Mak 7

Jesus tiyse ndee ɛylak nə ghele Islael

(Mat 15.1-9)

1Nɛy se lu ɛ kechii kelee, ghele kenone Falisee gese nɛ̀ ghɛ́ ɛydinte tesak ɛlee ghɛ ɛ́ nè lòòn ɛ Jolesalem kaame ɛ Jesus ɛybee, 2è yɛn nɛ ghon-ɛyfɛl nə wen ɛlee yiɛ nɛ̀ ɛghoo se gvən, nɛ ɛ́ báà suu ɛ ndee ɛylak.

3[Ghele Juus, tete-tete ghɛ́ kenone Falisee, sɛɛ jia yiɛ əbfua-əbyíɛ́ne nɛ ɛ́ báà suu ɛghoo ɛ ndee ɛylak, ghɛɛ-ghɛɛ ka ɛbàá ɛbàá ghene nè dinen se ghene;] 4nɛ̀ wel nè lòò əbwɛy è kfəəy, ghàà əb yiɛ kefaa buu ge əb suute əblik ɛ ndee ɛylak, gese lɛme nchil selee se ɛydio ka sɛ se nè dinen ge ɛ́ yɛ suu əbfua ka ɛybom, nɛ̀ ntonse gese nɛ̀ əmnkunme nɛ̀ ɛysiye.

5Ghele kenone Falisee ghii, nɛ̀ ndintese tesak shii me bif se Jesus ge: Lu bek ghɛ wɛ ghon-ɛyfɛl nə wɛ̀ báà se chii ka ɛbàá ɛbàá ə ghɛsene nè chiin, sɛ́y yiɛ nɛ̀ ɛghoo se gvən?

6Jesus fise se ghene ge: Nfekte yɛ Ezaya nè suuy se əbluuy ge ghɛn lu nfefsese, ghɛn ko nɛɛye kenəə kɛ əb nè nyaken ge Feyine suuye ge:

“Ghel ghine kokse mɛ se əbchio

nɛ̀ ghene báà fo ɛytem se mɛ.

7Ɛykokse yɛ ghel ghine fóon se mɛ lɛye se lólò,

bek ge ghene liɛ əbnəə wɛ lɛmen ghel,

dinte se ghele ge lu nchil ə som.”

8Lu ɛyghɛl ka ghɛn maayen nchilse Feyin, è se lɛme nɛ lu sɛ ghele.

9Ghɛn loote ke jii ɛytof yɛ maay nchilse Feyin ɛ ten ka ghɛne yɛ lɛme ndee ɛylak nə ghɛn! 10Moses nè suuy ge: Wel ngvəmle ba ə wen ghene no ə wen, nɛ naa ndɛ suŋnen kebee kum ba ə wen kene no ə wen fene ɛ́ yuy wen yuyen. 11Se lu se ghɛn nɛ ghɛn suuy ge, wel ki kefaa kɛ kè lòó əb giamten ba ə wen so kene no ə wen, è suuy ge lu Kolban (nɛ lu ge shi kɛ Feyine), 12fene əb jia bo yɛ lu se giamtene ba ə wen kene no ə wen. 13Ghɛne dinte əbnəə ə wɛn wɛ tene se ghele dì, nɛɛy nɛ kenəə ə Feyine nduu se kefaa lólò, gese nɛɛy əbnəə əblee ka əbghene naa se ɛydio.

Əbnəə wɛ əb besen wel

(Mat 15.10-20)

14Jesus me gese jaŋ ghel ghi è suuy se ghene ge: Ghɛn yiote kenəə kɛ mɛ suuy se ghɛn ghel ɛjim, è keele. 15Kefaa wiy kɛ ke liin liin ɛ wel ə əblɛɛ kɛ ke besen wel, kefaa kɛ ke besen wel lu kɛ ke fəyen fəyen. 16Wel wɛ əb kiin əbtuule se yio, əb yio.

17Əb nɛy lòò, è vəse ghel ghi è kfəəy se ndaa, ghon-ɛyfɛl nə wene bif se wen ge ngan yin sɛ suŋnen kum ghɛ-a? 18Əb bif se ghene ge: Ɛytof ə yɛne lu sɛy ɛytəm-a? Ghɛne báà se ke ge kefaa kɛ ke liin liin ɛ wel əbghune báà se bese wen-a? 19Ke lu dî bek ge ke lóó ghàà ke lii nɛ lu ɛytem, ke lii nɛ lu əblɛɛ, wel nɛy me kfəl. [Əb nè suuy dì se din ge əbfua-əbyíɛ́ne əbjime jofe.]

20Əb gese suuy ge: Kenəə kɛ ke fəyen fəyen ɛ wel əbghun lu keghene kɛ ke besen wel, 21Ke lu dî bek ge lu wel ə məm, dii ɛ wel ɛytem ghaa wel loo əb yɛ ki tekwaate tebee, me jaŋe kenjaŋ, choŋe əbchoŋ, yuyte ghel, liɛ əbkiy kene ɛlum ə ghel, 22semte əbfua ghel, ki nchiinen ɛybee, lɛɛse ghel, momle kemomle, ghɛke kenghɛk, bese teghel ə ghel, kokse əbghun, gese nɛɛy əbnəə əbyume. 23Əbnəə əbbee nɛ̂ vin əbjim lóo ɛ wel ɛytem me bese wel.

Əbvii əblee fó ɛytem se Jesus

(Mat 15.21-28)

24Jesus nɛy lòò se fo, è ndu ɛ keleŋe Taya ghene Sidon, è bɛ̀ɛ̀ ɛ ndaa ɛylee fo, è jia se koŋe ge wel keele ge lɛɛ ghaa yi luun, dî ghele ko keele. 25Əb ndu dì ɛ leghɛ, əbvii əblee nɛ fewane wen fekiye ki ɛyfim ɛ wen əblɛɛ, yio ge əb lu fo, è gwiy è təm ɛləy ɛ wen ɛyshiɛ. 26Əb təm ɛləy ɛ Jesus ɛyshiɛ dì, è se beŋte wen ge əb jum ɛyfim se wan ə vi əblɛɛ. [Əbvii nɛ̂ vin nè lu wele ketum nɛ ɛ́ nè bii wen ɛ Foenisia ɛylake Silia.] 27Jesus me suuy se wen ge: Kɛ mbiye lu ge ɛ́ yiɛse ghon, bek ge ke báà jof ge ɛ́ liɛ əbfua-əbyíɛ́ne nə ghone è mak se buose.

28Əb soote ge: Báàba, dî nɛ buose loo se yɛ biŋte ɛykfək əbfua wɛ ghone yiɛn nɛ ɛy chemkee ɛyshaa ketatan.

29Jesus me suuy se wen ge: Ghensen suuy wɛ dì fene lòó wɛ̀ yɛ kfəəy, ɛyfime tene fəymen se wan ə viɛ əblɛɛ. 30Əb me kfəəy è yɛn wan nɛ əb nyiŋ ɛ əbkun nɛ ɛyfim yi fəymen se wen əblɛɛ.

Jesus chuk nkuo əbtuule, nɛ lu kechichi

31Jesus nɛy me lòò se keleŋe Taya, è tosen jii Sidon ge yi fiile se kechem keghuye kɛ Galilee, è me chia jii mə Ntɛk-Sɛ-Ɛyvəm. 32Əb chin fo, ghele gwiy nɛ̀ wel əblee se wen nɛ lu kechichi nɛ əb ke wiy se suŋnen, è se beŋte wen wɛ Jesus ge əb ko kum wen. 33Jesus liɛ wel vi, ghene wen fəynen se ghele məm, əb vii ghon ɛghoo se wele ten əbtuule, è tio ɛyliɛ, è kum keleeme ə wele ten so. 34Əb kum dì, è kiy ɛyyio, è shom, è suuy se wele ten ge: Efata, nɛ lu ge, dise əbghune.

35Əbtuule ə wel vi me dise, keleeme wene yayte, əb kɛɛte se yɛ suŋnen kejuŋ. 36Jesus me chiise se ghene ge: Ghɛn yɛ ke se fiɛle kenəə ten se wel ghɛy; əb se chiise naa lɛɛy nɛ ɛ́ sɛ́y mɛyse saŋse nduu so nduun. 37Ghel ɛjim ghɛ ɛ́ nè yion se lu nɛ̀ əbchíò əbyúméné suuye ge: Əbnəə əbjim wɛ əb nɛɛyen lu əbjuŋ, əb nɛɛye naa nɛ ghel ghɛ ɛ́ yion wiy əbnəə yio, nɛ ghɛ ɛ́ suŋnen wiy, suŋnene.

Currently Selected:

Mak 7: oku

Highlight

Copy