Jn 7

Ghone-no ə Jesus wɛyse wen

1Se lu ɛybame kii nɛ̂ kine Jesus me se kale kɛn ɛ Galilee. Əb nè báà se koŋe se ndu ɛ Judea bek ge ghɛ́ mbiye nə ghele Juuse nè baate se yuye wen. 2Əbliy wɛ ghele Juuse sɛɛ yiɛ kechii keghakene kɛ ɛ́ toŋten ge kɛ́ əmtaa nè se baksene.#7.2 Ghele Islaele nè loo ɛ́ yiɛ əbliy nɛ̂ vin se yɛ kuume əmtaa ɛykokse wɛ Feyine nè dinen Moses bakle ghene se jɛle so əbkwak əbyume ka ghone Islaele nè kfəəyen se Kanaan. 3Ghone-no ə Jesuse me suuy se wen ge: Loo se fɛn è ndu ɛ Judea ka ghon-ɛyfɛl nə wɛ̀ yɛn əbnəə əbchio əbyúméné wɛ wɛ̀ nɛɛyen. 4Wele kɛŋe ge ghele keele kenəə kɛ əb nɛɛyen, é əb jia yɛ ghoone so ghoonen. Dine ngeŋ ə yiɛ se mbi ka wɛ̀ nɛɛyen əbnəə əbchio əbyúméné vine lɛ. 5Ghene nè suuy dì bek ge ghene ghɛ ghone-no ə wene chèmè nè báà fo ɛytem se wen.

6Jesus me suuy se ghene ge: Əbliy wɛ lòó mɛ ndu bɛɛy ghàà kwɛn, dî nɛ əbliy əbjime lu əbkwɛnen se ghɛn. 7Ghele ghɛ mbi báà se bane ghɛn dî bane mɛ bek ka mɛ suuyen se ghene əbliy əbjim ge jiise ghene báà jof. 8Ghɛn ndu, è yiɛ kechii keghakene, mɛ jia ndu bek ka əbliy wɛ lòó mɛ ndu ɛ ten bɛɛy ghàà kwɛn. 9Əb suuy dì è me gok ɛ Galilee.

Jesus ndu ɛyyiɛ kechii əmtaa è dinte əbnəə se ghele

10Ghone-no ə wene me ndu ɛyyiɛ yi, əb yese è ndu sɛy, dî è jia se lu ɛ ghele məm, è se lele lelen. 11Ghɛ́ mbiye nə ghele Juuse me se kɛŋe wen fo bifte ge əb sɛ waay-a?

12Nè lu dî nɛ ghele chəm chəm kum wen fo naa se ɛydio. Ghel ɛlee nè suuy ge əb lu wel əbjuŋ, nɛ ɛlee suuy ge: Ɛngaŋ, əb lofte ghel loften. 13Ghene loo fane ghɛ́ mbiye nə ghele Juuse dî wel jia se suŋnen kum Jesus ɛ ngɛngɛ.

14Ɛyyiɛ yi nɛy loo gianen, Jesus kok è ndu ɛ ndaa-ɛykokse è se dinte əbnəə se ghele. 15Ghɛ mbiye nə ghele Juuse se lu nɛ̀ əbchíò əbyúméné kante ge: Ke ghan lɛɛy nɛ wel vin yɛ ke əbnəə se ŋaŋ lɛ nɛ əb nè bɛɛy ghàà yi yiɛke ka wándɛ ŋwaale?

16Jesus me suuy se ghene ge: Əbnəə wɛ mɛ dinten se ghɛn báà se lu wome, əb lóò se Feyine wɛ əb nè tumen mɛ. 17Naa ndɛ wɛ shii ə wen luun se yɛ nɛɛy kenəə kɛ Feyine kɛŋen lòó əb keele ge əbnəə wɛ mɛ dinten sɛ lòò se Feyine moo, mɛ dinte ɛ mɛ əbtaawe-a. 18Wel wɛ əb suuyen kenəə ɛ wen əbtaawe kɛŋe ge ghele yɛ bente yi, dî nɛ wel wɛ əb kɛŋen ge ghele yɛ bente nɛ lu vi wɛ əb tumen yi lu wel əbluuy, nɛ əbbuame wiy ɛ wene məm. 19Lɛ nè báà fo Moses nchil se ghɛn-a? Dî nɛ wel se ghɛn lɛme wiy. Lu bek ghɛ wɛ ghɛne kɛŋen se yuye mɛ?

20Ghel ghi fise ge: Wɛ̀ ki ɛyfim ɛ wɛ əblɛɛ! Kɛŋe ndɛ se yuye wɛ̀?

21Jesus suuy se ghene ge: Mɛ nè nɛɛy kenəə kemok əbchio yum ghɛn. 22Moses nè lô fo ɛysak ge ghɛn yɛ nɛyte ghon ɛluumene dî nɛ nè báà kɛɛte Moses, nè kɛɛte ɛbaa ə ghɛn se yɛ nɛyte. Ghɛn ko lóó ɛ́ nɛyte ghon ɛ kechii ɛybam. 23Ghɛne lóó ɛ́ ko nɛyte wel ɛ kechii ɛybam ka ɛ́ jia kol ɛysake Moses, se lu bek ghɛ wɛ ghɛne yafsen se mɛ bek ka mɛ nè chuken wel ɛ kechii ɛybam əb bonen əbghun əbjim? 24Ghàà ghɛn yɛ loo sake nsak ghɛn yɛ kiynen kɛn kenəə ɛbɛy ɛbɛy. Ghɛn yɛ sake ɛ titiy kiynen kenəə ten kejim.

Jesus lɛ lu Vi wɛ Feyine nè Yiosen-a?

25Ghele ghɛ Jolesalem ɛlee me se kante ge: Vin lɛ báà se lu wel wɛ ɛ́ kɛŋen se yuy-a? 26Əb vine ka əb suŋnen ɛ ngɛngɛ nɛ wel suuy wiy kenəə kum wen. Lɛ lòó ke yɛ lu ge ghel ɛsakene ke ge əb lu Vi wɛ Feyine nè Yiosen-a? 27Dî nɛ ghɛsen ke ghaa əb lòòn, nɛ Vi wɛ Feyine nè Yiosene náà gwiy, é wel jia yɛ ke ghaa əb lòòn.

28Se lu nɛ Jesus bo dinte əbnəə se ghele ɛ ndaa-ɛykokse, əb bif ɛ giɛ ɛytaa ge: Ghɛn lɛ loote ke mɛ, gese ke ghaa mɛ lòòn-a? Mɛ dì nè báà gwiy se mɛ ngeŋ. Wel wɛ əb nè tumen mɛ lu wel əbluuy, nɛ ghɛn ke wiy wen. 29Mɛ ke wen bek ge mɛ lòò ghɛse wen nɛ nè tum wen mɛ.

30Ɛ́ yio kii nɛ̂ kine, è me se kɛŋe se koo wen, dî wel cheme jia kum wen bek ka əbliy wɛ Feyine nè siysen nè bɛɛy ghàà kwɛn. 31Dî ghel se ɛydio ghɛ ɛ nè yioten fó ɛytem se wen è suuy ge: Vi wɛ Feyine nè Yiosen lɛ yî gwiy, è yɛ nɛɛy əbnəə əbchio əbyúméné wɛ əb chian wɛ wel vine nɛɛyen-a?

Ɛ́ tum ghele nchiy ge ɛ́ koo Jesus

32Ghele kenone Falisee yio ka ghele chəm-chəm kum Jesus, ghene ghele mbiye se ghɛ́ ntaŋlee me tum ghel ghɛ ɛ́ nè chiyen ndaa-ɛykokse ge ɛ́ koo Jesus. 33Jesus me suuy ge: Mɛ bɛɛy se yɛ lu ghɛsen se feleeŋese əbliy se geese lòò se ndu se wel vi wɛ əb nè tumen mɛ. 34Ghɛne náà yɛ kɛŋe mɛ, è jia yɛn, nɛ mɛ naa yɛ lu ɛ kelik kɛ lòó ghɛn jia ndu fo.

35Ghɛ́ mbiye nə ghele Juuse me se kante ge: Əb lóò se ndu ghááy wɛ lòó ghɛsen jia yɛn wen? Əb cheme loo è ndu ɛ əbtum ɛ ntɛke sɛ Glees ghaa ghele Juuse chiin, è dinte əbnəə se ghene-a? 36Əb suuy ge ghɛsene nɛ̂y yɛ kɛŋe yi è jia yɛn, nɛ lòó ghɛsen jia ndu se ghaa əb luun. Kii nɛ̂ kine dine gee ghɛ?

Moo mɛ əm fóon ɛychii yɛ ɛy jia yî mɛy

37Nɛy se lu ɛ kechii kenləysen kɛ nè luun kechii ketaa kɛ ɛ́ nè mɛysen ɛyyiɛ kechii keghakene kii, Jesus teem ɛ ghele məm è suuy ɛ giɛ ɛytaa ge: Naa ndɛ wɛ kendoŋe moo yumen wen, gwiy se mɛ è nəə. 38Ŋwaale-Feyine suuy ge: Naa ndɛ wɛ əb foon ɛytem se mɛ lu nɛ moo mɛ əm foon ɛychii nɛ̂y lun ɛ wen ə ɛytem è yɛ lɛŋ. 39Jesus nè suuy kine kum Keyioy ə Feyin kɛ ghel ghɛ ɛ́ nè foon ɛytem se wen nè nɛ̂y se kiile. Nè lu əbliy fo nɛ Feyine nè bɛɛy ghàà fo Keyioy ə wen se ghele bek ka əb nè bɛɛy ghàà lose Jesus se wen əbghaake.

Ghele giabsen bek Jesus

40Ghele yio əbnəə wɛ Jesus nè suuyen, ɛlee suuy ge: Wel vin lu kɛn naa wele ntum nə Feyine nɛ̂ vi.

41Ɛlee suuy ge: Əb lu Vi wɛ Feyine nè Yiosen.

Dî ɛlee se kante ge: Vi wɛ Feyine nè Yiosen nè nɛ̂y se lòò nɛ lu ɛ Galilee-a? 42Ŋwaale-Feyin lɛ báà se suuye ge: Vi wɛ Feyine nè Yiosene náà yɛ lu wel ɛykfəə nə David nɛ ɛ́ bii wen ɛ Betlehem ɛ ntɛk yɛ David nè chiin ɛ ten-a? 43Ghele me se lu ɛgiabsen bek Jesus. 44Ɛlee se kɛŋe se koo wen, dî wel jia kum wen.

Ghɛ́ mbiye nə ghele Juuse tɛn se beeme Jesus

45Nchiy shii nɛy fiile, ghele mbiye se ghɛ́ ntaŋlee, nɛ̀ ghele kenone Falisee me bif se ghene ge: Ghɛne báà gwiy nɛ̀ wen bek ghɛ?

46Ghɛ́ nchiye fise ge: Wel nè bɛɛy ghàà yi suuy ɛynkii əbnəə wɛ wel vine suuyen.

47Ghele kenone Falisee bif ge: Əb chèmè lɛɛsemen ghɛn sɛy-a? 48Ghɛn lɛ nè yiomen ge wele mbiy əblee kene wele kenone Falisee əblee lu nɛ əb fo ɛytem se wen-a? 49Ghel ghine báà se ke ɛysak ə Moses, nɛ Feyine makmen lòn se ghene.

50Nikodemus wɛ əb nè shikenmen ɛyghan se Jesus, nɛ ko lu wele kenone Falisee nè lu fo. Əb me bif se ghele ngoo nə wene ge: 51Ɛysak ə yɛ́sen lɛ beeme ge ɛ́ tenen nsak ə wel nɛ ɛ́ báà sak, è keele ge əb sɛ nɛɛy ghɛ-a?

52Ghene fise ge: Wɛ̀ lòò sɛy ɛ Galilee-a? Kiynen ɛ ŋwaale-Feyin é wɛ̀ yɛn ge wele ntum nə Feyine wiy se yi se fəy ɛ Galilee. 53[Ghene me giabsen è se kfəəy se ghene ndaase.

Currently Selected:

Jn 7: oku

Highlight

Copy