Mɑ́lɛ́kúshi 6
6
Pʉɔ-Nɑ̌zɑlɛt lʉꞋ nɛpɛ́m Yɛ́su
(Mɑtʉ̈ɔ 13.54-58; Lúkɑ́shi 4.16-30)
1Yɛ́su kɑ fú zúꞋu, ŋ́ɡʉ nɛ́ lɑ́Ꞌ yi ɑ kɑ ɡúꞋnɛ zúꞋu, pɔ́p ɡɑŋku pɛ́ pɔ́nɛ. 2Lɛ́ꞌ-nji yɔ́p ɡɛ ḿbɔ́, ɑ ɡʉ ndɑ́-cúꞌlɛ pɔ́p, ńzɛ nɛzíꞋ pʉɔ nɛ́ nu-Sɛ́, pʉɔ tɛ ńzɑ́ɑ zúꞋ sẅiŋɛ yɛ́, ḿmɑɑ tɛꞋ, ḿbɔ́ ńcú ŋɡɔ: «A lɔk mɔ mɛnu tsʉʉ ɛ́fú pɔ ɡɔ́? Wɔ̌ ɡɑ́nɛ yɔ ntɛ́ jínu mbɔ̌ wɛ́, mbɑ mɛtʉʉ nɛlɔk ŋ́ɡɛ yɔ ŋkʉꞋnɛ nu? 3A kɑ́ pɔ́ kɑ́pɛ́ndɑɑ, ḿbɔ́ mɔ́ɔ-Mɑlíyɑ pɔ́ ɔɔ? Ḿbɔ́ mɔ́ɔmɑ́ pɛ́ Jɑ̂k, ŋ́ɡɛ Jɔsɛ́ɛ, ŋ́ɡɛ Jẅidɛ mbɑ Símɔ pɔ́ ɔɔ? Pɔ́ɔpɛ́mɑ́ pɛ́ pɛ́ pɑŋɡɛ́ kɑ́ pɔ́ pɔ tsɛtsɛt pɛkŋɛ pɔ́?» Ńcú pɔ́Ꞌɔ, ńdʉꞋ nɛpɛ́m wɛ́. 4Yɛ́su cú mbɔ̌ pɔ́p ŋɡɔ: «Pɛ́ ɡɛ mɛkuꞋ-ŋɡɛ́mndʉ̈ɔꞋ-Sɛ́ zʉꞋ tsʉʉ, tɛ ɛ́ tsʉꞋ ndɑꞋ zʉꞋ yí ɑ kɑ ɡúꞋnɛ, pɛ́ ɡwɑ́k wɛ́ tsɛtsɛt pɔ́ɔpɛ́mɑ́ pɛ́ mbɑ ndɑ́ pɔ́p.» 5Ɛ́ kɑ pɔ́ pɔ́nɛ tɛ Yɛ́su pɔɔ ɡɛ mɛcɔ́ mɛŋkʉꞋnɛ mɛnu zúꞋu pɔ́, tɛ ńdíꞋ ndɑꞋ pɑꞋ ɑ kɑ zɑ́pnɛ mbɔ́ mɛ́ nǔu pɛcɔ́ ntɑ́Ꞌ-ɡɑŋɡɔɔ, ŋ́ɡɛ pɔ́p fíitɛ. 6Ɛ́ kʉꞋnɛ Yɛ́su tɛꞋ, pɑꞋ pɔ́p kɑ́ zɑ́p tʉ́m nǔu wɛ́ pɔ́.
Yɛ́su túu pʉɔ pɛ́ ntsɔ̌ppɑ́
(Mɑtʉ̈ɔ 10.1, 5-14; Lúkɑ́shi 9.1-6)
Yɛ́su ɡɛ ɛ́fú zúꞋu, ŋ́ɡʉ ńzɛ nɛnɛn tsɛt mɛlɑ́Ꞌ shʉ́ zúꞋu, ḿbɔ́ ńzíꞋ pʉɔ nɛ́ nu-Sɛ́. 7Ɛ́fúŋ pʉɔ pɛ́ ntsɔ̌ppɑ́ nɛ́ nɛɡɛ́m. Ńtúu wɔ́p pɛ́pɑ́ pɛ́pɑ́, ŋ́ɡɑ́ mɛtʉʉ mbɔ̌ pɔ́p nɛlɔk ńzuŋ mɛzẅikŋɛ kɛpɔŋ. 8Ńcú mbɔ̌ pɔ́p tɛ ŋ́ɡẅɛ́Ꞌ ŋɡɔ: «Kɔɔ pʉʉ ɡɔ́ ŋ́ɡʉ ḿbɛ́ɛ yɛcɔ́ yúu, tɛ ńdíꞋ ndɑꞋ ntẅí. Kɔɔ pʉʉ ɡẅɛɛ yúu pɛjʉ́, ḿbɑ́ɑ ŋu nɛpɛ́ɛ pɑɑ. Kɔɔ ŋu ɡẅɛɛ mbɑ ŋkɑ́p. 9Zẅíknɛ mɛtɑp mʉ́ʉ, lɑ́ kɔɔ pʉʉ ɡẅɛɛ mɛndẅí mɛ́mbɑ́.» 10Yɛ́su pɛn ńcú mbɔ̌ pɔ́p ŋɡɔ: «pʉʉ lɑɑ ŋ́ɡʉ tɛ ŋ́kúu tsɛt tɑ́Ꞌ lɑ́Ꞌ, pʉʉ nɑ́ŋ pɔ tsɛt ndɑ́ yi pɛ́ ŋ́ɡɛ ŋ́ɡɑ́ mbɔ̌ pʉʉ tɛ ŋ́ɡɛ ɛ́fú zúꞋu ŋ́ɡʉ. 11Pʉɔ yɛcɔ́ lɑ́Ꞌ lɑɑ ńdʉꞋ nɛkúkŋɛ wʉ́ʉ, ńdʉꞋ nɛzúꞋ sẅiŋɛ yʉ́ʉ, pʉʉ fú zúꞋu ŋ́ɡɔ ŋ́ɡʉ, ḿbúꞋ pɛ́pɛ́p-mɛku mʉ́ʉ, nɛlɔk ńnyɛt wɔ́p ŋɡɔ nu yí pɔ́p ɡɛnɛ, ɛ́ tsʉꞋ ńdíŋɛ pɔ wɔ́p.»
12Pɔ́p ḿbɔ́ ŋ́ɡʉ, ńnɛn ɛ́sɑ́Ꞌ ŋɡɔ: «Ɛ́ sɛ́ ḿbíkŋɛ ŋɡɔ pʉɔ tsʉʉ kúpmɛ mɑt.» 13Ḿbɛn ḿbɔ́ ńzuŋmɛzẅikŋɛ kɛpɔŋtɛ ńzɑ́ɑ, ńci mɛɡwɛ́t nǔu pɛɡɑŋɡɔɔ tɛ ńzɑ́ɑ pɔ́p fíitɛ.
Nu-fɔɔ Ɛlɔ̂dɛ pɔ́p Jɑ̂ŋ Mbɑptíshi
(Mɑtʉ̈ɔ 14.1-2; Lúkɑ́shi 9.7-9)
14Fɔɔ Ɛlɔ̂dɛ zúꞋ yɛ́ pɑꞋ pɛ́ cúnɛ mɛnu mi Yɛ́su ɡɛnɛ, mbíꞌŋɡɔ lík-Yɛ́su kɑ sɑt zʉꞋ. Pɛcɔ́ pʉɔ pɔ́ ńcú ŋɡɔ Jɑ̂ŋ Mbɑptíshi zẅíimɛ! Ɛ́ yúu mi ɛ́ ɡɛnɛ lɑ ɑ kuꞋ nɛɡɛ mɛŋkʉꞋnɛ mɛnu. 15Pɛcɔ́ pʉɔ cú ŋɡɔ ɑ Ɛlíyɑ. Pɛcɔ́ cú yɔ́p ŋɡɔ ɑ wɛcɔ́ ŋɡɛ́mndʉ̈ɔꞋ-Sɛ́ pɑ́Ꞌ pɛ́ ŋkɑ́mbi. 16Fɔɔ Ɛlɔ̂dɛ zúꞋ mɔnɛ mɛnu, ńcú yɛ́ ŋɡɔ: «A Jɑ̂ŋ ẅí ŋ kɑ ɡɛnɛ pɛ́ zɑꞋ tú yɛ́ lɑ́, ɑ zẅíimɛnɛ.»
17Ɛ́ kɑ ɡɔ́ ḿbɔ́, mbɔ fɔɔ Ɛlɔ̂dɛ kɑ ɡɛ pɛ́ ɡẅɛɛ Jɑ̂ŋ, ŋ́kút wɛ́ ŋ́ɡʉ ḿmɑꞋ ndɑ́tsɑ́ŋ, mɛlɑ́Ꞌ Ɛlɔ̂díyɑ ẅí ɑ ḿbɔ́nɛ nzwɛ́-mɔ́ɔmɑ́ wɛ Filîp, lɑ ɑ ńtíi wɛ́. 18Jɑ̂ŋ ńcú mbɔ̌ Ɛlɔ̂dɛ ŋɡɔ: «Nɛpʉ́ʉ kɑ́ pɔ́ ḿbɛ́m ŋɡɔ ɔ tíi nzwɛ́-mɔ́ɔmɑ́ wu pɔ́.» 19Ɛ́ kɑ fú pɔ́Ꞌɔ, lɑ Ɛlɔ̂díyɑ zɑꞋ ŋkwɑɑ yɛ, ḿbɔ́ ńdɔɔ shʉ́ nɛɡɛ pɛ́ jẅí wɛ́, ŋ́kɛ́ ḿbɔɔ ḿbɔ́ ŋ́kuꞋ pɔ́. 20Mbíꞌŋɡɔ fɔɔ Ɛlɔ̂dɛ kɑ pɔ́ ḿbɔ́k Jɑ̂ŋ, ḿbɔ́ ńjí ŋɡɔ ɑ ndɛ́ɛnɛ Lɛ́ɛnɛ́nɛ, ŋ́ɡɛ pɔ nu yi ɛ́ tʉ́ʉnɛ ndʉ́ŋndʉŋ, pɔ́Ꞌɔ lɑ́, ɑ pɔ́ ńtʉ̈ɔ́Ꞌlɛ wɛ́ tʉ̈ɔ́Ꞌlɛnɛ, ḿbɛn ńnɑ́ŋ ŋ́kɔŋ nɛzẅíꞋlɛ sẅiŋɛ yɛ́ tɛꞋ, mbɑ pɑ́Ꞌ ɛ́ mbɔ́ ŋ́ɡɑ́ɑnɛ wɛ́.
21Yɛcɔ́ lɛ́Ꞌ ɡɛ ḿbɔ́, shʉ́ cẅɛt mbɔ̌ Ɛlɔ̂díyɑ, lɛ́Ꞌ ɛ̂yɑ́ pɛ́ pɔ́ ńjʉ́ mɑ́mɑ́ ndínɑ ntɔ́Ꞌ nɛlɔk kẅíitɛ lɛ́Ꞌ yi pɛ́ kɑ pínɛ fɔɔ Ɛlɔ̂dɛ, mbɔ fɔɔ Ɛlɔ̂dɛ fúŋ pɛkɛ́m, ɛ́fúŋ pɛtɑ́tndɑ́-pɑlʉ̈ɔ́Ꞌntsɔ, mbɑ pɛmɑ́pʉɔ tsɛt ŋɡuŋ-Ŋɡɑlilɛɛ. 22Pɛ́ pɔ́ ŋ́ɡɛ ndínɑ, mɔ́ɔ-Ɛlɔ̂díyɑ ɛ̂wɑ́ wɛ mɑŋɡɛ́ tɔ́ ńnʉŋ yúu, ńnʉŋ tɛ nu pɔŋ fɔɔ Ɛlɔ̂dɛ pɔ́p pʉɔ pi ɑ lɑ́Ꞌnɛ ɛ́fúŋ wɔ́p. Fɔɔ cú mbɔ̌ mɔ́ɔ mɑŋɡɛ́ ɛ̂wɑ́ ŋɡɔ: «Píkŋɛ yú yúu mi ɔ kɔŋnɛ ŋɡɔ n dɔk ɛ́sɔŋ wú, tɛ ɛ́ pɔŋ wú, 23ńcú tɛ ŋ́kɑɑ ŋɡɔ: Kʉ̈ɔ́ lɑ́ yi ɔ ɡʉ ḿbíkŋɛ, ŋ ɡʉ ŋ́ɡɑ́ mbɔ̌ ɡu. Ɔ lɑɑ ńzɛɛ ḿbíkŋɛ pɔ ŋɡɔ pûu ɡɑp nɛfɔɔ nɑ́ɑ tsɛtsɛt m bɛ́m pɛ́mnɛ.» 24Mɔ́ɔ mɑŋɡɛ́ ɛ̂wɑ́ cẅɛt, ŋ́ɡʉ ḿbíkŋɛ mɑ́ wɛ ŋɡɔ: «N cú ŋɡɔ fɔɔ lɔk kʉ̈ɔ́ ɛ́sɔŋ wɑ́ɑ?» Mɑ́ wɛ pʉ̈ɔt ŋɡɔ: «Gʉ ḿbíkŋɛ pɔ ŋɡɔ pɛ́ zɑ́Ꞌ tú-Jɑ̂ŋ Mbɑptíshi ŋ́ɡɑ́ mbɔ̌ ɡu.» 25Mɔ́ɔ kʉ̈ɔ́ ŋ́ɡʉ nɛjɔ́ŋ fɔɔ ńcú mbɔ̌ wɛ́ ŋɡɔ: «Ŋ kɔŋ tú-Jɑ̂ŋ Mbɑptíshi, tsɛt pɑk-kɑ́ŋ, pɔ ŋkɔ̂ɔnɛ.» 26Fɔɔ zúꞋ, shʉ́ wɛ́ ɡɔ́ɔ ḿpfúu, lɑ́ nɛpɔ́ yi ɑ lɑ́Ꞌ ńcú mbi pɛɡʉʉ pɛ́ tɛ ŋ́kɑɑ ɡɛ ɑ pɔɔ jí nɛlʉꞋ pɔ́. 27A ɡɔ́ɔ ńtúu mɔ́ɔpúꞌ, ńcú ŋɡɔ ɑ ɡʉ ńdɔk tú-Jɑ̂ŋ ńtɔ́. Mɔ́ɔpúꞌ ɡʉ ndɑ́tsɑ́ŋ ńzɑ́Ꞌ tú-Jɑ̂ŋ, 28ńníꞋ tsɛt kɑ́ŋ ńdɔk ńtɔ́, ŋ́ɡɑ́ mbɔ̌ mɔ́ɔ mɑŋɡɛ́ ɛ̂wɑ́, ɑ cẅɛ́ɛ ŋ́ɡʉ ŋ́ɡɑ́ mbɔ̌ mɑ́ wɛ. 29Gɑŋku-Jɑ̂ŋ ɡɛ ńzúꞋ ŋɡɔ pɛ́ jẅí tɑ̌ɑ wɔ́p, ńtɔ́ ńtíi pfú yɛ́ ńdɔk ŋ́ɡʉ ńtẅí.
Yɛ́su zẅík pʉɔ ntsɑ́Ꞌ yɛ́tɑ́ɑ
(Mɑtʉ̈ɔ 14.13-21; Lúkɑ́shi 9.10-17; Jɑ̂ŋ 6.1-15)
30Gɑŋntúu-Yɛ́su ɛ̂pɑ́ ɡʉ tɛ ḿbɛn, ńtɔ́ ńcúꞋlɛ nɛjɔ́ŋ yɛ́, ḿbɔ́ ḿbɛ́ɛtɛ yúu tsʉʉ yi pɔ́p ɡɛnɛ, ɛ́sẅíi wɛ́ tɛ mbɑ yúu mi pɔ́p zíꞋnɛ pʉɔ. 31A cú mbɔ̌ pɔ́p ŋɡɔ: «Pʉʉ tɔ́ pɛkŋɛ lɔɔ zʉꞋ yi ŋu kɑ́ pɔ́ zúꞋu pɔ́, pʉʉ nɑ́Ꞌ ńjẅiitɛ.» A cú pɔ́Ꞌɔ, mbíꞌŋɡɔ lɑ́Ꞌ tɛ ńzɑ́ɑ kɑ pɔ́ ńdɛɛtɛ, pɛcɔ́ pɔ́ ŋ́ɡʉ, pɛcɔ́ pɔ́ ńtɔ́, tɛ pɔ́p ɡɑŋku pɛ́ pɔɔ ɡẅɛɛ ŋkɑ́ nɛkwɛ́t yúu pɔ́. 32Pɔ́p pɛpɔ́p kúu tsɛt kɑnúꞋ, ḿbɔ́ ŋ́ɡʉ nǔu zʉꞋ yi mɛnjɛ́Ꞌ kɑ́ pɔ́ zúꞋu pɔ́.
33Ŋ́ɡɔ́ ŋ́ɡʉ, lɑ́Ꞌ tɛ ńzɑ́ɑ jʉ́ɔ wɔ́p, ńdíŋɛ wɔ́p, ńzɑ́Ꞌtɛ ńnɛn nɛ́ mɛku, ɛ́fú mɛtʉ́sɔŋ tsʉʉ ńcẅɛt, ḿbiitɛ nǔu yɛcɔ́ njʉ́n, ńzẅíꞋlɛ wɔ́p. 34A kúu zúꞋu, ɛ́fú tsɛt kɑnúꞋ ńcẅɛt, ńjʉ́ɔ nɔɔ-lɑ́Ꞌ, mɛjʉ́ŋ mɔ́p kɔ́ wɛ́, mbíꞌŋɡɔ pɔ́p ḿbɔ́ pɑꞋ nɔɔ-mɛnjinjɔ mi ntsiinɛ kɑ́ pɔ́ ɡú pɔ́ lɑ́. A zɛ nɛzíꞋ wɔ́p nɛ́ mɛnu tɛ ńzɑ́ɑ. 35ZɑꞋ-njí ɡɛ ńdɛɛ, ɡɑŋku pɛ́ tɔ́ nɛjɔ́ŋ yɛ́, ḿbɔ́ ńcú ŋɡɔ: «Pɛkŋɛ zɑ́Ꞌnɛ kɔ̂ŋtɛt, mbɔ zɑꞋ lɛɛ, 36cú mbɔ̌ pʉɔ pɔ́p ɡʉ tsɛt mɛnjɛ́Ꞌ mbɑ tsɛt mɛlɑ́Ꞌ mi ɛ́ mbʉʉ zɑ́Ꞌnɛ, ńzúu yúu pɛjʉ́.» 37A tsɔ́Ꞌ mbɔ̌ pɔ́p ŋɡɔ: «Pʉʉ ŋ́ɡɑ́nɛ yúu pɔ́p kwɛ́t.» Pɔ́p pʉ̈ɔt yɔ́p ŋɡɔ: «Ɛ́ pɑꞋɑ pɛk ɡʉ ḿbʉ́ʉpɛ mɑ́mɑ́ ŋkɑ́p, tɛ ɛ́ pɔ́ ŋ́kuꞋ mɛndɛ́níɛ#6.37 Mɛndɛ́níɛ TɑꞋ ndɛ́nîɛ ŋkɑ́p-tɑꞋ lɛ́Ꞌlɑ́Ꞌ-fɑꞋ. ŋkʉ yɛ́pɑ́, lɑ́ ńdɑ́Ꞌ ńdɔk ńzẅík lɑ́Ꞌ yɔ kɛkʉ̈ɔ́?» 38Yɛ́su píkŋɛ wɔ́p ŋɡɔ: «Pʉʉ ɡẅɛɛ mbɛlɛ̂ɛt ntɑ́Ꞌ yɛ́sʉ́Ꞌʉ́? Pʉʉ ɡʉ ńdíŋɛ pɛkŋɛ jʉ́ɔ.» Pɔ́p ɡʉ ńdíŋɛ, ḿbɛn nzʉʉ ɛ́sẅíi wɛ́ ŋɡɔ: «Pɛk ɡẅɛɛ mbɛlɛ̂ɛt ntɑ́Ꞌ yɛ́tɑɑ ŋ́ɡɛ mɛshú mbɑŋ yɛ́pɑ́.»
39A cú mbɔ̌ pɔ́p ŋɡɔ: «Pʉʉ ɡɛ pʉɔ nɑ́ŋtɛ ndǔ nɛɡíi pɔ́tnɛ́nɛ mɛnɔɔ mɛnɔɔ.» 40Pɛ́ kɔkŋɛ ńnɑ́ŋtɛ sɛ́ mɛnɔɔ mɛnɔɔ, mɛcɔ́ mɛŋkɑŋ pɔ́ pʉɔ mɛɡɛ́mɛ́ntɑɑ, mɛcɔ́ pɔ́ pʉɔ ŋkʉ. 41Yɛ́su cẅɛ́ɛ mbɛlɛ̂ɛt ɛ̂yɑ́ ntɑ́Ꞌ yɛ́tɑɑ pɔ́p mɛshú ɛ̂mɑ́ mbɑŋ yɛ́pɑ́, ḿbʉꞋ tú yɛ́, ŋ́ɡɑ́ pɑꞋlɑ́ mbɔ̌ Sɛ́, ḿbʉ̈ɔ́Ꞌtɛ mbɛlɛ̂ɛt ŋ́ɡɑ́ mbɔ̌ ɡɑŋku pɛ́, nɛpɔ́ yi pɔ́p ɡʉ ŋ́ɡɑptɛ mbɔ̌ lɑ́Ꞌ, ḿbɛn ŋ́ɡɛ pɔ pɔ́Ꞌɔ, nǔu mɛshú. 42Pɔ́p pɛtsʉʉ kwɛ́t, ńzwɛ́t. 43Pɛ́ lɑktɛ mɛkɛm mbɛlɛ̂ɛt mbɑ mɛshú mi ɛ́ vuꞋnɛ, ɛ́ lúu pɛtúŋ ntsɔ̌ppɑ́ nɛ́ nɛɡɛ́m. 44Pʉɔ pi pɔ́p kɑ kwɛ́tnɛ mbɛlɛ̂ɛt, kɑ zɑ́ɑ tɛꞋ, tɛ ndɑꞋ mbɛ́ɛnɛ pɔ́ yúu ntsɑꞋ yɛ́tɑ́ɑ.
Yɛ́su nɛn ndǔ ŋki
(Mɑtʉ̈ɔ 14.22-33; Jɑ̂ŋ 6.16-21)
45Yɛ́su ɡɔ́ɔ ńcú mbɔ̌ ɡɑŋku pɛ́ ŋɡɔ pɔ́p kúu kɑnúꞋ, ḿbiitɛ ḿbɔ́ mbi, ńtúu nɛ́ yɛcɔ́ njʉ́n, nǔu ɡúŋ-Mbɛtsɑyídɑ, ɑ tsʉꞋ nzʉʉ ńdɛɛmɛ lɑ́Ꞌ pɔ́p ɡʉ. 46Yɛ́su lɛɛmɛ lɑ́Ꞌ tɛ pʉɔ ɡɔ́ ŋ́ɡʉ, ɑ kɔ́Ꞌ ndǔ nɛcɔ́ nɛŋkɔ́Ꞌ nɛcɛꞋlɛ Sɛ́. 47Túꞌ ɡɛ ŋ́ɡɔ sʉ́ʉ, mbɔ kɑnúꞋ ɡʉ tɛ ḿbɔ́ sɔŋ-ŋki, Yɛ́su pɛ́t ńtʉ́ʉ pɔ sɛ́ zɛ́nɛjʉ́, 48lɑ́ ŋ́kɛ́ ńjʉ́ɔ pɑꞋ ŋki sɛ́ ŋ́ɡɑ́ɑnɛ wɔ́p, mbíꞋŋɡɔ fɛfʉ̈ɔt kɑ pɔ́ ɛ́fú pɔ mbi nɛ mbi ńtɔ́. Ɛ́ ɡɛ ḿbɔ́ ŋkɔ́Ꞌnjí, Yɛ́su pɔ́ nɑ́ɑnɛ wɔ́p, ḿbɔ́ ńnɛn ndǔ ŋki, tɛ ńdɔɔ nɛlut wɔ́p, 49pɔ́p jʉ́ɔ pɑꞋ ŋu sɛ́ ńnɛn ndǔ ŋki, ŋ́kwɑŋɛ ŋɡɔ ɛ́ jíjʉ́ŋ-ŋu, ńzɛ nɛɡɑ́ ɡwɑ́t nɛ́ tʉʉ. 50Pɔ́p pɛtsʉʉ kɑ pɔ́ ńjʉ́ɔ wɛ́ pɑꞋ ɑ tɔ́nɛ, ńcʉ̈ɔꞋ, lɑ́ Yɛ́su ɡɔ́ɔ ɛ́fúŋ wɔ́p, ɛ́sẅíi wɔ́p ŋɡɔ: «Pʉʉ pɔ́tnɛ ńnɑ́ŋ, ɑ pɔ́ mɔ, kɔɔ pʉʉ pɔ́k.» 51A cú pɔ́Ꞌɔ, ŋ́kúu tsɛt kɑnúꞋ, fɛfʉ̈ɔt zɑ́Ꞌnɛ, ɛ́ tsɑ wɔ́p tɛꞋ, 52mbíꞌŋɡɔ jínu yɔ́p ḿbɛ́t ńtuꞋ tuꞋnɛ, ńzɛɛ ŋ́ɡɔ ḿbɔ́, mbɔ pɔ́p ŋkɑɑ zúꞋ yúu mi Yɛ́su kɑ lɔknɛ nu-mbɛlɛ̂t ńnyɛt pɔ́.
Yɛ́su ɡɛ pɛŋɡɔɔ njʉ́n-Jɛnɛzɑlɛ̂t fíitɛ
(Mɑtʉ̈ɔ 14.34-36)
53Pɔ́p túu ŋki, tɛ ŋ́kúu nǔu njʉ́n yɛ Jɛnɛzɑlɛ̂t, ńcʉŋɛ kɑnúꞋ, ɛ́fú tsɛtú ńcẅɛt, 54ńcẅɛt tɛ ŋ́ɡɔ ńtʉ́ʉ sɛ́, pɛ́ ɡɔ́ɔ ńdii Yɛ́su, 55ŋ́kʉɔtɛ ŋ́ɡʉ tsɛt mɛnjɛ́Ꞌ ńdɔɔ ɡɑŋɡɔɔ, ńtíi wɔ́p ndǔ mɛkúu ńdɔk ńtɔ́ nɛ́ zʉꞋ yi pɛ́ zúꞋnɛ ŋɡɔ ɑ zúꞋu. 56A pɔ́ ńdɛɛ mbɑ ɡɔ́ lɑ́, kɛ pɔ tʉ́sɔŋ ɔɔ, kɛ pɔ tsɛt mɛnjɛ́Ꞌ ɔɔ, pɛ́ pɔ́ ńtíi pɛŋɡɔɔ ńdɔk ńtɔ́, ńnɔŋ zʉꞋ yi ɑ ɡʉ ńdɛɛ zúꞋu, ḿbuꞋ mbɔ́ mbɔ̌ wɛ́ ŋɡɔ ɑ pɛ́m pɔ́p ɡẅɛɛ pɔ ndɑꞋ nɛcɔ́ŋ-ndẅí nɛ́. Pʉɔ pi pɔ́p kuunɛ nɛcɔ́ŋ-ndẅí ɛ̂nɑ́, fíitɛ tsʉʉ.
Currently Selected:
Mɑ́lɛ́kúshi 6: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
