Bɛnyɛná 7

Ɛtambá yɛ́ Itiənə

1Nɔ́yɛ́, Mutitiəmahánɛna mɔŋɛ́ŋa a ná wɛɛ́ya batá a sɛ́á: «Yatɛ́ ɔyɛ́á bá ndɔ laa ɛlɔ́áyɛ́ áwɔ yɛ́ lɛa taká əə́?» 2Itiənə a ná bɛ́kámɔ́sɔ́na a sɛ́á: «Á bənísə́ na bisə́, nɔ́ mɛaŋɔ́á ɔ́kɔ́ muɛsɛ, Huɛlɛ́ yɛ tuúmə a ka bínə́niə á yəsúə́ isə́ á Ábɛlaháma ikúílí a ná báá ɔ Mɛsɔbɔtamíə́, ubusíə́ ɔbɔ́á a kə́túə́nə́kínə ɔ Halána. 3A ná wɛɛ́ya lɛ́na a sɛ́á: “Tíkə́ bɔ́áwɔ́á bɔnɔŋɔ na nɛ́áwɔ́á nikúlə, káka ɔ bɔnɔŋɔ ɔbɔ́á mɛ ŋɔ aŋɔ́á ínə́niə.” 4Ábɛlaháma a ná yɛ́ɛ́yɛ́ ikúílí hɔ́álɛ́na ɔ bɔnɔŋɔ bɔ́ bɛndɔ bá Kalátɛ, a ná kə́túə́nə́kínə ɔ Halána. Ɔmɔ́tɔ́yɛ́, əlimə ɔwá yayɛ́á isə́ a nɔ́ wə́ə́, Huɛlɛ́ a ná wɛɛ́ya tuəníníə́ ɔ bɔ́ɔbɔ bɔnɔŋɔ ɔbɔ́á nɔ ndɔ niŋə isíŋáka. 5Huɛlɛ́ sa wɛɛ́ya misí tíkínə mbá ata nɛtálɛ́ná nɛ́ mɔkɔlɔ́ ɔ bɔ́táyɛ́ bɔnɔŋɔ, mba, a ka wɛɛ́ya bílíhə́niə ɔwá, a ŋɔ bɔɛ́ta índiə ɔ ɔwayɛ́ na yayɛ́á ɛndɛkɛ ɔyɛ́á yɛ́ ŋɔ báá ɔ ɔwayɛ́ əlimə. Ata nɔ́yɛ́ ɛ́sɛ́á Ábɛlaháma a sa bá na mɔná. 6Huɛlɛ́ a ka wɛɛ́ya lɛna náana a sɛ́á: “Yáyɛ́á ɛndɛkɛ yɛ́ ŋɔ niŋəkə ɔ bɔnɔŋɔ buinə́buinə́, ɔ ɛbɔ́ka ɔyɛ́á bá ŋɔ bəə́bu híə́niə bɛɔlɛ́, bá ŋɔ bəə́bu təkəsəkə tɔ́na ɔ bɛbɔ́ɛ́yɛa bínisə bɛ́ tuɔŋɔ. 7Mba, Mɛaŋɔ́á mɛ ŋɔ bɔ́ɛ́yɛ́ bɔnɔŋɔ kə́lə́səkiə ɔ ɛbɔ́ka ɔyɛ́á bá ŋɔ bəə́bu híə́nəsiə bɛɔlɛ́. Əlimə yɛ nɔ́yɛ́, bá ŋɔ fámáka, bá ŋɔ mɛaŋɔ́á bɛ́kálákɛna ɔ yɛ́ɛyɛ ɛbɔ́ka.” 8A ná nɛkaka hákɛ́ná na Ábɛlaháma ɔ hɛŋgɛtɛ́nɛ́á hɛ́ muandana; ɛnaka a Ísakɛ bíə́nə́, əlimə yɛ tunó tɔ́námanɛ́, a ná wɛɛ́ya anda. Hɔ́ánánátɔ́, Ísakɛ a ná ayɛ́ Yákɔbɔ anda, Yákɔbɔ tɔ́na a ná ayɛ́ niómo na báfandɛ́ nɛ́ tɔkala#7.8 Niómo nɛ́ baná na báfandɛ́ bá Yákɔbɔ, bá ná híáná əlimə yɛ ikúílí babɔ́ta bá tutikə tɔ́ Ísilahɛ́lɛ. andáka.»

9«Tɔkala bá ná Yɔ́sɛbɛ hɛtɛna, bá ná wɛɛ́ya sɛmá ɔkɛaka ɔwá bá wɛɛ́ya ákánána ɔ Ikíbíto. Mba, Huɛlɛ́ a ka báá na wɛɛ́ya; 10a ná wɛɛ́ya hutúnə ɔ məsə́kə məkimə, a ná wɛɛ́ya nyɔnɔ na ɛmanya índíə́ ɔ busíə́ bɔ́ Falahɔ́ŋɔ á munəni wa Ikíbíto; wɔ́ɔwɔ a ná wɛɛ́ya tínímíə́ mɔmanɛna wa wə́yíə́ ɔmbɛ́la mukimə na ɔ Ikíbíto. 11Nɔ́yɛ́, mətíli má ná fínə́ ɔ Ikíbíto yikimə na ɔ bɔnɔŋɔ bɔ́ Kánahána. Məsə́kə má ka báá maŋɛ́ŋa, bíə́súə́ bisə́kúlúlúnə́ bá lɛ bɔɔ́la bɔ́ŋɔ́ tɔ́na bɔ́ ɔnɛ́á. 12Ɛnaka Yákɔbɔ á ɔ́kɔ́ ɔwá bɛ́labɔ́nɛ́á bɛ́ lɛa ɔ Ikíbíto, a ná bíə́súə́ bisə́ lɔ́má umə́ ɔ ikúílí yíbúsíə́. 13Ɔ wɔŋgɔkɔnɔ bikúílí bɛ́fandɛ́, Yɔ́sɛbɛ a ná kɛ́áka bənínyə́ bá ná wɛɛ́ya manya, Falahɔ́ŋɔ a ná hikúlə hɛ́ Yɔ́sɛbɛ manya tɔ́na. 14Əlimə yɛ nɔ́yɛ́, Yɔ́sɛbɛ a ná bɛndɔ lɔ́má ɔkɛaka ɔwá bá ká yáyɛ́á isə́ ɛ́tá na híə́yíə́ hikúlə hikimə, ɔmbana mukimə wɔ́ ka báá moómo álɛ́ndɔ́lɔ́mɔnɔ má bɛndɔ na bálánɔ. 15Yákɔbɔ a ná yɛ́ɛ́yɛ́ ikúílí lɔɔ́kɔ ɔ bɔnɔŋɔ bɔ́ Ikíbíto; wɛɛ́ya na bíə́súə́ bisə́kúlúlúnə́ bá ná kə́wə́kúnínə umə́. 16Bá ná yə́búə́ imimə tilə́nə ɔ Sikɛ́mɛ, bá ná bəə́bu nyəə́kə ɔ munyə́ ɔwá Ábɛlaháma a ná ɔ́ndɔ́ na mɔnɛ́á ɔ baná bá Ɛmɔ́lɔ, á isə́ yɛ Sikɛ́mɛ.»

17«Ɛnaka ikúílí yɛ́ bá yɛ́ ndɔ bɛ́nya ɔyɛ́á Huɛlɛ́ a ná hɔ́ánána ɔ nɛkaka uwundúsiniə ɔnɛ́á a ná hákɛ́ná na Ábɛlaháma, ilúkunə yɛ́ ná áŋánáka, yɛ́ ná bunə́ ɔ ɔyáyɛ́na ɔ Ikíbíto. 18Bɔ́mɔtɛ́ buɔsɛ́, wɔmɔtɛ́ munəni ɔwá a sa bá a ndɔ Yɔ́sɛbɛ manya, a ná nɛmanɛna ɛta. 19Wɛ́ɛ́yɛ́ munəni a ná yə́súə́ ilúkunə nimbəkə, a ná bíə́súə́ bisə́kúlúlúnə́ tə́kə́sə́kə, a ná bəə́bu íkíníə́ ɔwá bá bə́búə́ baná tíkə́ mbá bá wə́kúnə. 20Ɔ́ yɛ́táyɛ́ ikúílí bá ná Mósisi biənə, a ka báá mɔná muɛsɛ, Huɛlɛ́ a wɛɛ́ya hikəkiə. Bá ka wɛɛ́ya nɛnaka miilí ɛ́lálɔ́ á yáyɛ́á isə́ ɔmbɛ́la. 21Əlimə yɛ ikúílí, bá ná wɛɛ́ya ombóko, mɔná muəndú wa Falahɔ́ŋɔ a ná ká wɛɛ́ya bata, a ná wɛɛ́ya bóŋgókó ɛ́sɛ́á wayɛ́á mɔná wa bɛ́múɛ́tɛ́. 22Bá ka Mósisi ɛmanya yikimə yɛ bɛndɔ bá Ikíbíto tunəkiə, a ná híáná injiŋə yɛ mɔndɔ ɔ ɔwayɛ́ bɛtambá na ɔ ɔwayɛ́ bɛnyɛná.»

23«Ɛnaka a hɔ́á moómo ə́nisə má tuɔŋɔ, a ná ɛfɛka kusə́nə ɔwá a ká báyɛ́á bənísə́ á baná bá Ísilahɛ́lɛ síə́línə. 24Ɛnaka a káfámá umə́, a ná mɔndɔ wa Ikíbíto kɔ́áná a ndɔ wa Ísilahɛ́lɛ təkəsə. A ná bɛ́táŋɛ́lɛ́ána ɔkɛaka ɔwá á wɛ́ɛ́yɛ́ fúnə́ ɔwá bá ndɔ təkəsə, a ná wa Ikíbíto ɔnɔ. 25A ka fɛka ɔwá, báyɛ́á bənísə́ bá ŋɔ manya bá sɛ́á ɔ tɔ́mbákɛna na wɛɛ́ya, Huɛlɛ́ a ŋɔ bəə́bu hutunə; mba, bənísə́ bá sa wɛɛ́ya ɔ́kɔ. 26Ɔ hinó ɔhɛ́á hɛ́ ná ɔ́ŋgɔ́nɔ, a ná baná bá Ísilahɛ́lɛ yámá báfandɛ́ bá ndɔ nɔa, a ka hikəkiə ɔ bumbə́nú ɔháá ɔ uwəbú ətíə́, a sɛ́á: “Á bɛ́ámɛ́á bɛŋgɔ́áyɛ́, nɔ lɛa bənísə́, ɛlɔ́áyɛ́ yatɛ́ nɔ ndɔ nɔɛna əə́?” 27Mba, wɛ́ɛ́yɛ́ ɔwá a ná báá a ndɔ munísə́ təkəsə, a ná Mósisi bɔ́há, na ɔlaa a sɛ́á: “Ɛ́yánɛ́ a ná aŋɔ́á tínímíə́ wəsúə́ mɔmanɛna na wəsúə́ mukə́lə́siə əə́? 28Ɔ ndɔ siə ɔwámɛ ɔwɔ́nɔ ɛ́sɛ́á ɔ ná mɔndɔ wa Ikíbíto ɔ́nɔ́ naánɛkɔla əə́?” 29Ɛnaka Mósisi a bɛ́ɛ́yɛ́ bɛtambá ɔ́kɔ́ nɔ́yɛ́, a ná tɛbákɛ́na, a ná kə́bítímə́ ɔ bɔnɔŋɔ bɔ́ Matiánɛ, ɔmɔ́tɔ́yɛ́ a ná ká báyɛ́á baná báfandɛ́ biənə.»

30«Əlimə yɛ moómo ə́nisə tɔ́na má tuɔŋɔ, yɛmɔtɛ́ áŋgɛlɛ a ná wɛɛ́ya bínə́níə́ ɔ ɛmbɔ́ma hoóyi na ɔmáá wɔ́ Sináya, ɔ ətíə́ yɛ musoŋó wɔ́ hiwə ɔ ɛfakafáká ɔyɛ́á yɛ́ ná bá yɛ́ ndɔ kɔnjɔ. 31Mósisi a ka yɛ́táyɛ́ inónó siəkínə, a ná ə́lə́mə́nə. Ɔ ikúílí ɔyɛ́á a ná bɛ́nyálɛ́la ɔkɛaka ɔwá á siəlínə́ muɛsɛ, nióni nɛ́ Isə́lúkú nɛ́ sɛ́á: 32“Mɛaŋɔ́á mɛ lɛ́á Huɛlɛ́ yɛ bɛ́áwɔ́á Bisə́kúlúlúnə́, Huɛlɛ́ yɛ Ábɛlaháma, yɛ Ísakɛ na yɛ Yákɔbɔ.” Na bɔndandɛma bukimə, Mósisi a sa bá a ndɔ óso tɔ́na ɔ usinə. 33Nɔ́yɛ́, Isə́lúkú a sɛ́á: “Húlíə́ bɛtafɛ́ná ɔ ɔwáwɔ makɔlɔ́ bɔkɔasɛ́á, ɛbɔ́ka ɔyɛ́á ɔ lɛ́á tɛ́nɛ́mátɔ́ yɛ́ lɛa yɛnaŋanaŋa. 34Mɛ ná siəkínə́ ɛ́sɛ́á yámɛ́á ilúkunə yɛ́ ndɔ ɛmɔ́kɛ́ nyáá ɔ Ikíbíto; mɛ ná ɔ́kɔ́kɛ́ná tɔ́na ɛ́sɛ́á bá ndɔ bɛ́kɛ́ta, nɔ́yɛ́, mɛ ná lɔɔ́kɔ ɔ uwəbú ɔ ndəhutúnə́. Káka isíŋáka, Mɛ nɔ́ aŋɔ́á lɔ́ma ɔ Ikíbíto.”»

35«Yɛ́táyɛ́ Mósisi, ɔ́ ɔyɛ́á ɛndɛkɛ Ísilahɛ́lɛ bá ná bɛ́sáŋɔ́ná na ɔlaa bá sɛ́á: “Ɛ́yánɛ́ a ná aŋɔ́á bɛ́lɛ́ná isə́lúkú na mukə́lə́siə əə́?” Ɔ tɔ́mbákɛna na áŋgɛlɛ ɔwá a ná wɛɛ́ya bínə́níə́ ɔ ɛfakafáká nuúmə́, ɔ ɔwayɛ́ Huɛlɛ́ a ná lɔ́má ɛ́sɛ́á isə́lúkú na mɔsɔ́tɔ́na. 36Wɛɛ́ya a ná bəə́bu fə́mə́kíə́ ɔ Ikíbíto ɔ tɔ́mbákɛna bihə́nə́síníə́ na tɔŋgɛtɛ́nɛ́á tɔ́ yələ́mənə ɔtɔ́á a ná kɛ́áká ɔ bɔ́táyɛ́ bɔnɔŋɔ, ɔ nɔmɔ́ nɛnyɔakánɔ́ na ɔ makɔ́tákɛ ɔ ətíə́ moómo ə́nisə má tuɔŋɔ. 37Á Mósisi tɔ́na a ná ɛndɛkɛ Ísilahɛ́lɛ lɛ́na a sɛ́á: “Huɛlɛ́ a ŋɔ bənú mɔhɛ́nátɔtányɛ́ lɔ́mɛ́na ɛ́sɛ́á mɛaŋɔ́á, ɔwá a ŋɔ bámɛnɛna ɛláŋa yɛ́ yə́núə́ ilúkunə.” 38Ikúílí yɛ́ nɛkɔta nɛ́ ɛndɛkɛ Ísilahɛ́lɛ ɔ makɔ́tákɛ, wɛɛ́ya tɔ́na a ná báá ɔ ətíə́ yɛ bíə́súə́ bisə́kúlúlúnə́ na áŋgɛlɛ ɔyɛ́á yɛ́ ná bá yɛ́ ndɔ wɛɛ́ya hɛ́na ɔ ɔmáá wɔ́ Sináya ɔmbáŋá; wɛɛ́ya a ná bɛtambá kúsə́nə ɔbɛ́á bɛ́ ndɔ buɔmɔ́ índiə ɔkɛaka ɔwá a bəsú bɛɛ́ta índíə́. 39Mba, bíə́súə́ bisə́kúlúlúnə́ bá sa hikiə ɔ ɔwayɛ́ ɔwɔkɛ́na; bá ná wɛɛ́ya bɛsaŋɔna, bá bɛ́kɔ́lɔmɔkɔna ɔbánɔ́ ɔwá bá híánáka ɔ Ikíbíto. 40Bá ná Álɔnɔ lɛ́na bá sɛ́á: “Kɛakɛ́ná bəsú bɛhuɛlɛ́ ɔbɛ́á bɛ́ kɛndáka ɔ uwəsú busíə́, ɔ taká, yɛ́ɛ́yɛ́ Mósisi ɔwá a ná bəsú fə́mə́kíə́ ɔ bɔnɔŋɔ bɔ́ Ikíbíto, tɔ lɛ ndɔ manya kásɛ nəníə́ a ná hiana.” 41Nɔ́yɛ́, bá ná mɔná ɛfɔŋɔ mɔ́mɔ́láka ɔ mátáyɛ́ mɔɔsɛ́, bá ná nɛhánɛna índíə́ ɔ yɛ́táyɛ́ ililí, bá ná ɛŋganda túmbə́kíə́ na nɛhɔnɔ ɔ buolí bɔ́ mə́búə́ makátá. 42Mba, Huɛlɛ́ a ná bəə́bu əlimə túmə́, a ná bəə́bu níása ɔkɛaka ɔwá bá tundondoní tɔ́ nɔɔ́mɛná lúbúnə́kə, ɛ́sɛ́á yɛ́ lɛ́á tilə́kə́tɔ́ ɔ hiəfulə hɛ́ bɔhɛ́nátɔtányɛ́ yɛ́ sɛ́á:

“Á ilúkunə yɛ́ Ísilahɛ́lɛ, baánɛ ɔ ɔwámɛ

nɔ́ ná mɛnyama ɔ́nɔ́kɛ́na na bɛ́mɔtɛ́ bɛnamá ɔ makɔ́tákɛ

ɔ ətíə́ yɛ moómo ə́nisə má tuɔŋɔ əə́?

43Mba bóo! Nɔ ka yanda yɛ́ huɛlɛ́ á Mɔ́lɔkɔ

na hindondoní hɛ́ yənúə́ Huɛlɛ́ á Lɛ́fanɛ túána,

nɔ ná bɛ́ɛ́yɛ́ bililí tábɔ́náka ɔkɛaka ɔwá nɔ bɛɛ́ta lúbúnə́kə.

Ɔ́ ɛlɔ́áyɛ́ nɔ́yɛ́, mɛ ŋɔ bənú ákánana ɔ ɛsɔ hata yáyɛ́ná Babílono.”»

44«Bíə́súə́ bisə́kúlúlúnə́ bá ka báá na yanda yɛ́ nɛnyáná na Huɛlɛ́ ɔ makɔ́tákɛ. Yɛ́ ka báá tábɔ́nákátɔ́ ɛ́sɛ́á Huɛlɛ́ a ná Mósisi manɛ́na: Ɔ taká, a ka wɛɛ́ya manɛna ɔwá, a yɛɛ́ta tábɔ́náka ɔ ɛnya ɔyɛ́á á ná síə́kínə. 45Ɛnaka bíə́súə́ bisə́kúlúlúnə́ bá yɛɛ́ta kusə́nə, bá ná yɛɛ́ta fínə́nə ɔ bɔnɔŋɔ ɔbɔ́á bá ná nɔbá ɔ makátá má balɛmanyáhuɛlɛ́, bááyɛ́ ɔbá Huɛlɛ́ a ná búlə́kə ɔ uwəbú busíə́, á Yɔ́sua a ná bəə́bu kɛndákána. Yɛ́ ka tuənə umə́ ɔkafámáká ɔ ikúíli yɛ́ Ndə́witi. 46Ndə́witi a ná ɛkamɛla yɛ́ Huɛlɛ́ kúsə́nə. A ná wɛɛ́ya batá ɔkɛaka ɔwá a bituənínə́ falábáka ɛlɔ́áyɛ́ Huɛlɛ́ yɛ Yákɔbɔ. 47Mba, á Salómono ɔbánɔ́ a ná wɛɛ́ya miímə falábákɛ́na. 48Ata nɔ́yɛ́, abáka Huɛlɛ́ yɛ ɔmɔ́lɔ́mɔ́kɔndɔ a lɛ tuə́nə ɔ məə́bə ɔmá bɛndɔ bá ná fálábáka. Ɛ́sɛ́á mɔhɛ́nátɔtányɛ́ a ndɔ fə́mə́ləniə a sɛ́á:

49“Isə́lúkú a ndɔ laa ɔwá; nɔɔ́mɛná yɛ́ lɛ́á híə́míə́ hikómo,

misí tɔ́na nɛbɛ́lɛ́nɛ́ná nɛ́ mámɛ́á makɔlɔ́.

Yatɛ́ miímə nɔ ŋɔ mɛaŋɔ́á falabakɛna əə́?

Hə́níə́ ɛbɔ́ka yɛ́ nɛ́ámɛ́á nɛhɔtɛ́ná yɛ́ ŋɔ bámɛnɛna əə́?

50Tátá wə́míə́ mɔkátá wɔ́ ná bɛ́ɛ́yɛ́ bɛkɔa bikimə bɔ́táká əə́?”»

51«Uwənú á bɛndɔ bá mɔlɔ́á natákátɔ́ ɔbá mɔlɛ́má na məlúə́ má lɛ́á tɛlɔ́nɛ́nátɔ́ ikúílí Huɛlɛ́ a ndɔ bənú ɛ́lɛna, nɔ ndɔ Umbúínyi Mɔnaŋanaŋa əlimə túmə́ ikúílí tɛ́á, nɔ báka hɔɛ́ ɛ́sɛ́á bíə́núə́ bisə́kúlúlúnə́. 52Ɛ́yánɛ́ ɔ ətíə́ yɛ bɔhɛ́nátɔtányɛ́ bíə́núə́ bisə́kúlúlúnə́ bá sa təkəsə əə́? Bá ka bááyɛ́ ɔ́nɔ́kɔ ɔbá bá ná nɛsákɔna nɛ́ Wataká bíbúə́ nɔ́ŋɔ́náka ubusíə́ bɔ́ ikúílí, isíŋáka, ɔ ɔwayɛ́ nɔ́ ná sɛ́ma, nɔ ná wɛɛ́ya ɔ́nɔ́kɔ́ tɔ́na. 53Uwənú ɔbá nɔ ná umbə́ndə́ wɔ́ Huɛlɛ́ kúsə́nə ɔ tɔ́mbákɛna na bɛáŋgɛlɛ, mba, nɔ sa muítə bɛ́kɛna.»

Nyɛmbɛ́ yɛ Itiənə

54Ɛnaka bɛláŋa bɛ́ nindúmə́ nɛ́ bəkə́lə́siə bá bɛ́ɛ́yɛ́ bɛtambá ɔ́kɔ́kɛ́na, hilóbi hɛ́ ná bəə́bu tuana, bá Itiənə bɛka kótókinə. 55Mba ɔwayɛ́, úndúə́tɔ́ na Umbúínyi Mɔnaŋanaŋa, a ná məə́sə bə́líə́ ɔ ɔmbáŋá: A ná tuúmə tɔ́ Huɛlɛ́ yámá na Yə́susu tɛ́nɛ́mátɔ́ ɔ mɔkátá wɔ́ bɛnɔ́mɛ wɔ́ Huɛlɛ́. 56A sɛ́á: «Ə́yə́ə́, mɛ ndɔ nɔɔ́mɛná sinə úbúnə́tɔ́, Mɔná wa mɔndɔ tɛ́nɛ́mátɔ́ ɔ mɔkátá wɔ́ bɛnɔ́mɛ wɔ́ Huɛlɛ́!» 57Nɔ́yɛ́, bá ná yə́mə́níə́ nióni nɛŋɛ́ŋa, bá ná məlúə́ bíníbə́kə. Bəkimə iŋgində́, bá ná wɛɛ́ya biɔnjɛ́na, 58bá ná wɛɛ́ya fámáná ɔ bətínə́, bá ná tuə́nə ɔ ɔwayɛ́ ulúmə na miɔkɔ. Bəmbóŋímboŋi bá ná bíə́búə́ bɛlɛŋa tíkə́ ɔ bɛtáta ɔ ɛnjɔ́hɔkɛ yɛ́ mɔndɔ, nɛ́áyɛ́á niínyə á Sáwolo. 59Ɛnakaka bá báá ɔ ɔwayɛ́ ulúmə na miɔkɔ, Itiənə a ayɛ́ bɛ́kálákɛna náana a sɛ́á: «Á Isə́lúkú á Yə́susu, káhá híə́míə́ hɛtányɛ́!» 60Əlimə yɛ nɔ́yɛ́, a ná kiníə́, a ná yə́mə́ na iŋgínə́ a sɛ́á: «Á Isə́lúkú, niasɛ́ná bəə́bu bɔ́ɛ́yɛ́ bɔbɛ́á!» Əlimə yɛ bɛ́ɛ́yɛ́ bɛtambá, a ná kátɛ́á.

Currently Selected:

Bɛnyɛná 7: tvu

Highlight

Copy