Luk 6

Jesus tiyse Kenəə kum Kechii Ɛybam

(Mat 12.1-8; Mak 2.23-28)

1Nè lu ɛ kechii ɛybam kelee ghe Jesus se chia ɛylem ɛsaŋ, ghon-ɛyfɛl nə wene me kote əbtuu ɛsaŋ əblee è se fikse kfəle. 2Ghele kenone Falisee ɛlee bif ge: Lu bek ghɛ wɛ ghɛne nɛɛyen kenəə kɛ ɛysake báà beeme ge ɛ́ nɛɛy ɛ kechii ɛybam?

3Jesus fise ge: Ghɛn nè bɛɛy ghàà jaŋ kenəə kɛ David nè nɛɛyen ɛ əbliy wɛ jeŋ nè yafen ghene ngoo ə wen-a? 4David nè lii ɛ ndaa Feyin è liɛ keban nɛ ɛ́ chiysemen Feyin so, nɛ ɛysake báà beeme ge wel yiɛ buu kɛn ghɛ́ ntaŋlee, è yiɛ, è gese fo ngoo ə wen so.

5Jesus me suuy se ghene ge: Wanwel lu Báàba kechii ɛybam.

Jesus chuk wel ɛ Kechii Ɛybam

(Mat 12.9-14; Mak 3.1-6)

6Nɛy gese se lu ɛ kechii ɛybam kelee Jesus ndu ɛ ngay ɛyjem, è se dinte əbnəə se ghele. Nè lu dî nɛ wel əblee lu fo nɛ keghoo ə wene kɛ́ əbkoy əbtaa kuomen. 7Ghel ghɛ ɛ́ nè dinten tesak ə Moses gese nɛ̀ ghele kenone Falisee me tam ɛshiɛ è se kiye ge sɛ lòó əb chuk ɛ kechii ɛybam-a, ka ghene kooy kenəə kɛ lòó ɛ́ toy wen so. 8Jesus nè ke ɛykwaate ghen, è me suuy se wel wɛ keghoo ə wene nè luun kekuon vi ge: Loole, è gwiy è teem fɛn. Əb me loole è ndu è teem fo. 9Jesus me suuy se ghene ge: Mɛ bife se ghɛn ge, kɛ ɛysake kɛŋen ge ɛ́ nɛɛy ɛ kechii ɛybam lu njuŋ moo lu mbee-a, se boyse moo se bese-a? 10Əb suuy dì, è kiy è kal nɛ̀ ghene ghel ɛjim, è me suuy se wel vi ge: Nase keghoo ə kiɛ. Əb nase nɛ ke bonenmen.

11Kii nɛ̂ kine nɛɛy ghene yio ɛyyaf naa se ŋaŋ, è me se chio ntaŋ kum kenəə kɛ lòó ɛ́ mom se Jesus.

Jesus chokte ghɛ́ ntum nə wene

12Ko se lu əmchii fo Jesus lòò è kok ɛ kfən se jem, è chii se jem ntək əbful se Feyine. 13Əbtəke yio, əb jaŋte ghon-ɛyfɛl nə wen è me chokte ɛlee ɛ ghene məm njio-sebaa ɛyvəm è chio ɛyghel se ghene əbghun ge ghɛ́ ntume. 14Ghel ghɛ əb nè chokten lu ghine ge: Simon wɛ əb nè chion ɛyghel se əbghun gho ge Bita, nɛ̀ wan-no wen wɛ Andole, gese nɛ̀ Jɛms nɛ̀ Joon nɛ̀ Filib nɛ̀ Baltolomew, 15nɛ̀ Matio nɛ̀ Ntomas nɛ̀ Jɛms wɛ wán Alfaeus, nɛ̀ Simon wɛ əb nè luŋen nɛ̀ ketume, 16nɛ̀ Judas wɛ wán Jɛms, gese nɛ̀ Judas Iskaliot wɛ əb nè kalen è feene Jesus.

Feliɛ wele jumte ɛybame Jesus

(Mat 4.23-25)

17Jesus ghene ghel ghii chio se kfən è chin ɛ kelike mbok. Kenone ghon-ɛyfɛl nə wene nè lu fo, gese nɛ̀ feliɛ wele nɛ ɛ́ lòò tebuulese Judea tejim, nɛ̀ se Jolesalem gese nɛ̀ se ntɛk sɛ Taya nɛ̀ Sidon sɛ se luun ɛ əbghune jio ɛyghuy. 18Ghene nè gwiy se yiote əbnəə wɛ əb nè suuyen gese nɛ̀ ge əb chuk ghene. Əb gese chuk sɛ̂y ghel ghɛ əbyioy ɛyfime nè fóon ngɛk se ghene. 19Wel əbjim se luŋe kume wen bek ka əbtaawe nè fəyen ɛ wen əbghun chuke ghene ghel ɛjim.

Njuŋ ɛyghaken gese nɛ̀ ngɛkse

(Mat 5.1-12)

20Jesus fiɛk ɛshiɛ è kiy ghon-ɛyfɛl nə wen è suuy se ghene ge:

Ke lu kejuŋ se ghɛn ghɛ ɛ́ tanen,

bek ge Feyine náà yɛ lu əbfon ə wɛn.

21Ke lu kejuŋ se ghɛn ghɛ ɛ́ yafen jeŋ ɛ leenen,

bek ge ghɛne nɛ̂y yiɛ è kul.

Ke lu kejuŋ se ghɛn ghɛ ɛ́ toŋen ɛ leenen,

bek ge ghɛne nɛ̂y chɛk.

22Ke lu kejuŋ se ghɛn ɛ lefɛ ghele banen ghɛn, jumjum ghen, gese tɛyle ghen, toŋte ghɛn ɛ ɛyghel ɛybee bek Wanwel. 23Ghɛn yɛ saŋle gese nəmle naa leghɛ wɛ ke ganen, bek ge əbmakte ə wen əbghakene lu ɛyyio. Lu ɛyghɛl ka ɛbaa ɛbaa ghene nè nɛɛyen se ghele ntum nə Feyine.

24Dî nɛ lòn lu se ghɛn ghɛ ghel ɛghakene,

bek ge ghɛn yiomen əbjuŋ ə wɛn ɛ leenen.

25Lòn lu se ghɛn ghɛ ɛ́ yiɛn kulen ɛ leenen,

bek ge ghɛne nɛ̂y yɛ lu se jeŋ.

Lòn lu se ghɛn ghɛ ɛ́ chɛken ɛ leenen,

bek ge ghɛne nɛ̂y yɛ soo əbtuu gese toŋnene.

26Lòn lu se ghɛn ghɛ ghel ɛjime suŋnen kejuŋ kum ghɛn, bek ge lu ɛyghɛl ka ɛbaa ɛbaa ghene nè nɛɛyen se ghel ghɛ ɛ́ nè lɛɛsen ghene ge ɛ́ lu ghele ntum nə Feyine.

Koŋe Mbanen ə shiɛ

(Mat 5.38-48; 7.12)

27Mɛ me se suuy se ghɛn ghɛ ɛ́ yion mɛ ge: Ghɛn yɛ koŋe ghele əbbaanese nə ghɛn. Nɛɛye njuŋ se ghel ghɛ ɛ́ banen ghɛn; 28jeme ge Feyine bose ghii dii ghɛ ɛ́ tenen kak se ghɛn, gese jeme se ghii dii ghɛ ɛ́ nyablen nɛ̀ ghɛn. 29Loo lu wele tɛl wɛ̀ ɛ kegiɛk, wɛ̀ bense kelee é əb mɛyse tɛl. Wele chok ndəyse kenton nə wɛ̀, wɛ̀ vəse sɛ məme əb mɛyse è chok. 30Lon naa ndɛ kefaa se wɛ̀, wɛ̀ fo, wele cheme liɛ naa ghɛ ə viɛ ghàà wɛ̀ kase bif. 31Ghɛn yɛ nɛɛye kenəə se ghele nɛ lu kɛ ghɛne koŋen ge ghene yɛ nɛɛy se ghɛn.

32Ghɛn lɛ koŋe kɛn ghel ghɛ ɛ́ koŋen ghɛn, ɛ́ yɛ bente ghɛn se ghɛ? Chèmè lu ghele mbeese fene ghene ko koŋe ghel ghɛ ɛ́ koŋen ghene. 33Ghɛn lòò è yɛ nɛɛye njuŋ kɛn se ghel ghɛ ɛ́ nɛɛyen njuŋ se ghɛn, ɛ́ yɛ bente ghɛn se ghɛ? Chèmè lu ghele mbee fene ghene ko nɛɛy sɛy dì. 34Nɛ loo lu ghɛne yɛ foose kɛn se ghii dii ghɛ ghɛne kwaaten ge ɛ́ nɛ̂y kase seese, ɛ́ yɛ bente ghɛn se ghɛ? Chèmè lu ghele mbee fene ghene ko foose se ghele mbee ɛlee, kɛŋe ge ghene nɛ̂y kase seese ɛyghɛl. 35Kɛ́ titiye lu ge: Ghɛn yɛ koŋe ghele əbbaanese nə ghɛn, nɛɛy njuŋ se ghene, foose se ghene kiye wiy kefaa ɛybam, é əbmakte əbghakene nɛ̂y yɛ lu wɛne, é ghɛn gese yɛ lu ghon ə Feyin wɛ əb ngaŋten bek ge, əb nɛɛy njuŋ se ghii dii ghɛ ɛ́ kiin nchiinen setaa gese ŋwɛye. 36Ghɛn yɛ ki ɛykoosen ɛysen se ghele kɛn ka ba ə wen kiin.

Ghàà yɛ sake ghel

(Mat 7.1-5)

37Ghàà ghɛn yɛ sake ghel, é Feyine jia náà sak ghɛn. Ghàà ghɛn yɛ ghame ghel, é Feyine jia náà gham ghɛn. Ghɛn yɛ lɛyse əbjas ə ghel é Feyine náà lɛyse wɛn wee. 38Ghɛn yɛ foo se ghele é Feyine náà fo sɛ̂y se ghɛn. Əb loo fo se ghɛn é əb fek kejuŋ è siyse, è yikte ke lun è yɛ səyte, əb kase se ghɛn ə əbbuam. Əbfek wɛ wɛ̀ feken kefaa so se geese fo se wel lu əbghene wɛ Feyine náà fek kiɛ so è fise.

39Jesus me maa ngan yin se ghene ge: Lɛ lòó kenfefe din jii se kenfef kelee-a? Əb lɛ mom di é ghene jia fɛyke se ɛybee ghel ɛjim-a? 40Wan-ɛyfɛl lòó əb jia chia ba-ɛyfɛl nə wen, dî nɛ naa ndɛ wɛ əb lootemen yiɛke, se shi kɛn ka ba-ɛyfɛl nə wen.

41Lu bek ghɛ wɛ wɛ̀ kiyen ɛykfəke fekak yɛ ɛy luun ɛ wan-no ə viɛ ɛyshiɛ, dî yɛne wiy kefuŋ kɛ ke luun ɛ yíɛ́? 42Lòó wɛ̀ suuy lɛɛy se wan-no ə viɛ ge: Wan-no ə wom, mɛ fəyse ɛykfəke fekak se wɛ̀ ɛyshiɛ, cheme yɛne wiy kefuŋ kɛ ke luun ɛ yiɛ. Wel əbbuam, chia mbiy è fəyse kefuŋe fekak kɛ ke luun ɛ wɛ̀ ɛyshiɛ é wɛ̀ me loote yɛn ɛykfəke fekak yɛ ɛy luun ɛ wan-no viɛ ɛyshiɛ, è fəyse.

Fekak ghene Əmtame ten

(Mat 7.16-20; 12.33-35)

43Lòó fekak fejuŋe jia koóm əmtam əmbee, ghɛɛ-ghɛɛ ka fekak febee loo fe jia koóm əmtam əmjuŋ. 44Ɛ́ keele fekak se ɛynkii əmtam mɛ fe koom. Lòó ɛ́ jia koy ɛybiy ɛ fekake əbjuŋ, nɛ lòó ɛ́ jia koy fenyak əbteŋe nduy. 45Wele loo lu Wel əbjuŋ ɛytem ə wene lun nɛ̀ əbnəə əbjuŋe, əb yɛ suuy əbnəə əbjuŋe, loo lu wel əbbee, ɛytem ə wene lun nɛ̀ mbee, əb yɛ suuye əbnəə əbbee, kenəə kɛ ke fəyen ɛ wel əbchio lu kɛ ke lunen ɛ wen ɛytem.

Wele kebakle əbfeesen ghene əbjiŋten

(Mat 7.24-27)

46Jesus gese bif ge: Lu bek ghɛ wɛ ghɛne toŋten mɛ ge: Báàba, Báàba; dî nɛɛy wiy kenəə kɛ mɛ suuyen se ghɛn? 47Naa ndɛ wɛ əb gwiyen se mɛ, è yio giɛ som, è yɛ nɛɛy ka mɛ suuyen lu nɛ mɛ din se ghɛn jii yɛ əb luun ɛ ten: 48Əb lu ka wel wɛ əb nè loo bàklè ndaa, è tim ketiɛ ten è chin ɛyghok. Ɛyghuu nɛy gwiy, jio luun è fəy è shikse ndaa ten, ɛy jia fɛy bek ka ɛ́ nè looten bàklè. 49Dî nɛ wel wɛ əb yion, nɛɛyen wiy lu ka wel wɛ əb nè baklen ndaa ə wen ɛ kegvəmte əmntiɛ. Ɛyghuu nɛy gwiy, jio lun è fəy è shikse ndaa ten ɛy fɛy kekfvəme tene se bɛme ge.

Currently Selected:

Luk 6: oku

Highlight

Copy