Luk 16

Wel ɛyfɛl dəm ɛytof se giamtene ngeŋ ə wen

1Jesus maa ngan yin se ghon-ɛyfɛl nə wene ge: Wel əbghaken əblee nè lô se ki wel ɛyfɛl nə wen nɛ əb lɛm ge əb yɛ toknen nɛ̀ ɛykɛŋ ə wene. Ghele naa suuy se wen ge: Wel ɛyfɛl nə wɛ̀ di se jefe nɛ̀ ɛykɛŋ ə yiɛ jefen. 2Wel əbghaken vi me jaŋ wel ɛyfɛl nə wen, è bif se wen ge: Lu ɛynkii kenəə kekɛ kin kɛ mɛ yion kum wɛ̀? Gwiye nɛ̀ ŋwaale sejim sɛ kum ɛyfɛl ə yiɛ, è fo san bek ge wɛ̀ jia bo nɛ̂y yɛ fɛl se mɛ. 3Wel ɛyfɛl vi kwaate ge: Lòó mɛ jɛl lɛɛy nɛ ba-ɛyfɛl shi se jume mɛ se ɛyfɛl. Mɛ báà se ki kediak kɛ yɛ lem ɛylem so, gese ghuumene se yɛ lone fenloone. 4Mɛ ke kenəə kɛ lòó mɛ nɛɛy ka ɛ́ jumen mɛ se ɛyfɛl, é ghele nɛ̂y yɛ fiisen mɛ ɛ ghene ndaase. 5Əb me kɛɛte se jaŋe ghel ɛykaa nə ba-ɛyfɛl nə wen femok femok. Wele wɛ̂ mbiy gwiy, əb bif ge: Wɛ̀ ki əbkaa ba-ɛyfɛl nə mɛ lɛɛy? 6Əb fise ge: Lu kolse əmngvəl əbviɛ. Wel ɛyfɛl vi me suuy se wen ge: Ko ŋwaale ɛykaa nə wɛ̀, è diom, chikiy chikiy è nyak nɛ lu əmmtan. 7Əb nɛ̂y bif se əblee ge: Wɛ̀ ki ɛykaa lɛɛy? Əb fise ge: Lu əbbuam ɛsaŋ əbviɛ. Wel ɛyfɛl vi suuy se wen ge: Ko ŋwaale ɛykaa nə wɛ̀, è nyak nɛ lu əmfaame.

8Wel əbghaken vi nè lô bente wel ɛyfɛl əbfifen nə wen vi bek ɛytof yɛ əb nè dəmen se giamtene ngeŋ ə wen bek ge ghel ghɛ ɛ́ foon ɛytem ə ghen nɛ lu əbfua wɛ̂ ketuu ntiɛ fɛne feesen ɛ əbnəə wɛ tene chia ghel ghɛ ɛ́ foon ɛytem se əbnəə nə Feyine. 9Mɛ me se suuy se ghɛn ge: Ghɛn yɛ nɛɛy nɛ lu əbnəə wɛ Feyine koŋen nɛ̀ əbkaa wɛ luun kefaa se nchɛk ka əb loo mɛy, é əb fiisen ghɛn è fo ɛychii se ghɛn yɛ ɛy jia yî mɛy. 10Wel ɛyfɛl wɛ əb foon ɛytem se fɛl kejuŋ nɛ̀ kɛ ɛylaaye lu nɛ əb ko nɛ̂y fo ɛytem se fɛl kejuŋ nɛ̀ kedione, nɛ̀ vi wɛ əb báà fɛl kejuŋ nɛ̀ kɛ ɛylaaye lu nɛ əb jia nɛ̂y fɛl kejuŋ nɛ̀ kedione. 11Lɛ loo lu, ghɛne jia fo ɛytem se yɛ toknen nɛ̀ əbfua wɛ̂ nchɛke nchɛke vine, é nɛ̂y fo ndɛ nkante əbfua se ghɛn? 12Ghɛn jia fo ɛytem se yɛ toknen nɛ̀ kefaa kɛ luun kɛ wel əbchine ɛ jii ɛyjuŋ, é nɛ̂y fo ndɛ kɛ luun kɛne. 13Lòó kekose jia yɛ fɛl se ɛbay ɛbaa, buu dì, é əb yɛ koŋe əblee bane əblee, kene əb yɛ yionen se əblee, kiye əblee lolo. Lòó ghɛn jia yɛ fɛl se Feyine gese fɛle se əbkaa.

Əbnəə əblee wɛ Jesus nè dinten

(Mat 11.12-13; 5.31-32; Mak 10.11-12)

14Falisee sɛ se nè koŋen əbkaa yio əbnəə əbjim wɛ Jesus nè suuyen è se buu wen. 15Əb me suuy se ghene ge: Ghɛn lu ghii dii ghɛ ɛ́ dinen se ghele ge ghɛn lu ghele ɛyjuŋe dî nɛ Feyine ke tetem ə tɛn. Əbfua wɛ ghele liɛn ge lu nkante əbfua, lu əbfua lólò ɛyshiɛ nə Feyine.

16Ɛ́ nè lô se fekte ɛysak ə Moses gese nɛ̀ əbnəə wɛ nfektese nè nyaken se chin se əbliy nə Joon Nfoo Moo, se kɛ̀ɛ̀tè se əbliy fo, ɛ́ se fekte sakghɛ əbjuŋ kum ɛysak ə Feyin nɛ wel əbjim luŋe ge yi yɛ lu wel əblee ɛ ten. 17Ke bonene se ɛyyio ghene ntiɛ se mɛy, chia ka kè lòó fenəətese lɛy ɛ məme ɛysak. 18Naa ndɛ wɛ əb jumen wiy ə wen, è ndu əbchin lu nɛ əb lii nchiine kenjaŋ, nɛ̀ naa ndɛ wɛ əb chɛmen əbvii wɛ əb fəyen lum, lu nɛ əb lii se ɛychii kenjaŋ.

Wel Əbghaken ghene Lazalus

19Wel əbghaken əblee nè lô se lu, make ndəy setaa, nɛ ɛyyiɛ wene nè lu ka wɛ̀ yɛ gee lu əbjen kechii kejim. 20Nè lu ɛ wen əbchio bɛy nɛ wele ketan əblee nɛ ɛ́ toŋte ge Lazalus nyiŋ fo, nɛ əbghune lu lɛ əbnchok əbnchok. 21Lazalus nè kwaate ge yi yɛ yiɛ ɛykfəke əbfua wɛ wel əbghaken nè yiɛn nɛ ɛy chemke. Buose nè gwiye naa laa əbnchok ə wen.

22Wele ketan vi naa kuo, nchiyse-ndaa nə Feyine gwiy è liɛ wen è ndu è lɛm se Ablaham ɛybee. Wel əbghaken vi naa kuo sɛy, ɛ́ gvəəme. 23Əb ndu è se lu ɛ kelik əbvəs è se fuo fo, è naa mak ɛyshiɛ naa ɛ əbtəm, è yɛn Ablaham nɛ Lazalus diom se wen ɛybee. 24Əb me jaŋ è suuy ge: Ba ə wom Ablaham, ko koosen ɛysen se mɛ è tum Lazalus é əb chəkte wán-keghoo nə wen se moo è gwiy è chemse se mɛ keleeme bek ge mɛ fuo ɛ məme əbvəs fɛn.

25Ablaham fise ge: Wan ə wom, kuume əbliy wɛ wɛ̀ nè yion əbjuŋ ɛ ketuu ntiɛ nɛ̀ Lazalus yɛne nɛ lu ngɛk. Lazalus se yio əbjuŋ fɛn ɛ leenen, nɛ wɛ̀ yɛne ngɛk fɛy. 26Báà mɛy kii nɛ̂ kine, əbfiane lu fɛn sooy ge ka ɛ́ siysen wɛ əb giabsen ghɛsen ka lòó wel jia lòò fɛn è diaŋ se fɛy, nɛ̀ lòó wel jia lòò fɛy è diaŋ se fɛn. 27Wel əbghaken vi ko gese lon ge: Kiy wɛ̀ ba ə wom, tum Lazalus se ghone-ba ə wome, 28bek ge ghone-ba wome lu ghel ɛtan, ka əb ndu è tef ghene fɛ ghene náà gwiy ɛ kelik fɛn è yɛ fuo lɛ. 29Ablaham fise ge: Ghene ki tesak tɛ Moses ghene nfektese nè nyaken, ghene yɛ yio teghene. 30Əb suuy ge: Ɛngaŋ, ba ə wom Ablaham. Wel kè lòò ɛylak nə ghel ɛkuone è ndu se ghene, é ghene kubsen tetem ə ghen. 31Ablaham me fise ge: Loo lu, ghene jia yio kenəə kɛ tesak ə Moses ghene nfektese suuy fene lòó ghene jia yio kɛ suuyen wel wɛ əb lòòn ɛ ɛylak nə ghel ɛkuone.

Currently Selected:

Luk 16: oku

Highlight

Copy