Mat 22

Ngan yɛ kum ɛyyiɛ əbjen

(Luk 14.15-24)

1Jesus gese se suŋnen se ghele ɛ nganse ge: 2Ɛysak ə Feyine lu ka əbjen wɛ əbfon əblee nè baaten se wan ə wen. 3Əbliye nɛy kwɛn, əb tum ghel ɛyfɛl nə wen se ghel ghɛ əb nè been ge ghene gwiy, ghene sɛy tɛn se gwiy. 4Əb me gese tum ghel ɛyfɛl nə wen ɛlee suuye ge: Ghɛn suuy se ghel ghɛ mɛ nè been ge: Mɛ baatemen əbnəə əbjim. Mɛ gwɛlmen ɛlume nyam gese nɛ̀ tekuŋe nyame, kefaa kejime shi kebaaten ka ɛ́ me kɛɛ è yɛ yiɛ. Ghɛn gwiy se əbjen. 5Dî ghene yio fuy è se nɛɛye əbnəə ə ghen. Wel əblee shik nɛ lu ɛylem ə wen, əblee ndu ɛ wen ə ndaa əbwɛy, 6ɛlee faŋ ghel ɛyfɛl ghi, è tɛl è yuyte. 7Ke yaf əbfon vi, əb tinse ghel ɛyghoŋ nə wen, ghene ndu è yuyte sɛy ghel ghi, è nyok ntɛke ghen. 8Əb nɛy me suuy se ghel ɛyfɛl nə wene ge: Əbjene kwɛnmen ɛyyiɛ dî nɛ ghel ghɛ mɛ nè been báà se lu kekwɛnten se gwiy. 9Ghɛn fəy yi è ndu se əmnkonen, è suuy se naa ndɛ wɛ ghɛne yɛn fo ge əb gwiy. 10Ghel ɛyfɛl ghi me ndu se əmnkonen, è liɛ wel əbjim wɛ ghene nè yɛnen, kene lu wel əbjuŋ kene əbbee, è gwiy so se bene əbjen, ndaa əbjen lun.

11Əbfon vi nɛy lii se chakte ghɛ́ əbjene, è yɛn wel əblee fo nɛ əb báà mak ndəyse əbjen. 12È bif se wen ge: Sun ə yom, wɛ̀ ghan lɛɛy se yɛ lu ɛ məm fɛn nɛ wɛ̀ báà mak ndəyse əbjen? Əb jia se ki kenəə se suuy. 13Əbfon me suuy se ghel ɛyfɛl nə wene ge: Ghɛn kul ɛghoo ə wen nɛ̀ ɛvəə ə wene, è mak se bɛy ɛ nfiine bene fɛ əb yɛ toŋ gese kfəle ɛsoŋ. 14Jesus se ləysene suuy ge: Feyine jaŋe ghel se ɛydio, dî choke se ɛylaay.

Jesus fise ɛybif yɛ kum ɛylake shile

(Mak 12.13-17; Luk 20.20-26)

15Ghele kenone Falisee me lòò è ndu è se taŋe ka ɛ́ nɛ̂y gof Jesus nɛ̀ tebife. 16Ghene nɛy me tinse ghon-ɛyfɛl nə ghene ɛlee gese nɛ̀ ghɛ́ kenon nə Helode se Jesus, ɛ́ suuy se wen ge: Ndinte, ghɛs ke ge wɛ̀ suuye əbluuy. Wɛ̀ fekte kenəə kɛ Feyine kɛŋen ge ghele yɛ nɛɛy, kiye wiy ge ghele sɛ kwaate gee ghɛ-a. Ke lu dî bek ka wɛ̀ báà se kiye ge fekɛɛy ə wele sɛ lu lɛɛy-a. 17Ghɛse kɛŋe se keele se wɛ̀ ge, ɛysak ə yɛ́sene sɛ bééme ge ɛ́ yɛ lake shile se əbfone Lûm moo ɛngaŋ-a? 18Jesus keele ge lu gof è me suuy ge: Nfefsese, lu bek ghɛ wɛ ghɛne momen se gofe mɛ? 19Ghɛn din ɛyshiɛ əbkaa san wɛ ɛ́ laken shile so.

Ghene gwiy so se wen. 20Əb bif se ghene ge: Lu ketuu ndɛ gese nɛ̀ ɛyghel ə ndɛ lɛ̂?

21Ghene fise ge: Lu kɛ́ əbfone.

Əb me suuy se ghene ge: Ghɛn fó yi kɛ́ əbfone se əbfon, è fo kɛ́ Feyine se Feyine.

22Ghene yio kii nɛ̂ kine, è se lu nɛ̀ əbchíò əbyúméné, è me lòò se ghaa əb nè luun.

Jesus fise ɛybif kum ɛyloole se ɛykuo

(Mak 12.18-27; Luk 20.27-40)

23Kɛn ɛ kechii fo ghele kenone Saddusee ɛlee gwiy se Jesus, nɛ lu ghel ghɛ ɛ́ suuyen ge ghele jia yî loole se ɛykuo, è bif se wen ge: 24Ndinte, Moses nè suuy ge: Wel kuo nɛ əb báà se ki wan, fene wan-no ə wen tiy se lɛme wiy-nkfə nɛ ghene wen yɛ bii ghon ge ghɛ́ wel əbkuone. 25Yɛn-a, ghone-nyii ɛlee nè lô se chii ghɛse ghene fɛn saamba. Wɛ ngɛsewel naa kiile əbvii, è kal è kuo, ki wiy ghon, wiy ə wen me se lu ghene wan-no ə wen. 26Wan-no wen kuo, ɛybame wene kuo, tebame wene kuo tejim. 27Se kenləysen, əbvii vi kuo. 28Ɛ́ náà loo lu ɛ kechii kɛ ghele kase loolen se ɛykuo, é əb yɛ lu wiy ə ndɛ nɛ ghene ghel ɛjim saamba nè liɛmen wen?

29Jesus fise ghene ge: Ghɛne kwaate nɛ ɛybame bek ka ghɛne báà se ke kenəə kɛ ke luun ɛ ŋwaale-Feyin, gese ke wiy əbtaawe Feyin. 30Ɛ́ náà loo lu əbliy wɛ ghele loolen se ɛykuo, é ghene yɛ lu ka nchiyse-ndaa nə Feyine ɛyyio, è jia yɛ ki əbkiy kene ɛlum. 31Jesus gese bif se ghene ge: Ke dine ge ghɛne bɛɛy ghàà jaŋ kenəə kɛ Feyine suuyen se ghɛn kum ɛyloole se ɛykuo-a? 32Feyine nè suuy ge: “Mɛ lu Feyin Fɛ Ablaham nɛ̀ Ayzek gese nɛ̀ Jakobe koksen. Feyine báà se lu Feyin ə ghel ɛkuone, Əb dì lu Feyin ə ghel ɛchiinee.” 33Ngose wel yio kii nɛ̂ kine, è se lu nɛ̀ əbchíò əbyúméné kum əbnəə wɛ əb nè dinten.

Nchil yɛ ɛy chian nchil sejim

(Mak 12.28-34; Luk 10.25-28)

34Ghele kenone Falisee yio ge Jesus chitemen əbchio ghele kenone Saddusee, è me konen è gwiy se Jesus. 35Wel əblee ɛ ghene ngoo nɛ lu ndinte tesak, me gof Jesus nɛ̀ ɛybif yine ge: 36Ndinte, nchil yɛ ɛy chian nchil sejim ɛ məm ɛysak lu ɛy kɛ?

37Jesus fise ge: Wɛ̀ lu se yɛ koŋe Báàba Feyin nə wɛ̀ nɛ̀ ɛytem ə yiɛ ɛyjime, nɛ̀ keyioy ə kiɛ kejime gese nɛ̀ ɛytof ə yiɛ ɛyjime. 38Yin lu nchile yɛ mbiy, nɛ gese lu nchil yɛ ɛy chian nchil sejim. 39Nchil yɛ ɛy kumten ɛyghen lu kɛn ka ɛyghen ge: Wɛ̀ lu se yɛ koŋe wel wɛ əb báksen se wɛ̀ kɛn ka wɛ̀ koŋen ngeŋ ə yiɛ. 40Ɛysake Moses ɛyjim, nɛ̀ əbnəə wɛ ghele ntum nə Feyine nè ndinten se ghele yɛkte nɛ lu ɛ nchilse fɛn sebaa.

Jesus bif kenəə, ke ghak ghel

(Mak 12.35-37; Luk 20.41-44)

41Nɛy se lu ka ghele kenone Falisee konen, Jesus bif se ghene ge: 42Ghɛne kwaate gee ghɛ kum Vi wɛ Feyine nè Yiosen? Əb lu wán ə ndɛ?

Ghene fise ge: Əb lu wán ə David. 43Əb bif se ghene ge: Ke ghan lɛɛy nɛ Keyioy Kelanene nɛɛy é David yɛ toŋte wen ge Báàba, suuy ge:

44“Báàba Feyin nè suuy se Báàba ə wom ge:

Diom se mɛ ɛybee əbkoy əbtaa

se chin se ka mɛ nɛ̂y lɛm mbanen ə shiɛ é wɛ̀ tom ɛvəə ɛ ghene əbtuu.”

45David nè toŋte wen ge Báàba, ke ghan lɛɛy ge Vi wɛ Feyine nè Yiosen yɛ lu wán ə David? 46Wel jia se ki kenəə se suuy; kɛɛte se kechii fo wel jia gese mom ge yi bif ɛybif se Jesus.

Currently Selected:

Mat 22: oku

Highlight

Copy