Bɛnyɛná 6

Nɛtɛ́fa nɛ́ bakamɛla Bálɛ́ndɔ́lɔ́mɔnɔ

1Ɔ yɛ́táyɛ́ ikúílí, ɔmbana wɔ́ bɔkɔ́nɛna wɔ́ ka bá wɔ́ ndɔ bunə, Bɛyútɛnɛ ɔbá bá ndɔ Kɛlɛ́kɛ hɔ́ɔ́, bá bááyɛ́ bá bɔnɔŋɔ bísə́kə́ləkinə bɔkɔasɛ́á, buɔsɛ́ tɛ́á bá bilíkə́ bɛ́ yə́búə́ ilúkunə fəliə ɔ ikúílí yɛ́ nɛafa nɛ́ bɛ́labɔ́nɛ́á. 2Nɔ́yɛ́, niómo nɛ́ basɔ́másɔma na báfandɛ́ bá ná bɔkɔ́nɛna bəkimə kɔtáka, bá sɛ́á: «Yɛ́ lɛ bá muɛsɛ ɔwá tɔ Ɛtambá yɛ́ Huɛlɛ́ níása ɔ ɔnɔŋɔna ɛlɔ́áyɛ́ manɛ́áka. 3Ɔ́ ɛ́lɔ́áyɛ́ nɔyɛ́, á bənísə́, nɔ́ tɛ́fá ɔ uwənú ətíə́ bɛndɔ baasɛ bálɛ́ndɔ́lɔ́mɔnɔ bá bə́tíə́tɔ, úndúə́tɔ́ na Umbúínyi Mɔnaŋanaŋa, na ɛmanya, mbá tɔ ŋɔ bəə́bu bɔ́táyɛ́ bɔsɔ́ma índiə. 4Uwəsú, tɔ ŋɔ mabɛ́kálɛ́na ákánana ɔ busíə́ na nɛnɔŋɔna nɛ́ Ɛtambá.» 5Ilúkunə yikimə bá ná ɛ́mɛ́nɛ́na ɔ yɛ́táyɛ́ ɛfɛka. Bá ná yɛ́ɛ́yɛ́ ikúílí Itiənə tɛ́fá á mɔndɔ wa úndúə́tɔ́ na ilumininə, na Umbúínyi Mɔnaŋanaŋa, Filíbo, Bɔkɔnɔ́lɛ, Nikanɔ́lɛ, Tímono, Balamɛnákɛ na Níkɔlásɛ á mɔndɔ wa bɔnɔŋɔ bɔ́ Aŋatiɔ́sɛ ɔwá a ná bɛ́kɔ́ŋɔ́ná ɔ ɛbasɛa yɛ́ Bɛyútɛnɛ. 6Əlimə yɛ nɔ́yɛ́, bá ná ká bəə́bu ínə́níə́ ɔ basɔ́másɔma, bá ná bəə́bu bɛ́kálákɛ́nɛ́na, bá ná bəə́bu makátá tálákɛ́ná tɔ́na.

7Ɛtambá yɛ́ Huɛlɛ́ yɛ́ ná yambáná ɔ ɔyáyɛ́na, ɔmbana wɔ́ bɔkɔ́nɛna wɔ́ ná áŋánáka ɔ Yəlúsalɛma, bətitiəmahánɛna#6.7 Bá ndɔ hɛ́na ɔ bətitiəmahánɛna bá Bɛyútɛnɛ. bəəŋí bá ná níə́búə́ nɛkɔmba tálɛ́ná á Yə́susu.

Nɛhalɛna nɛ́ Itiənə

8Itiənə úndúə́tɔ́ na nyɔnɔ yɛ Huɛlɛ́ na injiŋə, a ka bá a ndɔ tɔŋgɛtɛ́nɛ́á tɔ́ yələ́mənə na bihə́nə́síníə́ kɛa ɔ ətíə́ yɛ ilúkunə. 9Mba, bɔ́mɔtɛ́ bɛndɔ bá ná botólíə́ ɔ utə́ŋə́niə na Itiənə, bááyɛ́ bá miímə yɛ mabɛ́kálɛ́na yɛ Bɛyútɛnɛ,#6.9 Ɔ́ niɔŋɔ́ sɛ́á Miímə yɛ mabɛ́kálɛ́na yɛ Bɛyútɛnɛ. ɔbá bá ndɔ ɛ́lɛnɛna bá sɛ́á, miímə yɛ mabɛ́kálɛ́na yɛ bɛɔlɛ́ bɛ́ sɔ́tɔ́nákátɔ, Bɛyútɛnɛ bá bɔnɔŋɔ bɔ́ Silɛ́nɛ, bɔ́ Alɛkɛsandilíə́ bá bɔnɔŋɔ bɔ́ Silisíə́ na bɔ́ Ásia. 10Mba, a ka bá a ndɔ hɔ́ɔ́ na ɛmanya ɔyɛ́á yɛ́ ná bá yɛ́ ndɔ wɛɛ́ya húlínə na Umbúínyi Mɔnaŋanaŋa, bá sa bá tɔ́na hɔ́ánánátɔ́ ɔ utə́ŋə́niə na wɛɛ́ya. 11Bá ná yɛ́ɛ́yɛ́ ikúílí bɛndɔ sábɔ́ná ɔkɛaka ɔwá bá láá bá sɛ́á: «Tɔ ná wɛɛ́ya ɔ́kɔ́kɛ́ná a nɔ́ Mósisi na Huɛlɛ́ ɛ́ŋɛ́mana na bɛtambá bɛbɛ́á.» 12Bá ná ilúkunə, bɛnatákɛ na bamanyumbə́ndə́ kítíníə́, bá ná Itiənə biɔnjɛ́na, bá ná wɛɛ́ya ákánána ɔ nindúmə́ nɛŋɛ́ŋa nɛ́ bəkə́lə́siə.#6.12 Nindúmə́ nɛŋɛ́ŋa nɛ́ bəkə́lə́siə. 13Bá ná bəmbóŋímboŋi bá bɛkanja hulənə, bá sɛ́á: «Wɔ́ɔwɔ mɔndɔ a báka ɔbánɔ́ há tɛ́mbɛlɛ mɛnaŋanaŋa ɔkɔ́ba na Umbə́ndə́ ɔwá Mósisi a ná bəsú tikinə. 14Ɔ taká, tɔ ná ɔ́kɔ́kɛ́na a ndɔ laa ɔwá, yɛ́ɛ́yɛ́ Yə́susu a mɔndɔ wa Násalɛtɛ, a ŋɔ Tɛ́mbɛlɛ kataka, a ŋɔ bɛnɛ́ma sə́njəkiə tɔ́na ɔbɛ́á Mósisi a ná bəsú tikinə.» 15Bɛndɔ bəkimə ɔbá bá ná báá tuənə́kínə́tɔ́ ɔ nindúmə́ nɛŋɛ́ŋa nɛ́ bəkə́lə́siə, bá ná wɛɛ́ya məə́sə tala, bá ná yámá ɔwá bɔ́áyɛ́á busíə́ bɔ́ ndɔ nɔma ɛ́sɛ́á bɔ́ áŋgɛlɛ.

Currently Selected:

Bɛnyɛná 6: tvu

Highlight

Copy