Meŋiigíe 13
13
Banábasɛ nɛhɛ́ na Póolo bɛ́ ɛ́da go bosɔ́mɔ
1Naá giimbó gá boolímínyí gɛ́ɛgɛ naá Óntiosi, mbúsí na muloodio má Asaŋa mó mba lɛ́ hɔ́ɔ, ifíno yabɔ́: Banábasɛ, Símiyono, mɔ́ɔnyɔ bá gɔnɔmɔ́ mo dɔ́ŋɔnɔ bá amɔ́ Ufiídidi, Lúsiusu ba gɛdɔŋɔ gá Siléene, Manayɛ́nɛ mɔ́ɔnyɔ bá mbaá gumínyé gúmínyée na ufuŋe Elóode, na Póolo. 2Buisí búmmue, bá ná lɛ́ go búlugenye Daadáa, bá bécelene manyáanya, Gimmúmpúu gá Giliíli go bó oyana a amɔ́: «Nyáŋónɛ́náamɔ́ nɔnɔ Banábasɛ nɛhɛ́ na Sóole go go yɔgɔnɔ buelí bɔ́ɔbɔ ndɔ́mɔ́ bó dɔ́ŋɛ́nɔ́ɔlú go bɔ́.» 3Naá nnyimé ya go bécelene gá manyáanya na go bósógolonyo, gɔ́ɔ boolímínyí bá bó dálamɔ́ ɛmbɔ́gɔ go go bó fona, bá báa lɛ gó bó dɛ́ɛna bá bɛ́ɛ́ ɛ́dá go buelí bábɔ́.
Osɛɔsɛ́ɔ Ɛlɛ́masɛ
4Aŋa Gimmúmpúu gá Giliíli a mbaá lɛ bó dómáalú, Banábasɛ na Sóole go ɛ́da naá Selesíi, hɔ́ɔ hɔ́ɔlɔ́, gáábɔ́ go yala sitíme go go ɛ́da naá Sípele. 5Aŋa bá mbɛɛ́ ɛ́dá bola naá Selemíne, gáábɔ́ go bayɛga go dúmeninye nogálɔ ná Asaŋa naá nnyaŋá sá mbósógólí sá Beyúdene. Bá mba lɛ́ ɛ́dáalú na Sáŋa Mélékusu go go bó óhigonyo. 6Bá báá bácaáa gɛdɔŋɔ gá Sípele giimée bá bɛ́ɛ́ ɛ́dá húme naá Páfoso, hɔ́ɔ gɔ́ɔ bá mbaá luméné na osɛɔsɛ́ɔ ummue a bóoya a amɔ́ mɔ́ɔ a lɛ́ mbúsí, ufíno yɛ́hɛ́ Balɛ Yésusu, moɔnɔ́ ba Beyúdene. 7A mba lɛ́ ɔ ɔyɔ na Ŋgɔ́mɔnɔ ba Sípele ufíno yɛ́hɛ́ Seleyúsu Pólusu, unciŋínciŋi ba mɔtɔ. Ŋgɔ́mɔnɔ go dɔ́ŋɛnɔ Banábasɛ nɛhɛ́ na Sóole, goakɛ́ a mba lɛ́ a lɛ́galɛga go ɔ́bɔ nogálɔ ná Asaŋa. 8Kanɛ́ osɛɔsɛ́ɔ Ɛlɛ́masɛ, nɔ́ɔnɔ gɔ́ɔ ufíno yɛ́hɛ́ yó lɔ́mɔ́ na nogɛlɛ́gɛ, go ɛ́da go bó bábɛndabɛnda, a fúmbe go ŋa goŋaá Ŋgɔ́mɔnɔ a dɛ olímínyóo. 9Gɔ́ɔ Sóole, bá mo dɔ́ŋɔnɔ gɔnɔ́ bá amɔ́ Póolo, dácɛ na Gimmúmpúu gá Giliíli, a ágamɔ́ Ɛlɛ́masɛ oŋgíso. 10Gɛ́hɛ́ go mo oyana a amɔ́: «Uliomí ba mɔtɔ mɔ́ɔnyɔ na gɛbɛ́ gá odɛ́má, moɔnɔ́ ba ohándá, obɛlɔ́bɛlɔ ba besé iŋkimée. O do ná dɔmbɔ go nóŋgolonyo pɛ́ tɛ́nɛ́ɛ sá Asaŋa. 11Kanɛ́ godɔ́ɔdɔ o gɛɛ́ ɛ́ná. Daadáa a gaá go báláfɛ́ná, o goó obá bigélí o do gɔnɔ́ go ɛ́na gise go gɛcamɛna.» Hɔ́ɔ na hɔ́ɔ, oŋgíso yá Ɛlɛ́masɛ go dómba go oba bibúde, a báá bétemé naá mbíno gadɛ́ɛ, a ná lɛ́ a gunde boayá a gunde boayá, a fúmbe mɔtɔ goŋaá a mo gumbene go ombɔ́gɔ a mo indenye. 12Aŋa Ŋgɔ́mɔnɔ a mbɛɛ́ ɛ́ná bɔ́ɔbɔ bó mbaá báŋaáa, gɛ́hɛ́ go ága odɛ́má yɛ́hɛ́ naá Daadáa; a mba lɛ́ a békúke makɔ́nɔ́ gohúunenye gá masɛnɛ má Daadáa.
Dogálɔ dá Póolo naá Óntiosi ba Pisidíi
13Kɔ́ɔ Póolo na basɔ́gɔ́ɔ bá bólɛgamɔ́ naá sitíme hɔ́ɔlɔ́ naá Páfoso, gáábɔ́ go ɛ́da naá tɛ́sɔnɔ ya Pɛ́lɛyɛ ya gɛdɔŋɔ gá Panfɛlɛ́ɛ; Sáŋa Mélékusu go ádogana nabɔ́ hɔ́ɔlɔ́ mɔ́ɔ a báa gundé naá Yolósalɛmɛ. 14Kanɛ́ báaba bóncodío bú ú úlúkíe naá Pɛ́lɛyɛ gáábɔ́ go dúmbenye na oŋɛndɔ yábɔ́ bá bɛ́ɛ ɛ́dá go oba naá Óntiosi ba Pisidíi; buisí bá sábadɛ, gáábɔ́ go íŋene naá nnyaŋá ya mbósógólí bá báa lukúméné. 15Naá nnyimé ya go bana kálata sá Gicele na sɛ́ɛsɛ sá mbúsí sá Asaŋa, bagɔ́nɔ́ɔ bá nnyaŋá ya mbósógólí go dóma batɔ goŋaá bá bó oyana bá amɔ́: «Bolimóní, aáŋa no bɛanana nogálɔ ná go gíniginye batɔ báaba, no lɛ́ ba go gálagala godɔ́ɔdɔ.» 16Póolo go fadɛgɛna a báá dúfíe ombɔ́gɔ goŋaá bá mo ɔ́bɔ, go bayɛga dogálɔ a amɔ́: «Batɔ bá Ɛ́sɛlahɛ́ɛlɛ na bɛɛnyɔ́ɔ biimée báaba no búlugenyemú Asaŋa, ŋgɔ́bɔ́ɔmɔ́ nɔnɔ. 17Asaŋa ba boɛ́nɔ bɔ́ɔbɔ, Asaŋa ba Ɛ́sɛlahɛ́ɛlɛ a mbi iyídé biisée bɛ́cɔ́, a báá bó degíe gɛcamɛna gɛ́ɛgɛ bá mbaá lɔmɔ́ go osalɔ naá gɛdɔŋɔ gá Egíbítene, naá nnyimé a báá bó hémíe hɔ́ɔ na bogaaga bɛ́hɛ́. 18A báá bó beŋébéŋée boóma bá nnyómá otíno áhandɛ́ naá giolóo gá bodɛ́agadɛ́#13.18 Go ɛ́na naá Gihúmie 1.7; 12.51; Ɛmbanɔ 14.34; Bicele 1.31.. 19A báá fúúgíe mɛɛ́nɔ mátáanɔ na máandɛ́ naá cí ya Kanáana, a báá fáá boɛ́nɔ bɛ́hɛ́ cí moánɛ goŋaá bó ɔ́bɛnɔnɔ na yɛ́. 20Boóma bá nnyómá mantɛdɛ ménni na otíno áhandɛ́ na sɛ́ɔ́dɔ́. Hɔ́ɔlɔ́ gɔ́ɔ a fáamɔ́ biisée bɛ́cɔ́ begélí bɛsɛnɛ gó báá ncó húme naá gɛcamɛna gá mbúsí ya Asaŋa Sémuele#13.20 Go ɛ́na naá 1 Sémuele 3.20.. 21Naá nnyimé hɔ́ɔlɔ́, gɔ́ɔ boɛ́nɔ bó úhunemú ufuŋe, Asaŋa go bó fáa Séulu, ohaŋa ba Kísi, naá nigúli ná Bɛncamɛ́ŋɛ. Séulu a mba nonáa gɛdɔŋɔ nnyómá otíno áhandɛ́. 22Naá nnyimé ya Asaŋa go inye Séulu, gɛ́hɛ́ go bó fáa Défidi goŋaá a bɛ́ɛmba ufuŋe yábɔ́. A báá gálɛ́dá go busío bɛ́hɛ́ a amɔ́: “Ndɛ́ ɛ́náalú Défidi, ohaŋa ba Yése, a lɛ́ mɔtɔ bamɛ ba odɛ́má, a ná yɔgɔnɔ buelí buimée bɔ́ɔbɔ nná lɛ́galɛgamɔ́ goŋaá a yɔgɔnɔ#13.22 1 Sémuele 8.5,19; 10.21; 13.14; 16.12. Go eninye na bɔ́ɔbɔ naá Ɛsagɔ 89.21..” 23Onana Yá Défidi yúmmue yó mbaá lɛ Yésusu, mɔ́ɔ Asaŋa a mbaá mo dílímínyée goŋaá a bɛ́ɛmba uféŋí ba boɛ́nɔ bá Ɛ́sɛlahɛ́ɛlɛ; náana gɔ́ɔ a mbaá lɔmɔ́ bó dánɛ́náalú.
24«Otóotoɛ yá goŋaá Yésusu u úle, Sáŋa a mbo oyánɛ́náa boɛ́nɔ bá Ɛ́sɛlahɛ́ɛlɛ buimée goŋaá bá núgie gɛɔyɔ gábɔ́ bá béyuminye. 25Naá medúgú má go súgidinye má gɛɔyɔ má Sáŋa, a mba lɛ́ o oya a amɔ́: “No béeniŋenye no amɔ́ ndɔ́mɔ́ ánɛ́ɛ o? Cɛ bósó mɔ́ɔnyɔ no gɛ́ganamɔ́. Kanɛ́ ɔ́bɔ́ nɔnɔ: u úlene naá yɔmɔ́ nnyimé mɔ́ɔnyɔ ndɔ́mɔ́ cɛ bósó go bɛanana bogaaga bá goŋaá pulune duelí dá nnaadɛna sɛ́hɛ́#13.25 Go ɛ́na naá Sáŋ 1.20; Mot 3.11; Mél 1.7; Lók 3.16; Sáŋ 1.27..”
26«Bolimóní, bɛɛnyɔ́ɔ ɛnana ya Ábalaháma na bɛɛnyɔ́ɔ biimée báaba no lɔ́mɔ́ háalá go go búlugenye Asaŋa: bá mbaá dómá tánɔ ya gisódio yɛ́ɛyɛ go busío bɛ́cɔ́. 27Kanɛ́ batɔ bá Yolósalɛmɛ na Mefuŋe mábɔ́ bá lɛ́ kanɛ go ɔ́bɔ ánɛ́ɛ a lɔ́mɔ́ Yésusu, bá dɛ ɔ́bɔ́ dogálɔ dá mbúsí sá Asaŋa dɔ́ɔdɔ bá banamɔ́ sábadɛ iŋkimée. Kanɛ́ bá mba hóógío go oya gá dogálɔ dɔ́ɔdɔ na go mo ága naá ncíbo ya gɛaŋɔ́ gá nigúe. 28Gɔgɔ́ akɛ́ aŋa bá mbaá lɔbɔ́ bá dɛ ɛ́ná gɛmbɛ́ná gá go mo ága naá ncíbo ya gɛaŋɔ́ gá nigúe, bá búú úhúné Pɛ́latɛ bá amɔ́ a ŋa goŋaá bá mo óna. 29Aŋa buimée bɔ́ɔbɔ bó mbaá lɔmɔ́ ba go báŋa go busío bɛ́hɛ́ bó mbɛɛ́ ɛ́nánɛ́náa aŋa Ŋgɔ́ŋɛ́ sɛ́ mboó oyáa, bá báá mo siisíe naá kolósi bá báá mo miée#13.29 Go ɛ́na naá Mot 27.22-23,57-61; Mél 15.13-14,42-47; Lók 23.21-23,50-56; Sáŋ 19.15,38,42.. 30Kanɛ́ Asaŋa a mba mo fúfúné. 31Naá nnyimé yɛhɛ́ ya go fúfuge naá begúe, medúgú gɛca, Yésusu a mbɛ ɛ́nɛ́gánɛ́náa batɔ báaba bá mbaá mo dílígénénée gó bayɛga naá Gelilée gó nco húme naá Yolósalɛmɛ; bá ndiemi bɔ́ɔ bá lɔ́mɔ́ godɔ́ɔdɔ ŋgominyo sɛ́hɛ́ go go gálagala go busío bɛ́hɛ́ naá boɛ́nɔ bá Ɛ́sɛlahɛ́ɛlɛ.
32«Bɛɛcɔ́ɔ moatɛ́ moatɛ dɛ á nyó úlíné na Gɛnɔ́gɔ́ gá Cɔ́mɔ moánɛ: tánɔ yɛ́ɛyɛ Asaŋa a mbaá dánɛ́ná biisée bɛ́cɔ́, 33a á yɛ hóógío godɔ́ɔdɔ go busío bɛ́cɔ́ baaná bábɔ́, na gofúfune gá Yésusu aŋa gɔ́ɔgɔ gó lɔ́mɔ́ ɔ́ŋɔ́ɔlú naá kálata ya Ɛsagɔ, osagɔ yá gáandɛ́ɛ goŋaá: “O lɛ́ Moɔnɔ́ bamɛ, ínoni yɛ́ɛyɛ ŋgɛɛ́ ɛ́yá tɛ́ɔ.”
34«Asaŋa a mba dóógío goŋaá a ŋga mo fúfúné naá kadɛ́gadɛ́ɛ ya begúe goŋaá nnyɔ́dɔ yɛhɛ́ ɛ dɛ yɛkáa. A mba gálɛ́dá a amɔ́: “Ka ŋga nyó fáá bimmúmpúu bá bɛfona bá mammana bɛ́ɛbɛ mmbaá dánɛ́ná Défidi.”
35«Nɔ́ɔ gɔ́ɔ a gɔnɔmɔ́ go oya naá gɛbana gíntió a amɔ́: “O do ŋgá bóso go dɛ́ɛna Gimmúmpúu bahɔ a yɛka.”
36«Kanɛ́, Défidi mɔ́ɔ, aŋa a mbaá ŋá a báa go hóogio nokɛsa ná Asaŋa naá gɛcamɛna gɛ́hɛ́, a mba gúé bá báá mo miée anáa biisée, a báá yɛkáa#13.36 Go ɛ́na naá 1 Mefuŋe 2.10.. 37Kanɛ́ mɔ́ɔnyɔ Asaŋa a mbaá mo fúfúné a dɛ mbá yɛka. 38Bolimóní bámɛ, íyíme nɔnɔ bese goŋaá gɛ́hɛ́ gɔ́ɔ no mbɔɔ́ ɔ́bɔ́ ihéehinye há bɛlɔgɔ, 39gɛ́hɛ́ gɔ́ɔ mɔtɔ uŋkimée mɔ́ɔnyɔ o olimonyomú a lɔ́mɔ́ sódíolú go bɛoba biimée bɛ́ɛbɛ Gicele gá Mɔ́sɛsɛ gɛ́ mbaá lɔmɔ́ kanɛ bogaaga bá go mo sódio go bɛ́.
40«Bébeŋéemú nɔnɔ, bɔ́ɔbɔ mbúsí sá Asaŋa sɛ́ mboó oyáa bó do nyó bolɛ́ná. 41“Na dofáná, éléméne nɔnɔ no gélegede; goŋaá kaá ncó ŋa gɛantáanta gá boóma naá medúgú mɛ́nyɔ́ máama, bá amɔ́ bá nyó oyana obɔ moánɛ bɛɛnyɔ́ɔ kanɛ go ɛ́na, no do bósó bá go oliminyo.”»
42Naá gohéme gábɔ́, batɔ go gɔnɔ bó úhune bá amɔ́ bá nco gunde sábadɛ ya go ɛndɛga, bá nco fitie go bó oyana bosɔ́mɔ moánɛ. 43Naá nnyimé ya nɛganda ná gioliminyo, gɛca gá Beyúdene na batɔ bóntió báaba bá mbaá lɔmɔ́ íŋénéelú naá gioliminyo gá Beyúdene go biene Póolo na Banábasɛ; bɔ́ɔ báandɛ́ go ɛ́da go oya ŋkanɔ́ nabɔ́ bá bó téndenye goŋaá bá bɛ́ɛmba bágódɛ́náalú naá niibo ná Asaŋa. Póolo na Banábasɛ bó oyanɛna batɔ báaba bá lɔ́mɔ́ bá dɛ bɛ́ɛ́mbá Beyúdene nogálɔ ná Asaŋa.
44Buisí bá sábadɛ ya go ɛndɛga, makana má batɔ tɛ́sɔnɔ iŋkimée go bábándɛgɛna go go ɔ́bɔnɔ nogálɔ ná Daadáa. 45Beyúdene bɛ́ ɛ́nana gitúu gá batɔ gɛ́ɛgɔ, gáábɔ́ go bɛa hɛagá, bá bɛ́ɛ́ ɛ́dá go góŋona dogálɔ dá Póolo, bá mo sɛga. 46Póolo na Banábasɛ go bó ádɛna pasɛ́ pasɛ́ bá amɔ́: «Bá mbaá lɔmɔ́ ba go dóana go oya nogálɔ ná Asaŋa naá bɛɛnyɔ́ɔ, kɔ́ɔ no nó umbenenemú, no gɔnɔ dúfenye goŋaá no do háánánáa na gɛɔyɔ gá kanɛ mesúge, bó á súgé. Kanɛ́ godɔ́ɔdɔ, bɛɛcɔ́ɔ dɛ bábondona naá báaba bá lɔ́mɔ́ bá dɛ bɛ́ɛ́mbá Beyúdene. 47Mammana, gɛlɔsɛnɔ gɛ́ɛgɛ Daadáa a lɔ́mɔ́ có fáalú gɛ́gɛ́ɛ gɛ́ amɔ́: “Ndɛ́ go dílímínyéelú go go bɛ́ɛmba gise gá bɛdɔŋɔ, go go ɛ́da na gisódio naá embúne yá cí eŋkimée#13.47 Iseyíi 49.6..”»
48Batɔ báaba bá mbaá lɔmɔ́ bá dɛ bɛ́ɛ́mbá Beyúdene bɔ́ ɔ́bɔnɔ nɔ́ɔnɔ, gáábɔ́ go ɛ́da go békelenye, bá gúmenye nogálɔ na Daadáa; biimée báaba bá mbaá lɔmɔ́ bá háanana na gɛɔyɔ gá kanɛ mesúge bá bóó olímínyóo.
49Nogálɔ ná Daadáa gá nɔ́ go ɛ́da nó ɛ́dana naá hoóma hiimée hɔ́ɔhɔ. 50Kanɛ́ Beyúdene go ɛ́da go bó lónconinyo bɛyáŋáŋáa bá bakɔ́dɔ bɛ́ɛbɛ bɛ́ mbií íŋéné naá gioliminyo gábɔ́ na batɔ bagɔ́nɔ́ bá tɛ́sɔnɔ; gáábɔ́ go ubie noséésényée, bá báá gó bɔ́yɔdɛgɛnɔ Póolo na Banábasɛ na noséésényée bá báá bó gúnée naá cí yabɔ́. 51Aŋa bó mbaá báŋaáa nɔ́ɔnɔ, Póolo na Banábasɛ bá báá bó bágóbɛ́ná bibúu bábɔ́ bá bɛgɔ́ndɔ́ go dómba, bá bɛ́ɛ́ ɛ́dá naá Ikoniumu. 52Kanɛ́ boolímínyí bɔ́ɔ bá mba lɛ́ dácɛ na bɛyaŋa na Gimmúmpúu gá Giliíli.
Currently Selected:
Meŋiigíe 13: YAS
Highlight
Share
Copy
Want to have your highlights saved across all your devices? Sign up or sign in
