Lúkɑ́shi 7
7
Yɛ́su ɡɛ ŋkwɑɑ-wɛcɔ́ tɑ́tndɑ́-pɑlʉ̈ɔ́Ꞌntsɔ-Pɑlɔ́mɑ fíitɛ
(Mɑtʉ̈ɔ 8.5-13; Jɑ̂ŋ 4.46-54)
1Yɛ́su cú nu mbɔ̌ lɑ́Ꞌ tɛ ḿbɔ́tnɛ ńnɑ́ŋ, ḿbɛn nzʉʉ nɛ́ Kɑpɛɛnɑwûm. 2Wɛcɔ́ tɑ́tndɑ́-pɑlʉ̈ɔ́Ꞌntsɔ-Pɑlɔ́mɑ pɔ́ tʉ́sɔŋ ɛ̂wɑ́, ŋ́ɡẅɛɛ ŋkwɑɑ wɛ, ŋ́kɔŋ wɛ́ tɛꞋ. Ŋkwɑɑ wɛ ɛ̂wɑ́ pɔ́, mbɔ ɑ vu ɡɔɔ, ńtsʉ́Ꞌ ḿpfú pfúnɛ. 3Tɑ́tndɑ́-ntsɔ zúꞋ pɛ́ pɔ́ ŋ́kẅíi lík-Yɛ́su, ɑ ɡúu pɛkɛ́m-Pɑyúdɑ ŋɡɔ pɔ́p ɡʉ ḿbúꞋ mbɔ́ mbɔ̌ wɛ́, ɑ tɔ́ ńcẅɛ́ɛ mɔ́ŋkʉ̈ɔ́ wɛ mbɔ̌ nɛvú. 4Pɔ́p ɡʉ tɛ ŋ́kúu nɛjɔ́ŋ Yɛ́su, ńtsuŋ ḿbúꞋ mbɔ́ mbɔ̌ wɛ́ ńcú ŋɡɔ: «Tɑ́tndɑ́-ntsɔ ẅí ɑ túunɛ wɛk, ɑ kuꞋ ŋu ẅí ɛ́ lɑɑ ḿbɔ́ ɔ cẅɛ́lɛ́ wɛ́. 5A kɔŋ lɑ́Ꞌ yɛkŋɛ kɔŋnɛ tɛ mbɔ ɑ kɑ kút ndɑ́-cúꞋlɛ mbɔ̌ pɛk.» 6Yɛ́su zúꞋ, ńdɔ sɛ́, pɔ́p pɛ pɔ́p ɡʉ, ŋ́ɡʉ tɛ ńtsʉ́Ꞌ nɛkúu njɛ́Ꞌ-tɑ́tndɑ́-ntsɔ ɛ̂wɑ́, ḿbuutɛ pɛcɔ́ pʉɔ pinɛ tɑ́tndɑ́-ntsɔ túunɛ. Pɔ́p cú mbɔ̌ wɛ́ ŋɡɔ: «Tsɑpʉɔ, tɑ́tndɑ́-ntsɔ mbɑɑ ŋ́ɡɔ, kɔɔ pɑ́klɛ mbʉʉ yu ŋɡɔ ɔ ɡɛ ŋ́ɡʉ ndɑ́ yɛ, ŋɡɔ ɑ kɑ́ kuꞋ ŋu ẅí ḿbɔ́ ɔ tɔ́k tɛ ŋ́kúu ndɑ́ yɛ pɔ́.» 7Ɛ́ yúu mi ɛ́ ɡɛnɛ, lɑ kwɑꞋ jʉ́ pɔɔ tsɔ́Ꞌ mɛku mɛ́ ńtɔ́ ńjʉ́ɔ wú pɔ́. Ŋ́ɡɔ sɛ́sẅíi, tʉ́ʉ pɑ́Ꞌ, ńcú nɛ́ ntsu, mɔ́ŋkʉ̈ɔ́ wɛ fíitɛ; 8ŋɡɔ ɑ cú pɑ́Ꞌɑ ḿbɔ́ yɛ́ nzʉʉ ŋu, ńzúꞋ ntsu wɛ, ḿbɛn ŋ́ɡẅɛɛ yɛ́ pɑlʉ̈ɔ́Ꞌntsɔ nzʉʉ yɛ́, pɔ́p pɔ́ ńzúꞋ wɛ́, ŋɡɔ ɑ lɑɑ ńcú mbɔ̌ wɛcɔ́ ŋɡɔ: «Gʉ», ɑ ɡʉ, ŋɡɔ: «Tɔ́», ɑ tɔ́, ḿbɛn ńcú nɛ́ ŋkwɑɑ wɛ́ ŋɡɔ: «Gɛ pɑ́ꞋɑꞋ, ɑ ɡɛ.» 9Yɛ́su zúꞋ yɔ sẅiŋɛ yi ɛ́ cẅɛtnɛ ntsu-tɑ́tndɑ́-ntsɔ, ŋ́ɡʉ̈ɔꞋtɛ wɛ́, ɛ́shɔtnɛ ńcú mbɔ̌ lɑ́Ꞌ yi ɛ́ nzʉʉ yɛ́ ŋɡɔ: «Ɛ sẅíi wʉ́ʉ, mbɑ tsɛt ŋɡɔ́ŋ-Pɑíslɑyɛ̂l, ŋ kɑ́ jʉ́ɔ wɛcɔ́ ŋu ẅí ɑ zɑ́p tʉ́m nǔu mɔ pɑꞋ jʉ́ pɔ́.» 10Pʉɔ pinɛ tɑ́tndɑ́-ntsɔ-Pɑlɔ́mɑ túunɛ wɔ́p ɡɛ ḿbɛn tɛ ŋ́kúu ndɑ́, ńjʉ́ɔ, mbɔ ŋɡɔɔ fíitɛ.
Yɛ́su ɡɛ mɔ́ɔ-mpfúk mɑŋɡɛ́ zẅíimɛ
11Yɔ nu lɛɛ, Yɛ́su cʉ́ɔ sɛ̂ndúŋ, ḿbɔ́ ŋ́ɡʉ nɛ́ tʉ́sɔŋ yi pɛ́ fúŋnɛ ŋɡɔ Nɑyîn, pɔ́p ɡɑŋku pɛ́ ŋ́ɡɛ nɔɔ-lɑ́Ꞌ pɔ́ ńnɛn. 12Pɔ́p ɡʉ tɛ ńtsʉ́Ꞌ nɛkúu tʉ́sɔŋ, ńjʉ́ɔ, mbɔ pɛ́ tíi pfú-wɛcɔ́ mɔ́ɔ mbɛ́ɛnɛ, ńdɔk ŋ́ɡʉ nɛtẅíi. Mbɔ ɑ ḿbɔ́ ndɑꞋ mɔ́ɔ mbɔ̌ mɑ́ wɛ, ɑ pɔ́ mpfúk. Lɑ́Ꞌ pɔ́ nzʉʉ yɛ́ tɛ ńzɑ́ɑ.
13Tsɑpʉɔ Yɛ́su jʉ́ɔ mpfúk ɛ̂wɑ́, mɛjʉ́ŋ mɛ́ kɔ́ wɛ́, ɑ cú mbɔ̌ wɛ́ ŋɡɔ: «Kɔɔ pɛn ŋ́kíi!» 14Ńcú pɔ́Ꞌɔ, ŋ́kẅɛ́Ꞌlɛ, ńtɔ́ ŋ́kúu ŋkɔp-pfú, pʉɔ pinɛ pɔ́p kɑ tíinɛ tʉ́ʉ, Yɛ́su cú ŋɡɔ: «Mɔ́ɔsuu, n cú ŋɡɔ ɔ jʉɔmɛ.» 15A lɛɛ tɛ ńcú, ɑ pʉꞋ mbʉʉ yɛ ńnɑ́ŋ ńnɑ́ŋnɛ, ńzɛ nɛsẅíŋɛ, Yɛ́su ɡẅɛɛ wɛ́ ŋ́ɡɑ́ mbɔ̌ mɑ́ wɛ. 16Lɑ́Ꞌ yi ɛ́ ḿbɔ́nɛ sɛ́ kɑ jʉ́ɔ, pɔ́k ɡẅɛɛ wɔ́p pɛtsʉʉ, pɔ́p ɡúꞋlɛ Sɛ́, ńcú ŋɡɔ: «Mɑ́mɑ́ ŋɡɛ́mndʉ̈ɔ́Ꞌ-Sɛ́ tɔ́ lɑ́Ꞌ pɛkŋɛ, Sɛ́ tɔ́ ńcẅɛ́lɛ́ pʉɔ pɛ́.» 17Pɛ́ kɑ lɔk mɛnu mi Yɛ́su ɡɛnɛ ɛ́sɑt ŋɡɔ́ŋ-Jẅidɛ̂, tɛ mbɑ mɛcɔ́ mɛlɑ́Ꞌ shʉ́ zúꞋu.
Gɑŋntúu-Jɑ̂ŋ Mbɑptíshi
(Mɑtʉ̈ɔ 11.2-11)
18Gɑŋku-Jɑ̂ŋ Mbɑptíshi zúꞋ yɔ́p mɔ mɛnu tsʉʉ, ńtɔ́, ḿbɛ́ɛtɛ ɛ́sẅíi wɛ́. Jɑ̂ŋ fúŋ pʉɔ pɛ́pɑ́ tsɛtsɛt pɔ́p, 19ńtúu wɔ́p ŋɡɔ pɔ́p ɡʉ ḿbíkŋɛ Yɛ́su ŋɡɔ ɑ Nzɑ́Ꞌŋkʉ ẅí pɛ́ kɑ pɔ́ ńzẅíꞋlɛ lɑ́, kɛ pɛ́ ḿbɛn ńzẅíꞋlɛ pɔ wɛcɔ́ ŋu ndɛꞋ ɔ́ɔ? 20Pɔ́p ɡʉ tɛ ŋ́kúu nɛjɔ́ŋ Yɛ́su, ńcú mbɔ̌ wɛ́ ŋɡɔ: «Jɑ̂ŋ Mbɑptíshi túunɛ wɛk ŋɡɔ pɛk tɔ́ ḿbíkŋɛ wú ŋɡɔ ɔ pɑꞋɑ ḿbɔ́ Nzɑ́Ꞌŋkʉ ẅí pɛ́ kɑ pɔ́ ńzẅíꞋlɛ lɑ́, kɛ pɛ́ ḿbɛn ńzẅíꞋlɛ pɔ wɛcɔ́ ŋu ndɛꞋ ɔ́ɔ?»
21Ɛ́ kɑ ɡɔ́ ḿbɔ́, Yɛ́su pɔ́ ńzɔŋ mɛɡɔɔ tɛ ńzɑ́ɑ, ḿbɔ́ ńtɔ́ mɛlɔ́Ꞌ ntɛ́ nɛ́ ntɛ́, ḿbɔ́ ńzuŋ mɛzẅikŋɛ kɛpɔŋ mi ɛ́ mbʉʉ pʉɔ, ḿbɔ́ ŋ́ɡɛ pɛfumík jʉ́ɔ zʉꞋ. 22A tsɔ́Ꞌ mbɔ̌ pɔ́p ŋɡɔ: «Pʉʉ ɡʉ ḿbɛ́ɛtɛ ɛ́sẅíi Jɑ̂ŋ nɛ́ yúu mi pʉʉ jʉ́ɔnɛ, mbɑ yi pʉ́ʉ zúꞋnɛ pɛ́ cú, ɛ́sẅíi wɛ́ ŋɡɔ pɛfumík sɛ ńjʉ́ɔ zʉꞋ sʉ́Ꞌnɛ, pɛpʉ̈ɔ́Ꞌtɛ mɛku pɔ́ ńnɛn sʉ́Ꞌnɛ, ɡɑŋŋkɑꞋ pɔ́ fíitɛ, pɛmbúꞋmɛtúutɛ́ pɔ́ ńzúꞋ zʉꞋ, pɛpfú pɔ́ ńzẅíimɛ, pɛpúŋ pɔ́ ńzúꞋ Ŋkʉʉ sʉ́Ꞌnɛ.» 23Pɔ́ttú ŋu ẅí ɑ kɑ́ kɑ́ɑ nɛzɑ́p tʉ́m nǔu mɔ pɔ́.
24Gɑŋntúu Jɑ̂ŋ Mbɑptíshi ɡʉ, Yɛ́su tsʉ́Ꞌ ńcú nu ntɛ́ Jɑ̂ŋ mbɔ̌ lɑ́Ꞌ yi ɛ́ zúꞋu, ḿbíkŋɛ wɔ́p ŋɡɔ: «Ɛ́ ḿbɔ́ ŋkɑ́ Jɑ̂ŋ pʉʉ ɡʉ kɔ̂ŋtɛt ńjʉ́ɔ kʉ̈ɔ́? KɛkɑꞋ yi fɛfʉ̈ɔt sɛ́ ńnʉꞋnɛ lɑ́? Ŋɡɑ́ŋ. 25Lɑ́ pʉʉ ḿbɔ́ ŋ́ɡʉ pɔ nɛjʉ́ɔ wɔ̌? Ŋu ẅí ɑ mɑꞋnɛ mɛndẅí-ŋkɑ́p lɑ́ɑ? Lɑ́ pɑmɑꞋ yîyɑ́ ntɛ́ mɛndẅí, ḿbɛn ŋ́ɡẅɛɛ yúu-mɛsuu ńnɑ́ŋ pɔ ntɔ́Ꞌ. 26Lɑ́ pʉʉ ḿbɔ́ ŋ́ɡʉ ńjʉ́ɔ pɔ wɔ̌? Ncẅiŋkʉʉ-Sɛ́ kíi? Ɔ́ɔŋ, lɑ́ ŋ kɛ́ ɛ́sẅíi wʉ́ʉ, ɑ ḿbɔ́ jʉ́ lɑ́ ńdɛɛ mbɑ ncẅiŋkʉʉ-Sɛ́! 27Jɑ̂ŋ zɛnɛ ḿbɔ́ ŋu ẅí Sɛ́ kɑ tsʉꞋ nɛcú nu nǔu wɛ́, ńcú pɛ́ ŋwɑꞋnɛ ŋɡɔ: ZuꞋu, ŋ ɡʉ ńtúu mɑ́ntúu wɑɑ, ɑ piitɛ ńtɔ́, ḿbɔ́ ńniitɛ sɛ̂ndúŋ wú lɑ́ ɔ tɔ́.»
28Yɛ́su pɛn ŋ́kẅiꞋ ńcú ŋɡɔ: «Ɛ sẅíi wʉ́ʉ, wɛcɔ́ ŋu ŋkɑɑ zɛɛ ḿbɔ́ ɡú tɛ ńdɛɛ Jɑ̂ŋ Mbɑptíshi pɔ́. Lɑ́ ɑ kɛ lɑɑ ḿbɔ́, mbɔ ŋu ẅí ɑ zɛ ŋkɔ̂ɔnɛ nɛjʉ́ɔ nu nɛfɔɔ-Sɛ́, ɑ lɑɑ ŋ́kɛ́ ńzɛɛ ŋ́kʉ̈ɔ́k kʉ̈ɔ́knɛ pɔ ŋɡɔ ku ɔ́ɔ, mbɔ ɑ pɔ́ttú ńdɛɛ Jɑ̂ŋ lɑɑ.»
29Pʉɔ pɛ́tsʉʉ kɑ zẅíꞋlɛ nu-Jɑ̂ŋ, tɛ mbɑ pɑcẅɛ́ɛntsup-Pɑlɔ́mɑ, cú ŋɡɔ: «Yu mi Sɛ́ ɡɛnɛ, pɛkŋɛ zúꞋ lɑ́, ɛ́ nɛ́nẅín!» Ńcú pɔ́Ꞌɔ, ŋ́ɡɛ Jɑ̂ŋ nuꞋ wɔ́p ŋki. 30Lɑ́ ŋ́ɡʉ nǔu Pɑ́fɑlísɑy, pɔ́p pɑkyɛ́Ꞌtɛ nɛpʉ́ʉ-Sɛ́, mbɔ pɔ́p kɑ mɛꞋ yɔ́p yîyɑ́ nu mɛꞋnɛ, lɑ ɛ́ pɔ́ yi Sɛ́ kɑ niitɛ ntɛ́ wɔ́p, ḿmɛꞋ pɔ́Ꞌɔ, ḿbɔɔ pɛ́m Jɑ̂ŋ nuꞋ wɔ́p ŋki pɔ́.
31Yɛ́su pɛn ńcú ŋɡɔ: «Tɛ mɔ ńdɔk kʉ̈ɔ́ ḿbɛ́ɛ fʉꞋ nǔu pʉɔ pinɛ pɔ́p ndǔ mbí ŋkɔ̂ɔnɛ? Pɔ́p pɛꞋnɛ fí pɛwɔ̌? 32Pɔ́p fí pɔ́ɔ pi pɔ́p nɑ́ŋnɛ ndǔ zɑ́n, ḿbɔ́ ńzɔp tsɛtsɛt pɔ́p ńtɔ́ mɛlɔ́Ꞌ ŋɡɔ: Pɛk kɑ púꞋ nɛlúŋ, pʉʉ pɔɔ nʉŋ. Pɛk kɑ tíi nɛvú, pʉʉ pɔɔ lɑɑ. 33Yɔ kwɑꞋ pɑꞋ pɛ́ kɑ ɡɛnɛ nǔu Jɑ̂ŋ Mbɑptíshi. A kɑ tɔ́, ḿbɔɔ yúu kwɛ́t, ḿbɔɔ mɛluꞋ nɔ́, pʉʉ cú ŋɡɔ zẅikŋɛ kɛpɔŋ sɛ́ ḿbɑ́klɛ wɛ́. 34Mɔ́ɔ-ŋu kɛ́ ńtɔ́ yɛ́ ŋkɔ̂ɔnɛ, ḿbɔ́ ŋ́kwɛ́t yúu, ḿbɛn ḿbɔ́ ńnɔ́ mɛluꞋ, pʉʉ cú ŋɡɔ pɛ́ líŋɛ wɛ́ lɑ́ ńjʉ́ɔ, ŋu wɑ́lɑ́ pɔ́ ŋ́kwɛ́t yúu, ḿbɔ́ nɛ́nɔ́mɛluꞋ, ḿbɔ́ súu pɑcẅɛ́ɛ ntsup-Pɑlɔ́mɑ, mbɑ wɛ pɛcɔ́ pʉɔ kɛpɔŋ. 35Lɑ́ pʉɔ pɛ́tsʉʉ pinɛ pɔ́p pɛ́mnɛ yɔ jí nu lɔk ńnyɛt ŋɡɔ ɑ ɡɛ mɛnu sʉ́Ꞌnɛ Sɛ́.»
Yɛ́su ɡʉ ndɑ́-Simɔ̂ŋ, ɑ pɔ́ ŋu Fɑlísɑy
36Wɛcɔ́ ŋu Fɑlísɑy ɡɛ ɛ́fúŋ Yɛ́su ŋɡɔ ɑ tɔ́ pɔ́pmɛ́ jʉ́ yúu. Yɛ́su tɔ́ tɛ ŋ́kúu ndɑ́, nɑ́ŋ sɛ́ nɛjʉ́ yúu. 37Wɛcɔ́ mɑŋɡɛ́ pɔ́ tʉ́sɔŋ, ḿbɔ́ ŋ́ɡẅɛɛ lík kɛpɔŋ, ńzúꞋ ŋɡɔ Yɛ́su ndɑ́-ŋu Fɑlísɑy, niitɛ lɑmɛ́ndɑɑ tsɛt mɔ́ɔ mɔ́ndɑ́ŋ ẅí ɛ́ pɔ́ pɔ ŋɡɔꞋ ńdɔk ńtɔ́, 38ŋ́kúu ndɑ́, ńtʉ́ʉ nzʉʉ Yɛ́su, nɛjɔ́ŋ mɛku mɛ́, ńzɛ nɛkíi, ŋ́kíi kíinɛ tɛ ŋki-mík mɛ́ cẅɛt ńcʉ̈ɔ́tɛ nǔu mɛku-Yɛ́su. Pɛ́ pɔ́ ńjʉ́ɔ mɑŋɡɛ́ ɛ̂wɑ́ pɔ́ ńdɔk#7.38 Ńdɔk mɛnuk-tú mɛ́ ńtuk mɛku Yɛ́su. Mɑŋɡɛ́ ɛ̂wɑ́ kɑ ɡẅɛɛ mɛnuk-tú sɛsɑ, ḿbi mɛkẅíꞋlɛ mɛ́ sɛ́ lɑ ńdɔk ńtuk mɛku-Yɛ́su., ńtɑ́ɑ ɛ́sɛntɛ, ńdɔk lɑmɛ́ndɑɑ yîyɑ́ ńzɔ́Ꞌ.
39Ŋu-Fɑlísɑy ẅí ɑ lɑ́Ꞌnɛ ɛ́fúŋ Yɛ́su jʉ́ɔ pɔ́Ꞌɔ, ŋ́kwɑŋɛ tʉ́m yɛ́ ŋɡɔ, ŋu wɔ pɛ́Ꞌɛ ḿbɔ́ kwɑꞋ ŋɡɛ́mndʉ̈ɔ́Ꞌ-Sɛ́, mbɔ ɑ jí lii mɑŋɡɛ́ ẅi ɑ zɑ́pnɛ pɔ́ nǔu wɛ́ lɑ́, mbɔ ɑ jí ŋɡɔ ɑ mɑŋɡɛ́ kɛpɔŋ. 40Yɛ́su ɡɔ́ɔ ńcú mbɔ̌ wɛ́ ŋɡɔ: «Simɔ̂ŋ, puu ɡẅɛɛ sẅiŋɛ.» A cú ŋɡɔ: «Cícɑ, mɔ sɛ́ ńzúꞋ.» 41Yɛ́su cú ŋɡɔ, wɛcɔ́ ŋu kɑ lɑ́Ꞌ ḿbɔ́ ŋ́kɑ́ ŋkɑ́p mbɔ̌ pʉɔ pɛ́pɑ́, nduŋmbi ɡẅɛɛ nɛpɑꞋ ŋkʉ yɛtɑɑ, mbɑ́ɑtɛ ɡẅɛɛ yɛ́ nɛpɑꞋ ndɑꞋ mɛɡɛ́m ntɑɑ. 42A kɑ kɑ́, ńjʉ́ɔ pɔ́p pɔɔ kuꞋ nɛtɔŋɛ pɔ́, ɑ cú ŋɡɔ ɑ kɛ́ lɑ́Ꞌ ḿbɛn ŋ́kɑ́ ŋkɑ́p yîyɑ́ pɔ́, ŋ́ɡɔ́ɔ ńnɑ́ mbɔ̌ pɔ́p. Ɔ jʉ́ɔ yú ŋɡɔ wɛ́t ŋu nǔu pɔ́p pɛ́pɑ́ ɡɛ ŋ́kɔŋ ŋɡɑŋ-ŋkɑ́p ɛ̂wɑ́ tɛꞋ? 43Simɔ̂ŋ tsɔ́Ꞌ ŋɡɔ: «Ŋ kwɑŋɛ ŋɡɔ ɑ ɡɛ ḿbɔ́ ŋu ẅi yɛ ŋkɑ́p kɑ zɑ́ɑnɛ.» Yɛ́su cú ŋɡɔ: «Ɔ sẅíi nu.»
44Ḿbɛn ɛ́shɔtnɛ, ńdíŋɛ mɑŋɡɛ́ ɛ̂wɑ́, ḿbɛn ńcú mbɔ̌ Simɔ̂ŋ ŋɡɔ: «Ɔ sɛ́ ńjʉ́ɔ mɑŋɡɛ́ wɔ? Mɔ ńdɑ́Ꞌ mɔ́ ŋ́kúu ndɑ́ zɑ́Ꞌnɛ, ɔ pɔɔ ɡɑ́ wɑ́ɑ ŋki n dɔk suk mɛku pɔ́, lɑ́ mɑŋɡɛ́ wɔ lɔknɛ ŋki mík mɛ́ suk mɛku mɑ́ɑ, ḿbɛn ńdɔk mɛnuk-tú mɛ́ ńtuk. 45Ɔ kɑ́ cɛꞋlɛ wɑ́ɑ, ɛ́sɛntɛ wɑ́ɑ pɔ́. Lɑ́ ɛ́ ɡʉ nǔu wɛ́, mbɔ tɛ ɛ́fú pɑꞋ ɑ lɑ́Ꞌnɛ ŋ́kúu ndɑ́ zɑ́Ꞌnɛ, ɑ sɛntɛ́ mɛku mɑ́ɑ kɛ́ kɑ́ɑ. 46Ɔ lɑ́Ꞌ ḿbɔɔ lɔk mɔ́zʉꞋ mɛɡwɛ́t ńzɔ́Ꞌ tú yɑ́ɑ pɔ́, lɑ́ ɑ lɑ́Ꞌ ńdɔk lɑmɛ́ndɑɑ ńzɔ́Ꞌ mɛku mɑ́ɑ.» 47Ɛ́ lɛɛ pɔ́Ꞌɔ, lɑ́ ɛ sẅíi wú ŋɡɔ, mɑŋɡɛ́ wɔ ńnyɛt yɔ ntɛ́ kɔŋɛ pɑꞋɑ, mbíꞋŋɡɔ pɛ́ ńdikŋɛ mɛnu kɛpɔŋ mɛ́ mi ɛ́ kɑ zɑ́ɑ mɔ́ tɛꞋ, ŋ́ɡɑ́ mbɔ̌ wɛ́. Lɑ́ ŋ́ɡʉ nǔu ŋu ẅi ɑ jʉ́ɔ ŋɡɔ mɛnu kɛpɔŋ mɛ́ mi pɛ́ likŋɛ́nɛ kɛ́ ḿbɔɔ zɛɛ ńzɑ́ɑ tɛꞋ pɔ́, mbɔ yɛ́ ŋkɔŋɛ ɡʉ ḿbɛn ḿbɔ́ pɔ mɔ́zʉꞋ.
48Yɛ́su ɡɔ́ɔ ŋ́kɛ́ ńcú mbɔ̌ mɑŋɡɛ́ ɛ̂wɑ́ ŋɡɔ: «Pɛ́ likŋɛ mɛnu kɛpɔŋ mú ŋ́ɡɑ́ mbɔ̌ wu.» 49Pʉɔ pinɛ pɔ́p pɛ́pɔ́p ḿbɔ́nɛ ndɑ́ ḿbɔ́ ńjʉ́ yúu zúꞋ, ńzɛ nɛpíkŋɛ tsɛtsɛt pɔ́p ŋɡɔ: «Wɔ ŋu pɛn ḿbɔ́ pɔ wɔ̌ tɛ ńdikŋɛ mɛnu kɛpɔŋ-ŋu?» 50Yɛ́su pɛn ńcú mbɔ̌ mɑŋɡɛ́ ɛ̂wɑ́ ŋɡɔ: «Ɔ luk ndɔɔ-mɛnu kɛpɔŋ mú, mbíꞋŋɡɔ ɔ zɑ́p tʉ́m yú nǔu mɔ. Gʉ nɛ́ mbɔ́tnɛ.»
Currently Selected:
Lúkɑ́shi 7: JGO
Highlight
Share
Copy
Want to have your highlights saved across all your devices? Sign up or sign in
CABTAL, 2017
