Mak 8

Jesus yiɛse ghel nkam sekɛɛk

(Mat 15.32-39)

1Ko se lu əmchii fo, feliɛ wele gese kaame ɛ Jesus ɛybee, ki wiy kefaa se yiɛ. Jesus jaŋ ghon-ɛyfɛl nə wen, è suuy ge: 2Mɛ koosen ɛysen se ghel ghine bek ge ghɛse ghene shi se əbchii əbtal, nɛ ghene bo ki wiy kefaa se yiɛ. 3Mɛ lòò, è suuy ge ghene yɛ kfəəy se jeŋ, é jeŋ mak ghene ɛ jii bek ge ghene ɛlee lòò əbtəm.

4Ghon-ɛyfɛl nə wene me bif se wen ge: Lòó ghɛsen liɛ ghááy keban kɛ yiɛse ghel ghin so, nɛ ghɛsen lu əbkwak?

5Jesus me bif ge: Ghɛn ki ntukse keban se sek?

Ghene fise ge: Se lu saamba.

6Əb me lam ghel ghii diom se ntiɛ. Əb liɛ ntukse keban sɛ saamba shi, è bɛ̀ɛ̀lè Feyin, è bɛkte, è fo se ghon-ɛyfɛl nə wene ge ghene giate se ghel ghii. Ghene me giate. 7Nè lu dî nɛ ghon-ɛyfɛle ki səə se laykene se ɛylaay. Jesus bɛɛle Feyin se seghene, è suuy ge ghene giate sɛy se ghel ghii. 8Wel əbjim yiɛ è kul. Ghon-ɛyfɛle biŋte əbmbɛkele wɛ əb nè bɛɛsen, nkaase saamba se lunken. 9Ghele nè lu fo ka nkam sekɛɛk di. 10Jesus nɛy tinse ghel ghi ge ghene yɛ kfəəy, ghene ghon-ɛyfɛl nə wene me lii se kenək kɛn se əbliy è se diaŋe se ntaam Dalmanuta.

Jesus tɛn se nɛɛy kenəə əbchio əbyúméné

(Mat 12.38-42; 16.1-14)

11Ghele kenone Falisee gwiy è kɛɛte se yɛ beke mbek ghene ghe Jesus, gofe wen, suuye ge əb nɛɛy kenəə əbchio əbyúméné se din ge əbtaawe ə wene lòò se Feyine. 12Əb shom ɛ wen ɛytem, è suuy ge: Lu bek ghɛ wɛ ghele ghɛ́ ntem fɛne shiin kenəə əbchio əbyúméné? Mɛ suuy əbluuy se ghɛn ge kenəə əbchio əbyúméné di wiy kɛ Feyine nɛɛy se ghel ghine.

13Əb vəse ghene se fo, è lii se kenək, è diaŋ se njine vii.

Ghɛn yɛ toknen kum teyiɛke ghele kenone Falisee

(Mat 16.5-12)

14Nè lu dî nɛ ghon-ɛyfɛle lɛysen se liɛ keban, è se ki kɛn ntuke keban ɛymok ɛ kenək. 15Jesus me tef ghene ge: Ghɛn yɛ toknen kum feshike ghele kenone Falisee gese nɛ̀ fɛ Helode.

16Ghon-ɛyfɛl nə wene yio dî, è me se kantê ge: Tam fene əb suuy lɛ bek ka ghɛsen báà se ki keban.

17Jesus me keele kenəə kɛ ghene kanten è bif ge: Lu bek ghɛ wɛ ghɛne kanten kum kenəə keban kɛ ghɛne báà se ki? Ke dine ge ghɛne yɛne əbnəə chəysen wiy. Ɛytof ə yɛne bɛɛy ɛytəm-a? 18Ghɛn ki ɛshiɛ, yɛne wiy əblik-a, ki əbtuule, yio wiy əbnəə-a? Ghɛn bo kuume wiy-a? 19Nè lu əbliy wɛ mɛ nè bɛkten ntukse keban setan è yiɛse ghel nkam setan so, ghɛn nè baate əbmbɛkele ten əb lun nkaa se sek? Ghene fise ge:

Əb nè lu nkaase njio-sebaa ɛyvəm.

20Mɛ yiɛse ghel nkam sekɛɛk nɛ̀ ntukse keban saamba, ghɛn baate əbmbɛkele ten əb lun nkaa se sek?

Ghene fise ge: Əb lun nkaase saamba. 21Əb me bif se ghene ge: Ghɛne yɛne əbnəə vin lɛ chəysen wiy-a?

Jesus chuk ɛshiɛ kenfef ɛ Betsaida

22Ghe Jesus nɛy ndu è chin ɛ Betsaida, ghel ɛlee gwiy nɛ̀ kenfefe se Jesus è se lone ge əb ko kum wen. 23Jesus me ghal keghoo ə kenfef ki, ghene wen fəynen ntɛk: Jesus tio ɛyliɛ se wen ə ɛshiɛ, è lɛm keghoo ɛ wen ɛykek è bif ge: Wɛ̀ lɛ yɛne əblik-a?

24Əb kiy ɛyyio, è suuy ge: Mɛ yɛne ghel ge life life, di-a ka lu əmkak ka əm jɛ́len.

25Jesus gese lɛm ɛghoo se wel vi ɛshiɛ, əb kiy əblik ketaan, ɛshiɛ wene yiase, əb se loote yɛne əblik. 26Jesus me suuy se wen ge: Yɛɛ kfəəye, dî nɛ ghàà chèmè lii se ntɛk.

Bita suuy ge Jesus lu vidi wɛ Feyine nè yiosen

(Mat 16.13-20; Luk 9.18-21)

27Jesus ghene ghon-ɛyfɛl nə wene me lòò, è se nduu ɛ ntɛke sɛ keleŋe Saesalea Filibi, əb bif se ghon-ɛyfɛl nə wene ge: Ghele suuye ge mɛ lu ndɛ?

28Ghene fise ge: Ghel ɛlee suuye ge, wɛ̀ lu Joon Nfoo Moo, nɛ ɛlee suuye ge, wɛ̀ lu Elija, nɛ̀ ɛlee suuye ge wɛ̀ lu wele ntum nə Feyine əblee wɛ əbməən. 29Əb me bif ge: Ghɛne suuye kɛne ge mɛ lu ndɛ?

Bita fise ge: Wɛ̀ lu Vi wɛ Feyine nè Yiosen.

30Jesus me chiise se ghene ge: Ghàà wel yî suuy kenəə kɛ kum mɛ nɛ̂ kin se wel.

Jesus suŋnen kum ngɛkse ə wen gese nɛ̀ ɛykuo ə wene

(Mat 16.21-28; Luk 9.22-27)

31Jesus me kɛɛte se yɛ dinte əbnəə se ghon-ɛyfɛl nə wene ge: Wanwel tiy se yɛne ngɛk se ŋaŋ, é chɛɛse ghene ghele mbiye se ghɛ́ ntaŋlee gese nɛ̀ ndintese tesake tunse wen. Ɛ́ yuy wen, é əbchii chia əbtal é əb loole se ɛykuo. 32Əb nè suuy əbnəə ten se ghene ɛ tɛtɛ. Bita me liɛ wen ghene wen bak əbghun, əb me se yole Jesus. 33Jesus benle è kiy ghon-ɛyfɛl nə wen, è wam Bita ge: Loo se mɛ ɛybee, wɛ̀ lu Satan! Ɛykwaate yiɛ lu yɛ́ wele, nɛ wiy yɛ́ Feyine.

34Jesus me jaŋ ngose wel yi, nɛ̀ ghon-ɛyfɛl nə wene è suuy ge: Naa ndɛ wɛ əb kɛŋen se yɛ jumte ɛybam ə yom lu se yɛne ngeŋ ə wen ka kefaa lólò, se bɛɛye kentam ə wen se yɛ jɛl so ɛ mɛ ɛybam. 35Bek ge naa ndɛ wɛ əb kɛŋen se babte ɛychii ə wene náà lɛy ɛyghene, nɛ naa ndɛ wɛ əb lɛyen ɛychii ə wen bek mɛ gese nɛ̀ sakghɛ əbjuŋ lu nɛ əb náà yɛ ki ɛychii. 36Lòó sɛk yɛ lu ghɛ se wel ɛ lefɛ əb kiilen ketuu ntiɛ kejim, è lɛy ɛychii ə wen? 37Kefaa lɛ lu kɛ lòó wel fó se ten ɛychii ə wen so-a? Ke wiy. 38Naa ndɛ wɛ əb ghuumen mɛ gese ghuumen giɛ ə som ɛ mbi fɛn yɛ ghele tunsenmen Feyin, è se nɛɛye əbnəə əbbee ɛ ten lɛ, lu vi di wɛ Wanwele yî ghuumen se wen ɛ əbliy wɛ əb gwiyen ɛ əbghaake nə ba ə wen, nɛ̀ nchiyse-ndaa nə Feyine se lanene.

Currently Selected:

Mak 8: oku

Highlight

Copy