Yɔhánɛsɛ 17

Uŋgə́lə́kí wɔ́ Yə́susu

1Ikúílí Yə́susu a ná bɛ́ɛ́yɛ́ bɛtambá hɔ́á ɔ ɔlaa, a ná məə́sə bə́líə́ ɔ ɔmbáŋá, a sɛ́á: «Á Ába, ikúílí yɛ́ nɔ́ ndafama, úmə́síə́ wawɔ́á Mɔná ɔkɛaka ɔwá, wawɔ́á Mɔná á aŋɔ́á úmə́kíə́, 2ɔ ka wɛɛ́ya iŋgínə́ índiə ɔsɛ́á a mɔsá mukimə manákɛ́na ɔkɛaka ɔwá, ɔ bááyɛ́ bəkimə ɔbá ɔ ná wɛɛ́ya índíə́, á bəə́bu buɔmɔ́ bɔ́ ikúílíə́kimə índíə́. 3Buɔmɔ́ bɔ́ ikúílíə́kimə bɔ́ báka ɔwá, bá aŋɔ́á mánya, ɔwáwɔ á Huɛlɛ́ bíbúə́ yɛ taká, na Yə́susu Kilísitusu ɔ ɔmanya ɔwá ɔ́ ná lɔma. 4Mɛ ná aŋɔ́á úmə́kíə́ ɔ misí, mɛ ná hɔ́á ɔkɛa yatɛ́ ɔ ná mɛaŋɔ́á batá ɔ sɛ́á mɛ kɛ́áka. 5Isíŋáka nə́ə, á Ába, índíə́ mɛaŋɔ́á tuúmə ɔwáwɔ ɛmɛ́ŋɛ́ ɔtɔ́á tɔ́ ná mɛaŋɔ́á bámɛ́nɛ́ná ɔ ɔwáwɔ ɛmɛ́ŋɛ́ ubusíə́ ɔbɔ́á ɔ misí kə́tíə́.»

6«Bɛndɔ ɔbá ɔ ná ɛtá ɔ misí ɔkɛaka ɔwá ɔ mɛaŋɔ́á bəə́bu índíə́, mɛ ka kɛaka ɔwá bá aŋɔ́á mánya, bá lɛa báwɔ, ɔ ka mɛaŋɔ́á bəə́bú índiə. Bá ka yáwɔ́á ɛtambá bə́təkiə. 7Bá ndɔ manya isíŋáka ɔwá, bikimə ɔbɛ́á ɔ ná mɛaŋɔ́á índíə́ bɛ́ ndɔ húlínə na aŋɔ́á, 8mɛ ka bəə́bu lɛna yatɛ́ ɔyɛ́á ɔ ná mɛaŋɔ́á lákɛ́na, bá ná bɛ́táyɛ́ bɛtambá tə́tə́níə́ ɔ uwəbú mɛlɛ́má. Bá ná manyá taká taká ɔwá, mɛ ka húlínə́ na aŋɔ́á, bá ná lumínə ɔwá aŋɔ́á ɔ ná mɛaŋɔ́á lɔma.»

9«Mɛ ndɔ aŋɔ́á bɛ́kálɛ́na ɛlɔ́áyɛ́ əbú, mɛ lɛ ndɔ bɛ́kálɛ́na ɛlɔ́áyɛ́ bɛndɔ bá misí, mba, ɛlɔ́áyɛ́ bááyɛ́ ɔbá ɔ ná mɛaŋɔ́á índíə́, bɔkɔasɛ́á bá lɛa báwɔ. 10Bikimə tɔ́na ɔbɛ́á bɛ́ lɛ́á bɛ́ámɛ bɛ́ lɛa bɛ́áwɔ, bikimə ɔbɛ́á bɛ́ lɛ́á bɛ́áwɔ bɛ́ lɛa bɛ́ámɛ, tɔ́ámɛ́á tuúmə tɔ́ ndɔ bínə́niə ɔ uwəbú. 11Mɛ lɛ bá tɔ́na ɔ misí, mba uwəbú, bá lɛa ɔ misí, ɔwámɛ mɛ lɛa ɔsákɔna na aŋɔ́á. Á Isə́ Mɛnaŋanaŋa, tə́tə́kə́níə́ bámɛ́á bɔkɔ́nɛna na yawɔ́á iŋgínə́ ɔyɛ́á ɔ ná mɛaŋɔ́á índíə́ ɔkɛaka ɔwá, bá bámɛ́nɛ́ná mɔndɔ ɔmɔtɛ́ ɛ́sɛ́á na mɛaŋɔ́á na aŋɔ́á tɔ lɛ́á mɔndɔ ɔmɔtɛ́. 12Ikúílí ɔyɛ́á mɛ ná báá na bəə́bu, mɛ ka bá mɛ ndɔ bəə́bu tə́tə́niə ɔ tɔ́mbákɛna na nɛ́áwɔ́á niínyə ɔnɛ́á ɔ ná mɛaŋɔ́á índíə́, mɛ ná bəə́bu hóyókíə́, ata ɔmɔtɛ́ ɔ uwəbú ətíə́ a sa nímínə, úhúlíə́ á mɔná wa bunímə́ ɔkɛaka ɔwá, Mətilə má bíúndúsíníə́. 13Isíŋáka mɛ lɛa ɔ ɔsákɔna ɔwáwɔ busíə́, mɛ ndɔ bɛ́ɛ́yɛ́ bɛtambá laa ɔ misí ɔkɛaka ɔwá, bá bámɛ́nɛ́ná ɔ nɛhɔnɔ nuúmə́ ɛ́sɛ́á mɛ lɛ́á undúə́tɔ́ na nɛhɔnɔ. 14Mɛ ná bəə́bu yáwɔ́á ɛtambá índíə́, bɛndɔ bá misí bá ná bəə́bu kóyókíə́ bɔkɔasɛ́á, bá lɛ bá bá misí ɛ́sɛ́á mɛ lɛ bá wa misí. 15Mɛ lɛ ndɔ aŋɔ́á bata ɔwá ɔ bəə́bu húlíə́ ɔ misí, mba, ɔ́ bəə́bu tə́tə́kə́níə́ hata na Mɔbɛ́á. 16Bá lɛ bá bá misí ɛ́sɛ́á mɛ lɛ bá wa misí. 17Kɛ́áka ɔwá bá bámɛ́nɛ́ná bíndíə́tɔ́ ɔ ɔwáwɔ ɔ tɔ́mbákɛna na yáwɔ́á taká, yáwɔ́á ɛtambá yɛ́ lɛa taká. 18Hɔ́ánánátɔ́ ɛ́sɛ́á ɔ ná mɛaŋɔ́á lɔ́má ɔ misí, mɛaŋɔ́á tɔ́na mɛ ndɔ bəə́bu lɔ́ma ɔ misí. 19Mɛaŋɔ́á mukimə mɛ ndɔ bíndiə ɔ ɔwáwɔ ɛlɔ́áyɛ́ əbú ɔkɛaka ɔwá, bəə́bu tɔ́na bá bámɛ́nɛ́ná taká na aŋɔ́á.»

20«Tátá ɛlɔ́áyɛ́ əbú bíbúə́ mɛ ndɔ bɛ́kálɛ́na, mba, ɛlɔ́áyɛ́ bááyɛ́ ɔbá bá ŋɔ níə́búə́ nɛkɔmba tálɛ́na ɔ ɔwámɛ nyɔnɔ na bíə́búə́ bɛtambá. 21Mɛ ndɔ bɛ́kálɛ́na ɔwá, bəkimə bá bámɛ́nɛ́ná mɔndɔ ɔmɔtɛ́. Á Ába, ɛ́sɛ́á ɔ lɛ́á tɔanátɔ́ na mɛaŋɔ́á na aŋɔ́á, bá bámɛ́nɛ́ná tɔanátɔ́ na bəsú. Bá bámɛ́nɛ́na mɔndɔ ɔmɔtɛ́ ɔkɛaka ɔwá, bɛndɔ bá misí bá lumínə bá sɛ́á ɔ ná mɛaŋɔ́á lɔma. 22Ɛlɔ́áyɛ́ ámɛ, mɛ ná bəə́bu tuúmə índíə́ ɔtɔ́á ɔ ná mɛaŋɔ́á índíə́ ɔkɛaka ɔwá, bá bámɛ́nɛ́ná mɔndɔ ɔmɔtɛ́ ɛ́sɛ́á tɔ́ əsú lɛ́á mɔndɔ ɔmɔtɛ́. 23Mɛ ndɔ niŋə ɔ uwəbú nuúmə́, ɔ ndɔ niŋə ɔ ɔwámɛ nuúmə́ ɔkɛaka ɔwá, bá bámɛ́nɛ́ná ɔ nɛtɔana nɛ́ hɔ́ánánátɔ́, bɛndɔ bá misí tɔ́na bá manyá bá sɛ́á ɔ ka mɛaŋɔ́á lɔma, ɔ ndɔ bəə́bu hikiə tɔ́na ɛ́sɛ́á ɔ ndɔ mɛaŋɔ́á hikiə. 24Á Ába, mɛ ndɔ hikiə ɔwá, ɔ ɛbɔ́ka ɔyɛ́á mɛ ŋɔ bámɛnɛna, bááyɛ́ ɔbá ɔ ná mɛaŋɔ́á índíə́ bá bámɛ́nɛ́ná na mɛaŋɔ́á ɔkɛaka ɔwá, bá tɔ́ámɛ́á tuúmə lə́mbə́kíə́ ɔtɔ́á ɔ ná mɛaŋɔ́á índíə́, ɔ taká, ɔ ka mɛaŋɔ́á hikəkiə ubusíə́ bɔ́ nɛbɔ́tɛ́ná nɛ́ misí. 25Á Isə́ yɛ taká, bɛndɔ bá misí bá sa aŋɔ́á manya, mba ɔwámɛ, mɛ ka aŋɔ́á manya, bááyɛ́ ɔbá ɔ ná mɛaŋɔ́á índíə́ bá ka manya ɔwá ɔ ka mɛaŋɔ́á lɔ́ma. 26Mɛ ka bəə́bu nɛ́áwɔ́á niínyə mənyəsiə, mɛ ŋɔ manyɔ́ bəə́bu nɛɛ́ta mənyəsiə ɔkɛaka ɔwá, nibo ɔnɛ́á ɔ ná mɛaŋɔ́á hikə́kíə́ nɛ́ bámɛ́nɛ́ná ɔ uwəbú nuúmə́, mɛaŋɔ́á tɔ́na, mɛ bámɛ́nɛ́ná ɔ uwəbú nuúmə́.»

Currently Selected:

Yɔhánɛsɛ 17: tvu

Highlight

Copy