Lúkasɛ 5

Símono, Yákɔbɔ na Yɔhánɛsɛ bá nɔ́ Yə́susu ɔŋgɔkɔ

(Mat 4.18-22; Mə́l 1.16-20; Yɔh 21.1-11)

1Hímotí hinó, Yə́susu a ka bá ɔ ɛsɛ́lɛ́ yɛ́ nɛɛ́ŋɛa ɔnɛ́á bá ndɔ ɛ́lɛnɛna bá sɛ́á Yənə́salɛtɛ. Bɛndɔ bəəŋí bá ka bá bá ndɔ nyɛkɛnana ɔ ɔwayɛ́ ɛmɛ́ŋɛ́, ɛlɔ́áyɛ́ ɛtambá yɛ́ Huɛlɛ́ ɔwɔ́kɔ. 2Yə́susu a ná bisóyí yámá bɛ́fandɛ́ ɔ ɛsɛ́lɛ́ yɛ́ nɛɛ́ŋɛa, bəlumbəlumbə bá ka tukəkinə uwəbú məbúnjə́ ɔsɔa. 3A ná tálɛ́má ɔ isóyí yɛ́ Símono, a ná wɛɛ́ya batá a sɛ́á, á bísúə́lə́ hata ná ɛsɛ́lɛ́. Yə́susu a ná tuə́nə ɔ isóyí nuúmə́, a ná ákánána ɔ busíə́ ɔ ilúkunə uwukúniə. 4Ɛnaka a hɔ́á ɔhɔ́ɔ, a ná Símono lɛ́na a sɛ́á: «Tɔ́mbálɛ́lá hə́ní hata ɔ yumbə, nɔ́ mə́núə́ məbúnjə́ əmbə́kínə mbá nɔ tuɔfɔ́ hálɛ́ákɛ́na.» 5Símono a sɛ́á: «Á Muinə́niə, tɔ ná nyɔ́ɔ́kɔ́ bulúə́ bukimə, tɔ sá halɛna ata bɔɔ́la. Mba, ɛ́sɛ́á ɔ ná láá nɔ́yɛ́, ɛkasɛ mɛ məbúnjə́ əmbə́kínə.»

6Ɛnaka bá məbúnjə́ əmbə́kínə, bá ná tuɔfɔ́ hálɛ́ákɛ́ná tuəŋí ɔ nindínə́ ɔnɛ́á mə́búə́ məbúnjə́ má ná lúmə́ ɔ ɔsalɛa. 7Bá ná bəkúlə́kulə kə́síníə́ ɔbá bá ná báá ɔ yííní isóyí, bá sɛ́á bá sɔ́nɔ bá ndá bəə́bu ɔlɔ. Báaba bá ná ndáfama, bá ná úndúsíə́ bisóyí bɛ́fandɛ́ bɛ́ tuɔfɔ́ ɔ nindínə́ ɔnɛ́á, bɛ́ ná botólíə́ ɔ ɔnyúɛ́na ɔ mənífə́ nuúmə́. 8Ɛnaka Símono á yámá nɔ́yɛ́, a ná kiníə́ á Yə́susu busíə́ a sɛ́á: «Á Isə́lúkú, bísúə́lə́ hata na mɛaŋɔ́á bɔkɔasɛ́á mɛ lɛa mɔkɛamabɛ́á!» 9Bɔkɔ́lɔ́ma bɔ́ ná Símono na bááyɛ́ bəkimə ɔbá bá ná báá na wɛɛ́ya itíə́ ɛlɔ́áyɛ́ buiŋí bɔ́ tuɔfɔ́ ɔtɔ́á bá ná hálɛ́ákɛ́na. 10Hɔ́ánánátɔ́ na bikindəniə bɛ́ Símono, Yákɔbɔ na Yɔhánɛsɛ á baná bá Sɛbɛtɛ́. Mba, Yə́susu a ná Símono lɛ́na a sɛ́á: «Ɔ lɛ kɔlɔma, ɔ botolokiə isíŋáka bɛndɔ ɔ ŋɔ nɔ́fɔ́kɔ.» 11Əlimə yɛ nɔ́yɛ́, bá ná bisóyí súə́kə́ ɔ ɛsɛ́lɛ́, bá ná bikimə tíkə́, bá ná Yə́susu ɔŋgɔ́kɔ.

Yə́susu a nɔ́ mɔndɔ wa minú niŋəsiə

(Mat 8.1-4; Mə́l 1.40-45)

12Hinó hímotí, Yə́susu a ka báá ɔ bətínə́ yɛ bɔ́táyɛ́ bɔnɔŋɔ, mɔndɔ ɔwá minú yɛ́ ná bá yáyɛ́nátɔ́ a ná hulə. Ɛnaka a Yə́susu yámá, a ná kɔ́á imbúbiə ɔwayɛ́ busíə́ na ɔwayɛ́ ɔbɛ́tɔ́kɔ́lɛna a sɛ́á: «Á Isə́lúkú, ábá ɔ ndɔ hikiə, ɔ óso ɔwámɛ uniŋəsiə.» 13Yə́susu a ná mɔkátá sándɔ́na, a ná wɛɛ́ya itíə́lə, a sɛ́á: «Ɛ́ɛ! Mɛ ndɔ hikiə, niŋə.» Ɔ umisíumə́ wɛ́ɛ́yɛ́ mɔndɔ a ná niŋə. 14Nɔ́yɛ́, Yə́susu a ná wɛɛ́ya umbə́ndə́ índíə́ ɔwá a lɛ lɛ́na ata mɔndɔ, A sɛ́á: «Káka bínə́níə́ ɔbánɔ́ á mutitiəmahánɛna, ɔ́ nɛhánɛna nɛ́ nibínə́ŋəsiə índíə́ tɔ́na ɔnɛ́á Mósisi a ná tínímíə́ ɔkɛaka ɔwá bəkimə bá manyá bá sɛ́á ɔ ná niŋə.» 15Niínyə nɛ́ Yə́susu nɛ́ ná yambáná ɔ ɔyáyɛ́na; bilúkunə biəŋí bɛ́ kɔtakana ɔwayɛ́ ɔwɔ́kɔ, na iniŋəsiə yɛ́ yə́búə́ mɛɛ́mbɔ ukusənə. 16Mba ɔwayɛ́ a ka bá a ndɔ bísúə́lə ɔ bɛbɔ́ka bɛ́ yə́ə́bu ɔhá a ná bá ndɔ kabɛkalɛna.

Yə́susu a nɔ́ yaáta yɛ́ mɔndɔ niŋəsiə

(Mat 9.1-8; Mə́l 2.1-12)

17Hinó hímotí, Yə́susu a ka bá ɔ uwinə́niə. Bɛfalísia na bamanyumbə́ndə́ bá ka báá ɔmɔ́tɔ́yɛ́. Bá ka húlə́kinə ɔ mɔnɔŋɔ ɔmá má lɛ́á ɔ Kalɛ́lɛa na má Yútɛa, na má Yəlúsalɛma. Injiŋə yɛ Isə́lúkú á Huɛlɛ́ yɛ́ ka báá na Yə́susu, yɛ́ kɛaka a bɛnákɛnákɛ niŋəsəkiə. 18Bɛndɔ bá ná húlə́ bá nɔ́ yaáta yɛ́ mɔndɔ túána ɔ ɛkaálɛa. Bá ka siəkə ɔ ɔwayɛ́ ufínənə ɔ miímə mbá bá wɛɛ́ya bɛ́lɛ́na ɔwayɛ́ busíə́. 19Ɛ́sɛ́á nɛmɔndɔ nɛ́ ná báá undúə́tɔ́ ɔ miímə, bá sa manya hə́níə́ bá wɛɛ́ya fíníə́. Bá ná yɛ́ɛ́yɛ́ ikúílí báláka ɔ muanda, bá ná yósi oso. Bá ná wɛɛ́ya tukíníə́ na yáyɛ́á ɛkaálɛa ətíə́ yɛ bɛndɔ, á Yə́susu busíə́. 20Ɛnaka á yə́búə́ ilumininə siəkínə, a ná mɔndɔ wa mɔɔ́mbɔ lɛ́na a sɛ́á: «Á yamɛ́á ɛŋgɔ́áyɛ́, mɛ ná aŋɔ́á máwɔ́á mabɛ́á niasɛ́na.» 21Əlimə yɛ bɛ́táyɛ́ bɛtambá, bamanyumbə́ndə́ na Bɛfalísia bá ná botólíə́ ɔ ubílúlə bá sɛ́á: «Ɛ́yánɛ́ mɔndɔ wɔ́ɔwɔ ɔwá a ndɔ Huɛlɛ́ kɔ́ba əə́? Ɛ́yánɛ́ á óso ɔ mabɛ́á ɔnɛasɛna əə́? Yɛ́ sá bá á Huɛlɛ́ bíbúə́.» 22Mba, Yə́susu a ná mə́búə́ mafɛka manyá, a ná bəə́bu lɛ́na a sɛ́á: «Ɛlɔ́áyɛ́ yatɛ́ nɔ lɛ́á na yɛ́táyɛ́ ɛnya yɛ mafɛka ɔ uwənú mɛlɛ́má əə́? 23Yatɛ́ yɛ́ lɛ́á ányákátɔ́ ɔlaa ɔwá, mɛ ná aŋɔ́á máwɔ́á mabɛ́á niasɛ́na, ataná ɔlaa ɔwá, hɔalɛ́na kɛndáka əə́?» 24Mba, mɛ ndɔ siə uwənú umənyəsiə mɛ sɛ́á: «Mɔná wa mɔndɔ a báka na kuənjə ɔ mabɛ́á ɔnɛasɛna ɔ misí.» A ná yaáta yɛ́ mɔndɔ lɛ́na a sɛ́á: «Hɔalɛ́na, ɛtá yáwɔ́á ɛkaálɛa, úlúə́ ɔwáwɔ ɔmbɛ́la.» 25Ɔ umisíumə́, mɔndɔ a ná tɛ́nɛ́má ɔ məə́sə má bɛndɔ bəkimə, a ná yáyɛ́á ɛkaálɛa túáná ɔyɛ́á a ná báá sianátɔ. 26Yələ́mənə na bɔkɔ́lɔ́ma bɔ́ ná bɛndɔ bəkimə itíə́, bá Huɛlɛ́ nyamaka, bá laaka bá sɛ́á: «Tɔ ná bɛyɛmbɛlana bɛ́ bɛkɔa siəkínə́ niɔfɛ́nɛ.»

Yə́susu a nɔ́ Lə́wi ɛ́lɛakɛna

(Mat 9.9-13; Mə́l 2.13-17)

27Əlimə yɛ nɔ́yɛ́, Yə́susu a ná ákana, a ná mɔkɔtabɛtásɛ yama, nɛ́áyɛ́á niínyə á Lə́wi, tuənə́tɔ́ ɔ ɔwayɛ́ ɛbɔ́ka yɛ́ buolí. A ná wɛɛ́ya lɛ́na a sɛ́á: «Ɔŋgɔ́kɔ́ mɛaŋɔ́á.» 28Lə́wi a ná hɔalɛ́na, a ná tíkə́ bikimə ɔ ɛbɔ́ka ɔyɛ́á a ná báá tuənə́tɔ́, a ná wɛɛ́ya ɔŋgɔ́kɔ.

29Ɛlɔ́áyɛ́ nɔ́yɛ́, a ná ɛŋganda yɛŋɛ́ŋa tíkə́ ɔ ɔwayɛ́ ɔmbɛ́la ɔ nióni nɛ́ Yə́susu. Bakɔtabɛtásɛ bəəŋí na bɔ́mɔtɛ́ bɛndɔ bá ka báá ɔ ɛtáka na bəə́bu. 30Ɛnaka Bɛfalísia na bamanyumbə́ndə́ bá ɛ́ná nɔ́yɛ́, bá ná botólíə́ ɔ ubílúlə; bá ná bɔkɔ́nɛna bá Yə́susu lɛ́na bá sɛ́á: «Ɛlɔ́áyɛ́ yatɛ́ nɔ ndɔ nyínəniə, nɔ níə́kəniə na bakɔtabɛtásɛ na bakɛamabɛ́á əə́?» 31Yə́susu a sɛ́á: «Bɛndɔ ɔbá bá ndɔ niŋə muɛsɛ abáka bá lɛ ɛmɔ́ɛ́nɛ́ siə, mba, bɛnákɛnákɛ abáka bá ɛmɔ́ɛ́nɛ́ siəkə. 32Mɛ sa ndasá ɔ bááyɛ́ bátaká ɔwɛ́lɛna, mba, ɛlɔ́áyɛ́ bakɛamabɛ́á ɔkɛaka ɔwá bá mɔlɛ́má kɔŋɔna.»

Yə́susu a ndɔ hɛ́na ɛlɔ́áyɛ́ nibítə́tə́niə nɛ́ ɔnɛ́á

(Mat 9.14-17; Mə́l 2.18-22)

33Bɛfalísia bá ná Yə́susu lɛ́na bá sɛ́á: «Bɔkɔ́nɛna bá Yɔhánɛsɛ bá ndɔ bítə́tə́niə, bá ndɔ bɛ́kálɛ́na ikúílí tɛ́á. Mba báwɔ́á bɔkɔ́nɛna uwəbú, abáka bá nɛ́áka, bá nyákɛna.» 34Yə́susu a sɛ́á: «Abáka maŋgɔ́áyɛ́ má wɛ́ɛ́yɛ́ ɔwá a nɔ́ húlə ɔ ɔbɛ́lɛna bá lɛ bítə́tə́níə́ ɔ ɔnɛ́á ɔ ikúílí ɔyɛ́á a lɛ́á na bəə́bu. 35Mba, tunó tɔ́ ŋɔ ndafámá ɔtɔ́á bá ŋɔ yəbúə́ ibə́ húliə; ɔ yɛ́táyɛ́ ikúílí, bá ŋɔ bítə́tə́kəniə.»

36A ná bəə́bu wúuwu ɔŋana tɛ́ná a sɛ́á: «Ata mɔndɔ ɔmɔtɛ́ a sa ósó ɔ ifəsiə yɛ́ nɛbata nɛɔmɔ́mɔ ɔwɛta, ɛlɔ́áyɛ́ unibinə ɔ ilunə́ki yɛ́ nɛbata. Ábá mɔndɔ a ná nɔ́yɛ́ kɛ́áka, nɛbata nɛɔmɔ́mɔ nɛ́ sɔ́ ŋɔ bá bɔkɔa bɔ́mɔtɛ́ na ilunə́ki. 37Ata mɔndɔ ɔmɔtɛ́ a sa ósó ɔ mutəkuniə wɔ́ məluku ɔháá ɔ ibióki yɛ́ mɛsɔ́á; ábá a ná nɔ́yɛ́ kɛ́áka, mutəkuniə wɔ́ məluku wɔ́ ŋɔ ibióki yɛ́ mɛsɔ́á sánáka. Məluku má ŋɔ olokokiə, mɛsɔ́á tɔ́na yɛ́ tɛŋɛtɛŋɛa. 38Mba, bá ná hɔ́ánána ɔ mutəkuniə ɔháa ɔ mɛsɔ́á miɔmɔ́mɔ. 39Ata ɛ́yánɛ́ mɔndɔ, ábá a ná yundú yɛ́ məluku nyɛ́ná, abáka a lɛ mutəkuniə hikíə́ bɔkɔasɛ́á, a ŋɔ laa a sɛ́á yundú yɛ́ lɛ́á məluku ɔ maasɛ.»

Currently Selected:

Lúkasɛ 5: tvu

Highlight

Copy