Mɑ́lɛ́kúshi 13
13
Yɛ́su cú pɑꞋ pɛ́ ɡʉ ńdɑ́Ꞌ ŋ́kɛm ndɑ́-nɔŋpɔꞋ
(Mɑtʉ̈ɔ 24.1-2; Lúkɑ́shi 21.5-6)
1Yɛ́su ɡɛ ḿbɔ́ ɛ́fú ndɑ́-nɔŋpɔꞋ ńcẅɛt, wɛcɔ́ tɑꞋ ŋɡɑŋku wɛ cú ŋɡɔ: «Tɑ̌ɑ wɛk, kɛ ńdíŋɛ pɔ mɛŋɡɔꞋ mi pɛ́ kɑ lɔknɛ ŋ́kút zʉꞋ yɔ lɑ́ ńjʉ́ɔ, zʉꞋ ɛ̂yɑ́ ɡú tɛꞋ.» 2Yɛ́su tsɔ́Ꞌ mbɔ̌ wɛ́ ŋɡɔ: «Kɔɔ líŋɛ pɔ pɑꞋ pɛ́ kɑ kútnɛ ɛ́ ɡú pɑꞋnɛ lɑ́. Yɛcɔ́ lɛ́Ꞌ ɡʉ ŋ́ɡɛ ḿbɔ́, pɛ́ kɛm tɛ ŋɡɔꞋ pɔɔ pɛn ńzɑ́pmɛ nǔu yɛcɔ́ pɔ́.»
Yɛ́su cú nu nǔu tɑkŋɛ yi ɛ́ ɡʉ ŋ́ɡɛ ńcẅɛt
(Mɑtʉ̈ɔ 24.3-14; Lúkɑ́shi 21.7-19)
3Pɔ́p ɡʉ tɛ ŋ́kúu ndǔ nɛŋkɔ́Ꞌ-mɛtʉ́-mɛɡwɛ́t-ɔliivɛ, Yɛ́su nɑ́ŋ sɛ́ tɛ ḿbɔ́ ńjʉ́ɔ zʉꞋ-nɔŋpɔꞋ. Pyɛ̂ pɔ́p Jɑ̂k, ŋ́ɡɛ Jɑ̂ŋ pɔ́p Ndɛlɛ́yɑ fɑk mbʉʉ yɔp, ńtɔ́ ḿbíkŋɛ wɛ́ ŋɡɔ: 4«Sẅíi wɛ́k ŋkɑ́ yi yɔ nu ɡʉ ńdɑ́Ꞌ ŋ́ɡɛ. Sẅíi wɛ́k nɛ́ lii yi pɛ́ ɡʉ ńdɔk ńjí ŋɡɔ ŋkɑ́ kuꞋ?»
5Yɛ́su zɛ nɛsẅíi wɔ́p ŋɡɔ: «pʉʉ lɑk tú yʉ́ʉ, ḿbɑ́ɑ ŋu nɛfʉꞋnɛ wʉ́ʉ. 6Pʉɔ tɛ ńzɑ́ɑ ɡʉ ŋ́ɡɛ ńtík lík yɑ́ɑ mbi, mbɑ wɔ̌ lɑ́ nǔu pɔ́p cú ŋɡɔ ɑ Nzɑ́Ꞌŋkʉ ẅi Sɛ́ kɑ kɑꞋnɛ, ńcú pɔ́Ꞌɔ, ńdɔk fu pʉɔ tɛ ńzɑ́ɑ. 7Pʉʉ lɑ́Ꞌ ḿbɔ́ tɛ ńzúꞋ pɛ́ pɔ́ ńcú nu nǔu mɛntsɔ mi ɛ́ cẅɛtnɛ nǔu wʉ́ʉ shʉ́, kɛ ŋɡɑ sɛsɑ ɔɔ, kɔɔ pʉʉ cʉɔꞌ. Ɛ́ sɛ́ ḿbíkŋɛ ŋɡɔ yîyɑ́ yúu piitɛ ńdɛɛ, lɑ́ ɛ́ ɡɔ́ɔ ńdɔk ḿbɔɔ pɔ́ ŋɡɔ njí mɛ pɔ́. 8Lɑ́Ꞌ ɡʉ ńdɑ́Ꞌ ńdɔ sɛ́ ńdʉ̈ɔ́Ꞌ yɛcɔ́, fɔɔtúu lɔ sɛ́ ńdʉ̈ɔꞋ wɛcɔ́#13.8 Wɛcɔ́ nɛkyɛ́Ꞌtɛ ŋɡɔ: Pɛ́ ɡʉ ńdɑ́Ꞌ ńdɔk yɛ́tɛ́ lii ńnyɛt ŋɡɔ ŋkɑ́ yi mbɑ kʉ̈ɔ́ lɑ́ ɡʉ ḿmɛ kuꞋ?, tsɛ́tsɑ́ꞌ ɡʉ ńdɑ́Ꞌ tsʉ́Ꞌnɛ nǔu mɛzʉꞋ tɛ ńzɑ́ɑ, cʉ́ pɛn ḿvu. Mɔnɛ mɛnu lɔk ḿbɔ́ nzɛnɛ ŋɡʉ̈ɔ́Ꞌ. Lɑ́ ŋ́kɛ́ ḿbɔ́ pɔ pɑꞋ mɔ́ɔ nɛmnɛ mɑŋɡɛ́ shǔutɛ lɑ́.
9Pʉʉ lɑk tú yʉ́ʉ, pɛ́ ɡʉ ŋ́ɡɛ ńdɔk wʉ́ʉ ŋ́ɡʉ zʉꞋ yí pɛ́ zɑ́Ꞌnɛ ntsɑŋ zúꞋu, ńtswɑ́ɑ wʉ́ʉ mbɑ tsɛt mɛndɑ́-cúꞋlɛ-pɑyúdɑ, ńdɔk wʉ́ʉ ŋ́ɡʉ mbi pɛŋɡɔ́mnɑɑ pɔ́p pɛfɔɔ-mɛlɑ́Ꞌ mɔnɛ, ŋɡɔ pʉʉ sẅíi nu yɑ́ɑ mbi pɔ́p. 10Ɛ́ kɛ́ ḿbɔ́ ḿbíkŋɛ ŋɡɔ pɛ́ piitɛ ńcẅi Ŋkʉʉ Sʉ́Ꞌnɛ mbɔ̌ mɛŋɡɔŋ tsʉʉ.
11Pɛ́ lɑɑ ŋ́ɡɛ ḿbɔ́ tɛ ŋ́ɡẅɛɛ wʉ́ʉ, ŋ́ɡʉ nɛ́ ŋɑk wʉ́ʉ, kɔɔ pʉʉ puꞋ mbʉʉ yʉʉ ŋɡɔ pʉʉ ɡʉ ńtɔ́ zúꞋu ńcú ŋɡɔ kʉ̈ɔ́ ɔɔ, pʉʉ ɡʉ yʉ́ʉ ɡʉnɛ. Sɛ́ ɡʉ ŋ́kúu zúꞋu ŋkɑ́ yîyɑ́, ńníꞋ nu ntsu pʉʉ, pʉʉ cú. N cú pɑꞋɑ, mbíꞌŋɡɔ, pʉʉ ɡʉ ŋ́ɡʉ tɛ ŋ́kúu zúꞋu, pʉʉ pɔɔ pɛnnɛ ńcú nu pɔ́. Zẅikŋɛ-Sɛ́ tsʉ́Ꞌnɛ ńcú nu nǔu yʉ́ʉ zʉꞋ. 12Ŋu ɡʉ ŋ́ɡɛ ŋ́ɡẅɛɛ mɔ́ɔmɑ́ wɛ ŋ́ɡɑ́ pɛ́ jẅí, Tɑ́-mɔ́ɔ ɡẅɛɛ mɔ́ɔ nɛ ŋ́ɡɑ́ pɛ́ jẅí, mbɔ́ŋkʉ̈ɔ́ ɡʉ ńdɑ́Ꞌ ńdɔ sɛ́ ńtsʉ́ꞌ ɡɑŋmbuu pɛtɑ́t pɔ́p, ŋ́ɡɛ pɛ́ jẅí wɔ́p. 13Pʉɔ tsʉʉ ɡʉ ńdɑ́Ꞌ ḿbɑɑ wʉ́ʉ mɛlɑ́Ꞌ wɑ́ɑ, lɑ́ ŋu ẅí ɑ ńdɑ́Ꞌ sʉk kɛ́ kɑ́ɑ ɡʉnɛ ŋ́ɡɛ ńduk.»
Yɛ́su sɛ́ ńdɛꞋlɛ lii ŋɡʉ̈ɔ́Ꞌ ɡwɛ́
(Mɑtʉ̈ɔ 24.15-31; Lúkɑ́shi 21.20-28; 17.23-24)
14«Ɛ́ ɡʉ ńdɑ́Ꞌ ḿbɔ́ ŋkɑ́ yîyɑ́, pʉʉ jʉ́ɔ yúu pʉ́ʉnɛ yí pɛ́ fúŋnɛ ŋɡɔ ŋkʉꞋnɛ tɑ́k tɔ́ ńtʉ́ʉ zʉꞋ yí ɛ́ ńdɑɑ ḿbɔ́ ɛ́ pɔɔ zɛɛ ńtʉ́ʉ zúꞋu pɔ́. (Ŋu fúŋ zʉꞋ-ŋwɑꞋnɛ yɔ, sɑ́Ꞌ tʉʉ nɛniitɛ ńzúꞋ). Ɛ́ pɔŋ ŋɡɔ, pɛ́ lɑɑ ńdɑ́Ꞌ ḿbɔ́ tɛ ńjʉ́ɔ wɛ́, pʉɔ pi pɔ́p Judɛ̂ ŋ́kʉɔ ńdɔk wɛ mɛŋkɔꞋ ŋ́ɡʉ ńdʉɔmɛ. 15Ŋu ẅí ɑ ɡʉ ńdɑ́Ꞌ ḿbɔ́ ndǔ tɛtɑ́ɑ yi ɛ́ ntsɔꞋndɑ́,#13.15 Tɛtɑ́ɑ yi ɛ́ ntsɔꞋndɑ́pɛ́ lɑ́Ꞌ ndǔ ndɑ́ ndɛ̂k pɛ́ pɛ́t kɛ́ kẅii tú yɛ́. pɑ́ɑ nɛpfúu ŋɡɔ ɑ ɡʉ ḿbɛ́ɛ yúu ndɑ́ lɑ́ ŋ́kʉɔ. 16Ŋu ẅí ɑ ɡʉ ńdɑ́Ꞌ ḿbɔ́ ŋkɑꞋ, pɑ́ɑ nɛcú ŋɡɔ ɑ ɡʉ ḿbɛn ndɑ́ yɛ́ ḿbɛ́ɛ ndẅí-fɑ́k yɛ. 17Yɛ̌ɛ ŋɡʉ̈ɔ́Ꞌ ɛɛ! Tɛ pɑŋɡɛ́ pi pɔ́p ɡʉ ńdɑ́Ꞌ ḿbɔ́ shǔutɛ, mbɑ pi pɔ́p ɡʉ ńdɑ́Ꞌ ḿbɔ́ ńnɔ́ŋ pɔ́ɔmbɔ́t nǔu mîmɑ́ mɛlɛ́Ꞌ ɡʉ ńdɑ́Ꞌ ḿbɔ́ pɑꞋɑ! 18Pʉʉ cɛꞋlɛ Sɛ́ ŋɡɔ yɔ nu ɡɔ́ ńtɔ́, ɛ́ pɔɔ pɔ́ ŋkɑ́ mbʉŋ pɔ́. 19Mbíꞌŋɡɔ ŋɡʉ̈ɔ́Ꞌ yi ɛ́ ɡʉ ńdɑ́Ꞌ ŋ́kúu pʉɔ lɛ́Ꞌ ɛ̂yɑ́ ɡʉ ńdɑ́Ꞌ ńzɑ́ɑ tɛꞋ, tɛ mbɔ pɛ́ ŋkɑɑ mɔ́ zɛɛ ńjʉ́ɔ yɛcɔ́ pɔ́Ꞌɔ pɔ́. Tɛ ɛ́fú pɑꞋ Sɛ́ kɑ nɔŋnɛ ŋɡɔŋ, ŋ́ɡʉ ŋ́kúu ŋkɔ̂ɔnɛ, pɛ́ kɛ́ lɑ́Ꞌ ḿbɛn ńjʉ́ɔ yɛcɔ́ ŋɡʉ̈ɔ́Ꞌ pɔ́Ꞌɔ pɔ́.»
20Lɑ́ ḿbɔ́ yi Tsɑpʉɔ-Sɛ́ ŋkɑɑ pɔ́ pɛꞋnɛ ńzɛɛ ḿbɔɔ jʉ́ɔ ŋɡɔ ɑ ɡʉ ńcẅɛɛtɛ mîmɑ́ mɛlɛ́Ꞌ pɔ́, mbɔ ɛ́ ńdɑɑ ḿbɔ́ wɛcɔ́ ŋu lɑ́Ꞌ mbɔɔ luk. Lɑ́ ɑ kɑ lɔk nu-pʉɔ pi ɑ kɑ tsɔ́Ꞌnɛ wɔ́p ńdɔk ŋ́ɡɛ pʉɔ pɛ́, lɑ ńcẅɛɛtɛ mɛlɛ́Ꞌ ɛ̂mɑ́.
21Pɔ́ꞌɔ lɑ́, ŋu kɛ́ ńdɑ́Ꞌ ńcú mbɔ̌ pʉʉ ŋɡɔ jʉ́ɔ, Nzɑ́Ꞌŋkʉ pʉ́ɔ zɑ́Ꞌnɛ, kɛ ŋɡɔ jʉ́ɔ, ɑ pʉ́ɔlíinɛ zíꞋnɛ ɔɔ, pʉʉ pɑ́ɑ nɛpɛ́m. 22Mbíꞌŋɡɔ ɡɑŋ-cɔtnu ɡʉ ŋ́ɡɛ ńcẅɛt, pɛcɔ́ cú ŋɡɔ: «Mɔ nzɑ́Ꞌŋkʉ Sɛ́ kɑ kɑꞋnɛ, pɛcɔ́ pɔ́ ŋɡɔ pɔ́p pɛŋɡɛ́mndʉ̈ɔꞋ-Sɛ́, ńnyɛt mɛlii, ŋ́ɡɛ mɛŋkʉꞋnɛ mɛnu nɛlɔk ḿbʉ́ʉpɛ tú-pʉɔ, tɛ ḿbɔ́ mbɔ pɔ́p lɔk ḿbʉ́ʉpɛ mbɑ yɛ pʉɔ pi Sɛ́ kɑ tsɔ́Ꞌnɛ. 23Lɑ́ ɛ́ kɛ́ ŋ́ɡʉ nǔu pʉʉ, mbɔ ŋ kɛ́ ńzɑ́Ꞌ njí ɛ́sẅíi wʉ́ʉ nɛ́ nu yí ɛ́ sɛ́ ńtɔ́, pʉʉ lɑk tú yʉ́ʉ.»
Mɔ́ɔ-Ŋu ɡʉ ńdɑ́Ꞌ ḿbɛn nzʉʉ
24Lɑ́, ɛ́ ɡʉ ńdɑ́Ꞌ ḿbɔ́ nǔu mîmɑ́ mɛlɛ́Ꞌ, tɛ mbɔ yɔ ŋɡʉ̈ɔ́Ꞌ lɛɛ mɔ́, pɛ́ jʉ́ɔ
mɔ́nɛm shɔtnɛ sʉ́ʉ, sɑŋ pɔɔ pɛn ńtɑ́ pɔ́. 25Pɛcʉ̈ɔ́Ꞌ-sɑŋ fú tʉ́ nɛpú ḿvutɛ sɛ́,
Yɛ́tɛ yúu sʉ́Ꞌnɛ yi ɛ́ nɛfɑŋ puu ńtɑ́kŋɛ.
26Pɛ́ ɡɔ́ɔ ŋ́kɛ́ ńjʉ́ɔ Mɔ́ɔ-Ŋu pɔ́ tsɛt lɑ́ɑ, ḿbɔ́ ńtɔ́, ŋ́ɡẅɛɛ nɛŋwɑ́ŋɛ mbɑ mɑ́mɑ́ mɛtʉʉ. 27Ńtúu pɛcʉ̈ɔ́Ꞌ-Sɛ́, pɔ́p cúꞋlɛ pʉɔ pɛ́ pi ɑ kɑ tsɔ́Ꞌnɛ ndǔ mbí mɛsɑ́k mɛ́nɛ́kwɑ, pɔ́p fú mɛshʉ́ mɛshʉ́ ńtɔ́.
Yúu mi ɛ́ lɑɑ ḿbɔ́ tʉ́ ŋɡɛ̌m zíꞋ wɛkŋɛ
(Mɑtʉ̈ɔ 24.32-36; Lúkɑ́shi 21.29-36)
28Pʉʉ pɛ́ɛ fʉꞋ nǔu tʉ́ ŋɡɛ̌m. Pʉʉ pɔ́ tɛ ńjʉ́ɔ mɛfu mɛ́ kunɛ, lɑ́ ḿbɛn ńzɛ nɛtɔ́p, pʉʉ cú ŋɡɔ: «Ŋkɑ́-luu sɛ́ ńtɔ́.» 29Ndʉ́ŋndʉŋ pɔ́Ꞌɔ, pʉʉ ńdɑ́Ꞌ ḿbɔ́ tɛ ńjʉ́ɔ mɔnɛ mɛnu zɛ nɛlɛɛtɛ, pʉʉ jí ŋɡɔ ŋkɑ́ yi Mɔ́ɔ-Ŋu ɡʉ ńtɔ́, kẅɛ́Ꞌlɛ tɛ ḿbɔ́ ḿbɑ́ɑtɛ, ɛ́ tɔ́ tɛ ḿbɔ́ nɛjɛꞋndɑ́. 30Ɛ sẅíi wʉ́ʉ kwɑꞋ nɛ́nẅín, ku-pʉɔ pi pɔ́p ndǔ mbí ŋkɔ̂ɔnɛ, kɛ́ ɡɛ ńdɑ́Ꞌ ḿpfútɛ tɛ ḿmɛ, kɛ́ pɔ́ yi mɔnɛ mɛnu tsʉʉ tɔ́ pɔ́. 31Nɛfɑŋ pɔ́p tsɛ́tsɑ́Ꞌ ɡʉ ŋ́ɡɛ ḿmɛ, lɑ́ sẅiŋɛ yɑ́ɑ lɑ́Ꞌ mbɔɔ pɛ́.
32Lɑ́, ɛ́ kɛ́ ŋ́ɡʉ nǔu yîyɑ́ lɛ́Ꞌ, pɔ́p ŋkɑ́ yi mɔnɛ mɛnu ɡʉ ŋ́ɡɛ ńdɛɛ, mbɔ sɑ̌ɑ ŋu kɛ́ jí, tɛ mbɑ pɛcʉ̈ɔ́Ꞌ-Sɛ́ pi pɔ́p tʉ́nɛ́pú, tɛ mbɑ mɔ́ɔ-Sɛ́. NdɑꞋ Tɑ̌ɑ zɛ́nɛjʉ́ jínɛ.
33Pʉʉ kɛ́ ńdɑk tú yʉ́ʉ, kɔɔ pʉʉ fʉ̈ɔ́nɛ, ńdɛ́. Mbíꞌŋɡɔ pʉʉ kɑ́ pɔ́ ńjí ŋkɑ́ yi mîmɑ́ mɛnu ɡʉ ŋ́ɡɛ ńtɔ́ pɔ́. 34Mɛnu ŋkɑ́ ɛ̂yɑ́ ɡʉ ŋ́ɡɛ ḿbɔ́ pɑꞋ nu-ŋu ẅí ɑ tsʉꞋ nɛɡʉ nɛnɛn, fɛ́ɛ ndɑ́ yɛ mbɔ̌ ŋɡɑŋfɑꞋ wɛ́, ŋ́ɡɑ́ fɑꞋ yí ẅîwɑ́ ŋu ɡʉ ńtsʉ́ꞌ ḿbɔ́ ɛ́fɑꞋ, ńcú mbɔ̌ ŋu ẅí ɑ pyɛ́pnɛ ntsuŋkɑ́Ꞌ ŋɡɔ kɔɔ ɑ fʉ̈ɔ́nɛ ńdɛ́. 35Mbɑ pʉʉ yʉ́ʉ, kɔɔ pʉʉ fʉ̈ɔ́nɛ ńdɛ́. Mbíꞌŋɡɔ pʉʉ kɑ́ pɔ́ ńjí ŋkɑ́ yi ŋɡɑŋnjɛ́Ꞌ sɛ́ ńtɔ́ pɔ́. Kɛ ɑ ɡʉ ńtɔ́ pɔ mbɔ́tnjí ɔɔ? Kɛ pɔ tsɛt nɛtúꞋ ɔɔ? Kɛ pɔ ntsuŋkẅɛ́Ꞌ ɔɔ? Kɛ pɔ mbɑꞋmbɑꞋɑ́ ɔɔ? 36A lɑɑ ḿvukŋɛ vukŋɛnɛ ńtɔ́ ŋkɑ́ kʉ̈ɔ́ lɑ́, mbɔ ɛ́ kɑ́ pɔŋ ŋɡɔ ɑ ɡɔ́ kẅɛ́ɛtɛ wʉ́ʉ, pʉʉ pɔ́ ńdɛ́ pɔ́. 37Nu yi n cúnɛ mbɔ̌ pʉʉ lɑɑ, n cú mbɑ mbɔ̌ pʉɔ tsʉʉ. Kɔɔ ŋu fʉ̈ɔ́nɛ ńdɛ́.
Currently Selected:
Mɑ́lɛ́kúshi 13: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
