Bɛnyɛná 13

Umbúínyi Mɔnaŋanaŋa wɔ́ nɔ́ Sáwolo na Banábasɛ lɔ́ma ɔ bɔsɔ́ma

1Bɔhɛ́nátɔtányɛ́ na bələ́liə bá ka bákɔna ɔ ətíə́ yɛ ilúkunə yɛ́ Huɛlɛ́ ɔ bətínə́ yɛ Aŋatiɔ́sɛ: Banábasɛ, Simɛyɔ́ŋɔ, wə́yíə́ mɔlɔ́ŋɛ́ná á Mufítiti na Lusíusu á mɔndɔ wa bətínə́ yɛ Silɛ́nɛ, Manahɛ́nɛ á ikindəniə yɛ́ bɔlɔ́matɔ́ yɛ́ Əlóto, á mɔmanɛna ɔ misí yɛ Kalɛ́lɛa, na Sáwulu. 2Bɔ́mɔtɛ́ buɔsɛ́, ɛnaka bá kɔtákána á Isə́lúkú ɔ ɔnyama, bá ikiní yɛ́ ɔnɛ́á bɛ́kɛakɛna tɔ́na ɛlɔ́áyɛ́ Huɛlɛ́, Umbúínyi Mɔnaŋanaŋa wɔ́ ná bəə́bu lɛ́na wɔ́ sɛ́á: «Nɔ́ Banábasɛ na Sáwulu bákɛ́á ɛlɔ́áyɛ́ buolí ɔbɔ́á ɛkasɛ mɛ bəə́bu índíə́.» 3Nɔ́yɛ́, əlimə yɛ ikiní yɛ́ ɔnɛ́á na mabɛ́kálɛ́na, bá ná bəə́bu makátá tálákɛ́na, bá ná bəə́bu niása ɔwá bá ákana.

Banábasɛ na Sáwulu bá nɔ́ ákána ɔ bɔnɔŋɔ bɔ́ Cíbili

4Ɛ́sɛ́á Umbúínyi Mɔnaŋanaŋa wɔ́ ná Banábasɛ na Sáwulu lɔ́má, bá ná ákáná ɔ Səlusíə́. Ɔ ɔmɔ́tɔ́yɛ́ bá ná lánjɛ ɛtɛ́na ɔ ɔwákaka ɔ iloóló yɛ́ misí yɛ́ Cíbili. 5Ɛnaka bá káfámá umə́, bá ná ákáná ɔ bətínə́ yɛ Salamíni, bá ná lúmə́ ɔ ɛtambá yɛ́ Huɛlɛ́ ɔnɔŋɔna ɔ məə́bə má mabɛ́kálɛ́na má Bɛyútɛnɛ. Yɔhánɛsɛ á Mə́líkusu a ka báá na bəə́bu ɛ́sɛ́á wəbúə́ muɔ́lɔ. 6Bá ná iloóló yɛ́ misí bíásɛ́ná yikimə ɔkafámáká ɔ bətínə́ yɛ Bafɔ́sɔ. Bá ná yɛmɔtɛ́ ɛmɔ́ɛ́nɛ́ ɛ́nyánána ɔmɔ́tɔ́yɛ́, nɛ́áyɛ́á niínyə á Balayə́susu, a ka báá mɔyútɛnɛ, a bɛ́laka a sɛ́á wɛɛ́ya mɔhɛ́nátɔtányɛ́. 7Bá ka báá bá ndɔ manya muɛsɛ ɔwá Sɛlɛyúsu Báwulusu, á mɔmanɛna wa yɛ́táyɛ́ iloóló, a ka bá tɔ́na mɔndɔ wa ɛmanya. Mɔ́táyɛ́ mɔmanɛna a ná Banábasɛ ɛ́lɛ́ákɛ́ná na Sáwulu bɔkɔasɛ́á, a ka bá na ilókí ɔ ɛtambá yɛ́ Huɛlɛ́ ɔwɔ́kɔ. 8Ɛnaka bá káfámá, bá ná lúmə́ á mɔmanɛna uwukúniə, Ɛlimásɛ, ɔ́ niɔŋɔ́ mɔlɛmba na nihókí nɛ́ kɛlɛ́kɛ, a ná bəə́bu bísúmbə́níə́, a ka siəkə ɔwá mɔmanɛna a lɛ Yə́susu lumínínə. 9Nɔ́yɛ́, Umbúínyi Mɔnaŋanaŋa wɔ́ ná fínə́ ɔ mɔlɛ́má wɔ́ Sáwulu ɔwá bá ndɔ ɛ́lɛnɛna tɔ́na bá sɛ́á á Báwolo, a ná wɛɛ́ya məə́sə tala, 10a ná wɛɛ́ya lɛ́na a sɛ́á: «Ɔwáwɔ́ á mɔná wa sátana, á mɔndɔ wa úndúə́tɔ́ na maŋgɛ́lɛ́ na macaŋa, á mubəniə wa yatɛ́ ɔyɛ́á yɛ́ lɛ́á taká, maánɛ́á ɔ ŋɔ súkə ɔ mɛanɔ yɛ́ Isə́lúkú ukuəsiə əə́? 11Isíŋáka, ɔ́kɔ́kɛ́ná muɛsɛ: Ɛkasɛ Isə́lúkú a aŋɔ́á sɔ́kɔ́tɛ́á, ɔ ndɔ híánaka mundímə́ndímə, ɔ ikúílí tɛ́tɛ́á ɔ sɔ́ ŋɔ isəmú yɛ́ hiɔtɔ́tɔ́ sinə tɔ́na.» Ɔ umisíúmə́, məə́sə má Ɛlimásɛ má ná bíníbə, a siəkinə há ibínə́binə, a bɛ́kɔ́ŋɔ́naka bɛsalɛ bikimə ɔ mɔndɔ usiə ɔwá a wɛɛ́ya itíə́ ɔ mɔkátá. 12Ɛnaka mɔmanɛna a siəkínə́ yatɛ́ ɔyɛ́á yɛ́ ná bɛ́kɛ́áka, a ná lumínínə́ á Yə́susu, bilə́líə́ ɔbɛ́á a ná ɔ́kɔ́kɛ́na ɔwɔŋgɔkɔnɔ na Isə́lúkú bɛ́ ná wɛɛ́ya fínə́ ɔ mɔlɛ́má.

Báwolo na Banábasɛ bá nɔ́ ákána ɔ bətínə́ yɛ Aŋatiɔ́sɛ ɔ misí yɛ Bisitíə́

13Báwolo na bɛ́áyɛ́á bikindəniə bá ná hɔalɛ́na ɔ Bafɔ́sɔ ɔ lánjɛ, bá ná káfámá ɔ bətínə́ yɛ Bɛlɛyɛ́ ɔ misí yɛ Bamafilíə́. Yɔhánɛsɛ á Mə́líkusu, a ná bəə́bu tíkə́ ɔmɔ́tɔ́yɛ́, a ná tilə́ ɔ Yəlúsalɛma. 14Báwolo na Banábasɛ bá ná ɛnɔ́mɛ ɛtá ɔ makɔlɔ́ ɔ wákaka ɔ Aŋatiɔ́sɛ ɔ bɔnɔŋɔ bɔ́ Bisitíə́. Ɔ hinó hɛ́ Sábatɛ, bá ná fínə́ ɔ miímə yɛ mabɛ́kálɛ́na yɛ Bɛyútɛnɛ, bá ná tuə́nə. 15Bá ná yɛ́mɔtɛ́ ɛkɛ́tɛ yɛ́ hiəfulə hɛ́ Mósisi na hɛ́ bɔhɛ́nátɔtányɛ́ fánáka, bá ná hɔa. Əlimə yɛ mafana, bisə́lúkú bɛ́ miímə yɛ mabɛ́kálɛ́na bá ná bəə́bu mɔndɔ lɔ́mɛ́ná ɔkɛaka ɔwá a bəə́bu batá a sɛ́á: «Á bənísə́, ábá nɔ lɛa na bɛtambá bɛ́ makɛ́nda ɔ ɔlɛna ɔ ilúkunə, nɔ́ hɔ́lɔ́ isíŋáka.»

16Báwolo a ná tɛnɛma, a ná ilúkunə nə́yíə́ na mɔkátá, a sɛ́á: «Á bɛndɔ bá Ísilahɛ́lɛ na uwənú ɔbá nɔ lɛ bá bá Ísilahɛ́lɛ, ɔbá nɔ́ ndɔ Huɛlɛ́ lúbúnə, nɔ́ mɛaŋɔ́á ɔ́kɔ́kɛ́na muɛsɛ muɛsɛ! 17Yəsúə́ Huɛlɛ́ yɛ ilúkunə yɛ́ Ísilahɛ́lɛ a ka bíə́súə́ bisə́kínə́ tɛ́fa, a ná kɛ́áka ɔwá bá bunə́kə ɔ ikúílí ɔyɛ́á bá ná bámɛ́nɛ́ná ɔ ɛsɔ ɔ bɔnɔŋɔ bɔ́ Ikíbíto, əlimə yɛ nɔ́yɛ́, a ná bəə́bu fə́mə́kíə́ ɔ bɔ́táyɛ́ bɔnɔŋɔ na iŋgínə́ yɛ wə́yíə́ mɔkátá. 18A ná bəə́bu níə́kíə́ ɔ makɔ́tákɛ hoóyi na moómo ə́nisə má tuɔŋɔ.#13.18 Mɔ́mɔtɛ́ má ndɔ laa ɔwá, a ka bəə́bu ísə́biniə hoóyi na moómo ə́nisə má tuɔŋɔ. 19Ɛnaka bá káfámá ɔ bɔnɔŋɔ bɔ́ Kánahána, a ná nímə́síə́ tutikə tɔ́lɛ́ndɔ́lɔ́mɔnɔ, a ná yəbúə́ misí áfákɛ́na ɔ ɔwayɛ́ ilúkunə, yɛ́ ná híáná yəbu. 20Ubusíə́ ɔbɔ́á bɛ́ɛ́yɛ́ bɛkɔa bɛ́ bɛ́kɛ́áka, bá ka kɛaka hoóyi na bɛbɔ́ɛ́yɛa bínisə na moómo álánɔ má tuɔŋɔ ɔ bɔnɔŋɔ bɔ́ Ikíbíto. Əlimə yɛ nɔ́yɛ́, Huɛlɛ́ a ná bəə́bu bəkə́lə́siə índíə́ ɔkɛaka ɔwá bá bəə́bu kɛndákána ɔkafámáká ɔ ikúílí yɛ́ mɔhɛ́nátɔtányɛ́ á Sámuɛlɛ. 21Bá ná yɛ́ɛ́yɛ́ ikúílí munəni batá, Huɛlɛ́ a ná bəə́bú Sáwulu índíə́ á mɔná wa Kísi, mɔndɔ wa hitikə hɛ́ Bɛ́nyámɛna, a ka bəə́bu manakɛna moómo ə́nisə má tuɔŋɔ. 22Əlimə yɛ nɔ́yɛ́, Huɛlɛ́ a ná wɛɛ́ya tukíníə́ ɔ yɔkɔ́ yɛ́ nɛmanɛna, a ná Ndə́witi tuəníníə́, wɔ́ɔwɔ a ná híáná wəbúə́ munəni. Huɛlɛ́ a ka hɔ́ɔ́kɔ ɔwɔŋgɔkɔnɔ yɛ́ɛ́yɛ́ Ndə́witi a sɛ́á: “Mɛ ka Ndə́witi a mɔná wa Yɛsɛ́ bɔ́ŋɔ ɛ́sɛ́á mɔndɔ ɔwá wə́míə́ mɔlɛ́má wɔ́ ná híkə́kíə́, a ŋɔ úndúsiniə bikimə ɔbɛ́á mɛ ndɔ siə ɔwá a kɛ́áka.” 23Nɔ́yɛ́, Huɛlɛ́ a ka mɔndɔ índiə ɔ bɛndɔ bá Ísilahɛ́lɛ, a ná húlínə́ ɔ ɛndɛkɛ Ndə́witi ɔkɛaka ɔwá a bámɛ́nɛ́ná wəbúə́ Munuəniə ɛ́sɛ́á a ná bílíhə́níə́, mɔ́táyɛ́ mɔndɔ á Yə́susu. 24Ubusíə́ ɔbɔ́á a ndáfámá, Yɔhánɛsɛ a ka ilúkunə yɛ́ Ísilahɛ́lɛ lɛna ɔwá, bá mɛlɛ́má kɔŋɔna, bá nɛsɔa kusə́nə. 25Ɔ ikúílí ɔyɛ́á yɔhánɛsɛ a ná bá ɔ nisúki nɛ́ bɔ́áyɛ́á buolí, a ka bɛndɔ bata a sɛ́á: “Nɔ ndɔ ənú fɛka nɔ sɛ́á mɛaŋɔ́á ɛ́yánɛ́ əə́? Mɛ lɛa bá wɛ́ɛ́yɛ́ ɔwá nɔ ndɔ táta. Nɔ́ ɔ́kɔ́kɛ́na muɛsɛ, a báka ɔ ɔsákɔna ɔwámɛ əlimə, mɛ lɛ bá hɔ́ánánátɔ́ ɔ mikolí yɛ́ bɛ́áyɛ́á bɛtafɛ́ná uhumbulə.”»

26Báwolo a ná láá tɔ́na a sɛ́á: «Á bənísə́, uwənú á ɛndɛkɛ Ábɛlaháma ata uwənú ɔbá nɔ ndɔ Huɛlɛ́ yɛ bɛndɔ bá Ísilahɛ́lɛ lúbúnə, ɛlɔ́áyɛ́ əsú á Huɛlɛ́ a ná yɛ́ɛyɛ imbə́nú lɔ́mɛ́ná ɔyɛ́á yɛ́ ndɔ bɛndɔ ákánana ɔ nibínuəniə. 27Mba, bɛndɔ bá Yəlúsalɛma na bíə́búə́ bisə́lúkú bá sa Yə́susu sinə ɛ́sɛ́á Munuəniə, bá sa bɛtambá bɛ́ bɔhɛ́nátɔtányɛ́ ɔ́kɔ ɔbɛ́á bá ná báá bá ndɔ fana ɔ Sábatɛ tɛ́á. Mba, bá ka bɛ́táyɛ́ bɛtambá úndúsiniə ɛnaka bá kɛ́áka ɔwá bá Yə́susu ɔnɔkɔ. 28Ata nɔ́yɛ́ ɛ́sɛ́á bá sa hifílí bɔ́ŋɔ hɛ́ ɔwayɛ́ ɔhɔkɛna ɔ nyɛmbɛ́, bá ka Bilátɛ bata ɔwá a wɛɛ́ya ónósíə́. 29Ɛnaka bá úndúsíníə́ yatɛ́ yikimə ɔyɛ́á Mətilə má ná nɔŋɔ́náka ɔ ɔwayɛ́ ɛsalɛ, bá ná wɛɛ́ya tukíníə́ ɔ ɔmbásá, bá ná wɛɛ́ya bɛ́lɛ́na ɔ munyə́ nuúmə́. 30Mba, Huɛlɛ́ a ka wɛɛ́ya huŋuəsiə ɔ ətíə́ yɛ bəwə́nú. 31A ka bínə́niə mɔɔsɛ́ məəŋí ɔ bááyɛ́ ɔbá bá ná kɛ́ndáká na wɛɛ́ya, ɔ botolokiə ɔ Kalɛ́lɛa ɔkafámáká ɔ Yəlúsalɛma, bəə́bu bá ndɔ bɛndɔ bá Isilahɛlɛ lɛna isíŋáka ɛ́yánɛ́ a lɛ́á Yə́susu. 32Bəsú tɔ́na, tɔ nɔ́ ndasá uwənú busíə́ ɛlɔ́áyɛ́ uwənú ɔ yɛ́tána Imbə́nú Yɛɛsɛ yɛ Huɛlɛ́ ɔnɔŋɔnɛna ɔyɛ́á yɛ́ ndɔ laa ɔwá, yatɛ́ ɔyɛ́á Huɛlɛ́ a ná bílíhə́níə́ ɔ uwəsú bisə́kúlúlúnə́, 33a ná yɛɛ́ta úndúsíníə́ isíŋáka ɛlɔ́áyɛ́ əsú ɔbá tɔ́ lɛ́á yɛ́táyɛ́ ɛndɛkɛ. A ka nɔ́yɛ́ úndúsiniə ɔ botolokiə ɔ ikúílí Huɛlɛ́ a ná Yə́susu huŋúə́síə́ ɔ ətíə́ yɛ bəwə́nú. Bá ka bɔ́táyɛ́ bɔkɔa tiləkə ɔ hiəfulə hɛ́ tumboŋo tɔ́ ná úndúsíníə́ tɔ́fandɛ́ bá sɛ́á:

“Aŋɔ́á ɔ lɛ́á wamɛ́á mɔná,

ɔ botolokiə niɔfɛ́nɛ mɛaŋɔ́á mɛ lɛ́á yáwɔ́á Isə́.”

34Huɛlɛ́ a ka nɔŋɔnaka a sɛ́á a ŋɔ wɛɛ́ya huŋuəsiə ɔ ətíə́ yɛ bəwə́nú ɔkɛaka ɔwá, a lɛ híáná ɛfɔnɔ́kɛ. A ka nɔ́yɛ́ fə́mə́ləniə a sɛ́á:

“Mɛ ŋɔ bənú bɛsɔ́nɔ índiə ɔbɛ́á mɛ ná Ndə́witi bílíhə́níə́.

Tiísi yɛ bɛsɔ́nɔ ɔbɛ́á bɛ́ ndɔ húlínə na mɛaŋɔ́á.”

35Ɔ́ ɛlɔ́áyɛ́ nɔ́yɛ́ Ndə́witi a ná hɔ́ɔ́kɔ́ ɔ Mətilə ɔ yɛ́mɔtɛ́ ɛsalɛ a sɛ́á:

“Huɛlɛ́ a sa ndá níása ɔwá mɛɛ́lɔ yɛ wawɔ́á mɔndɔ ɔwá a lɛ́á wayɛ́ yɛ́ fɔnɔ́kɔ ɔ munyə́.”

36Munəni á Ndə́witi ɔwayɛ́, a ka kɛaka yatɛ́ yikimə ɔyɛ́á Huɛlɛ́ a ndɔ hikiə ɔ ɔwayɛ́ ikúílí, a ná wə́yíə́ mɔanɔ úndúsíníə́, əlimə yɛ nɔ́yɛ́ a ná wəə. Bá ka wɛɛ́ya nyəə ɔ ɛmɛ́ŋɛ́ yɛ bɛ́áyɛ́á bisə́, a ná fɔnɔ́kɔ. 37Mba, mɔndɔ ɔwá Huɛlɛ́ a ná huŋúə́síə́ a sa fɔnɔ. 38Á bənísə́, nɔ́ ndɔ manyá ɔwá, yatɛ́ ɔyɛ́á tɔ ndɔ bənú lɛna ɔwá, Huɛlɛ́ a ŋɔ bɛndɔ mə́búə́ mabɛ́á niasɛna, ɔ tɔ́mbákɛna na Yə́susu a ŋɔ nɔ́yɛ́ kɛaka. Umbə́ndə́ wɔ́ Mósisi wɔ́ sa óso ɔkɛa ɔwá, bɔbɛ́á bɔ́ mɔndɔ bɔ́ hɔ́á ɔ káfámá ɔwá Huɛlɛ́ a wɛɛ́ya siəkínə́ tɛ́nɛ́mátɔ́. 39Wɛ́ɛ́yɛ́ ɔwá a ŋɔ lumininə á Yə́susu, Huɛlɛ́ a ŋɔ wɛɛ́ya sɔ́ŋɔ́na ɔ bɔbɛ́á. 40Nɔ́yɛ́, nɔ manyaka nə́ə, yatɛ́ ɔyɛ́á bɔhɛ́nátɔtányɛ́ bá ná tílə́kə, yɛ́ óso uwənú ɔ ndafamɛna, bá ka hɔ́ɔ́kɔ bá sɛ́á:

41“Siəkínə́nu, uwənú á bɛndɔ ɔbá nɔ ndɔ Huɛlɛ́ yomosiə, nɔ ŋɔ báá ə́lə́mə́nə́tɔ, nɔ ŋɔ wə́kunə.

Ɔ taká, ɛkasɛ mɛ bɔkɔa kɛ́áka ɔ uwənú ikúílí ɔbɔ́á, ábá nɔ sá bɔɛ́ta sinə, ata mɔndɔ a ndɔ bənú bɔɛ́ta lɛna nɔ sa ndá lúmínə!”»

42Ɛnaka Báwolo na Banábasɛ bá fámá ɔ miímə yɛ mabɛ́kálɛ́na, bá ná bəə́bu bɛ́tɔ́kɔ́lɔ́kɛ́na ɔwá, bá manyɔ́ ndáhíáná ɔ hinó hɛ́ Sábatɛ ɔhɛ́á hɛ́ lɛ́á ɔ ɔsákɔna, bá ná bəə́bu hɔ́kɛ́ná nɔ́yɛ́ tɔ́na. 43Ikúílí ilúkunə yɛ́ ná fámáká ɔ miímə yɛ mabɛ́kálɛ́na, Bɛyútɛnɛ biəŋí na báaba ɔbá bá ná bɛ́kɔ́ŋɔ́ná ɔ ilumininə yɛ́ Bɛyútɛnɛ, bá ná Báwolo na Banábasɛ ɔŋgɔ. Bá bəə́bu hɔ́kɛna, bá bəə́bu makɛ́nda índiəkinə ɔkɛaka ɔwá, bá bámɛ́nɛ́ná bɛ́ɔ́lɔ́kɛ́nátɔ́ á Huɛlɛ́, Huɛlɛ́ tɔ́na á bəə́bu wə́yíə́ mɔlɛ́má muɛsɛ ínə́níə́.

Báwolo na Banábasɛ bá ndɔ Imbə́nú Yɛɛsɛ nɔŋɔnɛna ɔ bááyɛ́ ɔbá bá lɛ bá Bɛyútɛnɛ

44Ɔ hinó hɛ́ Sábatɛ ɔhɛ́á hɛ́ ná ɔ́ŋgɔ́nɔ, bɛndɔ bá bətínə́ mikimə bá ka báá kɔtákánátɔ́ ɔ Ɛtambá yɛ́ Huɛlɛ́ ɔwɔ́kɔ. 45Ɛnaka Bɛyútɛnɛ bá bɛndɔ yámá bəəŋí, bá ná Báwolo na Banábasɛ busə́kə ɔkɛna, bá ná ɛtambá yɛ́ Báwolo bɛsaŋɔna, bá ná botólíə́ ɔ ɔwayɛ́ ɔkɔ́ba. 46Na yɛmɛ́nɛna yikimə, Báwolo na Banábasɛ bá ná bəə́bu lɛná bá sɛ́á: «Yɛ́ lɛa ɔwá, há tɔ́ ka taŋá uwənú ɔ Ɛtambá yɛ́ Huɛlɛ́ ɔnɔŋɔnɛna uwənú ɔbá nɔ lɛ́á Bɛyútɛnɛ, ɛ́sɛ́á nɔ ná yɛɛ́ta bɛ́sáŋɔ́ná, nɔ ndɔ bísinə ɔwá, nɔ lɛ báá hɔ́ánánátɔ́ ɔ buɔmɔ́ bɔ́ ikúílíə́kimə ukusənə. Oo! Uwəsú, tɔ nɔ́ əsú bɛ́kɔ́ŋɔ́na ɔ bááyɛ́ ɔnɔŋɔnɛna ɔbá bá lɛ bá Bɛyútɛnɛ.» 47Ɔ́ Umbə́ndə́ ɔwá Isə́lúkú a ná bəsú índíə́ wúuwu, wɔ́ sɛ́á:

«Mɛ ka aŋɔ́á híə́nəsiə isəmú ɔkɛaka ɔwá yɛ́ nɔmáka ɔ mɔnɔŋɔ məkimə

ɔkɛaka ɔwá, ɔ tɔ́mbákɛna na aŋɔ́á,

nibínuəniə nɛ́ káfámá ɔ tɔlɛ́ŋɛ́ tukimə tɔ́ misí.»

48Ɛnaka bááyɛ́ ɔbá bá lɛ bá Bɛyútɛnɛ bá nɔ́yɛ́ ɔ́kɔ́kɛ́na, nɛhɔnɔ nɛ́ ná bəə́bu itíə́, bá ná lúmə́ á Isə́lúkú ɔ tuúmə uhíə́niniə ɛlɔ́áyɛ́ yɛ́táyɛ́ Ɛtambá. Bəkimə ɔbá Huɛlɛ́ a ná tábɔ́náka ɛlɔ́áyɛ́ buɔmɔ́ bɔ́ ikúílíə́kimə, bá ná híáná bəlumininə.

49Nɔ́yɛ́, Ɛtambá yɛ́ Isə́lúkú yɛ́ ná yambána ɔ nɛ́táyɛ́ nɛkɛ́tɛ nikimə nɛ́ misí. 50Mba, Bɛyútɛnɛ bá ná bəəndú baŋɛ́ŋa bísúə́línə ɔbá bá ná bɛ́kɔ́ŋɔ́ná ɔ uwəbú ilumininə, na bɛnatákɛ bɛ́ bətínə́, bá ná Báwolo na Banábasɛ babáka ɔkɛaka ɔwá, bá bəə́bu bɔbɛ́á kɛ́áka, bá ná bəə́bu kúbə́kə́ ɔ uwəbú bɔnɔŋɔ. 51Uwəbú, bá ná umbunə́ wɔ́ mə́búə́ makɔlɔ́ kútə́lə,#13.51 Ɔ uwinə́niə ɔwá bá ná salɛ́ána. bá ná ákáná ɔ bɔnɔŋɔ bɔ́ Ikɔniɔ́mɔ. 52Nɔ́yɛ́, bəlumininə bá Aŋatiɔ́sɛ bá ka báá undúə́tɔ́ na Umbúínyi Mɔnaŋanaŋa, bá ka bá ɔ nɛhɔnɔ.

Currently Selected:

Bɛnyɛná 13: tvu

Highlight

Copy