɔ o mbaá tómá. 26Mmba ŋaáa goŋaá bá go íyime, nná dúmbenye na go ŋanana nɔ́ɔnɔ. Nɔ́ɔ gɔ́ɔ gɛnɔ́ɔ́nɛ́nɔ́ gɛ́ɛgɛ o lɔ́mɔ́ na gɛ́ go busío bámɛ gɛ́ ná bɛ́ɛmbamɔ́ naá bɔ́ɔ, yɔmɔ́ɔ moatɛ́ nná bɛ́ɛmba tɔ́nɔ naá bɔ́ɔ.»
Currently Selected:
Sáŋa 17: YAS
Highlight
Share
Copy
Want to have your highlights saved across all your devices? Sign up or sign in
