Mak 6

Ɛ́ tunse Jesus ɛ Nazalet

(Mat 13.53-58; Luk 4.16-30)

1Jesus me lòò se fo, è ndu se ghene ntɛk, ghene ghon-ɛyfɛl nə wene. 2Nɛy loo lu ɛ kechii ɛybam, əb se dinte əbnəə se ghele ɛ ghene ngay ɛyjem. Ghel se ɛydio ghɛ ɛ́ nè yioten ka əb dinten se lu nɛ̀ əbchíò əbyúméné kante ge: Wel vin liɛ vine wɛ əbnəə ghááy? Əb liɛ ghááy əbfee vine? Yɛn ɛynkii əbnəə əbchio əbyúméné wɛ əb nɛɛyen. 3Əb lɛ wiy kamenda wɛ wán ə Mɛɛle-a? Jɛms nɛ̀ Joses, nɛ̀ Simon gese nɛ̀ Judas lɛ báà se lu ghone-no ə wen-a? Jɛmtese wene lɛ báà se chii ghɛsen nɛ̀ ghene fɛn-a? Ghene ghɛynen dì, è me tunse wen.

4Jesus me suuy se ghene ge: Ɛ́ sɛɛ ngvəmle wele ntum nə Feyine əblik əbjim buu kɛn ɛ ghene ntɛk, nɛ̀ se ghene ɛykfəə gese nɛ̀ se ghene ɛyshaa ndaa.

5Ɛ́ tunse wen dì, əb jia nɛɛy əbnəə əbchio əbyúméné fo, buu kɛn ghel ɛyafkene lɛ ɛ sek ghɛ əb nè lɛmen ɛghoo ɛ ghene əbtuu nɛ ghene bonene. 6Əbghune bɛɛme wen bek ka ghene nè báà fo ɛytem se wen.

Jesus tum ghɛ́ ntum ghɛ njio-sebaa ɛyvəm

(Mat 10.5-15; Luk 9.1-6)

Əb nɛy me lòò, è se jɛle ɛ ntɛke sɛ nseŋ foo dinte əbnəə se ghele. 7Jesus nɛy me tooy ghon-ɛyfɛl ghɛ njio-sebaa ɛyvəm è tum ghene ɛbaa ɛbaa, è fo əbtaawe se ghene ge ghene yɛ jume tefim so. 8Əb loo tume ghene è chiise se ghene ge: Ghɛne loo ndu ɛyjɛl yin, ghàà wel liɛ kefaa ka əbfua-əbyíɛ́ne, ka kebam, gese nɛ̀ əbkaa ɛ wene kebam. Wel lu se liɛ kɛn mbàŋ, 9dî è tuŋte guose ɛvəə, è jia liɛ ndəy selee. 10Əb gese suuy se ghene ge: Ghɛne lii naa ɛ ndaa ɛykɛ, ghɛn yɛ chii kɛn ɛ ten se chin se ka ghɛne nɛ̂y lòò se ntɛk fo. 11Yɛ lu wɛ ge ghele jia fiisen ghɛn naa ghááy, è jia yiote kenəə kɛ ghɛne suuyen, ghɛne loo lòò se ntɛk fo, ghɛn tɛte kebvəl se ghɛn ə ɛvəə ka əbchəyte se din ge kenəə kɛ ghene nɛɛyen báà jof.

12Ghene me lòò, è se fekte nduu nɛ̀ kenəə ə Feyine se ghele ge ghene kubsen tetem ə ghen. 13Ghene se jume tefim se ɛydio se ghele ɛyghun, yiose ghel ɛyafkene se ɛydio nɛ̀ əmngvəlme gese chuke ghene.

Ɛykuo ə Joon Nfoo Moo

(Mat 14.1-12; Luk 9.7-9)

14Ghele yionen è kal nɛ̀ ɛyghel ə Jesuse əblik əbjim, əbfon wɛ Helod yio sɛy. Ghel ɛlee se suuye ge: Wel vin lu kɛn naa Joon Nfoo Moo ka əb kasen loole se ɛykuo, nɛ ghɛy kenəə kɛ ke nɛɛyen ge əb yɛ ki əbtaawe se yɛ nɛɛye əbnəə əbchio əbyúméné lɛ.

15Ghel ɛlee sɛ́y se suuye ge əb lu Elija, nɛ ɛlee suuye ge əb lu wele ntum nə Feyin ka wɛ̂ əmməən əblee.

16Helod yio əbnəə nɛ̂ vin, è suuy ge: Lu Joon wɛ mɛ nè tenen ketuu ə wen ka əb kasen loole se ɛykuo. 17Nè lu dî nɛ Helod nè suuymen ɛ́ koo Joon è vii se nchak bek Helodias wɛ wiy ə Filib wɛ wán-no ə Helod, wɛ Helod nè fəysen è se ki. 18Helod nè fəyse dî Joon se suuye se wen ge: Nchile báà beeme ge wɛ̀ fəyse wiy ə wan-no ə viɛ.

19Kii nɛ̂ kine nɛɛy, Helodias se ki ɛytem ɛybee kum Joon, è se lɛme ge yi yuy wen dî è jia se ki jii. 20Nè lu dì, nɛ Helod ngvəmle Joon, tɛɛke wen, ke ge əb lu wel əbjuŋ, chii ka Feyine kɛŋen. Helod nè lóó yio kenəə kɛ Joon suuyen, ke yɛ foo ngɛk se wen naa se ŋaŋ, dî nɛ əb ko koŋe se yɛ yiote.

21Helodias nɛy me kiile nsan ɛ kechii kɛ Helod nè jaŋen ghel ɛtaa ghɛ ghene ghene nè saken ɛylak, nɛ̀ əbtuu ɛyghoŋe gese nɛ̀ ghel ɛghakene ghɛ́ Galilee ge ɛ́ gwiy è yiɛ kechii kɛ ɛ́ nè biin yi ɛ ten. 22Ɛ́ loo yiɛ, wan ə Helodias əbvii lii è gwiy, è bin kebin, ke jof Helod ghene ghel ɛyghane, əb me suuy se wan vi ge: Bif naa ghɛ kɛ wɛ̀ koŋen é mɛ fó se wɛ̀, 23è me laa kelek ge: Naa ghɛ kɛ wɛ̀ bifen, chèmè lu kengianen ɛylak nə mɛ, é mɛ fó. 24Wan ten me fəy se bɛy, è bif se no ə wen ge: Mɛ bif ghɛ?

Əb fise ge: Bif ketuu ə Joon Nfoo Moo. 25Əb me fiɛlé fiɛlén è lii kɛn se əbliy, è suuy se əbfon ge: Mɛ kɛŋe ge wɛ̀ fó ketuu Joon Nfoo Moo se mɛ ɛyshɛn kɛn ɛ leenen. 26Əbfon jia se saŋle naa se nkan, dî è jia se ki jii se tun bek kelek kɛ əb kè laanmen ɛ ɛyshiɛ nə ghel ɛyghan nə wene. 27Əb me tum wel ɛyghoŋ wɛ əb nè chiyen ntok kɛn se əbliy ge əb ndu è gwiy nɛ̀ ketuu ə Joone. Əb ndu ɛ ndaa nchak è ten ketuu ə Joon, 28è gwiy so ɛyshɛn, è fo se əbfon, əb fó se wan, əb ndu è fo se no ə wen. 29Ghon-ɛyfɛl nə Joon nɛy yio kenəə ten, è gwiy, è liɛ ɛygvəne wen è ndu è gvəəme.

Jesus yiɛse ghel nɛ ɛ́ chia nkam setan

(Mat 14.13-21; Luk 9.10-17; Jn 6.1-14)

30Ghɛ́ ntume nɛy kase fiile, è fiɛl se Jesus əbnəə əbjim wɛ ghene nè nɛɛyen, gese nɛ̀ wɛ ghene nè dinten se ghele. 31Se lu ka ghele nè gwiyen gese lòòn se ɛydio se ɛydio nɛ ghene ki wiy jii se yiɛ, Jesus me suuy se ghene ge: Ghɛsen ndu ɛ kelik kɛ ke luun nyiaŋ è yɛ lu ghɛsen-ghɛsen é ghɛn zəəlé. 32Jesus ghene ghon-ɛyfɛl nə wene me lii kenək kɛn ghene-ghene è ndu ɛ kelik kɛ ke luun nyiaŋ.

33Ghene loo lòò, ghel se ɛydio yɛn, è keele ge lu ghene, ghele me fəy ntɛk sejim, è nyiŋe ndu nɛ̀ kevəə, è chin se ghaa əb nè nduun nɛ ghene geese yɛ gwiy. 34Jesus gwiy è se fəye se kenək è yɛn feliɛ wel, ketuu lum wen bek ge ghene nè lu ka bvəyse-njiɛ sɛ ghàà nchiy. Əb me kɛɛte se yɛ dinte əbnəə se ghene se ɛydio. 35Nɛy se lu nɛ əbtəke se jiɛ, ghon-ɛyfɛl nə wene kokte è gwiy è suuy se wen ge: Əbliye chiamen, nɛ ghɛsen lu fɛn ɛ əbkwak. 36Lame é ghele giabsen è lii è ndu ɛ teghaŋ əbkwak gese nɛ̀ se ntɛke sɛ keleŋ fɛne è yun əbfua-əbyíɛ́ne nə ghen.

37Jesus suuy se ghene ge: Ghɛn fó əbfua-əbyíɛ́ne se ghene se ghɛne ngeŋ.

Ghene me bif ge: Ke dine ge ghɛs ndu è yun keban se denalius ɛyviɛ ɛybaa, è fo, é ghene yiɛ-a?#6.37 Denalius ɛymok nè lu əblaake ɛyfɛle yɛ́ kechii se wel ɛyfɛle wɛ̂ nchɛk. 38Jesus suuy se ghene ge: Ghɛn chia è kiy ge ntukse kebane sɛ lu se sek-a?

Ghene kiy, è gwiy è suuy ge se lu setan nɛ̀ səə sebaa.

39Jesus me lam ghene ghel ɛjim diom ɛ ɛykfəkfə ɛ ngoose ɛ ngoose. 40Ghene me diom ɛ ngoose ɛ ngoose, nɛ ngoo selee lu ghel əbviɛ nɛ selee lu ghel əmmtan. 41Əb me liɛ ntukse keban sɛ setan shi nɛ̀ səə sɛ sebaa shi è kiy ɛyyio, è bɛ̀ɛ̀lè Feyin, è bɛkte keban ki, è fo se ghon-ɛyfɛl nə wene ge ɛ́ giate se ghele. Əb ko gese fo səə shi, ɛ́ giate se wel əbjim. 42Wel əbjim yiɛ è kul. 43É baate ɛykfəke keban nɛ̀ yɛ səəse, ɛy lun nkaase njio-sebaa ɛyvəm. 44Se ghel ghɛ ɛ́ nè yiɛn keban nɛ̂ ki lu nɛ ɛluumene lu nkam setan.

Jesus jɛl ɛ ketuu moo

(Mat 14.22-33; Jn 6.15-21)

45Kɛn se əbliy Jesus suuy se ghon-ɛyfɛl nə wene ge: Ghɛn lii se kenək è diaŋ ɛ njine Betsaida se mbiy. Əb me yese lam ngose wel yi giabsen. 46Əb chakte ghene è me kok ɛ kfən se jem. 47Kebɛye se fine nɛ ghene bo bɛɛy nɛ̀ kenəke ɛ fetetene jio, nɛ Jesus lu ɛ kfən wen nyiŋ. 48Əb yɛn ka ghene luŋen, nɛ jii wiy bek əbfiɛf wɛ əb nè chian gwiyen jii ghaa ghene nè nduun. Əbtəke nɛy se tenen gwiye, Jesus se jɛle gwiye ɛ ketuu moo se baksene ghon-ɛyfɛl nə wen è se kiye se tosene ghene tosen. 49Ghene yɛn ka əb jɛ́len gwiyen ɛ ketuu moo è se kwaate ge lu nkfəsay, è se toŋe, 50bek ge ghene nè yɛn wen è se fane naa se ŋaŋ.

Əb suuy se ghene kɛn se əbliy ge: Ghɛn kul ɛyteme, lu mɛ Jesus, ghàà ghɛn yɛ fan. 51Əb suuy dì è lii se kenək, əbfiɛf vi me buu, ghene se loote lu nɛ̀ əbchíò əbyúméné, 52bek ge ghene nè báà keele kenəə kɛ kum ntukse keban, bek ka tekwaate ə ghene nè luun tetəm.

Jesus chuk ghel ɛ Gennesalet

(Mat 14.34-36)

53Ghene diaŋ se njine vii è me fəy ɛ Gennesalet, è chəŋ kenək. 54Se lu ka ghene nè fəyen gwiyen se kenək ɛ leghɛ, ghele me keele Jesus, 55è nyiŋnen è kal ntaam ten ɛyjim, è se buŋe ghel ɛyafkene ɛjim nduu so se naa ghááy ghaa ɛ́ nè yion ge əb lu. 56Əb nè loo ndu naa ghááy, kene ɛ ntɛk ɛylayten, kene ɛyghaken, kene ɛyghaŋ əbkwak, ghele ko yɛ gwiy nɛ̀ ghel ɛyafkene nyiŋse əblik əbwɛy, è me yɛ beŋte Jesus ge əb ko vəse ɛ́ ghene kum ɛyghaŋe ndəyse nə wen. Naa ndɛ se kume, me bonene.

Currently Selected:

Mak 6: oku

Highlight

Copy