Jn 6

Jesus yíɛ́se ghel nkam setan

(Mat 14.13-21; Mak 6.30-44; Luk 9.10-17)

1Kii nɛ̂ kine chia, Jesus diaŋ jio ɛyghuye yɛ Galilee yɛ ɛ́ toŋten sɛy ge Tibelias è ndu ɛ njine vii. 2Feliɛ wele lòò ɛ wen ɛybam bek əbnəə əbchio əbyúméné wɛ əb nè nɛɛyen se ghel ɛyafkene nɛ ghene yɛne. 3Jesus ghene ghon-ɛyfɛl nə wene me lòò è kok ɛ kfən è diom. 4Nè lu dî nɛ əbliy wɛ ghele Juuse sɛɛ yiɛ Kechii Ɛyboyse se baksene. 5Jesus loo kiy è yɛn nɛ feliɛ wele gwiye, è bif se Filib ge: Lòó ghɛsen yun ghááy əbfua-əbyíɛ́ne əbkwɛnen wɛ yiɛse ghel ghin so? 6(Əb nè bife kine se mome Filib bek ge əb nè se ke kenəə kɛ əb nɛɛy.)

7Filib fise ge: Lòò è yɛ lu ge wel əbjime kiile kefaa se yiɛ fene lòó yun keban se əbkaa nɛ əb chia denalius ɛyviɛ ɛybaa#6.7 Denalius ɛymok nè lu əblaake ɛyfɛl se kechii (kiye Mt 20.2)..

8Wan-ɛyfɛl nə wen əblee wɛ Andole, wɛ nè luun wán-no ə Simon Bita suuy ge: 9Wan əbluumen əblee lu fɛn ki ntukse keban setan nɛ̀ səə sebaa, dî nɛ ə́b báà chin ka lòó ghel ghine yíɛ́.

10Jesus me suuy ge: Ghɛn lam é ghene diom ɛ ntiɛ. Nè lu dî nɛ əbgii dio fo ge. Ghel ɛjime me diom, nɛ ɛluumen lu ka nkam setan dì. 11Jesus liɛ ntukse keban shi, è bɛ̀ɛ̀lè Feyin, è fo ɛ́ giate se ghel ghɛ ɛ́ nè diom, əb bɛɛle Feyin se səəse fɛy, è fo ɛ́ giate se ghele, wel əbjim yíɛ́ ka əb nè kɛŋen. 12Wel əbjim yíɛ́ è kul, Jesus suuy se ghon-ɛyfɛl nə wene ge: Ghɛn biŋte wɛ əb bɛɛsen fɛ kefaa lɛy se lólò. 13Ghene chinten əbmbɛkele əbfua-əbyíɛ́ne wɛ nè yiɛn ntukse keban sɛ setan shi əb bɛɛse, əb lun nkaase njio-sebaa ɛyvəm.

14Ghel ghii yɛn kenəə əbchio əbyúméné kɛ Jesus nɛɛyen è suuy ge: Vin lu kɛn naa wele ntum nə Feyine wɛ ŋwaale-Feyine dinen ge əb náà gwiy ɛ mbi fɛn. 15Jesus keele ge ghel ghii shi se koo yi se kokse ge əbfon, è me sosen è kase kok se kfən wen nyiŋ.

Jesus jɛl ɛ ketuu moo

(Mat 14.22-23; Mak 6.45-52)

16Nɛy se lu ɛ likfəəy, ghon-ɛyfɛl nə Jesus chio è ndu əbchio jio ɛyghuy, 17è lii se kenək è kase diaŋ se Kabanaum. Kebɛye fin, nɛ Jesus bɛɛy ghàà baksen ghene. 18Əbfiɛf əbtaa me se chia, shikse jio nɛ moome loole. 19Nɛy se lu nɛ ghon-ɛyfɛl nə Jesuse jɛlmen ɛ məme jio ka tetaŋ tetal kene tekɛɛk dì, ghene yɛn Jesus nɛ əb jɛle ɛ ketuu moo baksen gwiye se kenək, è me se fane. 20Jesus suuy se ghene ge: Ghàà ghɛn yɛ fan, lu mɛ Jesus. 21Ghene se koŋe se liɛ wen, è loo chin nɛ kenəke chinmen ɛ shif ghàà ghene nè nduun se fəy.

Ghele kɛŋ ghaa Jesus luun

22Əbtəke nɛy yio feliɛ wel fɛ fe nè goken ɛ njine jio yɛn ge lu kɛn kenək fo kemok, è me keele ge Jesus nè báà lii se kenək ghene ghon-ɛyfɛl nə wene, dii ge ghene ne lòò è vəse wen ɛ ɛybam. 23Əbnək əblee ko nè lòò ɛ Tibelias, è gwiy ɛ əbchio jio bene fɛ Báàba nè liɛn ntukse keban, è bɛ̀ɛ̀lè Feyin, è yiɛse feliɛ wel so. 24Ngose wel yi keele ge Jesus ghene ghon-ɛyfɛl nə wene báà se lu fo, è lii əbnək è diaŋ se Kabanaum, kɛŋe nduu nɛ̀ wen.

Jesus lu əbfua-əbyíɛ́ne wɛ əb fóon ɛychii

25Ghene yɛn Jesus ɛ njine jio fɛy, è bif se wen ge: Ndinte, wɛ̀ kè gwiy fɛn ɛ leghɛ?

26Jesus fise ge: Mɛ suuy əbluuy se ghɛn ge, ghɛne kɛŋe mɛ bek ka ghɛn ne yiɛn keban è kul nɛ báà se lu ge əbchəyte əbnəə əbchio əbyúméné wɛ mɛ nɛɛyen sɛ dine ghɛ-a? 27Ghàà ghɛn yɛ fɛl bek əbfua-əbyíɛ́ne wɛ əb sɛɛ bef. Ghɛn sɛy yɛ fɛl nɛ lu se wɛ əb sɛɛ lu kɛn luun, gwiye nɛ̀ ɛychii yɛ ɛy jia yî mɛy, əbfua-əbyíɛ́ne nɛ̂ vine lu nɛ nɛ̂y fo Wanwel se ghɛn. Feyin wɛ Bay dinmen ge yi ke se ɛyfɛl yɛ əb fɛ́len.

28Ghene me bif se wen ge: Lòó ghɛs jɛl lɛɛy se geese yɛ fɛl ɛyfɛl ə Feyin?

29Jesus fise ge: Ɛyfɛl yɛ Feyine kɛŋen ge ghɛn yɛ fɛl lu ge: Ghɛn fó ɛytem se wel vi wɛ yi nè tumen.

30Ghene bif ge: Kenəə əbchio əbyúméné kɛ wɛ̀ nɛɛy ka əbchəyte ge ghɛs yɛn è fo ɛytem se wɛ̀ lu ghɛ? Wɛ́ nɛɛy ghɛ? 31Ɛbaa ə ghɛsene nè yiɛ əbfua-əbyíɛ́ne wɛ ɛ́ nè toŋten ge manna#6.31 Manna lu keban kɛ Feyine nè yiɛsen ghele Islael so əbkwak əbyume se nguk əmkɛɛk. Kiye kentime kɛ 49 gese nɛ̀ Heb 9.4. ɛ əbkwak, ghɛɛ-ghɛɛ ka ŋwaale-Feyine suuyen ge: Əb nè fo keban kɛ ke nè lòòn ɛ ɛyyio se ghene.

32Jesus fise ge: Mɛ suuy əbluuy se ghɛn ge nè báà fo Moses əbfua-əbyíɛ́ne se ghɛn wɛ əb lòò ɛyyio. Nè fo Ba ə wom nkante əbfua-əbyíɛ́ne wɛ əb lòòn ɛ ɛyyio se ghɛn. 33Əbfua-əbyíɛ́ne wɛ Feyine fóon lu vii wɛ əb lòòn ɛ ɛyyio è gwiy è se foo ɛychii se mbi.

34Ghene yio è me suuy ge: Babɛy, yɛɛ foo əbfua-əbyíɛ́ne nɛ̂ vin se ghɛs əbliy əbjim.

35Jesus me suuy se ghene ge: Mɛ lu əbfua-əbyíɛ́ne wɛ əb fóon ɛychii. Naa ndɛ wɛ əb gwiyen se mɛ jia bo yɛ yio jiŋ, nɛ̀ kendoŋe moo jia bo yɛ yume wel vi wɛ əb foon ɛytem se mɛ. 36Dî nɛ mɛ nè lô suuy se ghɛn ge ghɛn lu nɛ ɛ́ yɛn mɛ, è jia fo ɛytem se mɛ. 37Wel əbjim wɛ Ba ə wom foon se mɛ nɛ̂y gwiy se mɛ. Mɛ jia yî jum ghii dii ghɛ ɛ́ gwiyen se mɛ; 38bek ge mɛ lòò ɛyyio è gwiy ɛ ntiɛ fɛn se yɛ nɛɛy kenəə kɛ wel wɛ əb nè tumen mɛ kɛŋen, nɛ wiy kɛ koŋen mɛ. 39Kenəə kɛ wel wɛ əb nè tumen mɛ kɛŋen lu ge ghàà mɛ nɛɛy ge wel se ghii dii ghɛ əb nè foon se mɛ lɛy, nɛ mɛ yî lose ghene se ɛykuo ɛ kechii kenləysen. 40Kenəə kɛ Ba ə wom kɛŋen lu ge wel əbjim wɛ əb yɛnen wan è fo ɛytem se wene náà kiile ɛychii yɛ ɛy jia yî mɛy, nɛ mɛ náà lose ghene se ɛykuo ɛ kechii kenləysen.

41Ghele Juus me kɛɛte è se vəke bek ka Jesus nè suuyen ge yi lu əbfua-əbyíɛ́ne wɛ əb səəken gwiy ɛ ɛyyio. 42Ghene me se suuye ge: Wel vin lɛ báà se lu Jesus wɛ wán ə Josɛf-a? Ghɛsen ke ba ə wen ghene no ə wen. Lòó əb yɛ suuy lɛɛy ɛ leenen ge yi səəke gwiy nɛ lu ɛyyio?

43Jesus fise ge: Ghàà ghɛn se vək se ghɛne ngeŋse. 44Lòó wel jia gwiy se mɛ buu ge gufte Bay wɛ əb nè tumen mɛ ge əb gwiy san; nɛ mɛ náà lose wen se ɛykuo ɛ kechii kenləysen. 45Ghele ntum nə Feyine nè nyak ge: “Feyine náà dinte əbnəə se ghel ghin əbjim.” Naa ndɛ wɛ əb yionmen è gese yiɛke kenəə kɛ Baye suuyen, gwiye se mɛ. 46Kii nɛ̂ kine báà me se lu ge wel nè yɛnmen Bay. Lu kɛn vi di wɛ əb nè lòòn se Feyine wɛ əb nè yɛnenmen Bay. 47Mɛ suuy əbluuy se ghɛn ge naa ndɛ wɛ əb foon ɛytem se mɛ se ki ɛychii yɛ ɛy jia yî mɛy. 48Mɛ lu əbfua-əbyíɛ́ne wɛ əb foon ɛychii. 49Ɛbaa ə ghɛne nè lô yiɛ manna#6.49 Manna lu keban kɛ Feyine nè yiɛsen ghele Islael so əbkwak əbyume se nguk əmkɛɛk. Kiye ɛ kentime kɛ 31 gese nɛ̀ Heb 9.4. əbkwak è ko naa kuo. 50Dî nɛ əbfua-əbyíɛ́ne wɛ əb lòòn ɛ ɛyyio lu ɛynkii əbfua-əbyíɛ́ne wɛ wel yiɛn, é əb jia yî kuo. 51Mɛ lu əbfua-əbyíɛ́ne wɛ əb lòòn ɛ ɛyyio nɛ lu wɛ əb foon ɛychii. Yiɛ naa ndɛ əbfua-əbyíɛ́ne nɛ̂ vin é əb yî yɛ chii ndu kɛn nduun. Əbfua-əbyíɛ́ne nɛ̂ vine lu əbghun ə wom wɛ mɛ nɛ̂y fo se boyse ghele ghɛ mbi fɛne.

52Ghele Juus yio kine è me kɛɛte se yɛ beke mbek se ghene ngeŋse ge: Lòó wel vin fó lɛɛy əbghun ə wen ge ghɛsen yiɛ?

53Jesus me suuy se ghene ge: Mɛ suuy əbluuy se ghɛn ge: Loo lu ghɛne jia yiɛ əbghun ə Wanwel, è gese nəə əmnduŋ mə wen, é ghɛn jia yɛ ki ɛychii ɛ məm nə ghɛn. 54Naa ndɛ wɛ əb yiɛn əbghun ə wom, è nəə əmnduŋ mə mom se ki ɛychii yɛ ɛy jia yî mɛy, é mɛ náà lose wen se ɛykuo ɛ kechii kenləysen. 55Ke lu dî bek ka əbghun ə wome lu nkante əbfua-əbyíɛ́ne, nɛ əmnduŋ mə mom lu nkante ɛynəə. 56Naa ndɛ wɛ əb yiɛn əbghun ə wom, è nəə əmnduŋ mə mom lu nɛ əb gokmen ɛ mɛ məm, mɛ gok ɛ wene məm. 57Bay wɛ əb foon ɛychii nè tum mɛ, se lu bek wen wɛ mɛ kiin ɛychii. Lu ghɛɛ-ghɛɛ ka yiɛn naa ndɛ əbghun ə wom é əb yɛ ki ɛychii bek mɛ. 58Kii nɛ̂ kine lu əbfua-əbyíɛ́ne wɛ əb səəken gwiy ɛ ɛyyio. Ə́b báà se lu ka əbfua-əbyíɛ́ne wɛ ɛbaa ə ghɛne nè yiɛn è ko naa kuo. Wel yiɛ əbfua-əbyíɛ́ne nɛ̂ vin é əb jia bo yî kuo.

59Jesus nè suuy əbnəə nɛ̂ vin ɛ ngay ɛyjeme yɛ Kabanaum ɛ əbliy wɛ əb nè dinten əbnəə se ghele.

Giɛ sɛ se fóon ɛychii yɛ ɛy jia yî mɛy

60Ghon-ɛyfɛl nə Jesuse yio kenəə kin kɛ əb nè suuyen, ndio wel ɛ ghene məm me se suuy ge: Ɛyyíɛ́ke yine taa naa se ŋaŋ. Lòó bééme ndɛ kenəə ten?

61Jesus ko me keele ge ghene vəke kesuŋnene ki è me suuy se ghene ge: Kii nɛ̂ kine taa se ghɛn se beeme-a? 62Lɛ loo lu ghɛne yɛn Wanwel nɛ əb kase koke se ghaa əb nè luun se mbiy é ghɛn nɛɛy lɛɛy? 63Kefaa kɛ ke fóon ɛychii lu Keyioy ə Feyin. Wel se wene ngeŋ lòó əb jia nɛɛy kenəə se kiile. Giɛ sɛ mɛ suŋnen se ghɛn lòò se Keyioy nɛ̂ kine nɛ lu sɛ se fóon ɛychii. 64Dî nɛ ghɛn ɛlee báà fo ɛytem. Jesus nè suuy dì ka əb nè se keen ghel ghɛ ɛ́ báà fo ɛytem se wen, gese ke wel wɛ əb nɛ̂y feene wen. 65Əb me gese suuy ge: Ghɛy kenəə kɛ ke nè nɛɛyen mɛ suuy se ghɛn ge lòó wel jia gwiy se mɛ buu ge nɛɛy Bay ge əb gwiy.

66Se kɛ̀ɛ̀tè se əbliy fo ndionen ghon-ɛyfɛl nə Jesus me fiile ɛybam, è jia gese se jɛle ghene ghene. 67Əb me bif se ghɛ́ ntume ghɛ njio-sebaa ɛyvəm ge: Lɛɛy se ghɛn! Ghɛne koŋe se vəse mɛ sɛy-a?

68Simon Bita fise ge: Báàba, lòó ghɛs ndu se ndɛ? Wɛ̀ ki giɛ sɛ se fóon ɛychii yɛ ɛy jia yî mɛy. 69Ghɛs lu nɛ ɛ́ fó ɛytem se wɛ̀ è se ke ge wɛ̀ lu wel əblanen vi wɛ əb lòòn se Feyine.

70Jesus suuy ge: Mɛ lɛ nè báà chok ghɛn njio-sebaa ɛyvəm, wel əblee se lu kevəŋ-a? 71Əb nè suŋnen kum Judas wɛ wán ə Simon Iskaliot Judas nè lu wel əblee ɛ məme ghon-ɛyfɛl ghɛ njio-sebaa ɛyvəm. Lu wen wɛ əb nè feenen Jesus.

Currently Selected:

Jn 6: oku

Highlight

Copy