Yɔhánɛsɛ 20

Nɛhɔŋɔa nɛ́ Yə́susu

(Mat 28.1-10; Mə́l 16.1-8; Lúk 24.1-12)

1Ɔ buɔsɛ́ bɔ́ indílí, ɛlala lɛ kátɛ́á, tubíndindí tɔ́ ka báá, Malɛ́á Mətəlínə a ná ákáná ɔ munyə́, a ná yámá ɔwá bá ka muɔkɔ hɛ́kɛa ɔwá wɔ́ ná báá ɔ nifínínə́ nɛ́ munyə́. 2A ná ákáná mɔtɛbɛna, a ná ká Símono Bíə́lə kɔ́ána na wɔmɔtɛ́ mɔkɔ́nɛna wɛ́ɛ́yɛ́ ɔwá Yə́susu a ná bá a ndɔ hikiə, a ná bəə́bu lɛ́na a sɛ́á: «Bá ná Isə́lúkú húlíə́ ɔ munyə́, tɔ lɛ ndɔ manya ɛbɔ́ka ɔyɛ́á bá ná wɛɛ́ya bɛ́lɛ́na.» 3Nɔ́yɛ́, Bíə́lə na wɛ́ɛ́yɛ́ mɔkɔ́nɛna bá ná fama, bá ná ákáná tɔ́na ɔ munyə́. 4Bəə́bu bəkimə báfandɛ́ bá tibəkinəniə iŋgində́, mba, wɛ́ɛ́yɛ́ mɔkɔ́nɛna a fáhaka ɔ mɔtɛbɛna yáyɛ́ná Bíə́lə, a ná taŋá ɔkafámá ɔ munyə́. 5A ná fɛŋɛ́mɛ́na, a ná biləbə́ yámá bɛ́lɛ́nátɔ́ ɔmɔ́tɔ́yɛ́, mba, a sa fínə ɔ munyə́. 6Símono Bíə́lə, ɔwá a ná bá a ndɔ wɛɛ́ya ɔŋgɔ a ná ndáfáma tɔ́na, a ná fínə́ ɔ munyə́, a ná biləbə́ yámá bɛ́lɛ́nátɔ́ ɔmɔ́tɔ́yɛ́. 7Ɔmbɔ́mɔ́ ɔwá bá ná háá ɔ mɔlɔ́á wɔ́ Yə́susu wɔ́ sa bá bɛ́lɛ́nátɔ́ na biləbə́, mba, wɔ́ ka báá bɔŋɔkɔ́tɔ́ bákɛ́átɔ́ ɔ ɛbɔ́ka yinə́yinə́. 8Ɔ yɛ́táyɛ́ ikúílí, wɛ́ɛ́yɛ́ mɔkɔ́nɛna ɔwá a ná taŋá ɔkafámá ɔ munyə́ a ná tíkə́ ayɛ́ fínə: A ná siəkínə, a ná lumínínə. 9Ɔ taká, bɔkɔ́nɛna bá sa bá bá nɔ́ Mətilə ɔ́kɔ muɛsɛ, ɔhá má ndɔ laa má sɛ́á Yə́susu a ná hɔ́ánána ɔhɔŋɔa ɔ ətíə́ yɛ bəwə́nú. 10Əlimə yɛ nɔ́yɛ́, bɔkɔ́nɛna báfandɛ́ bá ná híánáka ɔ uwəbú ɔmbɛ́la.

Malɛ́á Mətəlínə a nɔ́ Yə́susu siəkinə

(Mat 28.9-10; Mə́l 16.9-11)

11Ɔ yɛ́táyɛ́ ikúílí, Malɛ́á a ná tíkə́nə́ ɔ ɛmɛ́ŋɛ́ yɛ munyə́ a ndɔ lɛla. Ɛ́sɛ́á a ná bá a ndɔ lɛla, a ná fɛŋɛ́mɛ́na ɔ munyə́, 12a ná bɛáŋgɛlɛ yámá bɛ́fandɛ́ lɛŋábákátɔ́ na bɛlɛŋa bɛnaŋanaŋa, tuənə́tɔ́ ɔ ɛbɔ́ka ɔyɛ́á umimə wɔ́ Yə́susu wɔ́ ná báá bɛ́lɛ́nátɔ, wɔ́ɔwɔ ɔ ɛsalɛ yɛ́ mɔlɔ́á, wə́ə́ní ɔ ɛsalɛ yɛ́ makɔlɔ́.

13Bá ná wɛɛ́ya lɛ́na bá sɛ́á: «Á Ámá! Ɛlɔ́áyɛ́ yatɛ́ ɔ ndɔ lɛlɛna əə́?» A sɛ́á: «Bá ná yamɛ́á Isə́lúkú húlíə́ ɔ munyə́, mɛ lɛ ndɔ manya ɔhá bá ná wɛɛ́ya bɛ́lɛ́na.» 14Ɛ́sɛ́á a ná bá a ndɔ hɔ́ɔ́ nɔ́yɛ́, a ná bɛkɔŋɔna, a ná Yə́susu yámá tɛ́nɛ́mátɔ́ ɔmɔ́tɔ́yɛ́, mba, a sa bá a ndɔ manya a sɛ́á wɛɛ́ya. 15Yə́susu a ná wɛɛ́ya lɛ́na a sɛ́á: «Á Ámá! Ɛlɔ́áyɛ́ yatɛ́ ɔ ndɔ lɛlɛna əə́? Ɔwanɛ́ ɔ ndɔ siə əə́?» A ka bá a ndɔ fɛka ɔwá mɔnyɛna wa ɛtɔbɔtɔ́bɔ́, ɔ́ ɛlɔ́áyɛ́ nɔ́yɛ́ a ná wɛɛ́ya lɛ́na a sɛ́á: «Ábá aŋɔ́á ɔ ná wɛɛ́ya ɛta, lɛná mɛaŋɔ́á ɛbɔ́ka ɔyɛ́á ɔ ná wɛɛ́ya bɛ́lɛ́na mbá mɛ ŋɔ ka wɛɛ́ya ɛta.» 16Yə́susu a sɛ́á: «Á Malɛ́á!» A ná bɛkɔŋɔna, a ná wɛɛ́ya lɛɛ́ná na nihókí nɛ́ Hɛ́bɛlɛ a sɛ́á: «Ə́ə́! Labúni!» Ɔ́ niɔŋɔ́ a sɛ́á: «Á Mulə́liə.» 17Yə́susu a sɛ́á: «Ɔ lɛ mɛaŋɔ́á itíə́ bɔkɔasɛ́á, mɛ nana bálá ɔ ɛmɛ́ŋɛ́ yɛ yamɛ́á Isə́. Mba, káka bámɛ́á bənísə́ kɔ́ána, lɛná bəə́bu ɔwá mɛ lɛa ɔ ɔbálaka ɔ ɛmɛ́ŋɛ́ yɛ yamɛ́á Isə́ ɔwá a lɛ́á yənúə́ Isə́, ɛmɛ́ŋɛ́ yɛ yamɛ́á Huɛlɛ́ ɔwá a lɛ́á yənúə́ Huɛlɛ́ tɔ́na.» 18Nɔ́yɛ́, Malɛ́á Mətəlínə a ná ákana, a ná bɔkɔ́nɛna nɔŋɔ́nákɛ́na, a sɛ́á: «Mɛ ná Isə́lúkú síə́kínə, náana a ná mɛaŋɔ́á lákɛ́na.»

Bɔkɔ́nɛna bá nɔ Yə́susu siəkinə

(Mat 28.16-20; Mə́l 16.14-18; Lúk 24.36-49)

19Ɔ bɛkɔlakɔ́lá bɛ́ bɔ́táyɛ́ buɔsɛ́ bɔ́ indílí, bɔkɔ́nɛna bá ka báá kɔtálánátɔ́ ɔ miímə. Bá ka tɔkɔ́kɛ fanjaka bɔkɔasɛ́á, bá ndɔ bisə́lúkú bɛ́ Bɛyútɛnɛ kɔ́lɔ́ma. Yə́susu a ná fámá fəŋə́nyu, a ná tɛ́nɛ́má ɔ uwəbú ətíə́, a sɛ́á: «Bumbə́nú bɔ́ báá na bənú!» 20Ɛnaka a hɔ́lɔ́ nɔ́yɛ́, a ná bəə́bu máyɛ́á makátá ínə́níə́ na híə́yíə́ hɛfanda. Bɔkɔ́nɛna bá ka báá úndúə́tɔ́ na nɛhɔnɔ á Isə́lúkú ɔ usinə. 21Yə́susu a ná híánɔ́lɔ́na ɔ uwəbú ɔlɛna a sɛ́á: «Bumbə́nú bɔ́ báá na bənú! Ɛ́sɛ́á Isə́ a ná mɛaŋɔ́á lɔ́má, mɛaŋɔ́á tɔ́na mɛ ndɔ bənú lɔ́ma.» 22Əlimə yɛ bɛ́ɛ́yɛ́ bɛtambá, a ná bəə́bu mulúkúlúku fɛ́málɛ́na, a ná bəə́bu lɛ́na a sɛ́á: «Nɔ́ Umbúínyi Mɔnaŋanaŋa kusə́nə! 23Bɛndɔ ɔbá nɔ ŋɔ mabɛ́á niasɛna, Huɛlɛ́ a ŋɔ bəə́bu niasɛna. Bááyɛ́ ɔbá nɔ sɔ́ ŋɔ mabɛ́á niasɛna, Huɛlɛ́ a sa ndá bəə́bu niasɛ́na.»

24Ikúílí Yə́susu a ná fámálána ɔ miímə, Tɔ́masɛ ɔwá bá ndɔ ɛ́lɛnɛna Ɔmbɔ́ásalɛ́, wɔmɔtɛ́ wa niómo na báfandɛ́, a sa bá na bəə́bu. 25Nɔ́yɛ́ bááyɛ́ bɔkɔ́nɛna bɔ́mɔtɛ́ bá ná wɛɛ́ya lɛ́na bá sɛ́á: «Tɔ ná Isə́lúkú síə́kínə.» Mba Tɔ́masɛ a sɛ́á: «Ábá mɛ sá hibílíndíníə́ hɛ́ ɛmáŋɛ́ná sinə ɔ ɔwayɛ́ makátá, ábá mɛ sá híə́míə́ hɛnɔnɔ́ háá ɔ biósi bɛ́ ɛmáŋɛ́ná, ábá mɛ sá wə́míə́ mɔkátá sɔnɛna ɔ ɔwayɛ́ hɛfanda, mɛ sɔ́ ŋɔ lumininə.» 26Ɔ indílí yɛ́ ɔwɔŋgɔkɔnɔ, bá ka báá kɔtálánátɔ́ ɔ miímə, Tɔ́masɛ a ka báá na bəə́bu. Bɔkɔ́nɛna bá ka tɔkɔ́kɛ fanjaka tukimə, Yə́susu a na fámá fəŋə́nyu, a ná tɛ́nɛ́má ɔ uwəbú ətíə́, a sɛ́á: «Bumbə́nú bɔ́ báá na bənú!» 27A ná Tɔ́masɛ lɛ́na a sɛ́á: «Háá híə́wúə́ hɛnɔnɔ́ háha, siəkínə mámɛ́á makátá, túmbíə́ wə́wúə́ mɔkátá, sɔnɛ́ná muítə ɔ ɔwámɛ hɛfanda. Niasá mɛnyɔ́, mba, lumínínə ɔbánɔ́!» 28Tɔ́masɛ a sɛ́á: «Á yamɛ́á Isə́lúkú na yamɛ́á Huɛlɛ́!» 29Yə́susu a sɛ́á: «Bɔkɔasɛ́á ɔ ná mɛaŋɔ́á síə́kínə, ɔ́ ɛlɔ́áyɛ́ nɔ́yɛ́ ɔ ná lumínínə əə́? Nɛhɔnɔ na bááyɛ́ ɔbá bá ná lúmínínə ɛŋaná ɔwámɛ usinə!»

Hɛkɔma hɛ́ híihi hiəfulə

30Yə́susu a ka bɛ́mɔtɛ́ bisə́mə́tə́ bɛ́ yələ́mənə kɛaka tɔ́na biəŋí ɔ busíə́ bɔ́ báyɛ́á bɔkɔ́nɛna ɔbɛ́á bɛ́ lɛ bá tilə́tɔ́ ɔ híihi hiəfulə. 31Bá ka bɛ́ɛbɛ bɛkɔa tiləkə ɔkɛaka ɔwá, nɔ́ lumínə́ nɔ sɛ́á Yə́susu a lɛa Mɛ́sia, wɛɛ́ya á lɛ́á Mɔná wa Huɛlɛ́. Mba, ábá nɔ ná níə́núə́ nɛkɔmba tálɛ́ná ɔ ɔwáyɛ́, nɔ ŋɔ buɔmɔ́ kusənə ɔ tɔ́mbákɛna na nɛ́áyɛ́á niínyə.

Currently Selected:

Yɔhánɛsɛ 20: tvu

Highlight

Copy