Meŋiigíe 10
10
Kɔlɔnɛ́yɛ ɛ ɛ́ ɛ́ná giínigie
1Mɔtɔ ummue a mba lɛ́ naá Sɛsalɛ́ɛ, ufíno yɛ́hɛ́ Kɔlɔnɛ́yɛ. A mba lɛ́ ogɔ́nɔ́ɔ ba olɔŋɔ yá bisimbi ntɛdɛ yɔ́ɔyɔ bá mbaá lɛ bá dɔ́ŋɔnɔ bá amɔ́ «Itelíke». 2Mɔtɔ ba ndiemi a mba lɛ́ o olimonyo, a búlugenye Asaŋa na nnyaŋá yɛhɛ́ ya batɔ iŋkimée kɛ́; a mba lɛ́ a ŋanana basógasoga bá gɛdɔŋɔ gá Beyúdene niibo makɔ́nɔ́, a bósógolonyo Asaŋa bɛcamɛna biimée.
3Budúgú búmmue, buisí kɛnca boóma bá bigúlí bɛ́dadɔ́, gɛ́hɛ́ go ɛ́na giínigie dalaŋɛ dalaŋɛ: ɛ́ŋgɛlɛsɛ ba Asaŋa go íŋene naá mɔ́ nnyaŋá, go mo dɔ́ŋɔnɔ a amɔ́: Kɔlɔnɛ́yɛ! 4Kɔlɔnɛ́yɛ go mo ágɛna oŋgíso na bofoá naá nnyɔ́dɔ, go mo úhune a amɔ́: Daadáa, ɛkádɛ́ gɛ́ o? Kanɛ́ ɛ́ŋgɛlɛsɛ go mo gundie a amɔ́: Mbósógólí sáhɔ na niibo nɛ́ɛnɛ o ŋananamɔ́ basógasoga mó á ncó bolɛna Asaŋa naá mmoɛná, a go béeniŋenye kanɛ go go bófoolio. 5Dómá kanɛ́ godɔ́ɔdɔ yɛ́ɛyɛ batɔ naá Yopée, bɛ́ ɛ́da go dɔ́ŋɔnɛnɔ Símono, mɔ́ɔnyɔ bá dɔ́ŋɔnɔmɔ́ bá amɔ́ Píele. 6A bɛ́dɛmanamɔ́ naá nnyaŋá ya mɔtɔ uncodío mɔ́ɔnyɔ a yɔgɔnɔmɔ́ buelí bá bɛɔbɔ, ufíno yɛ́hɛ́ Símono, mɔ́ɔnyɔ nnyaŋá yɛhɛ́ ɛ lɔ́mɔ́ naá boayá bá máŋɛ́.
7Aŋa ɛ́ŋgɛlɛsɛ mɔ́ɔnyɔ a mbaá dómbá, Kɔlɔnɛ́yɛ go dɔ́ŋɛnɔ boyogóní bɛ́hɛ́ báandɛ́ na gisimbi gɛ́hɛ́ gímmue gɛ́ɛgɛ gɛ́ mbaá lɛ nábɛnábɛ nɛhɛ́ medúgú gɛca, gɛ́ olimonyo tɔ́nɔ Asaŋa; 8aŋa a mbaá ŋá a báa go bó oyanɛna boóma buimée bɔ́ɔbɔ bó mbaá bádómbánáa nɛhɛ́ na ɛ́ŋgɛlɛsɛ, gɛ́hɛ́ go bó dóma naá Yopée.
Píele ɛ ɛ́ ɛ́ná giínigie naá Yopée
9Gó á bélíe, aŋa bá mbaá ŋá bá ná lɛ́ go pɛ́ go go ɛ́da bola naá tɛ́sɔnɔ ya Yopée, Píele go bólɛga naá kúléné yɛ́ɛyɛ naá nnyaŋá mmoɛná go go bósógolonyo; bó mba lɛ́ boóma bá tólóbóo. 10Kɔ́ɔ ncaná ɛ mo gumbenemú, a bɛ́ɛ́ ɛ́dá go fúmbe goŋaá gásɛ́ a á nyáányáa. Naá gɛcamɛna gɛ́ɛgɛ bá mba ŋá bá gá mo námbɛna nambɛna, gɛ́hɛ́ go ɛ́na giínigie. 11Go ɛ́na mmoɛná bébuunéelú, boóma bó ɛ́da go úlene bó siisene go cí, aŋa gɛantá gá sanda na mokásá naá edúu énni. 12Naá sanda yɛ́ɛyɔ gadɛ́ɛ, nnyama mbɔ́dɔ iŋkimée sɛ́ mba lɛ́ kɔ́ɔ, sá bɛgɔ́ndɔ́ bínni na sá go bónóŋosonyo go cí, na munoní mbɔ́dɔ iŋkimée. 13Ukelú gá yɔ́ go mo oyana yó amɔ́: Píele, fadɛ́gɛ́na! Óná, o nyáa. 14Kanɛ́ Píele go gundie a amɔ́: Akɛ́ɛ, Daadáa! Mammana, mbébíényée yamɛ ká báasa cɛ nyáá boóma bá gɛlɔkɔ na bá biílo. 15Ukelú go gɔnɔ fitie yó amɔ́: Bɔ́ɔbɔ Asaŋa a báá ná manɛ́ go gedie, maamɔ́ɔ o do bó ɛ́ná go amɔ́ bó lɛ́ na biílo. 16Bó mba báŋanánáa nɔ́ɔnɔ ɛŋɛndɔ ɛdadɔ́, boóma go dómba go gunde naá mmoɛná.
17Píele a gá fege a dɛ íyímé boóma bɔ́ɔbɔ giínigie gɛ́ɛgɔ gɛ́ mbaá lɛ gɛ́ oya naá cí, batɔ báaba Kɔlɔnɛ́yɛ a mbaá lɔmɔ́ dómáalú go nco dɛ́lɛmɛna naá gɛasɛ́ gá nnyaŋá ya Símono, mɔtɔ ba go yɔgɔnɔ bɛɔbɔ; goakɛ́ bá mba ŋá bá báa go bó témbuginye nnyaŋá yɛhɛ́. 18Gáábɔ́ go oba go úhene ukelú naá mmoɛná aáŋa naá nnyaŋá yɛ́ɛyɛ gɔ́ɔ Símono mɔ́ɔnyɔ bá dɔ́ŋɔnɔmɔ́ bá amɔ́ Píele a mbaá lɔmɔ́ a bɛ́dɛmana hɔ́ɔ. 19Píele a gá fege go íyime naá cí giínigie gɛ́ɛgɛ a mbaá lɔmɔ́ ɛ́náalú, Giliíli go mo oyana a amɔ́: Batɔ bádadɔ́ bá lɛ́ háalá bá go fúmbe, 20fadɛ́gɛ́na, o siise, go ɛ́da o gunde olɔŋɔ nabɔ́, o do ágá mpálɔ́. Mammana yɔmɔ́ɔ mɔ́ɔ mbáá ná bó dómá. 21Gɔ́ɔ Píele a siisemú, go oyana batɔ bɔ́ɔbɔ a amɔ́: Yɔmɔ́ɔ moánɛ mɔ́ɔnyɔ no fúmbemú mɔ́nyɔ́ɔ. No lɔ́mɔ́ háalá goakɛ́ o? 22Bɔ́ɔ go gundie bá amɔ́: Ogɔ́nɔ́ɔ ba bisimbi, Kɔlɔnɛ́yɛ, mɔ́ɔ a có dómamɔ́. A lɛ́ usi ba mɔtɔ, a búlugenye Asaŋa, gɔnɔ́ Beyúdene biimée bɔ́ ɔ́bɔnɔ bese nɛhɛ́! Mɔ́ɔ ɛ́ŋgɛlɛsɛ ba Asaŋa a á ná mo ɛ́nɛ́gɛ́ná a báá mo sɔ́mɔ́ goŋaá bá nco go dɔ́ŋɛnɔ, go úle naá mɔ́ nnyaŋá, ɔ ɔ́bɔ dogálɔ dáhɔ. 23Píele go bó gɛ́ndɛgɛna naá nnyaŋá, bá báá bɛ́dɛ́mɛ́ná.
Aŋa gó mbaá bélíe, gɛ́hɛ́ go biene pɛ́ olɔŋɔ na batɔ bɔ́ɔbɔ, boolímínyí bóncodío báaba naá Yopée bá bɛ́ɛ́ ɛ́dá go go ɛ́da mo díligene. 24Naá buisí bá go ɛndɛga, gɛ́hɛ́ go ɛ́da bola naá Sɛsalɛ́ɛ, Kɔlɔnɛ́yɛ a mba lɛ́ a mo gɛ́gana hɔ́ɔ naá nnyaŋá yɛhɛ́, olɔŋɔ na ncíbo yɛhɛ́ ya batɔ, na begúle bɛ́hɛ́ bá odɛ́má báaba a mbaá lɔmɔ́ dɔ́ŋɔ́nɔ́ dɔ́ŋɔ́nɔ́. 25Aŋa a mbɛɛ́ ɛ́ná Píele i íŋenene naá mɔ́ nnyaŋá, gɛ́hɛ́ go ɛ́da go go mo gólio, go oba naá mɔ́ bɛgɔ́ndɔ́, a báá mo kuncéné enúu go go mo búlugenye. 26Píele go mo fediginye a báá mo oyáná a amɔ́: Fadɛ́gɛ́na, yɔmɔ́ɔ tɔ́nɔ ndɛ́ mɔtɔ aŋa maamɔ́ɔ. 27Bɛ́ ɛ́da bó oya ŋkanɔ́, Píele gɛ́hɛ́ go íŋene, go gíde gitúu gá batɔ bédulé bédulé. 28Gɛ́hɛ́ go bó oyana a amɔ́: No íyimene no amɔ́ bó lɛ́ gicele goŋaá moɔnɔ́ ba Beyúdene a gálagala na uŋunyí akɛ́ goŋaá i íŋene naá mɔ́ nnyaŋá. Kanɛ́ Asaŋa a á túfíe a amɔ́ cɛ sɛmɛ́gánánáa go ɛ́na mɔtɔ uncodío goŋaá a lɛ́ dɛ́áŋáalú, cɛ bolá naá mɔ́ɔ. 29Boóma moánɛ bɔ́ ŋgaá ná lɔmɔ́ cɛ ágá mpálɔ́, mbúú úlé naá odɔ́ŋɛ́nɔ yáhɔ. Kanɛ́ ŋgoyánáamɔ́ nɔnɔ boóma bɔ́ɔbɔ no á ná tɔ́ŋɔ́nɔ́ɔ go bɔ́.
30Kɔlɔnɛ́yɛ go gundie a amɔ́: Bó ná lɛ́ ínoni medúgú mádadɔ́, buisí kɛnca naá bigúlí bɛ́dadɔ́ moatɛ́ moatɛ, yɔmɔ́ɔ mbósógolonyo naá yɔmɔ́ nnyaŋá, mbáá gó ɛ́na mɔtɔ boasɛ na bɛla bá go geyime go kúmine, a báá dɛ́lɛ́mɛ́ná naá yɔmɔ́ busío, 31gɛ́hɛ́ go ŋgoyana a amɔ́: Kɔlɔnɛ́yɛ, Asaŋa a lɛ́ ɔ́bɔ́ɔlú mbósógólí yahɔ, a báá bééníŋínyée niibo nɛ́ɛnɛ o ŋananamɔ́ basógasoga. 32Kanɛ́ dómá mɔtɔ naá Yopée, ɛ ɛ́da dɔ́ŋɛnɔ Símono, mɔ́ɔnyɔ bá dɔ́ŋɔnɔmɔ́ bá amɔ́ Píele, u úle háalá; a bɛ́dɛmanamɔ́ naá Símono, mɔtɔ ba go yɔgɔnɔ buelí bá bɛɔbɔ, naá boayá bá máŋɛ́. 33Gɔ́gɔ́ɔ ŋgaá ná dúmbíe go dóma mɔtɔ goŋaá a nco go dɔ́ŋɛnɔ, maamɔ́ɔ tɔ́nɔ o báá ŋaáa bese o búú úlé. Godɔ́ɔdɔ, dɛ lɛ́ bɛɛcɔ́ɔ biimée háalá naá busío bá Asaŋa, go go ɔ́bɔ boóma buimée bɔ́ɔbɔ Daadáa a á ná go oyáná go busío bɛ́cɔ́.
Dogálɔ dá Píele naá nnyaŋá ya Kɔlɔnɛ́yɛ
34Gɔ́ɔ Píele a gɔ́lɔmɔ́ dogálɔ, a amɔ́: Mammana, ŋgɔɔ́ ɔ́bɔ́ boóma moánɛ goŋaá Asaŋa a dɛ iyée mɔtɔ#10.34 O bana, go eninye na Bicele 10.17.. 35Mɔtɔ uŋkimée mɔ́ɔnyɔ a mo hálamananamɔ́, a ŋanana bɔ́ɔbɔ bó lɔ́mɔ́ besé, akɛ́ a lɛ́ ba kasɛ́á boɛ́nɔ, a lɛ́ usi ba mɔtɔ naá oŋgíso yɛ́hɛ́. 36A mba dómá nogálɔ nɛ́hɛ́ naá baaná bá Ɛ́sɛlahɛ́ɛlɛ nɔ́ɔnɔ nó lɔ́mɔ́ Gɛnɔ́gɔ́ gá Cɔ́mɔ gá buumbénú#10.36 O bana, go eninye na Iseyíi 52.7. naá pɛ́ ya Yésu Kilítu, Daadáa ba batɔ biimée.
37No íyimene boóma bɔ́ɔbɔ bó mbaá dómbánáa naá Yudée uŋkimée, bó ɛ́da dúmine naá Gelilée, naá nnyimé ya giyuminye gɛ́ɛgɛ Sáŋa a mbá lɔmɔ́ o oya. 38No íyimene aŋa Asaŋa a mbaá hóógío Yésusu ba Násalɛdɛ na bogaaga bá Gimmúmpúu gá Giliíli. No íyimene gɔnɔ́ aŋa Yésusu a mbaá lɔmɔ́ ɛ ɛ́da ɛ ɛnda naá gɛdɔŋɔ giimée, a ŋanana besé, e éŋugenye biiménénée báaba bá mbaá lɔ́mɔ́ bɛɔlɛ́ bá ohándá, goakɛ́ Asaŋa a mba lɛ́ nɛhɛ́. 39Dɛ lɛ́ báaba bá mbaá lɔmɔ́ ɛ́náalú boóma buimée bɔ́ɔbɔ a mbaá lɔmɔ́ ŋaáalú naá gɛdɔŋɔ gá Beyúdene na naá Yolósalɛmɛ. Bá mba mo óná bá báá mo máná naá kolósi mmoɛná. 40Kanɛ́ Asaŋa a mba mo fúfúné naá buisí bá gádadɔ́ɔ, a báá gundé a báá mo ŋaáa goŋaá a bédúfie, 41caá naá batɔ biimée, goana na báaba bá lɔ́mɔ́ ŋgominyo sɛ́hɛ́, báaba Asaŋa a mbaá dóáná go iyide. Dɛ lɔ́mɔ́ bɛɛcɔ́ɔ báaba dɛ mbaá nyáányáa dɛ báá nyóánánáa nɛhɛ́ naá nnyimé ya gofúfuge gɛ́hɛ́ naá begúe#10.41 Go ɛ́na naá Lók 24.30,42.. 42Gɔ́ɔ Yésusu a mbaá có dómá goŋaá dɛ bóó oyáa naá batɔ dɛ gunde dɛ dúfie mammana goŋaá a lɔ́mɔ́ mɔ́ɔ Asaŋa a mbaá mo dílímínyée go go bɛ́ɛmba aŋa Usúmbí bɛsɛnɛ ba bɔgɔ́sɔ na begúe. 43Mbúsí sá Asaŋa iŋkimée sɛ́ mba dúfényée go busío bɛ́hɛ́ goŋaá mɔtɔ uŋkimée mɔ́ɔnyɔ a mo olimonyomú, a bɛanana ihéehinye há bɛlɔgɔ bɛ́hɛ́ go ufíno yɛ́hɛ́#10.43 Go ɛ́na naá Iseyíi 53.5-6; Selemíi 31.34..
Batɔ báaba bá lɔ́mɔ́ bá dɛ bɛ́ɛ́mbá Beyúdene bá á bɛáa Gimmúmpúu gá Giliíli
44Aŋa Píele a mbaá ŋá a gá gálagala nɔ́ɔnɔ, Gimmúmpúu gá Giliíli go siisene biimée báaba bá mbaá lɔmɔ́ bá bódólonyo Nogálɔ nɔ́ɔnɔ. 45Boolímínyí biimée bá ancábáalú báaba bá mbaá lɔmɔ́ úléelú olɔŋɔ na Píele bá mba békúkée goŋaá Gimmúmpúu gá Giliíli ɛ ɛ́dana tɔ́nɔ naá batɔ báaba bá lɔ́mɔ́ bá dɛ bɛ́ɛ́mbá Beyúdene. 46Mammana, bá mba lɛ́ bá bó ɔ́bɔnɔ bá gálagala dogálɔ dúncodío, bá búlugenye bogɔ́nɔ́ɔ bá Asaŋa. Gɔ́ɔ Píele a gɔnɔmɔ́ gɔ́lɔ dogálɔ a amɔ́: 47«Kasɛ́á mɔtɔ a lɔ́mɔ́ ba go lege goŋaá bá dɛ yumínyée naá miimpo báaba bá báá ná manɛ́ go bɛa Gimmúmpúu gá Giliíli aŋa bɛɛcɔ́ɔ tɔ́nɔ o?» 48Gɔ́ɔ i íŋenemú bogaaga bá go yuminye batɔ bɔ́ɔbɔ go ufíno yá Yésu Kilítu. Batɔ bá ndiemi gáábɔ́ go mo bósógolidio goŋaá á ba gɔnɔ́ bɛ́ɛmba nabɔ́ go baaná bá medúgú.
Currently Selected:
Meŋiigíe 10: YAS
Highlight
Share
Copy
Want to have your highlights saved across all your devices? Sign up or sign in
