Mɑtʉ̈ɔ 17

Yɛ́su sɛ́ ńnyɛt nɛŋwɑ́ŋɛ wɛ mbɔ̌ pɛcɔ́ ɡɑŋku pɛ́

(Mɑ́lɛ́kúshi 9.2-13; Lúkɑ́shi 9.28-36)

1Ɛ́ lɛɛ lɛ́Ꞌ pɛ́nɛ́ntúkú, Yɛ́su fɑk Pyɛ̂, ŋ́ɡɛ Jɑ̂k, nɛ́ Jɑ̂ŋ ɑ pɔ́ mɔ́ɔmɑ́ pɛ́ Jɑ̂k, ńdɔk wɔ́p ŋ́ɡʉ ŋ́kɔ́Ꞌ ndǔ nɛcɔ́ mɑ́mɑ́ nɛŋkɔ́Ꞌ. Pɔ́p pɛ́pɔ́p pɔ́ zúꞋu zɛnɛ pɔ́p. 2Pɔ́p jʉ́ɔ lii-Yɛ́su shɔtnɛ mbi pɔ́p, shʉ́ wɛ́ ŋwɑŋɛ pɑ́Ꞌ mɔ́nɛm lɑ́. Mɛndẅí mɛ́ fúk tɛ ŋ́kyɛꞋ zʉꞋ. 3Pɔ́p jʉ́ɔ, mbɔ Mɔ̌sɛ̂ɛ pɔ́p Ɛlíyɑ vukŋɛ vukŋɛnɛ ńcẅɛt, pɔ́p pɛ́ Yɛ́su pɔ́ ɛ́sẅíŋɛ. 4Pyɛ̂ ɡɔ́ɔ ḿvukŋɛ vukŋɛnɛ, ńcú mbɔ̌ Yɛ́su ŋɡɔ: «Tsɑpʉɔ, ɛ́ pɔŋ pɑ́Ꞌ pɛkŋɛ zɑꞋnɛ lɑɑ. Pɛ́m n nʉk mɛtɑp mɛ́ntɑ́t, tɑ́Ꞌ pɔ́ yú, tɑ́Ꞌ pɔ́ yɛ́ Mɔ̌sɛ̂ɛ, yɛcɔ́ pɔ́ yɛ́ Ɛlíyɑ.» 5A pɛ́t ńcú cúnɛ, yɛcɔ́ lɑ́ɑ, yi ɛ́ ŋwɑŋɛ ŋwɑŋɛ́nɛ ńcúŋ ŋ́kẅíipɛ wɔ́p, ŋɡi-ŋu fú tsɛtú ńcú ŋɡɔ: «Yɔ Mɔ́ɔ wɑɑ, ŋ kɔŋ wɛ́ tɛꞋ, ɑ yɑ́ɑ tsɑ́ɑtɛ, pʉʉ zúꞋ ntsu wɛ́.» 6Gɑŋku-Yɛ́su ɡɔ́ɔ ńzúꞋ yɔ nu, ḿvu sɛ́, ɛ́sɔp shʉ́ wɔ́p sɛ́, ḿbɔ́ ḿbɔ́k tɛꞋ. 7Yɛ́su tɔ́, ńzɑ́p pɔ́ nǔu pɔ́p, ńcú ŋɡɔ: «Pʉʉ lɔ sɛ́, kɔɔ pʉʉ pɛn ḿbɔ́k.» 8Pɔ́p pʉꞋ tú yɔ́p ḿbɑ́tɛ, ńtsʉ́Ꞌ ńjʉ́ɔ pɔ Yɛ́su zɛnɛjʉ́.

9Pɔ́p pɛ́pɔ́p ɡɛ ḿbɔ́ ɛ́fú ndǔ nɛŋkɔ́Ꞌ ńcúŋ, ɑ kwɛn wɔ́p ŋɡɔ, kɔɔ pɔ́p kẅíi tɛ ŋu ndɛꞋ fɛ́ꞌnɛ ńjí yúu mi pɔ́p jʉ́ɔnɛ, tɛ ńdɑ́Ꞌ ŋ́kúu ŋkɑ́ yi Mɔ́ɔ-Ŋu ńzẅíimɛ nǔu nɛvú.

10Pɔ́p zúꞋ pɔ́Ꞌɔ, ḿbíkŋɛ Yɛ́su ŋɡɔ: «Tɛ mɛlɑ́Ꞌ kʉ̈ɔ́ pɑkyɛ́ꞌtɛ nɛpʉ́ʉ-Mɔ̌sɛ̂ɛ cú ŋɡɔ Ɛlíyɑ ɡʉ ńdɑ́Ꞌ ḿbiitɛ ńtɔ́?» 11Yɛ́su pʉ̈ɔt ŋɡɔ: «Ɛ́ nɛ́nẅín, Ŋɡɛ́mndʉ̈ɔ́Ꞌ-Sɛ́ Ɛlíyɑ ḿbɔ́ ŋ́ɡʉ ńtɔ́, nɛzɑ́p mbɑ kʉ̈ɔ́ lɑ́ nǔu yɛ́ zʉꞋ. 12Ɛ sẅíi wʉ́ʉ ŋɡɔ Ɛlíyɑ kɑ tɔ́ mɔ́ lɑ́, pʉɔ pɔɔ wɛ́ pɛ́m, ńnyɛt wɛ́ nɛ́ ŋɡʉ̈ɔ́Ꞌ pɑ́Ꞌ pɔ́p kɔŋnɛ, pɔ́p ɡʉ ŋ́ɡɛ ḿbɛn ńnyɛt Mɔ́ɔ-Ŋu nɛ́ ŋɡʉ̈ɔ́Ꞌ pɔ pɔ́Ꞌɔ.» 13Yɛ́su cú pɔ́Ꞌɔ, ɡɑŋku pɛ́ ɡɔ́ɔ ŋ́kɛ́ ńzúꞋ ŋɡɔ ɑ lɑ́Ꞌ pɑꞋɑ pɔ Jɑ̂ŋ Mbɑptíshi.

Yɛ́su ɡɛ wɛcɔ́ mɔ́ɔ ẅi ɑ mvuɡwɑ́Ꞌ fíitɛ

(Mɑ́lɛ́kúshi 9.14-29; Lúkɑ́shi 9.37-43)

14Pɔ́p ɡʉ tɛ ŋ́kúu zʉꞋ yí lɑ́Ꞌ kɑ pɔ́nɛ zúꞋu, wɛcɔ́ ŋu tɔ́ ŋ́kẅíꞋlɛ mbi Yɛ́su, 15ńcú mbɔ̌ wɛ́ ŋɡɔ: «Ndɛ, sɛ́sẅíi, tsɑ́ɑ mɛjʉ́ŋ mɔ́ɔ wɑɑ wɔ, ɑ mvuɡwɑ́Ꞌ. A jʉ́ɔ ŋɡʉ̈ɔ́Ꞌ tɛꞋ, ɑ zɑ́ɑ ḿvu tsɛt múk, tɛ mbɑ tsɛt ŋki. 16Mɔ m̄bɔ́ ńdɔk wɛ́ ńtɔ́ mbi ɡɑŋku pú, lɑ́ pɔ́p pɔɔ kuꞋ nɛɡɛ ɑ fíitɛ pɔ́.» 17Yɛ́su zúꞋ pɔ́Ꞌɔ, ŋɡɔ: «Yɛ̌ɛ! Pʉʉ pʉɔ-ŋɡuꞋ yɔ, pʉʉ pɛkɛ́tú. Pʉʉ kɑ́ zɑ́p tʉ́m nǔu Sɛ́ pɔ́, ɛ́ pɑ́Ꞌɑ pɛkŋɛ ńdɑ́Ꞌ ńnɑ́ŋ tɛ ŋ́kúu pɔ shʉ́n? Ŋ ɡʉ ńdɑ́Ꞌ ɛ́sʉk nǔu mɛnu mʉ́ʉ tɛ ŋ́kúu pɔ shʉ́n? Pʉʉ lɔk mɔ́ɔ ɛ̂wɑ́ ńtɔ́ zɑꞋnɛ ŋ́ɡɑ́ mbɔ̌ mɔ.» 18Pɔ́p lɔk wɛ́ ńtɔ́, Yɛ́su cʉ́ɔk zẅikŋɛ kɛpɔŋ ɛ̂yɑ́, ɑ cẅɛt nǔu mɔ́ɔ ɛ̂wɑ́, ɑ ɡɔ́ɔ ɛ́fíitɛ pɔ ŋkɑ́ yîyɑ́.

19Pɔ́p ɡɑŋku pɛ́ ɡɛ ḿbɔ́ zɛnɛ pɔ́p, pɔ́p píkŋɛ wɛ́ ŋɡɔ: «Kʉ̈ɔ́ lɑ́Ꞌnɛ ŋ́ɡɛ ŋɡɔ, pɛk pɔɔ kuꞋ nɛzuŋ zẅikŋɛ kɛpɔŋ ɛ̂yɑ́ pɔ́ ɔɔ?» 20A pʉ̈ɔt mbɔ̌ pɔ́p ŋɡɔ: «Ɛ́ pɔ́Ꞌɔ, mbíꞋŋɡɔ pʉʉ zɑ́p tʉ́m nǔu Sɛ́ pɔ mɔ́zʉꞋ ŋɡɔ pítɛ. Pʉʉ lɑɑ sǐi ńzɑ́p tʉ́m yʉ́ʉ nǔu Sɛ́ ɛ́ kʉ̈ɔ́k pɔ mɔ́zʉꞋ pɑ́Ꞌ nɛsɑɑ-sɛ́súk, mbɔ ɛ́ lɑɑ ḿbɔ́ pʉʉ cú mbɔ̌ nɛŋkɔ́Ꞌ nɔ ŋɡɔ: “Tsɔ́Ꞌnɛ ŋ́ɡʉ ńtʉ́ʉ zíꞋnɛ, ɛ́ ɡʉ ńtʉ́ʉ zúꞋu. Mbɔ ɛ́ lɑɑ ḿbɔ́ yɛcɔ́ nu pɔɔ lɑ́Ꞌ ńtsɑ wʉ́ʉ pɔ́.”» [ 21Ɛ́ ɡʉ nǔu yîyɑ́ ntɛ́ zẅikŋɛ kɛpɔŋ, mbɔ ŋu pɔɔ zuŋ yîyɑ́ ntɛ́ zẅikŋɛ kɛpɔŋ tɛ ɑ cẅɛt kɛ́ júk nji ńcɛꞋlɛ Sɛ́ pɔ́#17.21 Mbɔ ŋu pɔɔ zuŋ yîyɑ́ ntɛ́ zẅikŋɛ kɛpɔŋ tɛ ɑ cẅɛt kɛ́ júk nji ńcɛꞋlɛ Sɛ́ pɔ́ Yɔ ŋkɑŋ-ŋwɑꞋnɛ kɑ́ pɔ́ tsɛt mɛlwɛn ŋwɑꞋnɛ-Ŋɡɛlɛk pɔ́..]

Yɛ́su pɛn ḿbɔ́ ḿbʉ́ ŋɡɔ ɑ ɡʉ ŋ́ɡɛ mpfú ḿbɛn ńzẅíimɛ

(Mɑ́lɛ́kúshi 9.30-32; Lúkɑ́shi 9.43-45)

22Ɛ́ pɔ́ yɛcɔ́ lɛ́Ꞌ, ɡɑŋku-Yɛ́su tɛmtɛ ńcúꞋlɛ Ŋɡɑlilɛɛ, Yɛ́su cú mbɔ̌ pɔ́p ŋɡɔ: «Pɛ́ ɡʉ ɛ́fɛn Mɔ́ɔ-Ŋu mbɔ̌ pʉɔmɛsɔŋ. 23Pɔ́p ɡɛ ɑ pfú, ɛ́ ɡɛ ḿbɔ́ mbɑ́ɑtɛ lɛ́Ꞌ pɛtɑ́t ɑ zẅíimɛ nǔu nɛvú.» Gɑŋku pɛ́ zúꞋ, ńtɛmtɛ ḿmʉk tɛꞋ.

NɛzẅíꞋ ntsu-Yɛ́su nǔu ntsup-zʉꞋ-nɔŋpɔꞋ

24Yɛ́su pɔ́p ɡɑŋku pɛ́ ɡʉ tɛ ŋ́kúu Kɑpɛɛnɑwûm, pɑcẅɛ́ɛ ntsup-zʉꞋ-nɔŋpɔꞋ tɔ́ ḿbíkŋɛ Pyɛ̂ ŋɡɔ: «Tɑ̌ɑ wʉʉ ŋ́ɡɑ́ yɛ́ ntsup-zʉꞋ-nɔŋpɔꞋ pɔ́ kɛ?» 25Pyɛ̂ tsɔ́Ꞌ ŋɡɔ: A ɡɑ́ ɡɑ́nɛ, ńcú pɔ́Ꞌɔ, ŋ́kúu ndɑ́, ḿbɛ́t pɔ kɛ́ ŋɑ́Ꞌ ntsu wɛ́, Yɛ́su cú mbɔ̌ wɛ́ ŋɡɔ: «Símɔ, ɔ kwɑŋɛ yú ŋɡɔ kʉ̈ɔ́. Ɛ́ ndǔ mbí yɔ pɛ́Ꞌɛ, pɛ́ wɔ̌ mɑꞋnɛ ntsup-ntʉ̈ɔꞋ pɔ́p mɛcɔ́ mɛntsup, mbɔ̌ pɛfɔɔ? Pɑlɑ́Ꞌ pɛ́ kɛ pɑlɑ́Ꞌ-ntʉɔꞋ?» 26Pyɛ̂ pʉ̈ɔt ŋɡɔ: «Pʉɔ-lɑ́Ꞌ-ntʉɔꞋ ɡɑ́nɛ. Yɛ́su cú mbɔ̌ wɛ́ ŋɡɔ: Pʉɔ-lɑ́Ꞌ kɑ́ lɔk ŋ́ɡẅɛɛ nɛɡɑ́ yɛcɔ́ yúu pɔ́, ɛ́ pɔ́Ꞌɔ pɔ́ kɛ?» 27Lɑ́ kɔɔ pûu ɡɛ nu pʉ́k pɑcẅɛ́ɛ ntsup. Gʉ ŋki ḿmɑꞋ mbɑꞋ. Ɔ ɡʉ ŋ́ɡẅɛɛ nduŋmbi mbɑŋ shú, ŋíɛꞋ ntsu wɛ́, ńjʉ́ɔ pɑk-ŋkɑ́p, ńcẅɛɛtɛ ńdɔk ŋ́ɡʉ ḿmɑꞋ yúu ntsup.

Currently Selected:

Mɑtʉ̈ɔ 17: JGO

Highlight

Copy