Jn 18

Ɛ́ koo Jesus

(Mat 26.47-56; Mak 14.43-50; Luk 22.47-53)

1Nɛy se lu ka Jesus nè mɛysenmen ɛyjem yi, ghene ghon-ɛyfɛl nə wene lòò è diaŋ əbfian əblee nɛ ɛ́ toŋte ge Kidlon. Ɛylom ɛylee nè lu fo, Jesus ghene ghon-ɛyfɛl nə wene me lii ɛ ten. 2Judas wɛ əb nè feenen Jesus nè ke kelike ten bek ka Jesus ghene ghon-ɛyfɛl nə wene nè lóó ɛ́ yɛ konen fo əbliy nɛ̀ əbliye. 3Judas liɛ ghel ɛyghoŋ gese nɛ̀ ghel ghɛ ɛ́ nè chiyen ndaa-ɛykokse ghɛ ghele mbiy se ghɛ́ ntaŋlee, nɛ̀ ghele kenone Falisee nè foon, ghene me ndu ɛylom fó ki əbfua ɛyghoŋ nɛ̀ əbkaakene nɛ̀ əbjiktene. 4Ka Jesus nè se keen əbnəə əbjim wɛ əb nè luun se gan se wen, əb me fəyte ɛ mbiy è bif ge: Lu ndɛ wɛ ghɛne kɛŋen?

5Ghene fise ge: Ghɛse kɛŋe Jesuse wɛ̂ Nazalet.

Əb me suuy ge: Lu mɛ.

Nè lu dì nɛ Judas wɛ əb nè feenen Jesus tiy fo ghene ghene. 6Nè lu əbliy wɛ Jesus nè suuyen se ghene ge lu yi wel wɛ ghene kɛŋen, ghene koyte ɛybam ɛybam, è fɛyke ɛ ntiɛ. 7Əb gese bif se ghene ge: Wel wɛ ghɛne kɛŋen lu ndɛ?

Ghɛne fise ge: Ghɛse kɛŋe Jesuse wɛ̂ Nazalet.

8Jesus fise ge: Mɛ suuymen se ghɛn ge lu mɛ wen. Di loo lu ge ghɛne kɛŋe mɛ, ghɛn vəse é ghel ghine loo. 9Əb nè suuy kii nɛ̂ kine se nɛɛy ge kenəə kɛ əb nè suuymen yɛ lu əbluuy. Əb nè suuy ge: Ba ə wom, wele báà lɛy ɛ məme ghii dii ghɛ wɛ̀ nè foon se mɛ chèmè kɛn əbmok.

10Simon Bita nè ki fiak. Əb guf è kɛf ketuule kɛ əbkoy əbtaa nə kekos ə ketuu se ghɛ́ ntaŋlee. Ɛyghele kekose kɛ tene nè lu ge Malkus. 11Jesus suuy se Bita ge: Kase vii fiak ə viɛ se bene fɛ əb kè luun! Wɛ̀ kɛŋe ge ghàà mɛ fii əbbome ngɛk wɛ Ba ə wom kiin se mɛ-a?

Ɛ́ liɛ Jesus è ndu so se ketuu se ghɛ́ ntaŋlee

12Ghel ɛyghoŋ ghii ghene ghe ketuu ə ghene, gese nɛ̀ ghel ghɛ ɛ́ chiyen ndaa-ɛykokse me koo Jesus è kul ɛghoo ə wen; 13Ɛ́ kul dì è liɛ wen è chia mbiy è ndu so se Annas. Annas nè lu ba əbchii nə Kaiafas wɛ nè luun ketuu se ghɛ́ ntaŋlee ɛ nguk fo. 14Nè lu Kaiafas nɛ̂ vin wɛ əb nè teften ghɛ́ mbiye nə ghele Juus ge ke jofe ge wel əbmok kuo ɛ kelik nə ghele.

Bita maa Jesus

(Mat 26.69-70; Mak 14.66-68; Luk 22.55-57)

15Simon Bita ghene wan-ɛyfɛl nə Jesus əblee se nduu ɛ Jesus ɛybam. Nè lu dì nɛ ketuu se ghɛ́ ntaŋlee loote ke wán-ɛyfɛl nɛ̂ vi, Jesus loo lii ɛ kebuk nə ketuu se ghɛ́ ntaŋlee əb me lii sɛy. 16Bita gok ɛ bɛy ɛ əbchio kebuk. Wan-ɛyfɛl vi wɛ ketuu se ghɛ́ ntaŋlee nè keen wen me kase fəy ɛ bɛy, è suŋnen ghene wan əbvii wɛ əb nè chiyen ɛ əbchio kebuk, è me liɛ Bita ghene wen lii. 17Wan əbvii vi wɛ əb nè chiyen əbchio kebuk bif se Bita ge: Wɛ̀ lɛ báà se lu wán-ɛyfɛl nə wel nɛ̂ vin əblee-a?

Bita fise ge: Ɛngaŋ.

18Nè lu dî nɛ kentone gvəle ghɛ́ ɛyfɛl nə ketuu se ghɛ́ ntaŋlee, nɛ̀ ghel ghɛ ɛ́ nè chiyen ndaa-ɛykokse kwaay əbvəs è teem ɛ əbghune ten è se yósê. Bita kokte è ndu è teem ghene ghene è se yósê sɛy əbvəs.

Ketuu se ghɛ́ ntaŋlee bifte əbnəə se Jesus

(Mat 26.59-66; Mak 14.55-64; Luk 22.66-71)

19Ketuu se ghɛ́ ntaŋlee bifte əbnəə se Jesus wɛ kum ghon-ɛyfɛl nə wen, gese nɛ̀ əbnəə wɛ əb dinten se ghele. 20Jesus fise ge: Mɛ nè lóó mɛ yɛ suŋnen se mbi ɛ dɛɛne, dinte əbnəə əbjim ɛ ngayse ɛyjem gese nɛ̀ se ndaa-ɛykokse bene fɛ ghele Juus ɛjime konen. Mɛ nè bɛɛy ghàà yɛ suuy kenəə ɛ nfik ɛ nfik. 21Lu bek ghɛ wɛ wɛ̀ biften tebif tin se mɛ? Yɛɛ bife se ghel ghɛ ɛ́ nè yion mɛ, ghene ke kenəə kɛ mɛ nè suuyen.

22Jesus suuy dì ɛ leghɛ, wel əblee se ghel ghɛ ɛ́ nè chiyen ndaa-ɛykokse tɛl wen ɛ kegiɛk, è bif ge: Ghɛy jii yɛ wɛ̀ fisen ketuu se ghɛ́ ntaŋlee ɛ ten-a?

23Jesus fise ge: Lòò è yɛ lu ge mɛ lu nɛ mɛ suuy kenəə nɛ̀ ɛybame, wɛ̀ suuy se wel əbjim fɛn. Yɛ́ lu wɛ ge mɛ suuy nɛ lu kenəə kɛ́ titiye, é wɛ̀ me tɛl mɛ lɛ-a?

24Annas me tinse Jesus nɛ əb bo bɛɛy əbkulen, se Kaiafas wɛ nè luun ketuu se ghɛ́ ntaŋlee.

Bita gese maa Jesus

(Mat 26.71-75; Mak 14.69-72; Luk 22.58-62)

25Se lu nɛ Bita bo tiy fo yose əbvəs, ghel ɛlee bif se wen ge: Wɛ̀ lɛ báà se lu sɛy wán-ɛyfɛl nə wel nɛ̂ vin əblee-a?

Bita fise ge: Ɛngaŋ.

26Nè lu dì nɛ wel əblee se ghɛ ɛ́ nè fɛ́len kekos se ketuu se ghɛ́ ntaŋlee tiy fo. Əb nè lu wele ndaa nə ghe wel wɛ Bita kè kɛfen ketuule ə wen. Kekos kii bif se Bita ge: Mɛ lɛ kè báà yɛn ghɛne ghe Jesus ɛ ɛylom-a?

27Bita gese tun, ɛ leghɛ lum ngvəə toŋ.

Ɛ́ gwiy nɛ̀ Jesus se Bailɛt

(Mat 27.1-2,11-14; Mak 15.1-5; Luk 23.1-5)

28Əbtəke nɛy loo yio, ghɛ́ mbiye nə ghele Juuse liɛ Jesus se Kaiafase ndaa, è ndu so se ntok nə goveno. Ghene ghɛ ghele Juus nè báà lii se ntok bek ka ghene nè kɛŋen se yɛ lu ɛlaanen se nɛy se yiɛ Kechii Ɛyboyse. 29Bailɛt me fəy è gwiy, è bif se ghene ge: Kenəə kɛ ghɛne toyen wel vin se ten lu ghɛ?

30Ghene fise ge: Əb kè boy se jia se nɛɛye kenəə kebee fene ghɛs kè báà se gwiye nɛ̀ wen se wɛ̀.

31Bailɛt me suuy se ghene ge: Ghɛn se ghɛne ngeŋse liɛ wen è ndu è sak ka ɛysak ə yɛne dinen.

Ghene fise ge: Ghɛs dì báà se ki əbtaawe se yuye wel. 32Kii nɛ̂ kine nè gan lɛ se nɛɛy ge kenəə kɛ Jesus nè suuyen kum ɛynkii ɛykuo yɛ əb náà kuo kwɛn.

33Bailɛt kase lii ɛ ntok è toŋte Jesus è bif se wen ge: Lu wɛ̀ əbfon ə ghele Juus-a?

34Jesus fise ge: Wɛ̀ bif lɛ ɛ wɛ̀ ɛykwaate moo suuy ghel əbnəə se wɛ̀ kum mɛ-a?

35Bailɛt fise ge: Wɛ̀ kwaate ge mɛ lu wele Juus-a? Ghel ghɛ ɛ́ gwiyen nɛ̀ wɛ̀ se mɛ lu ghele ghɛn, nɛ̀ ghele mbiye se ghɛ́ ntaŋlee. Kenəə kɛ wɛ̀ nɛɛyen lu ghɛ?

36Jesus me suuy ge: Əbfon ə wome báà se lu wɛ́ mbi fɛne. Əbfon ə wome kè boy se yɛ lu wɛ́ mbii, fene ghel ɛyfɛl nə mɛ kè lòó ɛ́ noo ge ghàà ghɛ́ mbiye nə ghele Juuse koo mɛ. Ɛngaŋ, əbfon ə wome báà se lu wɛ́ mbii.

37Bailɛt me bif ge: Ke chèmè dine ge wɛ̀ lu əbfon-a?

Jesus fise ge: Ke lu ka wɛ̀ suuyen ge mɛ lu əbfon. Ɛ́ nè bii mɛ ɛ mbi fɛn bek kii nɛ̂ kii, mɛ nè gwiy se yɛ din əbluuy se ghele. Naa ndɛ wɛ əb tiyen ɛ əbluuy yionen se mɛ.

38Bailɛt bif ge: Əbluuye lu ghɛ?

Bailɛt chiase ɛysak ge ɛ́ yúy Jesus

Bailɛt me kase fəy ɛ bɛy è suuy se ghele Juus ghii ge: Mɛ báà yɛn kejase wel vin, 39è gese suuy ge: Ke lu ɛ ghɛne nchiine nɛ ɛ́ loo yiɛ Kechii Ɛyboyse ghɛn lon ge mɛ fəyse wele nchak əbmok. Ghɛne kɛŋe ge mɛ fəyse wel vin wɛ luun əbfon ə ghele Juus-a?

40Ghene zəəme zəəmen ge: Ɛngaŋ, ghɛse báà se kɛŋe wen. Ko fəyse nɛ lu Balabbas. Balabbas nè lu əbchoŋ.

Currently Selected:

Jn 18: oku

Highlight

Copy