Mɑ́lɛ́kúshi 1
1
Nu-Jɑ̂ŋ Mbɑptíshi
(Mɑtʉ̈ɔ 3.1-12; Lúkɑ́shi 3.1-6, 15-18; Jɑ̂ŋ 1.19-28)
1Nzɛnɛ Ŋkʉʉ Sʉ́Ꞌnɛ nǔu Yɛ́su Kɛlístɔ mɔ́ɔ-Sɛ́, pʉ̈ɔ́lɑ́. 2Ɛ́ kɑ zɛ pɑꞋ Sɛ́ kɑ cúnɛ tsɛt ŋwɑꞋnɛ-ŋɡɛ́mndʉ̈ɔ́Ꞌ Ɛsɑ̌yɑ ŋɡɔ:
«ZuꞋu, ŋ ɡʉ ńdɑ́Ꞌ ńtúu mɑ́ntúu wɑɑ
ɑ pɔ́ mbi ḿbɔ́ ńniitɛ ndúŋ ẅi ɔ ńdɛɛ nǔu.»
3Ŋɡi-ŋu kɔꞋ ɛ́fú kɔ̂ŋtɛt, ńcú ŋɡɔ:
«Pʉʉ niitɛ sɛ̂ndúŋ ẅi Tsɑpʉɔ ńdɛɛ nǔu,
ŋ́ɡɛ mɛlɛ̌ɛndúŋ mi ɑ ńdɛɛ nǔu tʉ́ʉ ndʉ́ŋndʉŋ.#1.3 Es 40.3»
4Ɛ́ ɡɔ́ ńdẅiklɛ wɛcɔ́ ŋu ɡɛ ńcẅɛt kɔ̂ŋtɛt lík yɛ́ pɔ́ Jɑ̂ŋ. Ḿbɔ́ ɛ́sɑ́Ꞌ mbɔ̌ lɑ́Ꞌ ŋɡɔ, pɔ́p kúpmɛ mɑt wɔp, ɑ nuꞋ wɔ́p ŋki, Sɛ́ likŋɛ mɛnu kɛpɔŋ mɔ́p ŋ́ɡɑ́ mbɔ̌ pɔ́p. 5Pʉɔ tsʉʉ fú tsɛt pɑk-ŋɡɔŋ-Judɛ̂ ḿbɔ́ ńtɔ́, tɛ mbɑ pʉɔ tsʉʉ Yɛlúsɑlɛm tɔ́ nɛjʉ́ɔ Jɑ̂ŋ ɛ̂wɑ́ ńjʉ́ɔ wɛ́ pɔ́Ꞌɔ, ḿbɛ́m mɛnu kɛpɔŋ mɔ́p, ɑ nuꞋ wɔ́p tsɛt ŋki-Juudɛŋ.
6Jɑ̂ŋ kɑ pɔ́ kɔ̂ŋtɛt pɔ́Ꞌɔ, ḿmɑꞋ ndẅí, mbɔ pɛ́ kɑ lɔk mɛnuk-nɑɑ ẅi pɛ́ fúŋnɛ ŋɡɔ shɑmɔ̂ɔ ḿbɑ́Ꞌ, ńdɔk ŋɡup-nɑɑ ńtsɔ́ lúꞋ yɛ́. A kɑ pɔ́ ŋ́kwɛ́t ŋɡẅíimɛ ḿbɛn ńjʉ́ lumɔ́nɑɑ. 7A kɑ pɔ́ ɛ́sɑ́Ꞌ mbɔ̌ lɑ́Ꞌ ńcú ŋɡɔ: «Wɛcɔ́ ŋu nzʉʉ mɔ ḿbɔ́ ńtɔ́, ɑ tsɑ wɑ́ɑ, ŋ kɑ́ kuꞋ mbɑ nɛŋɔ́Ꞌnɛ sɛ́, ŋ́kíɛꞋ mɛŋkʉ-mɛtɑp mɛ́ pɔ́. 8Ɛ́ ɡʉ nǔu mɔ, mbɔ n nuꞋ wʉ́ʉ pɔ tsɛt ŋki. Lɑ́ ɑ ɡʉ ńtɔ́ ńnuꞋ wʉ́ʉ pɔ mbɔ̌ Zẅikŋɛ Lɛ́ɛnɛ́nɛ.»
Cẅɛɛŋki-Yɛ́su
(Mɑtʉ̈ɔ 3.13-17; Lúkɑ́shi 3.21-22)
9Ɛ́ kɑ pɔ́ nǔu mɛlɛ́Ꞌ ɛ̂mɑ́, Yɛ́su pɔ́ Nɑ̌ɑzɑlɛt, tsɛt pɑk-ŋɡɔŋ-Ŋɡɑlilɛɛ ɛ́fú zúꞋu ńtɔ́ ńjʉ́ɔ Jɑ̂ŋ, ɑ nuꞋ wɛ́ tsɛt ŋki-Juudɛŋ. 10Yɛ́su pɔ́ ɛ́fú ŋki ńcẅɛt, ńjʉ́ɔ ntsu-tʉ́nɛ́pú ɡɔ́ɔ ńtsɔ́Ꞌnɛ ńtʉ́ʉ, Zẅikŋɛ Lɛ́ɛnɛ́nɛ cúŋ, ḿbɔ́ pɑꞋ puutɛ lɑ́, ńtɔ́ ńtʉ́ʉ nǔu wɛ́. 11Ŋɡi fú tʉ́nɛ́pú ńcú ŋɡɔ: «Ɔ pɔ́nɛ mɔ́ɔ wɑɑ, ŋ kɔŋ wú tɛꞋ, ɔ ŋkʉ-tʉ́m yɑ́ɑ.»
12Zẅikŋɛ tɔ́ nǔu Yɛ́su pɔ́Ꞌɔ, ńtsʉ́ʉnɛ wɛ́, ɑ ɡɔ́ɔ ŋ́ɡʉ nɛ́ kɔ̂ŋtɛt. 13Pɔ́p mɛyúumɛku pɔ́nɛ zúꞋu, ɑ nɑ́ŋ nɑ́ŋnɛ lɛ́Ꞌlɑ́Ꞌ mɛɡɛ́mɛ́nɛ́kwɑ, Sɑ́ttɑ pɔ́nɛ ńtɔ́ ŋ́kwɑꞋnɛ wɛ́ ŋɡɔ ɑ fɑɑnɛ nu. Pɛcʉ̈ɔꞋ-Sɛ́ pɔ́ ńtɔ́ɔtɛ wɛ́.
Nu yí Yɛ́su kɑ pɔ́ ńzíꞋ pʉɔ
(Mɑtʉ̈ɔ 4.12-17; Lúkɑ́shi 4.14-15)
14Pɛ́ kɑ pɔ́ tɛ ŋ́ɡẅɛɛ Jɑ̂ŋ, ŋ́ɡɔ́ɔ ńníꞋ wɛ́ ndɑ́tsɑ́ŋ, Yɛ́su ɡʉ nɛ́ Ŋɡɑlilɛɛ. Ḿbɔ́ ńcẅi Ŋkʉʉ Sʉ́Ꞌnɛ-Sɛ́ ńcú ŋɡɔ: 15«Ŋkɑ́ pɑ́Ꞌnɛ mbɔ ɛ́ kuꞋ tɛ Sɛ́ ɡʉ ńzɛ nɛnyɛt nɛfɔɔ nɛ́. Pʉʉ kúpmɛ mɑt wʉʉ, ḿbɛn ḿbɛ́m Ŋkʉʉ Sʉ́Ꞌnɛ ɛ̂wɑ́.»
16Yɛ́su ɡɛ ḿbɔ́ ńnɛn mbʉʉ nɛtʉŋ-ŋki-Ŋɡɑlilɛɛ, ńjʉ́ɔ mbɛ́ɛnɛ yɛ́pɑ́, ɑ pɔ́ Símɔ pɔ́p ntsʉ́Ꞌzʉʉ wɛ Ndɛlɛ́yɑ. Pɔ́p pɔ́ pɑmɑꞋ mɛshú, ḿbɔ́ ḿmɑꞋ mɛŋkʉ ŋki. 17A cú mbɔ̌ pɔ́p ŋɡɔ: «Pʉʉ tɔ́ ńcʉ́ɔ nzʉʉ mɔ, mɔ ŋ́ɡɛ pʉʉ tsʉꞋ ńcúꞋlɛ pɔ pʉɔmɛsɔŋ.» 18Pɔ́p ɡɔ́ɔ ńnɑ́ mɛŋkʉ mɔ́p, ńcʉ́ɔ nzʉʉ yɛ́.
19A nɑ́Ꞌ ńnɛn, ńjʉ́ɔ pɛcɔ́ pʉɔ pɛ́pɑ́, Jɑ̂k pɔ́p ntsʉ́Ꞌnzʉʉ wɛ Jɑ̂ŋ, pɔ́ɔ-Zɛbɛ́dɛ́ɛ, pɔ́p pɔ́ tsɛt kɑnúꞋ ḿbɔ́ ńniitɛ mɛŋkʉ mɔ́p. 20A ɡɔ́ɔ ɛ́fúŋ wɔ́p ɡúu, pɔ́p ɡɔ́ɔ ńnɑ́ tɑ́t wɔp Zɛbɛ́dɛ̂ pɔ́p ɡɑŋfɑꞋ, tsɛt kɑnúꞋ, ńcʉ́ɔ nzʉʉ yɛ́.
Ŋu ẅí yɛcɔ́ zẅikŋɛ kɛpɔŋ kɑ ɡẅɛɛnɛ wɛ́, ḿbɔ́ ḿbúunɛ wɛ́
21Pɔ́p pɛ́pɔ́p ɡʉ tɛ ŋ́kúu Kɑpɛɛnɑwûm, ɛ́ pɔ́ lɛ́Ꞌ-nɛjẅiitɛ-pɑyúdɑ, Yɛ́su ɡʉ ndɑ́-cúꞌlɛ, ńzɛ nɛzíꞋ pʉɔ nɛ́ nu-Sɛ́. 22A ḿbɔ́ ŋ́ɡɛ pɑꞋ ŋu Sɛ́ túunɛ wɛ́, ḿbɔɔ ŋ́ɡɛ pɑꞋ pɑkyɛ́Ꞌtɛ nɛpʉ́ʉ-Sɛ́ pɔ́, lɑ́Ꞌ zúꞋ sẅiŋɛ yɛ́, ḿmɑɑ tɛꞋ.
23A ḿbɔ́ sẅiŋɛ wɛcɔ́ ŋu pɔ́ yɛ́ ndɑ́-cúꞌlɛ ɛ̂yɑ́, mbɔ yɛcɔ́ zẅikŋɛ kɛpɔŋ kɑ ɡẅɛɛ wɛ́, ɑ nɑ́ŋ tɛ ŋ́ɡíɛt ŋɡɔ: 24«Yɛ́su mɔ́ɔ-Nɑ̌zɑlɛt, pɛkŋɛ ɡẅɛɛ kʉ̈ɔ́? Ɔ kɑ fɑ́ɑ ńtɔ́ pɔ nɛpík wɛ́k? Mɔ sɛ́ ńjí wú. Ɔ fú nɛjɔ́ŋ Sɛ́.» 25Yɛ́su cʉ́ɔk yîyɑ́ zẅikŋɛ kɛpɔŋ ńcú mbɔ̌ wɛ́ ŋɡɔ: «Nɑ́Ꞌ, ɛ́fú nǔu ŋu wɑ́ ńcẅɛt!» 26Zẅikŋɛ kɛpɔŋ ɛ̂yɑ́ puu ńtsʉꞋnɛ wɛ́ tsʉ́Ꞌnɛnɛ, tɛ ŋ́ɡɔ́ ɛ́fú nǔu wɛ́ ńcẅɛt, ńtɔɔ ŋɡuŋ tɛꞋ. 27Ɛ́ kʉꞋnɛ lɑ́Ꞌ tsʉʉ, tɛ lɛ́m yɔ́p sɑ́ɑnɛ, pɔ́p píkŋɛ tsɛtsɛt pɔ́p ŋɡɔ: «Tɛ yɔ nu ŋɡɔ́ku? A pɔ́ ɛ́sɑ́Ꞌ Ŋkʉʉ Sʉ́Ꞌnɛ tɛ ńcʉ̈ɔ́k mɛzẅikŋɛ kɛpɔŋ, pɔ́p zúꞋ ntsu wɛ́.» Ɛ́ pɑꞋɑ ḿbɔ́ pɔ yɛcɔ́ nu fí kɛkʉ̈ɔ́? A sɛ́ ńzíꞋ pʉɔ pɑꞋ ŋu Sɛ́ túunɛ. 28Pɔ́ꞌɔ lɑ́, lík yɛ́ ɡɔ́ɔ ɛ́sɑt lɑ́Ꞌ tsɛt pɑk-ŋɡɔŋ-Ŋɡɑlilɛɛ tsʉʉ.
Yɛ́su sɛ́ ńzɔŋ mɛɡɔɔ tɛ ńzɑ́ɑ
(Mɑtʉ̈ɔ 8.14-15; Lúkɑ́shi 4.38-39)
29Yɛ́su pɔ́p ɡɑŋku pɛ́ ɡɔ́ɔ ɛ́fú ndɑ́-cúꞌlɛ ńcẅɛt. Pɔ́p Jɑ̂k ŋ́ɡɛ Jɑ̂ŋ ɡʉ ndɑ́ pɛ́ Símɔ pɔ́p Ndɛlɛ́yɑ. 30Mɑ́kẅiꞋ-Símɔ kɑ nɔɔ, mbʉʉnút pɔ́ nǔu wɛ́. Yɛ́su kúu zúꞋu pɛ́ ɡɔ́ɔ ɛ́sẅíi wɛ́. 31A kẅɛ́Ꞌlɛ ńtʉ́ʉ mbi yɛ́, ŋ́ɡẅɛɛ pɔ́ yɛ́, ŋ́ɡɛ ɑ lɔ sɛ́. Mbʉʉnút zɑ́Ꞌnɛ, ɑ ɡʉ ńniitɛ yúujʉ́ ŋ́ɡɑ́ mbɔ̌ pɔ́p.
32Ntsuŋkẅɛ́Ꞌ ɡɛ ḿbɔ́, tɛ mbɔ mɔ́nɛm pɛ́ mɔ́, pʉɔ zúꞋu zɛ nɛtíi ɡɑŋɡɔɔ tsʉʉ, mbɑ pʉɔ pinɛ mɛcɔ́ mɛzẅikŋɛ kɛpɔŋ kɑ ɡẅɛɛnɛ wɔ́p, ńdɔk ńtɔ́ ńjʉ́ɔ Yɛ́su. 33Pʉɔ-tʉ́sɔŋ ɛ̂wɑ́ tsʉʉ cúꞋlɛ ntsundɑ́. 34Yɛ́su ɡɛ mɛɡɔɔ ntɛ́ nɛ́ ntɛ́ nǔu pʉɔ tɛ ńzɑ́ɑ mɛ, ḿbɛn ńzuŋ mɛzẅikŋɛ kɛpɔŋ tɛ ńzɑ́ɑ nǔu pʉɔ. A ŋkɑɑ pɛ́m tɛ yɛcɔ́ zẅikŋɛ kɛpɔŋ ɛ̂yɑ́ cú nu pɔ́, mbíꞌŋɡɔ pɔ́p kɑ pɔ́ ńjí ŋu ẅí ɑ jʉ́.
Yɛ́su sẅíi nu-Sɛ́ Ŋɡɑlilɛɛ
(Lúkɑ́shi 4.42-44)
35Njí kɑ pɔ́ ŋ́kiɛ, zʉꞋ pɛ́t ɛ́sʉ́ʉ sʉ́ʉnɛ, Yɛ́su lɔ sɛ́, ɛ́fú ndɑ́ ńcẅɛt, ŋ́ɡʉ nɛ́ ŋkɔ̂ŋtɛt, ńzɛ nɛcɛꞋlɛ Sɛ́. 36Símɔ pɔ́p pɛcɔ́ ŋɡɑŋku-Yɛ́su tsʉꞋ nzʉʉ ḿbɔ́ ńdɔɔ wɛ́, 37ńdɔɔ wɛ́ lɔɔnɛ tɛ ńjʉ́ɔ wɛ́, ńcú mbɔ̌ wɛ́ ŋɡɔ: «Pʉɔ tsʉʉ sɛ́ ńdɔɔ wú.» 38A pʉ̈ɔt mbɔ̌ pɔ́p ŋɡɔ: «Pɛkŋɛ pɛn ŋ́ɡʉ zʉꞋ ndɛꞋ, tsɛt mɛcɔ́ mɛlɑ́Ꞌ mi ɛ́ shʉ́ zɑ́Ꞌnɛ, ńcẅi Ŋkʉʉ Sʉ́Ꞌnɛ-Sɛ́ mbɑ zúꞋu, mbíꞋŋɡɔ ɛ́ ncẅɛtnɛ ndɑ́ mɑ́ɑ.» 39A cú pɔ́Ꞌɔ, ḿbɔ́ ńnɛn zʉꞋ tsʉʉ tsɛt pɑk-ŋɡɔŋ-Ŋɡɑlilɛɛ, ŋ́kúu tsɛt mɛndɑ́-cúꞋlɛ, ńcẅi Ŋkʉʉ Sʉ́Ꞌnɛ-Sɛ́, ḿbɛn ńzuŋ mɛzẅikŋɛ kɛpɔŋ nǔu pʉɔ.
Yɛ́su ɡɛ wɛcɔ́ ŋɡɑŋkɑꞋ fíitɛ
(Mɑtʉ̈ɔ 8.1-4; Lúkɑ́shi 5.12-16)
40Wɛcɔ́ ŋɡɑŋkɑꞋ ɡɛ ńtɔ́ ŋ́kẅíꞋlɛ mbi Yɛ́su, ḿbuꞋ mbɔ́ mbɔ̌ wɛ́ ńcú ŋɡɔ: «Ɔ lɑɑ ŋ́kɔŋ, mbɔ ɔ kuꞋ nɛɡɛ ɛ fíitɛ.» 41Mɛjʉ́ŋ mɛ́ kɔ́ wɛ́, ɑ cɑklɛ pɔ́ ŋ́ɡẅɛɛ wɛ́, ńcú ŋɡɔ: «Ŋ kɔŋ pɔ́Ꞌɔ, fíitɛ.» 42ŊkɑꞋ ɡɔ́ɔ ḿmɛ nǔu wɛ́, ɑ fíitɛ. 43Ŋ́ɡɛ pɔ́Ꞌɔ, ɑ zuŋ wɛ́ ńcú ŋɡɔ ɑ fú zúꞋu ŋ́ɡʉ; 44ḿbɛn ńcú ŋɡɔ: «Pɑ́ɑ nɛcú sɑ̌ɑ nu mbɔ̌ ŋu. Gʉ ńnyɛt pɔ mbʉʉ yu mbɔ̌ nɔŋpɔꞋ, ḿbɛn ńnɔŋ pɔꞋ ẅí nɛpʉ́ʉ-Mɔ̌sɛ̂ɛ sɛ́ ḿbíkŋɛ mbɔ̌ ŋu ẅí ŋkɑꞋ mɛnɛ nǔu wɛ́, ɡɛ pɔ́Ꞌɔ, pʉɔ jí ŋɡɔ ɔ fíitɛ.» 45Lɑ́ ɑ ɡʉ, ńdɔk nu ɛ̂yɑ́ ɛ́sɑt zʉꞋ. Ɛ́ pɔ́ pɔ́nɛ tɛ Yɛ́su pɔɔ ḿbɛn ɛ́sɑ́ɑnɛ sɑ́ɑnɛ́nɛ, ŋ́kúu yɛcɔ́ tʉ́sɔŋ pɔ́, ńtsʉ́ꞌ ŋ́ɡɔ́ŋ pɔ sɛ̂ndúŋ, zʉꞋ yí pʉɔ kɑ́ pɔ́ zúꞋu pɔ́. Pɛ́ kɛ́ ḿbɔ́ ɛ́fú zʉꞋ tsʉʉ ńtɔ́ tɔ́nɛ ńjʉ́ɔ wɛ́.
Currently Selected:
Mɑ́lɛ́kúshi 1: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
