Mak 13

Jesus suŋnen kum ɛysakte ndaa-ɛykokse

(Mat 24.1-2; Luk 21.5-6)

1Jesus nɛy loo fəy se ndaa-ɛykokse wan-ɛyfɛl nə wen əblee suuy se wen ge: Ndinte, yɛn ɛytiy əbchio əbyúméné, nɛ̀ ndaa əbchio əbyúméné yin-a! 2Jesus bif ge: Wɛ̀ lɛ yɛne kenmbom əbchio əbyúméné kin-a? Əbliy gwiye wɛ ɛ́ nɛ̂y sakte ndaa yin, é ɛytiy ɛylee jia yɛ nyiŋ ɛ ɛylee ketuu.

Jesus suŋnen kum ngɛk sɛ se luun se gwiy

(Mat 24.3-14; Luk 21.7-19)

3Jesus nɛy kok, è diom ɛ kfən koo Olif ɛ nkeknen ndaa-ɛykokse, Bita, nɛ̀ Jɛms, nɛ̀ Joon gese nɛ̀ Andole me nyiake è bif se wen ge: 4Suuy se ghɛs əbliy wɛ əbnəə wɛ wɛ̀ suuyen yî gan ɛ ten, gese nɛ̀ əbchəyte wɛ əb yî din əbliye ten.

5Jesus me suuy se ghene ge: Ghɛn yɛ toknen fɛ wel náà lɛɛse ghɛn. 6Ghele náà fəy se ɛydio, è yɛ tɛke mɛ ɛykek suuye ge ghene lu wel wɛ Feyine nè yiosen, è gese lɛɛse ghel se ɛydio. 7Ghɛne náà yio ge ɛ́ təme ɛyghoŋ fɛɛy, è gese yio ge ɛ́ baate ɛyghoŋ, ghàà ghɛn yɛ fan, bek ge əbnəə nɛ̂ vin tiy se nɛy se gan, dî nɛ əb báà se dine ge mbi shi se mɛy. 8Ɛylak ɛlee náà yɛ noo ɛylee, nɛ əbfon ghene ghele ə wene təme ɛyghoŋ ghene ghe əbfon əblee ghene ghel ə wene. Ntiɛ naa yɛ shiken ketaan ketaan əblik se ɛydio, nɛ jeŋ koo. Əbnəə nɛ̂ vin lu kɛn kenkɛɛte ngɛkse, kɛn ka wán ɛ əbliy wɛ əb momen əbvii.

9Ghɛn toknen bek ge, ɛ́ nɛ̂y koo ghɛn è ndu so se ndaa nsak è gese liɛ ghɛn è ndu so se ngayse ɛyjem è tɛl. Ghɛne nɛ̂y teem ɛ ɛyshiɛ nə ghɛ ɛ́ saken gese nɛ̀ tefone bek mɛ è fekte sakghɛ əbjuŋ se ghene. 10Ɛ́ tiy se naa se fekte sakghɛ əbjuŋ vin əbtum əbjim nɛ mbi geese mɛy. 11Ɛ́ náà koo ghɛn è ndu so se ndaa nsak, è loo sak, ghàà wel yɛ tablene feknen ge yi sɛ suuy ge ghɛ-a? Nɛ̂y loo lu əbliy fo, wel suuy kenəə kɛ ke gwiyen ɛ wen əbchio bek ge ɛ́ jia nɛ̂y yɛ suŋnen wen, ɛ́ nɛ̂y yɛ suŋnen Keyioy Kelanene. 12Ɛ́ yî loo lu əbliy fo, é wel yɛ kal əmnaŋ kum wán-nyii ge ɛ́ yúy, nɛ ɛbaye kale əmnaŋ ge ɛ́ yúy ghon ə ghen, nɛ ghone bo fəye wiy fo ghene ɛbaa ə ghene nɛ̀ ɛnoo ghene, dî kale əmnaŋ ge ɛ́ yúy ghene. 13Ghel ɛjime náà yɛ bane ghɛn bek ge ghɛn lu ghele ngoo nə mɛ dî nɛ naa ndɛ wɛ əb yî taŋen è chin se kenləysen, náà kiile ɛyboy.

Jesus suŋnen kum əbchəyte ngɛk ɛytaa

(Mat 24.15-28; Luk 21.20-24)

14Ghɛne náà yɛn nkfəm ɛybee ɛybee nɛ ɛy tiye ɛ kelik kɛ ɛy ke báà se lu se yɛ tiy fo, [wel wɛ əb jaŋen me keele], [é ghel ghɛ ɛ́ luun ɛ Judea me sam se fo è kok se kfənse.] 15Wele yɛ lu ɛ ketuu ndaa, è loo səəke, fɛ əb lii se ndaa ge yi liɛ kefaa. 16Wele yɛ lu əbkwak ghàà əb kfəəy ge yi liɛ ndəyse kenton nə yi. 17Ke yi yɛ bef se əbkiy ghɛ ɛ́ luun nɛ̀ əmlɛɛme gese se əbkiy ghɛ ɛ́ kiin ghon ɛbole ɛ keleŋ əbliy fo. 18Ghɛn jem se Feyine ge əb bukse əbnəə vin fɛ əb yî gan nɛ̀ bèŋ. 19Ghele naa yɛn ngɛk ɛ əmchii nɛ̂ fo yɛ wel nè bɛɛy ghàà yɛn se kɛ̀ɛ̀tè se ka Feyine nè bomen mbi se kok se chin se leenen. Nɛ kenəə ka kii nɛ̂ kine jia bo yî gan. 20Kè buu ka Báàba Feyin nè nɛɛymen əbliye təmse fene wele jia yî boy. Dî nɛ Feyine nè təmse əbliy nɛ̂ vin bek ghel ə wen ghɛ əb nè chokenmen. 21Wel naa suuy se ghɛn ge: Yɛn-a, Vi wɛ Feyine nè Yiosen vine! Kene ge: Əb vii dii! Ghàà wel beeme. 22Ghel ɛlee náà fəy è yɛ lɛɛse ghel ge ghene lu Vi wɛ Feyine nè Yiosen, nɛ ɛlee yia ge ghene lu ghele ntum nə Feyine. Ghene náà fek mbɛm è nɛɛy əbnəə əbchio əbyúméné, nɛɛy di ge jii sɛ yɛ lu yɛ nɛɛy ge ghele jas jii, tete-tete ghɛ Feyine nè chokenmen. 23Ghɛn yɛ toknen bek ge mɛ suuymen əbnəə nɛ̂ vin se ghɛn nɛ əbliye bɛɛy ghàà kwɛn.

Ɛygwiye Wanwel

(Mat 24.29-31; Luk 21.25-28)

24Ɛ́ náà loo lu əbliy fo nɛ ngɛk ɛytaa yi mɛymen, é chuy yɛ fin finen, é njoŋ jia bo yɛ ban. 25Əmnjesme yî yɛ lòò ɛyyio chemkee, é əbfua wɛ əb luun ɛ ɛyyio yɛ jiŋ jiŋen. 26Ɛ́ me yɛn nɛ Wanwel gwiye ɛ məme mbàkse nɛ̀ əbtaawe gese nɛ̀ əbghaakee. 27Əb náà loo gwiy dì è tinse nchiyse-ndaa nə Feyine se tebuulese mbi tɛ tekɛɛk, é ghene baate ghel ghɛ ɛ́ nè chokenmen əblik əbjim.

Ngan yɛ kum fekake fig

(Mat 24.32-36; Luk 21.29-33)

28Ghɛn liɛ əbchəyte se fekake fige. Ghɛne yɛne nɛ fe se tookee, ghɛn mɛ keele ge ɛyghuu shi se guo. 29Lu ghɛɛ-ghɛɛ ka ghɛne náà yɛn nɛ əbnəə vine se gane è me keele ge Wanwel shi kɛn ɛ nchiɛ ɛ nchiɛ. 30Mɛ suuye əbluuy se ghɛn ge ghele ghɛ́ ntem fɛne jia yî kuoke ɛjim nɛ əbnəə vin əbjime báà gan. 31Ɛyyio ghene ntiɛ náà mɛy, dî nɛ giɛ ə some jia yî shiken.

Ghɛn yɛ lu kebaaten

(Mat 24.36-44)

32Wele báà se ke kechii, kene əbliy wɛ əbnəə vine yî gan ɛ ten. Chèmè lu nchiyse-ndaa nə Feyine ɛyyio, kene Wan ə Feyin, fene ghene báà se ke. Ko ke kɛn Bay Feyin. 33Ghɛn toknen, è yɛ lu kebaaten [jeme] bek ge wele báà se ke əbliy wɛ ke yî gan ɛ ten. 34Ke yî gan ka wel ɛ əbliy wɛ əb nduun ɛyjɛl, è lɛm ghel ɛyfɛl nə wen ge ɛ́ yɛ toknen nɛ̀ ndaa, è giate ɛyfɛl se ghene, wel nɛ̀ yɛ́ wene, wel nɛ̀ yɛ́ wene, è chiase ɛysak se wel wɛ əb chiyen əbchio-ndaa ge əb yɛ loote chiy. 35Ke me se lu ge ghɛn yɛ chiy kejuŋ bek ge ghɛne báà se ke əbliy wɛ ba-ndaa yî fiile ɛ ten. Lòó ɛ nɛ̂y yɛ lu kɛn ɛ likfəəy, kene nɛ̀ ɛyteme ntəke, kene ɛ lumngvəə wɛ̂ mbiy, kene ɛ kentoo chuy. 36Ke gan ge əb sasen è gwiy, ghɛn yɛ ke fɛ əb báksén ghɛn nɛ ɛ́ buunee. 37Kenəə kɛ mɛ suuyen se ghɛn lu nɛ mɛ suuy se wel əbjim ge: Ghɛn yɛ toknen.

Currently Selected:

Mak 13: oku

Highlight

Copy