Mɑtʉ̈ɔ 26
26
Pɛ́ sɛ́ ńdɔɔ nɛjẅí Yɛ́su
(Mɑ́lɛ́kúshi 14.1-2; Lúkɑ́shi 22.1-2; Jɑ̂ŋ 11.47-53)
1Yɛ́su kɑ zíꞋ nu-Sɛ́ mbɔ̌ pʉɔ tɛ ḿbɔ́tnɛ ńnɑ́ŋ, ńcú mbɔ̌ ɡɑŋku pɛ́ ŋɡɔ: 2«Pʉʉ zɛɛ ḿbɔ́ ńjí ŋɡɔ, ɛ́ tsʉ́Ꞌ ńjɑ́k pɔ lɛ́Ꞌ pɛ́pɑ́ pɛ́ jʉ́ ndínɑ-Pɑ́skɑ. Ŋkɑ́ yi pɛ́ ɡʉ ɛ́fɛn Mɔ́ɔ-Ŋu, pɛ́ kẅii wɛ́ nǔu tʉ́ mbɑ́ŋtɛ pɑ́ŋtɛ́nɛ.»
3Ɛ́ pɔ́ pɔ nǔu mɛlɛ́Ꞌ ɛ̂mɑ́, pɛtɑ́tndɑ́-pɑnɔŋpɔꞋ pɔ́p pɛkɛ́m-lɑ́Ꞌ cúꞋlɛ ntɔ́Ꞌ-Kɑyífɑ, ɑ pɔ́ nɔŋpɔꞋ wɛ ɡwɛ́, 4ńcúꞋlɛ pɔ́Ꞌɔ, ńzɑ́p ŋɡɔ pɔ́p ɡʉ ɛ́sɔ́tɛ ŋ́ɡẅɛɛ Yɛ́su, ńjẅí wɛ́. 5Lɑ́ pɔ́p pɔ́ ńcú ŋɡɔ kɔɔ pɛ́ kɛ́ ŋ́ɡẅɛɛ wɛ́ lɛ́Ꞌ-ndínɑ, ḿbɔ́k lɑ́Ꞌ nɛtɑ́k zʉꞋ.
Wɛcɔ́ mɑŋɡɛ́ lɔk lɑmɛ́ndɑɑ ńzɔ́Ꞌ tú-Yɛ́su
(Mɑ́lɛ́kúshi 14.3-9; Jɑ̂ŋ 12.1-8)
6Ɛ́ pɔ́ ŋkɑ́ ɛ̂yɑ́ Yɛ́su pɔ́ Mbɛtɑni, ndɑ́-Símɔ̂ŋ, ŋɡɑŋkɑꞋpɑ́p, 7ńnɑ́ŋ sɛ́ ḿbɔ́ ŋ́kwɛ́t yúu, wɛcɔ́ mɑŋɡɛ́ kúu yɛ́ ndɑ́, ŋ́ɡɔ́ ńtɔ́ nɛjɔ́ŋ Yɛ́su ŋ́ɡẅɛɛ ndɑ́ŋ, yɛcɔ́ lɑmɛ́ndɑɑ yí ɛ́ cʉ́ɔk ŋkɑ́p tɛꞋ pɔ́ tsɛtú, ɑ tswɛtɛ tú-Yɛ́su. 8Gɑŋku-Yɛ́su jʉ́ɔ, ɛ́ pʉ́k wɔ́p tɛꞋ, pɔ́p sẅíitɛ ŋɡɔ: «A zɛɛ ḿbʉ́ʉpɛ yɔ lɑmɛ́ndɑɑ mɛlɑ́Ꞌ kʉ̈ɔ́? 9Ɛ́ ńdɑɑ ḿbɔ́ pɛ́ fɛn, ńcẅɛ́ɛ mɑ́mɑ́ ŋkɑ́p, ŋ́ɡɑ́ mbɔ̌ pɛpúŋ.»
10Yɛ́su jí kwɑŋɛ yɔ́p, ńcú mbɔ̌ pɔ́p ŋɡɔ: «Pʉʉ ɡɑ́ɑnɛ mɛlɑ́Ꞌ kʉ̈ɔ́? A ɡɛ pɔ nu sʉ́Ꞌnɛ nǔu mɔ. 11Pʉʉ ɡʉ ḿbɔ́ ńjʉ́ɔ pɛpúŋ pɔ ŋkɑ́ tsʉʉ, lɑ́ ŋ́ɡʉ nǔu mɔ, mbɔ pɛkŋɛ kɛ́ pɔ́ ŋkɑ́ tsʉʉ pɔ́. 12Mɑŋɡɛ́ wɔ lɔk yɔ lɑmɛ́ndɑɑ ńzɔ́Ꞌ mbʉʉ yɑɑ, ńdɔk ńzɑ́Ꞌ njí ńzɔ́Ꞌ wɑ́ɑ lɑ pɛ́ tɑ́ɑ ńníꞋ wɑ́ɑ nɛshi. 13Ɛ sẅíi wʉ́ʉ, kwɑꞋ nɛ́nẅín, mbɑ ɡɔ́ lɑ́ yi pɛ́ ɡʉ ńdɑ́Ꞌ ńcẅi Ŋkʉʉ sʉ́Ꞌnɛ-Sɛ́ zúꞋu ndǔ mbí ɔɔ, pɛ́ ɡʉ ńdɑ́Ꞌ ḿbɛn ḿbɔ́ ńcú yúu mi mɑŋɡɛ́ wɑ́ ɡɛnɛ, ńdɔk kẅíitɛ wɛ́.»
Jẅidɑ ɡʉ ɛ́fɛn Yɛ́su mbɔ̌ pɛtɑ́tndɑ́-pɑnɔŋpɔꞋ
(Mɑ́lɛ́kúshi 14.12-16; Lúkɑ́shi 22.7-13)
14Wɛcɔ́ tɑ́Ꞌ ŋu nǔu pʉɔ ntsɔ̌ppɑ́ nɛ́ nɛɡɛ́m, lík yɛ́ pɔ́ Jẅidɑ Iskɑlyɔt, ɡʉ ńjʉ́ɔ pɛtɑ́tndɑ́-pɑnɔŋpɔꞋ, 15ńcú mbɔ̌ pɔ́p ŋɡɔ: «N dɑɑ ńnyɛt wʉ́ʉ pɑ́Ꞌ pʉʉ ɡʉ ŋ́ɡɛ lɑ ŋ́ɡẅɛɛ Yɛ́su, pʉʉ ɡɑ́ kʉ̈ɔ́ mbɔ̌ mɔ?» Ɛ́ ɡɛ pɔ́Ꞌɔ, pɔ́p ɡɑ́ ŋkɑ́p pɑk mɛɡɛ́mɛ́ntɑ́t mbɔ̌ wɛ́. 16A cẅɛ́ɛ, ńzɛ nɛlɔɔ shʉ́ pɑ́Ꞌ ɑ ɡʉ ɛ́fɛn Yɛ́su mbɔ̌ pɔ́p.
Yɛ́su túu ɡɑŋku pɛ́ nɛniitɛ yúu-Pɑ́skɑ
(Mɑ́lɛ́kúshi 14.12-21; Lúkɑ́shi 22.7-14, 21-23; Jɑ̂ŋ 13.21-30)
17Ɛ́ ɡɛ ḿbɔ́ nduŋmbi lɛ́Ꞌlɑ́Ꞌ nǔu ŋɡɑp yí pɛ́ ḿbɔ́ ŋ́kwɛ́t mbɛlɛ̂ɛt kɛ́ fɛntɛ, ńdɔk ńjʉ́ ndínɑ-Pɑ́skɑ, ɡɑŋku-Yɛ́su tɔ́ ḿbíkŋɛ wɛ́ ŋɡɔ: «Ɔ kɔŋ ŋɡɔ pɛk ɡʉ ɡɔ́, ńniitɛ yúujʉ́-Pɑ́skɑ zúꞋu?» 18Yɛ́su cú mbɔ̌ pɔ́p ŋɡɔ: «Pʉʉ ɡʉ tʉ́sɔŋ, ńjʉ́ɔ mɑ́kɛkɛ, ńcú mbɔ̌ wɛ́ ŋɡɔ: Cícɑ cú ŋɡɔ pɛk sẅíi wú ŋɡɔ yɛ́ ŋkɑ́ pɑ́Ꞌɑ ḿbɔ́ ŋ́kuꞋ, ɑ sɛ́ ŋ́kɔŋ ŋɡɔ pɔ́p ɡɑŋku pɛ́ jʉ́ wɔp ndínɑ-Pɑ́skɑ pɔ njɛ́Ꞌ wu.» 19Gɑŋku pɛ́ ɡɛ pɔ ndʉ́ŋndʉŋ pɑ́Ꞌ ɑ cúnɛ, ńniitɛ yúupɛjʉ́-Pɑ́skɑ zúꞋu.
20Ɛ́ ɡɛ ḿbɔ́ ntsuŋkẅɛ́Ꞌ, Yɛ́su pɔ́p ɡɑŋku pɛ́ ntsɔ̌ppɑ́ nɛ́ nɛɡɛ́m nɑ́ŋ sɛ́ nɛkwɛ́t yúu. 21Pɔ́p pɔ́ ŋ́kwɛ́t yúu, Yɛ́su cú ŋɡɔ: «Ɛ sẅíi wʉ́ʉ, kwɑꞋ nɛ́nẅín, wɛcɔ́ tɑ́Ꞌ ŋu tsɛtsɛt pʉʉ ɡʉ ɛ́fɛn wɑ́ɑ.» 22Pɔ́p zúꞋ, ḿbuu ḿmʉk, mbɑ wɔ̌ lɑ́ tsɛtsɛt pɔ́p píkŋɛ ŋɡɔ: «Ndɛ, ḿbɔ́ ɛ́ pɔ́ mɔ?» 23Yɛ́su pʉ̈ɔt mbɔ̌ pɔ́p ŋɡɔ: «Ŋu ẅí pɔ́ yɛ́kŋɛ ɡʉ ḿbuutɛ tsɛt kɑ́ŋ, ɑ ŋu ẅí ɑ ɡʉ ɛ́fɛn wɑ́ɑ.» 24Mɔ́ɔ-Ŋu ɡʉ ḿpfú, ɛ́ pɔ́ pɑ́Ꞌ pɛ́ kɑ cúnɛ tsɛt ŋwɑꞋnɛ-Sɛ́, lɑ́, pʉ́ktú ŋu ẅí ɑ ɛ́fɛn wɛ́. Mbi pɑ́Ꞌ pɛ́ ŋ́kɑɑ ŋ́ɡʉ ḿbí wɛ́ pɔ́. 25Jẅidɑ, ŋɡɑŋmɛnɑŋ ɛ̂wɑ́, píkŋɛ yɛ́ Yɛ́su ŋɡɔ: «Cícɑ ɔ lɑ́Ꞌ wɑ́ɑ kɛkʉ̈ɔ́?» Yɛ́su pʉ̈ɔt mbɔ̌ wɛ́ ŋɡɔ: «Gu kɛ́ nɛ́ ńcú!»
Yúupɛjʉ́-Tsɑpʉɔ
(Mɑ́lɛ́kúshi 14.22-26; Lúkɑ́shi 22.15-20; 1 Kɔlɛ̂ŋtɛ 11.23-25)
26Pɔ́p pɛ́pɔ́p pɔ́ ńjʉ́ yúupɛjʉ́, Yɛ́su pɛ́ɛ mbɛlɛ̂ɛt, ŋ́ɡɑ́ pɑꞋlɑ́ mbɔ́-Sɛ́, ḿbʉ̈ɔ́Ꞌtɛ ŋ́ɡɔ ŋ́ɡɑ́ mbɔ̌ ɡɑŋku pɛ́, ńcú ŋɡɔ: «Pʉʉ kɔ ŋ́kwɛ́t, yɔ mbɑp-mbʉʉ yɑɑ,» 27ḿbɛn ńtíi ntúꞋ-mɛluꞋ, ŋ́ɡɑ́ pɑꞋlɑ́ mbɔ̌ Sɛ́, ŋ́ɡɔ́ ŋ́ɡɑ́ mbɔ̌ ɡɑŋku pɛ́, ńcú ŋɡɔ: «Pʉʉ kɔ ńnɔ́ pɛtsʉʉ. 28MbíꞋŋɡɔ yɔ mɛci mɑ́ɑ, ɛ́ mɛci mí Sɛ́ lɔknɛ ŋ́ɡwɑt kɑɑ, ɛ́ mi ɛ́ tswɛtnɛ nǔu tú-pʉɔ tɛ ńzɑ́ɑ, pɑ́Ꞌ Sɛ́ ɡʉ ńdɔk ńdikŋɛ mɛnu kɛpɔŋ mɔ́p. 29Ɛ sẅíi wʉ́ʉ, ŋ kɛ́ lɑ́Ꞌ ḿbɛn ńnɔ́ mɔnɛ mɛluꞋ pɔ́, tɛ ńdɑ́Ꞌ ńtsʉ́Ꞌ ńnɔ́ pɔ mɛ fí ŋkɑ́ yi pɛkŋɛ ńtsʉ́Ꞌ ḿbɔ́ pɔ tsɛt nɛfɔɔ-Tɑ̌ɑ mɔ.»
30Ŋ́ɡɛ pɔ́Ꞌɔ, pɔ́p pɛ́pɔ́p ɡɔ́ɔ ŋ́kɛ́ ńzɔp mɛŋki ńdɔk ŋ́ɡúꞋlɛ Sɛ́, ŋkɑ́ kuꞋ pɔ́p cẅɛt, ŋ́ɡʉ nɛ́ ndǔ nɛŋkɔ́Ꞌ-mɛtʉ́-mɛɡwɛ́t-ɔliivɛ.
Yɛ́su cú ŋɡɔ Pyɛ̂ ɡʉ ŋ́ɡɛ muŋɛ wɛ́
(Mɑ́lɛ́kúshi 14.27-31; Lúkɑ́shi 22.31-34; Jɑ̂ŋ 13.36-38)
31Pɔ́p pɔ́ ŋ́ɡʉ, Yɛ́su cú mbɔ̌ pɔ́p ŋɡɔ: «Ɛ́ ɡʉ ŋ́ɡɛ ḿbɔ́ nɛtúꞋ lɔ́Ꞌnɛ, pʉʉ pɛtsʉʉ tɛmtɛ ḿmɛꞋ wɑ́ɑ ŋ́kʉɔ, ɛ́ puutɛ pɑ́Ꞌ pɛ́ kɑ ŋwɑꞋnɛ́nɛ ŋɡɔ Sɛ́ cú ŋɡɔ: Mɔ, ŋ ɡʉ ńdɑ́Ꞌ ńjẅí mbyɛ́p mbí, mɛnjinjɔ mɛ́ sɑt tɛt.» 32Yɛ́su pɛn ńcú ŋɡɔ: «Mɔ, ŋ ɡʉ ŋ́ɡɛ ḿbɔ́ tɛ ńzẅíimɛ nǔu nɛvú, ḿbiitɛ Ŋɡɑlilɛɛ ńzẅíꞋlɛ wʉ́ʉ.» 33Pyɛ̂ cú mbɔ̌ wɛ́ ŋɡɔ: «Pɛcɔ́ pʉɔ lɑɑ ḿmɛꞋ wú ŋ́kʉɔ pɛtsʉʉ, mbɔ ɛ́ lɑɑ ḿbɔ́ m bɔɔ wú mɛꞋ.» 34Yɛ́su pʉ̈ɔt mbɔ̌ wɛ́ ŋɡɔ: «Lɑ́ ŋ kɛ́ ɛ́sẅíi wú, kwɑꞋ nɛ́nẅín, mɔ̂ŋkʉ̈ɔ́Ꞌ ɡʉ ŋ́ɡɛ ŋ́ɡɔ́ ńtɔ́ŋ nɛtúꞋ lɔ́Ꞌnɛ, mbɔ ɔ muŋɛ wɑ́ɑ ŋkɑ́ yɛ́tɑ́t.» 35Pyɛ̂ cú mbɔ̌ wɛ́ ŋɡɔ: «Pɛ́ lɑɑ ńzɛɛ ńtɛmtɛ wûu ḿbɔ́ ńdɔk ŋ́ɡʉ pɔ nɛjẅí, mbɔ ɛ́ lɑɑ ḿbɔ́ m bɔɔ wú muŋɛ!» PfuꞋ ɡɑŋku pɛ́ pɛtsʉʉ pɛn ńcú yɔ́p pɔ pɔ́Ꞌɔ.
Yɛ́su sɛ́ ńcɛꞋlɛ Sɛ́ Ŋɡɛ̂tsɛ́mɑnɛ̂
(Mɑ́lɛ́kúshi 14.32-42; Lúkɑ́shi 22.39-46)
36Yɛ́su pɔ́p ɡɑŋku pɛ́ ɡʉ tɛ ŋ́kúu yɛcɔ́ zʉꞋ-ŋkɑ́Ꞌ yí pɛ́ fúŋnɛ ŋɡɔ Ŋɡɛ̂tsɛ́mɑnî, ɑ cú mbɔ̌ pɔ́p ŋɡɔ: «Pʉʉ nɑ́ŋ zɑꞋnɛ, ŋ ɡʉ zíꞋnɛ ńcɛꞋlɛ Sɛ́,» 37ɛ́fɑk pyɛ̂ pɔ́p mbɔ́ŋkʉ̈ɔ́ Zɛbɛ́dɛ̂ pɛ́pɑ́, pɔ́p pɛpɔ́p ɡʉ, ɑ zɛ nɛzúꞋ kɛ́kɑ́ŋ tʉ́m yɛ́, nɛvú kwɛ́t wɛ́, 38ŋ́ɡɔ́ɔ ŋ́kɛ́ ńcú mbɔ̌ pɔ́p ŋɡɔ: «Tʉ́m yɑ́ɑ pɑ́Ꞌɑ ḿbɔ́ ḿmʉk pɔ nǔu ntɛ́ yi ḿbɔ́ m pfú pfúnɛ. Pʉʉ nɑ́ŋ zɑꞋnɛ, ḿbɑ́ɑ ŋu wɛkŋɛ nɛmɛꞋ mbʉʉ yɛ ńdɛ́,» 39ńcú pɔ́Ꞌɔ, ńnɑ́Ꞌ ŋ́ɡʉ mbi, ŋ́kɔkŋɛ ńnɔɔ sɛ́, ɛ́sɔp shʉ́ wɛ́ sɛ́, ḿbɔ́ ńcɛꞋlɛ Sɛ́ ńcú ŋɡɔ: «Tɑ̌ɑ mɔ, ɛ́ lɑɑ ḿbɔ́ yi ḿbɔ́ ɛ́ pɔ́ pɔ́Ꞌɔ, ɔ ɡɛ yɔ ntúꞋ-ŋɡʉ̈ɔ́Ꞌ fú nɛjɔ́ŋ mɔ ńtsʉ́ʉtɛ! Lɑ́, kɔɔ ɡɛ wɑɑ nɛkɔŋtɛ, ɡɛ pɔ wu nɛkɔŋtɛ.» 40Yɛ́su cɛꞋlɛ Sɛ́ pɔ́Ꞌɔ, ḿbɛn nzʉʉ nɛ́ nɛjɔ́ŋ ɡɑŋku pɛ́, ńjʉ́ɔ pɔ́p pɔ́ ńdɛ́. A cú mbɔ̌ Pyɛ̂ ŋɡɔ: «Pʉʉ fɑ́ɑ mbɔɔ kuꞋ pɑ́Ꞌ ḿbɔ́ pɛkŋɛ tɛmtɛ ɛ́sʉk fɛlɔ́k mbɑ nǔu tɑ́Ꞌ nɛm pɔ́ pʉ́ɔ! 41Kɔɔ pʉʉ pɛn ńdɛ́, pʉʉ cɛꞋlɛ Sɛ́, ḿbɔ́k mɛnu nɛkwɑꞋnɛ wʉ́ʉ, pʉʉ vu. Tʉ́m-ŋu tɛntɛ tɛꞋ lɑ́, mbɑp-mbʉʉ pɔ́t pɔ́tnɛ.» 42Yɛ́su pɛn ɛ́fú nɛjɔ́ŋ pɔ́p ŋ́ɡʉ nǔu mbɑ́ɑtɛ yɛ́pɑ́, ńcɛꞋlɛ Sɛ́ ńcú ŋɡɔ: «Tɑ̌ɑ mɔ, ɛ́ lɑɑ ḿbɔ́ yi yɛcɔ́ nɛɡɛ tɛ kẅɛ́Ꞌlɛ yɔ ntúꞋ nɛjɔ́ŋ mɔ kɑ́ pɔ́ ɡú pɔ́, ŋ́kɛ́ ḿbɔ́ yi ŋ kɛ́ ńnɔ́ nɔ́nɛ, ɔ ɡɛ pɑ́Ꞌ ɔ kɔŋnɛ,» 43ńcú pɔ́Ꞌɔ, ḿbɛn ḿbɛn nzʉʉ, ńjʉ́ɔ pɔ́p pɔ́ ńdɛ́ lɛ́nɛ, mbíꞋŋɡɔ ɛ́ kɑ ɡɔ́ ḿbɔ́, mbɔ fɛlɔ́k ɡẅɛɛ wɔ́p tɛꞋ. 44Yɛ́su nɑ́ wɔ́p, ḿbɛn ŋ́ɡʉ cɛꞋlɛ Sɛ́ nǔu mbɑ́ɑtɛ yɛ́tɑ́t, ḿbɛn ńcú pɔ nu yí ɑ zɛɛnɛ ńcú, 45ŋ́ɡɛ pɔ́Ꞌɔ, ḿbɛn ɛ́fú zúꞋu ḿbɛn nzʉʉ, ŋ́kẅɛ́ɛtɛ ɡɑŋku pɛ́, ńcú mbɔ̌ pɔ́p ŋɡɔ: «Pʉʉ tsuŋ ńdɛ́, ńjẅiitɛ sʉ́Ꞌnɛ. Pʉʉ ɡɔ́ɔ ŋ́kɛ́ ńjʉ́ɔ, ŋkɑ́ kuꞋ! Pɛ́ ɡʉ ɛ́fɛn Mɔ́ɔ-Ŋu mbɔ̌ pʉɔ kɛpɔŋ.» 46Pʉʉ lɔ sɛ́ pɛkŋɛ ɡʉ! Ŋu ẅí ɑ fɛnnɛ wɑ́ɑ mbɔ̌ pɔ́p pʉ́ɔlɑ́ ɑ tɔ́nɛ lɑɑ!
Pɛ́ ɡẅɛɛ Yɛ́su
(Mɑ́lɛ́kúshi 14.43-50; Lúkɑ́shi 22.47-53; Jɑ̂ŋ 18.3-12)
47Yɛ́su pɛ́t ńcú cúnɛ, Jẅidɑ, ẅí ɑ wɛcɔ́ tɑ́Ꞌ nǔu ɡɑŋku pɛ́ ntsɔ̌ppɑ́ nɛ́ nɛɡɛ́m tɔ́, lɑ́Ꞌ pɔ́ nzʉʉ yɛ́ tɛ ńzɑ́ɑ, ŋ́ɡẅɛɛ mɛníi-ntsɔ pɔ́p pɛsʉʉ, ḿbɔ́ pʉɔ pínɛ pɛtɑ́tndɑ́-pɑnɔŋpɔꞋ pɔ́p pɛkɛ́m-lɑ́Ꞌ túunɛ wɔ́p. 48Ɛ́ ɡɔ́ ḿbɔ́, mbɔ Jẅidɑ kɑ sẅíi wɔ́p pɑ́Ꞌ ɑ ɡʉ ŋ́ɡɛ lɑ pɔ́p lii Yɛ́su, yîyɑ́ lii pɔ́ ŋɡɔ ɑ lɑɑ ńcɛꞋlɛ ŋu, ḿmɑ́ɑ wɛ́ pɔ́p jí ŋɡɔ ɑ jʉ́ ŋ́ɡɔ́ɔ ŋ́ɡẅɛɛ wɛ́. 49Jẅidɑ tɔ́ ɛ́ pɔɔ lɑ́ɑtɛ ɑ ɡɔ́ɔ ńtsʉ́ʉtɛ mbʉʉ yɛ, ńtɔ́ nɛjɔ́ŋ Yɛ́su, ńcú ŋɡɔ: «Ndɛ, n cɛꞋlɛ,» ŋ́ɡɔ́ɔ ḿmɑ́ɑ wɛ́. 50Yɛ́su tsɔ́Ꞌ mbɔ̌ wɛ́ ŋɡɔ: «Súu wɑɑ, ɡɛ pɔ yúu mi ɔ tɔ́nɛ nɛɡɛ.» Lɑ́Ꞌ ɡɔ́ɔ ŋ́kɛ́ ńtɔ́ ŋ́ɡẅɛɛ Yɛ́su. 51Wɛcɔ́ tɑ́Ꞌ ŋu nǔu pʉɔ pínɛ pɔ́p pɛ́ Yɛ́su lɑ́Ꞌnɛ ḿbɔ́, sɔŋ níi-ntsɔ tsɛt mbɑ́ɑ nɛlɔk ŋ́kʉ́ɔꞋ ŋɡɑŋfɑꞋ-nɔŋpɔꞋ wɛ ɡwɛ́, kẅɛ́ɛtɛ nɛtúutɛ nɛ́, ńzwɑ́. 52Yɛ́su cú mbɔ̌ wɛ́ ŋɡɔ: NíꞋ níi yu tsɛt mbɑ́ɑ, ŋu ẅí ɑ sɔŋnɛ níi ɡʉ ńdɑ́Ꞌ ḿpfú pɔ níi. 53Ɔ kɑ́ pɔ́ ńjí ŋɡɔ ɛ́ lɑ́Ꞌ ḿbɔ́ pɛ́Ꞌnɛ ḿbɔ́ nu-ntsɔ, mbɔ n dɑ́Ꞌ ɛ́fúŋ Tɑ̌ɑ mɔ ɑ ɡɔ́ɔ ńtúu pɛcʉ̈ɔ́Ꞌ pɛ́, tɛ pɔ́p lɛɛ ntsɑ́Ꞌ nɛ ntsɑ́Ꞌ. 54N dɑɑ ŋ́kɛ́ ŋ́ɡɛ pɔ́Ꞌɔ, yúu mi pɛ́ kɑ ŋwɑꞋnɛ́nɛ tsɛt ŋwɑꞋnɛ-Sɛ́ ɡɛ pɑ́Ꞌɑ lɑ ḿbuutɛ? Pɛ́ kɑ ŋwɑꞋnɛ tsɛtú ŋɡɔ: Mɛnu ɡʉ ńdɑ́Ꞌ ńdɛɛtɛ pɔ pɑ́Ꞌ ɛ́ lɛɛtɛ́nɛ ŋkɔ̂ɔnɛ lɑɑ. 55Ŋ́ɡɛ pɔ́Ꞌɔ, Yɛ́su ɡɔ́ɔ ŋ́kɛ́ ńcú mbɔ̌ lɑ́Ꞌ ŋɡɔ: «Pʉʉ ɡɔ́ ńtɔ́ nɛɡẅɛɛ wɑ́ɑ, ŋ́ɡẅɛɛ mɛníi-ntsɔ pɔ́p pɛsʉʉ pɑ́Ꞌ ŋkɑ́ yi pʉʉ ɡʉ ɡẅɛɛ ntsɔ́ŋ pɑ́Ꞌɑ ŋɡɔ́ku? Mɔ m̄bɔ́ lɛ́Ꞌ tsʉʉ ḿbɔ́ pɔ tsɛtsɛt pʉʉ zʉꞋ-nɔŋpɔꞋ, ḿbɔ́ ńzíꞋ pʉɔ nɛ́ nu-Sɛ́! Pʉʉ kɛ́ mbɔɔ wɑ́ɑ ɡẅɛɛ. 56Lɑ́ mɛnu mí ɛ́ lɛɛtɛ́nɛ lɑɑnɛ lɔk ḿbuutɛ nǔu nu yí pɛŋɡɛ́mndʉ̈ɔ́Ꞌ-Sɛ́ kɑ ŋwɑꞋnɛ́nɛ.» Pɛ́ ɡẅɛɛ Yɛ́su pɑ́Ꞌɑ, ɡɑŋku pɛ́ pɛtsʉʉ mɛꞋ wɛ́ ŋ́kʉɔ.
Yɛ́su mbi pɑsɑ́Ꞌlɑ́Ꞌ
(Mɑ́lɛ́kúshi 14.53-65; Lúkɑ́shi 22.54-55, 63-71; Jɑ̂ŋ 18.13-14, 19-24)
57Pʉɔ pínɛ pɔ́p ɡẅɛɛnɛ Yɛ́su lɔk wɛ́ ŋ́ɡʉ nɛ́ ntɔ́Ꞌ-Kɑyífɑ. A pɔ́ nɔŋpɔꞋ wɛ ɡwɛ́. Mbɔ pɑkyɛ́ꞌtɛ nɛpʉ́ʉ-Mɔ̌sɛ̂ɛ pɔ́p pɛkɛ́m-lɑ́Ꞌ tɛmtɛ ńcúꞋlɛ zúꞋu. 58Ŋ́ɡʉ nǔu Pyɛ̂, ɑ cʉ́ɔ nzʉʉ Yɛ́su lɑ́ ŋ́kɛ́ ḿbɔ́ pɔ ŋɡɑ sɛsɑ, ŋ́ɡʉ tɛ ńtɔ́k ŋ́kúu tɛtɑ́ɑ-nɔŋpɔꞋ wɛ ɡwɛ́, ŋ́ɡʉ ńnɑ́ŋ sɛ́ tsɛtsɛt ɡɑŋfɑꞋ, ḿbɔ́ ńdɔɔ nɛjʉ́ɔ pɑ́Ꞌ yɔ nu ɡʉ ńdẅiklɛ pɔ́Ꞌɔ. 59Pɛtɑ́tndɑ́-pɑnɔŋpɔꞋ pɔ́p pɑsɑ́Ꞌlɑ́Ꞌ, pɔ́ ńdɔɔ cɔtnu yí pɔ́p ɡʉ ńzɑ́p tú-Yɛ́su lɑ ńdɔk ŋ́ɡɛ pɛ́ jẅí wɛ́. 60Ŋ́kɛ́ ḿbɔɔ ḿbɔ́ ńjʉ́ɔ pɔ́. Tɛ mbɑ pɑ́Ꞌ ɡɑŋcɔtnu kɑ tɔ́nɛ tɛ ńzɑ́ɑ ḿbɔ́ ńzɑ́p mɛnu tú-Yɛ́su. Ɛ́ tsʉ́Ꞌ nɛlẅiklɛ, pɛcɔ́ pʉɔ pɛ́pɑ́ tɔ́ ńcú ŋɡɔ: 61«Ŋu wɑ́ lɑ́ kɑ cú ŋɡɔ: A kuꞋ nɛkɛm ndɑ́-nɔŋpɔꞋ, ńdɔk lɛ́Ꞌ pɛtɑ́t ŋ́kút.» 62NɔŋpɔꞋ wɛ ɡwɛ́ ɡɔ́ɔ ŋ́kɛ́ ńdɔ sɛ́ ḿbíkŋɛ Yɛ́su ŋɡɔ: «Ɔ nɑꞋ nɑꞋnɛ ɛɛ? Ɔ kɑ́ pɔ́ ńzúꞋ mɛnu mí pɛ́ cúnɛ nǔu ɡu lɑ́ pɔ́ kɛ?» 63Lɑ́ Yɛ́su pɔɔ tsɔ́p. NɔŋpɔꞋ wɛ ɡwɛ́ cú mbɔ̌ wɛ́ ŋɡɔ: «Lɔk lík-Sɛ́ ẅi ɑ ntʉʉ, ŋ́kɑɑ ɛ́sẅíi wɛ́k ŋɡɔ ɔ Nzɑ́Ꞌŋkʉ ẅí ɑ mɔ́ɔ-Sɛ́ kɛ ɔ kɑ́ pɔ́ ńjʉ́ɔ pɔ́ ɔɔ? 64Yɛ́su tsɔ́Ꞌ mbɔ̌ wɛ́ ŋɡɔ: Ɔ cú, lɑ́ ŋ kɛ́ niitɛ ɛ́sẅíi wʉ́ʉ, tɛ ɛ́fú ŋkɔ̂ɔnɛ, pʉʉ ɡʉ ŋ́ɡɛ ńjʉ́ɔ Mɔ́ɔ-Ŋu nɑ́ŋ nǔu ɡúŋ-pɔ́ tʉʉ-Ŋɡɑŋ-mɛtʉʉ tsʉʉ, ḿbɛn ńjʉ́ɔ ɑ pɔ́ ɛ́fú tsɛt lɑ́ɑ tʉ́nɛ́pú ńtɔ́.» 65NɔŋpɔꞋ wɛ ɡwɛ́ zúꞋ pɔ́Ꞌɔ, ɛ́shɔtnɛ ɛ́sɑtɛ mɛndẅí mɛ́, ńcú ŋɡɔ: «A zɔɔtɛ Sɛ́, pɛkŋɛ pɛn ńdɔɔ pɔ yɛ́tɛ́ ntɛ́ pɑjʉ́ ńjʉ́ɔ. KwɑꞋ pʉʉ yʉ́ʉ zúꞋ pɑ́Ꞌ ɑ zɔɔtɛnɛ Sɛ́.» 66Pʉʉ Kwɑŋɛ yʉ́ʉ ŋɡɔ kʉ̈ɔ́? Lɑ́Ꞌ pʉ̈ɔt ŋɡɔ: «A ŋu ẅí ḿbɔ́ pɛ́ jẅí wɛ́ jẅínɛ.» 67Pɔ́p ɡɔ́ɔ ŋ́kɛ́ ńtẅik mɛ́tɛ́ shʉ́-Yɛ́su, ŋ́kwɛn wɛ́, pɛcɔ́ pʉɔ pɔ́ ńtɛ́m mbɔ́ nɛtúutɛ yɛ́, 68ńcú ŋɡɔ: «Nzɑ́Ꞌŋkʉ, kíɛꞋ ŋu ẅí ɑ tswɑ́ɑnɛ wú.»
Pyɛ̂ muŋɛ Yɛ́su ŋkɑ́ yɛ́tɑ́t
(Mɑ́lɛ́kúshi 14.66-72; Lúkɑ́shi 22.56-62; Jɑ̂ŋ 18.15-18, 25-27)
69Ɛ́ ɡɔ́ ḿbɔ́ pɔ́Ꞌɔ, Pyɛ̂ nɑ́ŋ tɛtɑ́ɑ. Wɛcɔ́ ŋɡɑŋfɑꞋ wɛ mɑŋɡɛ́ tɔ́, ńcú mbɔ̌ wɛ́ ŋɡɔ: «Mbɑ ɡu yú pʉʉ pɛ́ Yɛ́su ŋu-Ŋɡɑlilɛɛ wɑ́ ḿbɔ́ ńnɛn.» 70Pyɛ̂ muŋɛ wɛ́ tɛ lɑ́Ꞌ pɔ́ ńzúꞋ zúꞋnɛ tsʉʉ ńcú ŋɡɔ: «Ŋ kɑ́ jí nu yí ɔ lɔɔnɛ nɛcú pɔ́!» 71Ŋ́ɡɔ́ɔ ŋ́kɛ́ ŋ́ɡʉ ńnɑ́ŋ nɛ́ ntsuŋkɑ́Ꞌ. Wɛcɔ́ ŋɡɑŋfɑꞋ wɛ mɑŋɡɛ́ jʉ́ɔ wɛ́, ńcú mbɔ̌ pʉɔ pínɛ pɔ́p ḿbɔ́nɛ zúꞋu ŋɡɔ: «Ŋu wɔ pɔ́p Yɛ́su ŋu-Nɑ̌ɑzɑlɛt kɑ pɔ́nɛ.» 72Pyɛ̂ pɛn ḿmuŋɛ, ńcú tɛ ŋ́kɑɑ ŋɡɔ: «ŋ kɑ́ jí ŋu ɛ̂wɑ́ pɔ́.» 73Pɛ́ nɑꞋ ńnɑ́ŋ, pʉɔ pí pɔ́p ḿbɔ́nɛ zúꞋu tɔ́ nɛjɔ́ŋ Pyɛ̂, ńcú ŋɡɔ: «Ɛ́ kɑ́ pɔ́ nu lɔɔnɛ pɔ́, ɔ wɛcɔ́ ŋu wɔp. Yu ntɛ́ nɛsẅíŋɛ ɡɛnɛ lɑ pɛk cú pɔ́Ꞌɔ.» 74A ɡɔ́ɔ ŋ́kɛ́ ńzɛ nɛɡɔ́: «Sɛ́ jẅí wɑ́ɑ, zɑŋ yɑ́ɑ, ŋ kɑ́ pɔ́ ńjí ŋu ɛ̂wɑ́ pɔ́.» Ŋ́ɡɔ́ ńcú pɔ́Ꞌɔ, mɔ̂ŋkʉ̈ɔ́Ꞌ pɔ́ ńtɔ́ŋ. 75Pyɛ̂ ɡɔ́ɔ ŋ́kẅíitɛ pɑ́Ꞌ Yɛ́su lɑ́Ꞌnɛ ńcú mbɔ̌ wɛ́ ŋɡɔ mɔ̂ŋkʉ̈ɔ́Ꞌ ɡʉ ŋ́ɡɛ ŋ́ɡɔ́ ńtɔ́ŋ, mbɔ ɔ muŋɛ wɑ́ɑ ŋkɑ́ yɛ́tɑ́t, ɛ́fú tɛtɑ́ɑ ńcẅɛt, ŋ́kíi tɛꞋ.
Currently Selected:
Mɑtʉ̈ɔ 26: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
